తెలుగులో కరెంట్ అఫైర్స్ మే 08, 2023 | పోటీ పరీక్షల స్పెషల్

తెలుగులో కరెంట్ అఫైర్స్ 08 మే 2023 ఉచితంగా పొందండి. యూపీఎస్‌సీ, ఎస్ఎస్‌సీ, ఏపీపీఎస్‌సీ, టీఎస్‌పీఎస్‌సీ, రైల్వే, బ్యాంకింగ్, డిఫెన్స్, ఎస్ఐ, పోలీస్ కానిస్టేబుల్ వంటి వివిధ నియామక పరీక్షలకు సిద్దమౌతున్న ఔత్సాహికుల కోసం ప్రత్యేకంగా పోటీ పరీక్షల దృక్కోణంలో అందిస్తున్నాం.

వైభవంగా కింగ్ చార్లెస్ III పట్టాభిషేకం

యునైటెడ్ కింగ్‌డమ్ మరియు ఇతర కామన్వెల్త్ రాజ్యాలకు రాజు మరియు రాణిగా చార్లెస్ III మరియు అతని భార్య కెమిల్లా పట్టాభిషేకం 6 మే 2023 న వెస్ట్‌మిన్‌స్టర్ అబ్బేలో ఘనంగా జరిగింది. గత ఏడాది 8 సెప్టెంబర్ 2022న చార్లెస్ తన తల్లి ఎలిజబెత్ II మరణంతో ఆయన బ్రిటన్ సింహాసనాన్ని అధిష్టించారు. 21వ శతాబ్దంలో పట్టాభిషేకం చేసిన మొదటి బ్రిటిష్ చక్రవర్తి మరియు రాణీగా చార్లెస్ మరియు కెమిల్లా నిలిచారు.

బ్రిటన్ ప్రభుత్వం అధికారికంగా నిర్వహించిన ఈ కార్యక్రమానికి 203 దేశాల నుండి దాదాపు 2,200 మంది అతిథులు ఆహ్వానించబడ్డారు. వీరిలో బ్రిటీష్ రాజకుటుంబ సభ్యులు, చర్చ్ ఆఫ్ ఇంగ్లాండ్ మరియు ఇతర బ్రిటిష్ విశ్వాస సంఘాల ప్రతినిధులు, యునైటెడ్ కింగ్‌డమ్ మరియు కామన్వెల్త్ నుండి ప్రముఖ రాజకీయ నాయకులు మరియు విదేశీ దేశాధినేతలు ఉన్నారు. భారతదేశం నుండి ఉపరాష్ట్రపతి జగదీప్ ధంఖర్, ఆయన జీవిత భాగస్వామి సుదేష్ ధంఖర్ హాజరయ్యారు.

ఇకపోతే ప్రస్తుతం ప్రపంచ వ్యాప్తంగా 43 దేశాలలో రాచరికం అమలులో ఉంది. ఇందులో 15 కామన్వెల్త్ రాజ్యాలకు బ్రిటన్ చక్రవర్తినే రాజుగా వ్యవహరిస్తున్నారు. ఈ జాబితాలో ఆంటిగ్వా, బార్బుడా, ఆస్ట్రేలియా, బహామాస్, బెలిజ్, కెనడా, గ్రెనడా, జమైకా, న్యూజిలాండ్, పాపువా న్యూ గినియా, సెయింట్ కిట్స్ అండ్ నెవిస్, సెయింట్ లూసియా, సెయింట్ విన్సెంట్ మరియు గ్రెనడైన్స్, సోలమన్ దీవులు, తువాలు మరియు యునైటెడ్ కింగ్‌డమ్ ఉన్నాయి.

ప్రపంచ వ్యాప్తంగా రాచరికం వ్యవస్థ మూడు రకాలుగా అమలు అవుతుంది. ఆయా దేశాల సంస్కృతీ, భాషను బట్టి రాచరికంలోని దేశాధినేతలను రాజు, రాణీ, అమీర్, సుల్తాన్ వంటి హోదాల్లో వ్యవహరిస్తారు. ఇందులో రాజ్యాంగ పరమైన రాచరికం, పూర్తి రాచరికం, మిశ్రమ రాచరికం ఉన్నాయి.  రాజ్యాంగ పరమైన రాచరికంలో రాజు ఆ దేశ రాజ్యాంగ పరిరక్షులుగా వ్యవహరిస్తారు. వీరికి రాజకీయ సంబంధిత జోక్యం ఉండదు. యూకేలో కనిపించే రాచరికం ఈ రకానికి చెందుతుంది. ఇదే రాచరికం జపాన్, డెన్మార్క్ దేశాల్లో కూడా కనిపిస్తుంది.

