తెలుగులో కరెంట్ అఫైర్స్ 15 మే 2023 ఉచితంగా పొందండి. యూపీఎస్‌సీ, ఎస్ఎస్‌సీ, ఏపీపీఎస్‌సీ, టీఎస్‌పీఎస్‌సీ, రైల్వే, బ్యాంకింగ్, డిఫెన్స్, ఎస్ఐ, పోలీస్ కానిస్టేబుల్ వంటి వివిధ నియామక పరీక్షలకు సిద్దమౌతున్న ఔత్సాహికుల కోసం ప్రత్యేకంగా పోటీ పరీక్షల దృక్కోణంలో అందిస్తున్నాం.
కర్ణాటక ముఖ్యమంత్రిగా సిద్ధరామయ్య ప్రమాణ స్వీకారం
కర్ణాటక నూతన ముఖ్యమంత్రిగా కాంగ్రెస్ సీనియర్ నేత సిద్ధరామయ్య మే 20న ప్రమాణస్వీకారం చేసారు. మరో సీనియర్ నాయకుడైన కర్ణాటక కాంగ్రెస్ అధ్యక్షుడు డీకే శివకుమార్‌ డిప్యూటీ సీఎంగా ప్రబాధ్యతలుస్వీకరించారు. సిద్ధరామయ్య కర్ణాటక ముఖ్యమంత్రిగా బాధ్యతలు చేపట్టడం ఇది రెండవసారి. గతంలో 2013 నుండి 2018 వరకు పూర్తి ఐదేళ్ల కాలానికి ఆయన సీఎంగా ఉన్నారు.
ఇటీవలే జరిగిన కర్ణాటక అసెంబ్లీ ఎన్నికలలో కాంగ్రెస్ పార్టీ పూర్తిస్థాయి మెజారిటీ సాధించడంతో కాంగ్రెస్ పార్టీ నూతన ప్రభుత్వాన్ని ఏర్పాటు చేసింది. మే 10వ తేదీన 224 అసెంబ్లీ స్థానాలకు ఎన్నికలు జరగగా, మే 13న ఎన్నికల ఫలితాలు వెలువడ్డాయి. ఇందులో కాంగ్రెస్ 135 స్థానాలను, భారతీయ జనతా పార్టీ 66 స్థానాలను దక్కించుకున్నాయి. దీనితో దక్షిణ భారత దేశంలో బీజేపీ అధికారంలో ఉన్న ఏకైక రాష్ట్రం కూడా చేజారిపోయింది.
ప్యూమా ఇండియా మేనేజింగ్ డైరెక్టర్‌గా కె బాలగోపాలన్‌
ప్రముఖ స్పోర్ట్స్‌వేర్ మరియు యాక్సెసరీస్ బ్రాండ్ అయినా ప్యూమా ఇండియా యొక్క నూతన మేనేజింగ్ డైరెక్టర్‌గా కార్తీక్ బాలగోపాలన్‌ నియమితులయ్యారు. గత 17 ఏళ్లుగా ప్యూమా ఇండియా యొక్క మేనేజింగ్ డైరెక్టర్‌గా ఉన్న అభిషేక్ గంగూలీ స్థానంలో వచ్చే ఆగష్టు నుండి కార్తీక్ బాలగోపాలన్‌ బాధ్యతలు స్వీకరించనున్నారు.
6 ఏళ్లలోపు పిల్లల కోసం పోషన్ భీ, పధాయి భీ ప్రోగ్రాం ప్రారంభం
ఆరు ఏళ్లలోపు పిల్లలకు నాణ్యమైన పోషకాహారంతో పాటు, ప్రాధమిక నైపుణ్య విద్యను అందించేందుకు "పోషణ్ భీ, పధాయి భీ” అనే నూతన కార్యక్రమాన్ని కేంద్రప్రభుత్వం అందుబాటులోకి తీసుకొచ్చింది. 10 మే 2023 న ఎర్లీ చైల్డ్‌హుడ్ కేర్ అండ్ ఎడ్యుకేషన్ బలోపేతం చేయడంపై ఢిల్లీలో జరిగిన ఒక సమావేశంలో, కేంద్ర మహిళా మరియు శిశు అభివృద్ధి మంత్రి స్మృతి ఇరానీ ఈ కార్యక్రమాన్ని ప్రారంభించారు.
