ఇంటర్ తర్వాత ఉన్నత విద్య కోర్సుల ఎంపిక కోసం పూర్తి వివరాలు తెలుసుకోండి. ఇంటర్మీడిట్ విద్యార్థి కెరీర్‌ను పూర్తి స్థాయిలో నిర్దేశించే తోలి మలుపు. ఎన్నో ఆశలు, ఆశయాలు, సందేహాల నడుమ ఈ కూడలిని దాటే ప్రక్రియ విద్యార్థిని, వారి తల్లిదండ్రులను ఒకింత కంగారుపెడుతుంది.
అభిరుచుల ప్రకారం నిర్ణయం తీసుకోవాలా, అవకాశాలకు అనుగుణంగా వెళ్లాలా, అందరూ నడిచే దారిలో ప్రయాణమా? అరుదైన కోర్సులతో భిన్నమైన మార్గమా? అర్హతలకు తగిన ఉద్యోగం దొరికితే చేరిపోదామా? వంటి మొదలగు ప్రశ్నలు విద్యార్థిని వేధిస్తాయి.
ఇలాంటి ప్రశ్నల నడుమ మీరు ఇబ్బందిపడుతున్నప్పుడు ఈ ఆర్టికల్ మీకు చక్కని మార్గనిర్దేశం చేస్తుంది. ఇంటర్ తర్వాత అందుబాటులో ఉన్న అన్ని రకాల కోర్సుల వివరాలు ఈ ఆర్టికల్ ద్వారా మీకు అందిస్తున్నాం. దీన్ని ఉపయోగించుకుని మీరు కోరుకున్న బంగారు భవిష్యత్తు కోసం తగిన నిర్ణయాన్ని తీసుకోండి.
ఇంటర్ తర్వాత ఇంజనీరింగ్ కోర్సులు
కెరీర్ పరంగా అత్యధిక డిమాండ్ ఉండి, అత్యధిక జీతభత్యాలు అందించే రంగం ఇంజనీరింగ్. మానవాళి అభివృద్ధి కోసం నిర్మాణాలు, సాధనాలు మరియు సాంకేతికతను అభివృద్దిపర్చే ఈ రంగం ఎప్పటికప్పుడు కొత్త అవకాశాలను అందిపుచ్చుకుంటుంది. నాణ్యమైన ఇంజినీర్లకు భవిష్యత్ కెరీర్ పరంగా ఎటువంటి డోకా ఉండదు.
ఈ రంగంలో కెరీర్ పరంగా, కోర్సుల పరంగా విస్తృతమైన అవకాశాలు అందుబాటులో ఉన్నాయి. సివిల్, మెకానికల్, ఎలక్ట్రికల్, ఎలక్ట్రానిక్స్, కంప్యూటర్స్, ఏరోనాటిక్స్, అగ్రికల్చర్/ ఇండస్ట్రియల్ వంటి ఇంజనీరింగ్ గ్రూపులలో చేరడం ద్వారా ఆయా ఇంజినీరింగ్ రంగాలలో ఉండే అవకాశాలను అందిపుచ్చుకోవచ్చు.
ఇంటర్మీడియేట్ యందు గణితం ఒక సబ్జెక్టుగా చదువుకున్న విద్యార్థులకు మాత్రమే ఇంజనీరింగ్ కోర్సులలో చేరేందుకు అవకాశం ఉంటుంది. ఇంటర్ ఉత్తీర్ణత పొందేకా ఇంజనీరింగ్ కోర్సులలో చేరేందుకు ఏదైనా ఒక ఇంజనీరింగ్ ప్రవేశ పరీక్షకు హాజరుకావాల్సి ఉంటుంది.
ప్రవేశపరీక్షలో పొందిన ర్యాంకు ఆధారంగా అందుబాటులో ఉండే ఇంజనీరింగ్ కాలేజీలలో అడ్మిషన్ లభిస్తుంది. నాలుగేళ్ళ ఇంజనీరింగ్ కెరీర్'లో కొత్త విషయాలు నేర్చుకునేందుకు విద్యార్థులకు ఎక్కువ సమయం అందుబాటులో ఉంటుంది. మీ భవిష్యత్ ఉత్తమంగా ఉండాలంటే ఈ నాలుగేళ్ళ సమయాన్ని అన్ని విధాలుగా సద్వినియోగ పరచుకోవాలి.
బీటెక్ పూర్తికాగానే అనేక ఉన్నతమైన ఉద్యోగాల్లో స్థిరపడేందుకు అవకాశం ఉంటుంది. అప్పుడే ఉద్యోగం ఎందుకు అనుకునే వారికి ఎంటెక్, ఎంబీఏ, ఎంసీఏ వంటి ఉన్నత విద్య కోర్సులలో చేరొచ్చు. ఎంటెక్, ఎంఎస్ కోసం విదేశాలకు వెళ్లొచ్చు. అలానే రాష్ట్ర లేదా కేంద్ర ప్రభుత్వాలు నిర్వహించే ఉద్యోగ నియామక పరీక్షల ద్వారా ప్రభుత్వ ఉద్యోగాల్లో స్థిరపడే అందుకు ప్రయత్నించవచ్చు.