పూర్తి రాచరిక దేశాలలో రాజు పూర్తి స్థాయి దేశ అధినేతగా ఉంటారు. రాజ్యాంగ, రాజకీయ పాలనకు పూర్తి బాధ్యత వహిస్తారు. ఈ రకం రాచరికానికి సౌదీ అరేబియా, వాటికన్ సిటీ, యస్వటీని వంటి దేశాలు ఉదాహరణగా చెప్పొచ్చు. ఇక మిశ్రమ రాచరికంలో కొన్ని ముఖ్యమైన అంశాలకు మాత్రమే రాజు బాధ్యత వహిస్తారు. మిగతా అంశాలలో ప్రజా ప్రభుత్వాలు స్వేచ్ఛగా విధులు నిర్వర్తిస్తాయి. ఉదాహరణకు జోర్డాన్, మొరాకో వంటి దేశాలలో ఈ రకం రాచరికం కనిపిస్తుంది.

అటామిక్ ఎనర్జీ కమిషన్ నూతన చైర్మన్‌గా ఎకె మొహంతి

ప్రఖ్యాత భౌతిక శాస్త్రవేత్త అజిత్ కుమార్ మొహంతి, అటామిక్ ఎనర్జీ కమిషన్ యొక్క కొత్త చైర్మన్‌గా మరియు డిపార్ట్‌మెంట్ ఆఫ్ అటామిక్ ఎనర్జీ యొక్క నూతన సెక్రటరీగా నియమితులయ్యారు. అజిత్ కుమార్ ప్రస్తుతం భాభా అటామిక్ రీసెర్చ్ సెంటర్ ( బార్క్) డైరెక్టరుగా బాధ్యతలు నిర్వర్తిస్తున్నారు. 1959లో ఒడిశాలో జన్మించిన మొహంతీ 1979లో బరిపడలోని ఎంపీసీ కళాశాల నుండి భౌతికశాస్త్రంలో ఆనర్స్‌ పొందారు. కటక్‌లోని రావన్‌షా కళాశాల నుండి పోస్ట్ గ్రాడ్యుయేషన్‌ను పూర్తి చేశారు.

అటామిక్ ఎనర్జీ కమిషన్ ఆఫ్ ఇండియా అనేది డిపార్ట్‌మెంట్ ఆఫ్ అటామిక్ ఎనర్జీ పరిధిలోని ఒక శాస్త్రీయ అణు పరిశోధన విభాగం. ఇది 03 ఆగష్టు 1948 లో ఏర్పాటు చేయబడింది. ఇది డిపార్ట్‌మెంట్ ఆఫ్ అటామిక్ ఎనర్జీ మరియు ప్రధానమంత్రి ప్రత్యేక్ష కనుసన్నలలో పనిచేస్తుంది. దీని ప్రధాన కార్యాలయం ముంబైలో ఉంది. అటామిక్ ఎనర్జీ కమిషన్ దేశంలో అణు పరిశోధనలను నిర్వహించడం, అణు శాస్త్రవేత్తలకు శిక్షణ ఇవ్వడం మరియు భారతదేశంలోని అణు ప్రయోగశాలలలో అణు పరిశోధనలను ప్రోత్సహించడం వంటి కీలక సేవలు అందిస్తుంది. దీనికి భారతదేశంలో ఐదు పరిశోధనా కేంద్రాలు ఉన్నాయి.

1. భాభా అటామిక్ రీసెర్చ్ సెంటర్ (BARC) - ముంబై
2. ఇందిరా గాంధీ సెంటర్ ఫర్ అటామిక్ రీసెర్చ్ (IGCAR), - కల్పక్కం (తమిళనాడు)
3. రాజా రామన్న సెంటర్ ఫర్ అడ్వాన్స్‌డ్ టెక్నాలజీ (RRCAT) - ఇండోర్
4. వేరియబుల్ ఎనర్జీ సైక్లోట్రాన్ సెంటర్ (VECC) - కోల్‌కతా
5. అటామిక్ మినరల్స్ డైరెక్టరేట్ ఫర్ ఎక్స్‌ప్లోరేషన్ అండ్ రీసెర్చ్ (AMD) - హైదరాబాద్.