సక్షం అంగన్‌వాడీ మరియు పోషణ్ 2.0 ప్రోగ్రామ్ కింద ఈ ప్రారంభ బాల్య సంరక్షణ మరియు విద్యా కార్యక్రమాన్ని అమలు చేయనున్నారు. దేశ వ్యాప్తంగా ఉన్న 1.3 మిలియన్లకు పైగా అంగన్‌వాడీ కార్యకర్తలకు ప్రత్యేక టీచింగ్ శిక్షణను అందించి, ప్లే స్కూల్ ఆధారిత విద్యా విధానాన్ని పిల్లలకు అందించనున్నారు.
ప్రొఫెసర్ జయంత్ విష్ణు నార్లికర్‌కు గోవింద్ స్వరూప్ అవార్డు
ప్రముఖ ఖగోళ శాస్త్రవేత్త, ప్రొఫెసర్ జయంత్ విష్ణు నార్లికర్ భారతదేశపు తొలి ఆస్ట్రోనామికల్ సొసైటీ ఆఫ్ ఇండియా యొక్క గోవింద్ స్వరూప్ లైఫ్‌టైమ్ అచీవ్‌మెంట్ అవార్డును అందుకున్నారు. ఈ ఏడాది ప్రారంభంలో ఐఐటీ ఇండోర్‌లో జరిగిన ఏఎస్ఐ యొక్క 41వ సమావేశంలో ఈ అవార్డును ప్రకటించినప్పటికీ, ప్రొఫెసర్ నార్లికర్ ఆరోగ్య కారణాలతో ఈ అవార్డును అందుకోలేపోయాయరు. ప్రస్తుత ఏఎస్ఐ అధ్యక్షుడు, ప్రొఫెసర్ దీపాంకర్ బెనర్జీ, వ్యక్తిగతంగా ఈ అవార్డును అందజేసి సత్కరించారు.
ప్రొఫెసర్ జయంత్ విష్ణు నార్లికర్, భారతీయ ఖగోళ భౌతిక శాస్త్రవేత్తగా, ఇంటర్-యూనివర్సిటీ సెంటర్ ఫర్ ఆస్ట్రానమీ అండ్ ఆస్ట్రోఫిజిక్స్ (IUCAA) వ్యవస్థాపకుడిగా ప్రసిద్ధి. ఈయన సర్ ఫ్రెడ్ హోయల్‌తో కలిసి హోయల్-నార్లికర్ సిద్ధాంతంగా పిలువబడే కన్ఫార్మల్ గ్రావిటీ సిద్ధాంతాన్ని అభివృద్ధి చేశాడు. ఈయన గతంలో ఆస్ట్రోనామికల్ సొసైటీ ఆఫ్ ఇండియా యొక్క అధ్యక్షుడుగా కూడా పనిచేశారు.
నార్లికర్ భారత ప్రభుత్వం నుండి పద్మ విభూషణ్ , పద్మ భూషణ్ అవార్డులతో పాటుగా కేంబ్రిడ్జ్ విశ్వవిద్యాలయం నుండి స్మిత్ అవార్డు మరియు ఆడమ్స్ ప్రైజ్ కూడా అందుకున్నారు. వీటితో పాటుగా ప్రఖ్యాత సైన్స్ అవార్డు అయినా కళింగ బహుమతి, ప్రిక్స్ జూల్స్ జాన్సెన్ మరియు మహారాష్ట్ర భూషణ్ వంటి అవార్డులు కూడా అయన ఖాతాలో ఉన్నాయి.
కంబోడియాను సందర్శించిన ఐఎన్ఎస్ ఢిల్లీ & సాత్పురా
ఆసియాన్ దేశాలకు భారత నౌకాదళ విస్తరణలో భాగంగా, భారతీయ నౌకాదళానికి చెందిన ఐఎన్ఎస్ ఢిల్లీ & ఐఎన్ఎస్ సాత్పురాలు కంబోడియాలోని సిహనౌక్‌విల్లే పోర్టును సందర్శించాయి. మే 11 నుండి 14 జరిగిన ఈ పోర్ట్ కాల్ రియర్ అడ్మిరల్ గుర్చరణ్ సింగ్ ఆధ్వర్యంలో నిర్వహించారు. ఈ సంధర్బంగా రెండు నౌకాదళాల సిబ్బంది వివిధ ప్రొఫెషనల్ ఇంటరాక్షన్‌లు, డెక్ విజిట్‌లు మరియు స్పోర్ట్స్ ఎక్స్ఛేంజీలలో పాల్గొన్నారు. ఈ సందర్శన ఇరుదేశాల నౌకాదళాల మధ్య సహకారాన్ని, స్నేహాన్ని పెంపొందించనుంది.