మీ లక్యం ఉద్యోగం కాకుంటే నూతన ఆలోచనలతో వ్యవస్థాపకులుగా మారి కొత్త వ్యాపార సంస్థలను ప్రారంభించవచ్చు. ఇలా వైపు చూసినా ఇంజనీరింగ్ విద్యార్థులకు కెరీర్ కనిపిస్తుంది. అంకితభావంతో ఇష్టపడి ఇంజనీరింగ్ పూర్తిచేసిన ఏ విద్యార్థి కేరీరులో విఫలమయ్యే అవకాశం లేదు..ఉండదు.
ఇంటర్ తర్వాత మెడిసిన్ కోర్సులు
వృత్తి జీవితంలో వైద్యులుగా లేదా దాని అనుబంధ వృత్తులలో స్థిరపడే ఆలోచన ఉన్నవారు మెడికల్ కోర్సులను ఎంపిక చేసుకోవాలి. ఇంటర్మీడియట్ యందు బోటనీ, జూవాలాజీ (బైపీసీ) ఒక గ్రూపుగా చదువుకున్న విద్యార్థులు మాత్రమే మెడికల్ కోర్సులలో చేరేందుకు అర్హులు.
ఇంజనీరింగ్ కోర్సులకు ఉండే పోటీ, కెరీర్ అవకాశాలు మెడికల్ విద్యార్థులకు ఉండకపోయినా, సమాజంలో గౌరపరమైన హోదాను, వృత్తి జీవితాన్ని పొందే అవకాశం వీరికి ఉంటుంది. వైద్య రంగంలో ఏటా వచ్చే కొత్త పోకడలు వైద్య విద్యార్థులకు కొత్త కెరీర్ అవకాశాలను అందుబాటులోకి తీసుకొస్తున్నాయి.
మెడిసిన్ చేసిన తరువాత ప్రభుత్వ, ప్రైవేట్ హాస్పిటల్స్ యందు జూనియర్ డాక్టర్లుగా చేరేందుకు అవకాశం ఉంటుంది. లేదా ఉన్నత విద్యలో రాణించాలంటే ఎం.డి., ఎం.ఎస్., డి.ఎం., పీజీ ఇన్ ఫోరెన్సిక్ మెడిసిన్, ఏరోస్పేస్ మెడిసిన్, ఏవియేషన్ మెడిసిన్, సైకియాట్రి, డెర్మటాలజీ, పీడియాట్రిక్స్ తదితర కోర్సులు అందుబాటులో ఉన్నాయి. ఉన్నత విద్య పూర్తిచేసాకా సొంతంగా ప్రాక్టీస్ ప్రారంభించవచ్చు లేదా హాస్పిటల్స్ యందు వైద్య వృత్తిని ప్రారంభించవచ్చు.
బైపీసీ విద్యార్థులకు మెడికల్ కోర్సులు అంటే ఎంబీబీఎస్ మాత్రమే కాదు, బ్యాచిలర్ ఆఫ్ డెంటల్ సర్జరీ (BDS), బ్యాచిలర్ ఆఫ్ హోమియోపతిక్ మెడిసిన్ అండ్ సర్జరీ (BHMS), డిప్లొమా ఇన్ నర్సింగ్, బ్యాచిలర్ ఆఫ్ ఫిజియోథెరపీ (BPT), బి.వి.ఎస్‌సి (వెటర్నరీ) వంటి కోర్సులలో చేరొచ్చు.
అలానే బ్యాచిలర్ ఆఫ్ అగ్రికల్చర్, బి.ఎస్‌సి (ఫిషరీస్), బి.ఎస్‌సి (ఫారెస్ట్రీ), బయోటెక్నాలజీ, బయోకెమిస్ట్రీ, మైక్రోబయాలజీ, ఫార్మసీ, జెనెటిక్స్, ఆక్వాకల్చర్, ఆస్ట్రానమీ, బయోఇన్ఫర్మాటిక్స్, బయోస్టాటిస్టిక్స్, ఎన్విరాన్‌మెంటల్ సైన్స్, ఫుడ్‌టెక్నాలజీ అండ్ ప్రాసెసింగ్, ఫారెస్ట్ రేంజర్, జియాలజీ, హార్టికల్చర్, హోంసైన్స్, మాలిక్యులార్ బయాలజీ, ఓషనోగ్రఫీ, ప్లాంట్‌పాథాలజీ వంటి తదితర రంగాల్లో అపారమైన అవకాశాలున్నాయి.