లక్షద్వీప్‌లో సైన్స్ 20 ఎంగేజ్‌మెంట్ గ్రూప్ మీటింగ్

భారతదేశం యొక్క జీ 20 ప్రెసిడెన్సీలో సైన్స్ 20 ఎంగేజ్‌మెంట్ గ్రూప్ సమావేశంను, లక్షద్వీప్‌లోని బంగారం ద్విపంలో మే 1మరియు 2వ తేదీల్లో నిర్వహించారు. యూనివర్సల్ హోలిస్టిక్ హెల్త్‌ అనే అంశంపై నిర్వహించ ఈ సమావేశంలో మానవ శారీరక, మానసిక ఆరోగ్యంపై ప్రత్యేక్షంగా, పరోక్షంగా ప్రభావం చూపే వ్యవసాయ పద్ధతులు, పౌష్టికాహారం, ఆరోగ్యకరమైన ఆహారపు అలవాట్లు మరియు పర్యావరణ స్పృహ విభాగాలపై చర్చలు నిర్వహించారు.

సార్వత్రిక సంపూర్ణ ఆరోగ్యాన్ని ప్రోత్సహించడానికి, దేశీయ సాంస్కృతిక వైవిధ్యాన్ని గుర్తించడం, సాంప్రదాయ వైద్య పద్ధతులను ఆధునిక ఆరోగ్య సంరక్షణ వ్యవస్థల్లోకి చేర్చడం, మానసిక ఆరోగ్యాన్ని పెంపొందించడానికి, అందరికీ నాణ్యమైన మానసిక ఆరోగ్య సేవలు అందుబాటులో ఉండేలా ఒక బలమైన మానసిక ఆరోగ్య విధానాన్ని రూపొందించడం వంటి అంశాలు కూడా చర్చకు వచ్చాయి. ఈ సమావేశానికి ఇండియన్ నేషనల్ సైన్స్ అకాడమీ ప్రెసిడెంట్ ప్రొఫెసర్ అశుతోష్ కుమార్ శర్మ సహాధ్యక్షత వహించారు.

మైక్రో & స్మాల్ ఎంటర్‌ప్రైజెస్‌ యొక్క క్రెడిట్ గ్యారెంటీ స్కీమ్ పునరుద్ధరణ

మైక్రో & స్మాల్ ఎంటర్‌ప్రైజెస్‌కు అదనంగా 2 లక్షల కోట్ల క్రెడిట్ గ్యారెంటీని అందించడానికి దాని పూర్వపు క్రెడిట్ గ్యారెంటీ ఫండ్ ట్రస్ట్ ఫర్ మైక్రో & స్మాల్ ఎంటర్‌ప్రైజెస్ (CGTMSE) పథకాన్ని తాజాగా కేంద్ర ప్రభుత్వం పునరుద్ధరించింది. ఈ పునరుద్దించిన పథకాన్ని కేంద్రమంత్రి నారాయణ్ రాణే, ఏప్రిల్ 27న ముంబైలో ప్రారంభించారు. ఇది సూక్ష్మ మరియు చిన్న పరిశ్రమలకు అదనంగా 2 లక్షల కోట్ల రుణాలు మరియు అడ్వాన్సులకు హామీనిస్తుంది.

మైక్రో అండ్ స్మాల్ ఎంటర్‌ప్రైజెస్ (MSE) విభాగానికి మెరుగైన రుణాలను అందించడానికి ఈ పథకాన్ని పునరుద్ధరించారు. దీని అమలు కోసం 2023-24 కేంద్ర బడ్జెట్‌లో 9,000 కోట్ల అదనపు కార్పస్ సపోర్టును అందుబాటులో ఉంచింది. ఈ నూతన పధకంలో 1 కోటి వరకు రుణాలకు గ్యారెంటీ రుసుములను 50% తగ్గించింది. అలానే కనీస హామీ రుసుమును సంవత్సరానికి 0.37% స్థాయికి తీసుకొచ్చింది. అదే సమయంలో గ్యారెంటీ సీలింగ్‌ను 2 కోట్ల నుండి 5 కోట్లకు పెంచడం ద్వారా చట్టపరమైన చర్య తీసుకోకుండానే క్లెయిమ్ సెటిల్మెంట్ కోసం థ్రెషోల్డ్ పరిమితిని ₹10 లక్షలకు పెంచినట్లు చేసింది.

ఈ సంధర్బంగా ఈ క్రెడిట్ హామీ పథకాన్ని ఉత్తమంగా వినియోగించుకున్న బ్యాంకులను కేంద్ర మంత్రి సత్కరించారు. తాజా పునరుద్ధరణ పథకం దేశంలోని ఎంఎస్‌ఇలకు కొలేటరల్ ఫ్రీ లెండింగ్‌ను సులభతరం చేయడంలో పాటుగా పెద్ద ఎత్తున ఉపాధిని సృష్టించడంలో దోహదపడుతుందని విశ్వాసం వ్యక్తం చేశారు.