ఆసియాన్ (ASEAN) అనేది పది ఆగ్నేయాసియా దేశాలకు చెందిన అంతర్ ప్రభుత్వ సంస్థ. ఇందులో బ్రూనై, కంబోడియా, ఇండోనేషియా, లావోస్, మలేషియా, మయన్మార్, ఫిలిప్పీన్స్, సింగపూర్, థాయిలాండ్ మరియు వియాత్నం సభ్యదేశాలుగా ఉన్నాయి. దీనిని 1967 బ్యాంకాక్ డిక్లరేషన్ ద్వారా స్థాపించారు. దీని ప్రధాన కార్యాలయం జకార్తాలో ఉంది.
సోషలిస్ట్ పండిట్ రామ్‌కిషన్‌కి "మ్యాన్ ఆఫ్ ది సెంచరీ" బిరుదు
ప్రముఖ సోషలిస్ట్ నాయకుడు పండిట్ రామ్‌కిషన్‌కు "శతాబ్ది పురుష్" బిరుదును ప్రదానం చేశారు. సోషలిస్టు నాయకుడిగా ఆయన చేసిన సేవలకు గుర్తింపుగా ఈ గౌరవాన్ని కల్పించారు. భారతీయ సోషలిస్టు సిద్ధాంతకర్త మరియు ప్రముఖ పార్లమెంటేరియన్ మధు లిమాయే జయంతి వేడుకలను పురస్కరించుకుని న్యూఢిల్లీలో జరిగిన కార్యక్రమంలో దీనిని ప్రధానం చేశారు.
97 ఏళ్ళ రామ్‌కిషన్ దేశంలోని అత్యంత సీనియర్-మోస్ట్ సోషలిస్ట్ నాయకుడుగా ఉన్నారు. ఈయన ప్రముఖ సోషలిస్టు నాయకులు జయప్రకాష్ నారాయణ్ మరియు లోహియా ప్రారంభించిన అనేక ఉద్యమాలలో చురుకుగా పాల్గొన్నారు. ఎమర్జెన్సీ సమయంలో సహా అనేక సార్లు కటకటాల వెనక్కి వెళ్ళారు. రామ్‌కిషన్ 1977లో ఒకసారి లోక్‌సభకు, మరో నాలుగుసార్లు రాజస్థాన్ అసెంబ్లీకి ఎన్నికయ్యారు.
ఈ కార్యక్రమంలో జమ్మూ కాశ్మీర్ మాజీ గవర్నర్ సత్యపాల్ మాలిక్ , సీపీఐ(ఎం) ప్రధాన కార్యదర్శి సీతారాం ఏచూరి, ఐఎన్‌ఎల్‌డీ నేత అభయ్ సింగ్ చౌతాలా, జేడీయూ నేత కేసీ త్యాగి సహా సీనియర్ రాజకీయ నాయకులు పాల్గొన్నారు.
మేడ్ ఇన్ ఇండియా : 75 ఇయర్స్ ఆఫ్ బిజినెస్ అండ్ ఎంటర్‌ప్రైజ్ బుక్ విడుదల
నీతి ఆయోగ్ మాజీ సీఈఓ అమితాబ్ కాంత్ రచించిన 'మేడ్ ఇన్ ఇండియా : 75 ఇయర్స్ ఆఫ్ బిజినెస్ అండ్ ఎంటర్‌ప్రైజ్' బుక్ మార్కెట్లోకి విడుదల అయ్యింది. ఈ పుస్తకం భారత సంవృత మరియు సాంప్రదాయిక ఆర్థిక వ్యవస్థ నుండి అభివృద్ధి చెందుతున్న ఆవిష్కరణ మరియు సాంకేతిక ప్రతిభ మరియు నైపుణ్యం యొక్క 75 సంవత్సరాల భారతదేశ ప్రయాణాన్ని వివరిస్తుంది.
