సౌరవ్యవస్థ గురించి తెలుసుకునే ముందు విశ్వం (యూనివర్స్) అంటే ఏంటో తెలుసుకోవాలి. విశ్వం అంటే అనంతమైన స్పేస్ అని అర్ధం. ఇందులోనే సూర్యుడు, గ్రహాలు, నక్షత్రాలు, మన గెలాక్సీ మరియు దాదాపు రెండు ట్రిలియన్ల ఇతర గెలాక్సీలు అమరి ఉన్నాయి. బిగ్ బ్యాంగ్ థియరీ ప్రకారం ఒక బలమైన విస్ఫోటనం జరగడం ద్వారా విశ్వం ఆరంభమైంది.
ఈ విస్ఫోటనం వలనే సమయం, గ్రహాలు, నక్షత్రాలు, పాలపుంతలు ఏర్పడ్డాయి. వీటితో పాటుగా విశ్వంలో వివిధ రూపాల్లో ఉండే పదార్థం, శక్తి కూడా ఉద్బవించింది. విశ్వం గురించి అధ్యయనం చేసే శాస్త్రాన్ని కాస్మొలోజి అంటారు.
ప్రాచీన గ్రీక్ మరియు భారతీయుల తత్వవేత్తల మరింత లోతైన ఆలోచన నుండి భూమి ప్రధాన కేంద్రంగా కొన్ని ఖగోళ పరిశీలనలు జరిగాయి. కొన్ని శతాబ్దాల తర్వాత కోపర్నికస్ సూర్యుడు ఆధారిత సూర్యకేంద్ర మోడల్ అభివృద్ధి పరిచాడు. ఈ రెండు సిద్ధాంతాలను ఆధారంగా చేసుకుని న్యూటన్ విశ్వ గురుత్వాకర్షణ సిద్ధాంతాన్ని సృష్టించాడు. దీన్ని ఆధారంగా చేసుకుని గ్రహాల చలనం, సౌరవ్యవస్థ, గెలాక్సీ మరియు విస్వంతరాల గురించి పూర్తిస్థాయి పరిశోదనలు జరిగాయి.
విశ్వం అనేది అపరిమిత గెలాక్సీల సమ్మేళనం. ప్రతి గెలాక్సీలో ఉండే కొన్ని బిలియన్ల నక్షత్రాలలో సూర్యుడు ఒకటి. సూర్యుడు గురుత్వాకర్షణ పరిధిలో 8 గ్రహాలు నిర్దిష్ట కక్ష్యలలో పరిభ్రమిస్తాయి. సూర్యుడు, దాని చుట్టూ తిరిగే గ్రహాలను కలిపి ఒక సౌరకుటుంబం అంటారు.
ఇలాంటి అనేక సౌరకుటుంబాలు కలిసి ఒక గెలాక్సీ ఏర్పడుతుంది. గెలాక్సీలన్నీ కలిసి విశ్వాన్ని సృష్టిస్తాయి. విశ్వం పరిధి 93 బిలియన్ కాంతి సంవత్సరాలు అని అంచనా. ఒక కాంతి సంవత్సరం అనగా ఒక ఏడాదిలో కాంతి ప్రయాణం చేయగలిగిన దూరం అని అర్ధం.