అమితాబ్ కాంత్ మేడ్ ఇన్ ఇండియా పుస్తకం సునీల్ భారతి మిట్టల్ మరియు రాహుల్ భాటియా వంటి వ్యాపారవేత్తల స్ఫూర్తిదాయకమైన కథలతో జీవం పోసుకుంది. ఈ పుస్తకం దేశం యొక్క వ్యాపార వారసత్వం మరియు సంస్కృతిపై బహుముఖ పరిశోధన నివేదికను అందిస్తుంది. ఈ పుస్తకం రూపా & కో ద్వారా ప్రచురితం అయ్యింది.
ట్రిపుల్ జంప్ జాతీయ రికార్డును బద్దలు కొట్టిన ప్రవీణ్ చిత్రవేల్
క్యూబాలోని హవానాలో జరిగిన అథ్లెటిక్స్ మీట్‌ యొక్క పురుషుల ట్రిపుల్ జంప్ ఈవెంట్‌లో భారత అథ్లెట్ ప్రవీణ్ చిత్రవేల్ 17.37 మీటర్ల రికార్డు మార్క్‌తో బంగారు పతాకాన్ని కైవసం చేసుకున్నాడు. దీనితో పాటుగా 2016లో బెంగళూరులో జరిగిన మూడో ఇండియన్ గ్రాండ్ ప్రిక్స్‌లో రెంజిత్ మహేశ్వరి నమోదు చేసిన 17.30 మీటర్ల పురుషుల ట్రిపుల్ జంప్ జాతీయ రికార్డును అధిగమించాడు.
భారత వైమానిక దళంలో మొదటి బ్యాచ్ స్వదేశీ వీటీఓఎల్ లాటరింగ్ ఆయుధాలు
భారత వైమానిక దళంలో మొదటి బ్యాచ్ స్వదేశీ వర్టికల్ టేకాఫ్ మరియు ల్యాండింగ్ (వీటీఓఎల్) లాటరింగ్ ఆయుధాలు చేరాయి. ఈ కొత్త ఆయుధాలు అన్ని రకాల భూభాగాలు మరియు ఎత్తైన ప్రాంతాల నుండి పనిచేయగల సామర్థ్యాన్ని కలిగి ఉన్నాయి. ఇవి సిబ్బందిని ఎటువంటి ప్రమాదానికి గురిచేయకుండా 50 కి.మీ కంటే ఎక్కువ పరిధిలో లక్ష్యాలను ఛేదించగలవు.
వీటిని టాటా అడ్వాన్స్‌డ్ సిస్టమ్స్ లిమిటెడ్ (టీఏఎస్‌ఎల్) అభివృద్ధి చేసింది. ఇవి పూర్తి స్వయంప్రతిపత్తి, సెమీ అటానమస్, లొయిటర్, ఎటాక్ మరియు రిటర్న్ హోమ్. సిస్టమ్ వర్టికల్ టేక్ ఆఫ్ మరియు ల్యాండింగ్ సామర్థ్యాన్ని కలిగి ఉంటాయి. అంటే ఇది టేకాఫ్ మరియు క్వాడ్‌కాప్టర్ లాగా ల్యాండ్ అవుతుంది. ఇది తూర్పు లడఖ్ మరియు అరుణాచల్‌లోని ఇరుకైన లోయల వంటి ఇరుకైన ప్రాంతాల నుండి సిస్టమ్‌ను ఆపరేట్ చేయడానికి ఉపయోగపడనున్నాయి.
వెయిట్ లిఫ్టింగ్ 55 కేజీల విభాగంలో బింద్యారాణి దేవికి రజతం
దక్షిణ కొరియాలోని జింజులో జరిగిన ఆసియా వెయిట్‌లిఫ్టింగ్ ఛాంపియన్‌షిప్‌లో మహిళల 55 కేజీల విభాగంలో భారత క్రీడాకారిణి బింద్యారాణి దేవి రజత పతకాన్ని కైవసం చేసుకుంది. ఈపోటీలో సోరోఖైబామ్ బింద్యారాణి దేవి ఏకంగా 194 కిలోలబరువును ఎత్తి రెండవ స్థానంలో నిలవగా, చైనాకు చెందిన చెన్ గువాన్ లింగ్ ఏకంగా 204 కిలోల బరువును ఎత్తి స్వర్ణ పతకాన్ని కైవసం చేసుకుంది.
ఇదిలా ఉంటే 67 కేజీల విభాగంలో కామన్‌వెల్త్‌ గేమ్స్‌ ఛాంపియన్ జెరెమీ లాల్‌రిన్నుంగా కూడా రజత పథకం సొంతం చేసుకున్నారు. ఆసియా వెయిట్‌లిఫ్టింగ్ ఛాంపియన్‌షిప్స్ 2023. 2024లో పారిస్ నగరంలో ఒలింపిక్ క్రీడలకు సంబంధించిన క్వాలిఫైయింగ్ ఈవెంట్‌ల సిరీస్‌లో రెండవది.
36 ఏళ్ల సర్వీసు తర్వాత ఐఎన్ఎస్ మగర్‌కు డికమిషన్
భారత నావికాదళానికి చెందిన అత్యంత పురాతనమైన ల్యాండింగ్ షిప్ ఐఎన్ఎస్ మగర్ 36 ఏళ్లపాటు దేశానికి ప్రతిష్టాత్మకమైన సేవలందించిన తర్వాత సర్వీస్ నుండి తొలగించబడింది. కొచ్చిలోని సదరన్ నేవల్ కమాండ్‌లో దీనికి సంబందించిన ఉపసంహరణ కార్యక్రమం మే 6న నిర్వహించబడింది.
ఈ నౌకను 1984లో కోల్‌కతాలోని గార్డెన్ రీచ్ షిప్‌బిల్డర్స్ & ఇంజనీర్స్ లిమిటెడ్ దేశీయంగా నిర్మించింది. ఈ ఓడ 5,600 టన్నుల బరువుతో, 125 మీటర్ల పొడవు, 17 మీటర్ల వెడల్పును కలిగి ఉభయచర అసాల్ట్ షిప్ ఆఫ్ ఇండియన్ నేవీగా కీలక సేవలు అందించింది. డిసెంబర్ 2004 సునామీ సమయంలో ప్రభావిత ప్రాంతాల నుండి 1,300 మంది పౌరులను తరలించడంలో ఇది కీలక పాత్ర పోషించింది. దీనికి మొసలి జాతికి 'మగర్' అని పేరు పెట్టారు.
గత ఏడాది జూన్ 3న ఐఎన్ఎస్ నిశాంక్ మరియు ఐఎన్ఎస్ అక్షయ్ నౌకలు 32 సంవత్సరాల సర్వీస్ పూర్తి చేసుకున్నక ముంబయిలోని నేవల్ డాక్‌యార్డ్‌లో డీకమిషన్ చేయబడ్డాయి. ఇదే ఏడాది 19 సెప్టెంబర్ 2022న ఐఎన్ఎస్ అజయ్ కూడా 32 సంవత్సరాల సర్వీస్ పూర్తి చేసుకుని ముంబయిలోని నేవల్ డాక్‌యార్డ్‌లో డీకమిషన్ చేయబడింది.
చండీగఢ్‌లో ఇండియన్ ఎయిర్ ఫోర్స్ హెరిటేజ్ సెంటర్
రక్షణ రాజ్‌నాథ్ సింగ్ మే 08, 2023 న చండీగఢ్‌లో ఇండియన్ ఎయిర్ ఫోర్స్ (IAF) యొక్క హెరిటేజ్ సెంటర్‌ను ప్రారంభించారు. దీనిలో భారత వైమానిక దళానికి చెందిన చారిత్రాత్మక, వారసత్వ ప్రతిరూపలను, కళాఖండాలను, కుడ్యచిత్రాలను, 3డి డయోరామాల సేకరణను ఇందులో పొందుపర్చుతారు. ఈ హెరిటేజ్ సెంటర్ వైమానిక దళం యొక్క వారసత్వ & సాంకేతిక పురోగతుల ప్రదర్శన వేదికగా ఉండనుంది.
వారాసిగూడలో ప్రధానమంత్రి జన్ ఔషధి కేంద్రం ప్రారంభం
కేంద్ర పర్యాటక శాఖ మంత్రి జి కిషన్ రెడ్డి, మే 7న సికింద్రాబాద్‌లోని వారాసిగూడలో ప్రధానమంత్రి జన్ ఔషధి కేంద్రాన్ని ప్రారంభించారు. నాణ్యమైన జనరిక్ ఔషధాలను అందరికీ అందుబాటు ధరల్లో అందించే లక్ష్యంతో 2008లో జన్ ఔషధి పథకాన్ని కేంద్రప్రభుత్వం ప్రారంభించింది.
దీనిని సెప్టెంబర్ 2015 లో 'ప్రధాన్ మంత్రి జన్ ఔషధి యోజన' (PMJAY)గా పునరుద్ధరించారు. ఈ పథకం పరిధిలో దేశ వ్యాప్తంగా 9400 లకు పైగా జన్ ఔషధి కేంద్రాలను కేంద్ర ప్రభుత్వం అందుబాటులోకి తీసుకొచ్చింది. ఈ కేంద్రాలలో న్యూట్రాస్యూటికల్స్, ఆయుష్ ఉత్పత్తులు మరియు సువిధ సహా 1600 కంటే ఎక్కువ మందులు మరియు 250 శస్త్రచికిత్స పరికరాలు అందుబాటులో ఉంటాయి.
యూజీ & పీజీ విద్యార్థుల కోసం కొత్త ఆన్‌లైన్ శిక్షణ కార్యక్రమాన్ని ప్రారంభించిన ఇస్రో
ఇండియన్ స్పేస్ రీసెర్చ్ ఆర్గనైజేషన్ కొత్తగా స్పేస్ సైన్స్ అండ్ టెక్నాలజీ అవేర్‌నెస్ ట్రైనింగ్ (START) పేరుతొ ఆన్‌లైన్ శిక్షణ కార్యక్రమాన్ని ప్రారంభించింది. ఈ కార్యక్రమం చివరి ఏడాది చదువుతున్న పోస్టుగ్రాడ్యుయేట్ మారియు అండర్ గ్రాడ్యుయేట్ ఫిజిక్స్ & ఇంజనీరింగ్ విద్యార్థుల కోసం అందుబాటులోకి తీసుకొచ్చింది.
ఈ కార్యక్రమం ఖగోళ శాస్త్రం & ఖగోళ భౌతిక శాస్త్రం, హీలియోఫిజిక్స్ & సన్-ఎర్త్ ఇంటరాక్షన్, ఇన్‌స్ట్రుమెంటేషన్ మరియు ఏరోనమీతో సహా అంతరిక్ష శాస్త్రంలోని వివిధ డొమైన్‌లను కవర్ చేస్తుంది. ఆసక్తి ఉండే విద్యార్థులు దీని కోసం దరఖాస్తు చేసుకోవచ్చు. యువ విద్యార్థులకు స్పేస్ టెక్నాలజీ, స్పేస్ సైన్స్ మరియు స్పేస్ అప్లికేషన్‌లపై ప్రాథమిక జ్ఞానాన్ని అందించడమే దీని ప్రధాన లక్ష్యం.
యూనివర్సిటీ ఆఫ్ కాశ్మీర్‌లో యూత్20 కన్సల్టేషన్ ఈవెంట్
భారత జీ20 అధ్యక్షతన, యూనివర్సిటీ ఆఫ్ కాశ్మీర్‌లో మే 10, 11 తేదీల మధ్య యూత్20 కన్సల్టేషన్ ఈవెంట్ నిర్వహించబడింది. వాతావరణ మార్పులపై జరిగిన ఈ యూత్20 కార్యక్రమంలో ఆతిథ్య భారతదేశంతో సహా 10 దేశాల నుండి ప్రతినిధులు హాజరయ్యారు. ఈ జాబితాలో అమెరికా, బ్రెజిల్, టర్కీ, జపాన్, దక్షిణ కొరియా, నైజీరియా మరియు మెక్సికో వంటి ఉన్నాయి.
ఈ సమావేశంలో వాతావరణ మార్పు మరియు విపత్తు ప్రమాదాల తగ్గింపు అనే అంశంపై నాలుగు ప్యానెల్ చర్చలు జరిగాయి. మొదటి ప్లీనరీ సెషన్ 'జీవవైవిధ్యం మరియు మానవ సంక్షేమంపై వాతావరణ మార్పుల ప్రభావం' అనే అంశంపై జరగగా, దీనిని జమ్మూ & కాశ్మీర్ ఇస్లామిక్ యూనివర్శిటీ ఆఫ్ సైన్స్ అండ్ టెక్నాలజీ వైస్ ఛాన్సలర్ ప్రొఫెసర్ షకిల్ ఎ. రోమ్‌షూ మోడరేట్ చేశారు.
రెండవ ప్లీనరీ సెషన్, 'సురక్షిత రేపటి కోసం డిజాస్టర్ రిస్క్ రిడక్షన్' అనే అంశంపై జరగగా, దీనికి ప్రొఫెసర్ ఎం. సుల్తాన్ భట్ నాయకత్వం వహించారు. మూడవ ప్లీనరీ సెషన్ 'గ్రీన్ ఎనర్జీ- ఇన్నోవేషన్స్ అండ్ ఆపర్చునిటీస్' అనే అంశంపై జరగగా, చివరి నాల్గవ ప్లీనరీ 'నీటి వనరులు: సవాళ్లు మరియు అవకాశాలు' అనే అంశంపై జరిగింది. ఆధునిక యువతని వాతావరణ, పర్యావరణ మార్పులకు సంబందించిన అంశాల యందు భాగస్వామ్యం చేయడమే దీని ప్రధాన లక్ష్యం.
భారతదేశంలో మకోటో షింకై ఫిల్మ్ ఫెస్టివల్
భారతదేశంలో ప్రముఖ జాపనీస్ దర్శకుడు మకోటో షింకై ఫిల్మ్ ఫెస్టివల్ నిర్వహించేందుకు పీవీఆర్ సినిమాస్ సిద్దమయ్యింది. జపనీస్ దిగ్గజ యానిమే దర్శకుడు మకోటో షింకై, తన కొత్త సినిమా 'సుజుమ్' ప్రమోట్ చేయడానికి ఇటీవల భారత్ విచ్చేసారు. ఈ సందర్బంగా పీవీఆర్ సినిమాస్ ఆయనతో ఈ ఒప్పందం చేసుకుంది.
ఇందులో భాగంగా ప్రస్తుతం విడుదల అవుతున్న సుజుమ్‌తో పాటు షింకై యొక్క నాలుగు మునుపటి హిట్‌ చిత్రాలు మే 19 నుండి భారతదేశం అంతటా పీవీఆర్ సినిమాస్ మరియు ఐనాక్స్ సినిమాల్లో ప్రదర్శించబడ్డాయి. భారతీయ యానిమే అభిమానులకు ఇది గొప్ప వార్తగా చెప్పొచ్చు.
మకోటో షింకై జాపనీస్ యానిమషన్ చిత్రాల దర్శుకుడుగా ప్రసిద్ధి. ఈయన 2002లో "వాయిసెస్ ఆఫ్ ఎ డిస్టాంట్ స్టార్" చిత్రంతో దర్శకుడిగా పరిచయం అయ్యారు. తర్వాత దశలో వెదరింగ్ విత్ యు, యూవర్ నేమ్, 5 సెంటీమీటర్స్ పర్ సెకండ్ వంటి గొప్ప చిత్రాలను నిర్మించారు.
పాకిస్థాన్ మాజీ ప్రధాని ఇమ్రాన్ ఖాన్ అరెస్టు
అత్యంత ప్రజాదరణ కలిగిన పాకిస్తాన్ మాజీ ప్రధాని ఇమ్రాన్ ఖాన్, మే 9న అవినీతి ఆరోపణల కేసులో అరెస్ట్ చేయబడ్డారు. ఇమ్రాన్ ఖాన్‌ను ఇస్లామాబాద్‌లోని హైకోర్టు లోపల ఆ దేశ నేషనల్ అకౌంటబిలిటీ బ్యూరో అదుపులోకి తీసుకుంది. ఇమ్రాన్ భార్య బుష్రా బీబీ ఖాన్ నిర్వహించే అల్-ఖాదిర్ ట్రస్ట్‌కు సంబంధించి అవినీతి ఆరోపణల కేసు నేపథ్యంలో ఈ అరెస్టు చోటు చేసుకుంది. ఆమె నిర్వహిస్తున్న ఈ ట్రస్టు లావాదేవీల ముసుగులో ఇమ్రాన్ విదేశాల నుండి భారీ ఎత్తును విరాళాలు, బహుమతులు పొందినట్లు అభియోగాలు మోపబడ్డాయి.
పాకిస్తాన్ మాజీ క్రికెటర్ అయినా ఇమ్రాన్, ఆ దేశ 22వ ప్రధాన మంత్రిగా 2018లో ప్రమాణ స్వీకారం చేశారు. తర్వాత కాలంలో ఆ దేశ సైన్య అధ్యక్షుడు జనరల్ కమర్ జావేద్ బజ్వాతో పొరపొచ్చాలు రావడంతో, అనేక రాజకీయ దోబూచులు తర్వాత గత ఏడాది ఏప్రిల్ నెలలో ఇమ్రాన్ ప్రభుత్వం, ఆ దేశ పార్లమెంట్ యందు మెజారిటీ కోల్పోయింది. దీనితో ఇమ్రాన్ ప్రధానిగా రాజీనామా చేయాల్సి వచ్చింది.
ఈ పరిణామాల తర్వాత సైనిక సహాయంతో ఆ దేశ ప్రధానిగా బాధ్యతలు స్వీకరించిన షెహబాజ్ షరీఫ్ నేతృత్వంలోని ప్రభుత్వం ఇమ్రాన్ ఖాన్‌ను అదుపులో పెట్టేందుకు అవకాశం ఉన్న అన్ని అంశాలపైనా కేసులు బనాయించింది. ప్రస్తుతం 150కి పైగా చట్టపరమైన కేసులు మోపబడ్డాయి. అందులో దేశ ద్రోహం కేసు కూడా ఉంది.
బార్బరా కింగ్‌సోల్వర్, హెర్నాన్ డియాజ్‌లకు ఫిక్షన్ పులిట్జర్ ప్రైజ్
2023 ఏడాదికి సంబంధించి ఫిక్షన్ పులిట్జర్ బహుమతిని బార్బరా కింగ్‌సోల్వర్ యొక్క "డేవిడ్ కాపర్‌ఫీల్డ్" మరియు హెర్నాన్ డియాజ్ యొక్క "ట్రస్ట్" నవలకు సంయుక్తంగా ఇవ్వబడింది. ఈ రెండు రచనలు ఈ ఏడాది గొప్ప ప్రజాదరణను పొందాయి.
డేవిడ్ కాపర్‌ఫీల్డ్ నవలను ది వాషింగ్టన్ పోస్ట్ 2022 యొక్క టాప్ రిలీజ్‌గా పేర్కొంది. ఈ రచన దక్షిణ అప్పలాచియాలోని ఒక ఒంటరి యువకుడి కష్టాలు మరియు పట్టుదలకు చెందిన కథ. హెర్నాన్ డియాజ్ యొక్క "ట్రస్ట్" నవల, 1920లలో న్యూయార్క్‌లో చోటుచేసుకున్న సంపద మరియు మోసానికి సంబంధించిన వినూత్న కథనం.
పులిట్జర్ ప్రైజ్ అనేది వార్తాపత్రిక, మ్యాగజైన్, ఆన్‌లైన్ జర్నలిజం, సాహిత్యం మరియు యునైటెడ్ స్టేట్స్‌లోని మ్యూజిక్ కళాకారుల విజయాలకు కొలంబియా విశ్వవిద్యాలయంచే అందించబడే అవార్డు. ఈ అవార్డు జోసెఫ్ పులిట్జర్ యొక్క వీలునామాలోని నిబంధనల ద్వారా ఇది 1917లో స్థాపించబడింది. 23 కేటగిరీల వారీగా అందించే ఈ అవార్డు విజేతలకు $15,000 నగదు పురస్కారం మరియు సర్టిఫికేట్‌ను అందిస్తారు. జర్నలిజం & పబ్లిక్ సర్వీస్ విభాగంలో విజేతలకు బంగారు పతకం ఇవ్వబడుతుంది.