ఈ పథకం అధికారికంగా ఆగస్ట్ 30, 2000 న ప్రారంభించబడింది. సూక్ష్మ మరియు చిన్న సంస్థలకు అనుషంగిక రహిత క్రెడిట్‌ను అందుబాటులో ఉంచడానికి భారత ప్రభుత్వం ప్రారంభించబడింది. దీని కోసం ప్రత్యేకంగా క్రెడిట్ గ్యారెంటీ ఫండ్ ట్రస్ట్‌ను కూడా ఏర్పాటు చేసింది. రెండేళ్ల కోవిడ్ సంక్షోభం వలన దేశంలోని ఎంఎస్‌ఇలు ఘోరంగా దెబ్బతిన్నాయి. ఇప్పటికే ఉన్న రుణాలను తిరిగి చెల్లించలేని పరిస్థితి ఏర్పడింది. కోవిడ్-19 సమయంలో ప్రభుత్వం ఎమర్జెన్సీ క్రెడిట్ లైన్ గ్యారెంటీ స్కీమ్ (ECLGS) వంటి చర్యలను చేపట్టినా, మెజారిటీ నిపుణులు CGTMSE పథకాన్ని పునరుద్ధరించాలని కోరుకున్నారు.

హైదరాబాద్‌లో ఫుడ్ కాన్‌క్లేవ్ 2023

తెలంగాణ ప్రభుత్వం, ఏప్రిల్ 28 మరియు 29 తేదీల్లో హైదరాబాద్‌లో నిర్వహించిన ఫుడ్ కాన్‌క్లేవ్ 2023ను విజయవంతంగా ముగించింది. దీనిని వ్యవసాయ ఆహార రంగానికి సంబంధించిన వార్షిక మేధోమథనం కార్యక్రమంగా ఏటా నిర్వహించేందుకు నిర్ణయించింది. ఈ మొదటి ఎడిషన్ ద్వారా తెలంగాణలోని వ్యవసాయ ఆహార పరిశ్రమలో 58,458 మందికి ప్రత్యక్ష ఉపాధి కల్పించేలా 7217.95 కోట్ల విలువైన పెట్టుబడులు వచ్చినట్లు ప్రభుత్వం ప్రకటించింది.

ఈ సదస్సును ఐటీ, పరిశ్రమల శాఖ మంత్రి కేటీ రామారావు ప్రారంభించారు. వ్యవసాయంలో సరికొత్త పోకడలు, ఆవిష్కరణలపై చర్చించేందుకు ప్రపంచవ్యాప్తంగా ఉన్న పరిశ్రమల ప్రముఖులు, నిపుణులు హాజరయ్యారు. ఈ సందర్బంగా కేటీఆర్ మాట్లాడుతూ ఫుడ్ ప్రాసెసింగ్‌ రంగాన్ని కోర్ థ్రస్ట్ ఏరియాగా రాష్ట్రం గుర్తించిందని వెల్లడించారు.

పబ్లిక్ ప్రైవేట్ పార్టనర్‌షిప్‌ల క్రింద అద్భుతాలు ఎలా సృష్టించవచ్చో, మైక్రో ఎంటర్‌ప్రెన్యూర్‌లను ఎలా ప్రోత్సహించవచ్చో తెలంగాణ ప్రభుత్వంను చూసి దేశంలోని మిగిలిన వారు నేర్చుకోవచ్చు అని అన్నారు. తెలంగాణ ఉత్పత్తి పరంగా విప్లవాలకు నాంది పలకడమే కాదు, పరిశ్రమల ప్రయోజనాల కోసం టాలెంట్ పూల్‌ను ఉత్పత్తి చేసే పర్యావరణ వ్యవస్థను కూడా సృష్టిస్తోందని పేర్కొన్నారు. తాజాగా ఆక్వా, డెయిరీ, ఆగ్రో ప్రాసెసింగ్ మరియు అనుబంధ రంగాలలో వచ్చిన పెట్టుబడులు ఆయా రంగాల్లో నూతన ఉత్తేజం రానుందని అన్నారు.

ఇ-రూపాయి (e₹)ని ఆమోదించిన మొదటి బీమా కంపెనీగా రిలయన్స్

రిలయన్స్ జనరల్ ఇన్సూరెన్స్, రిజర్వ్ బ్యాంక్ ఆఫ్ ఇండియా యొక్క సెంట్రల్ బ్యాంక్ డిజిటల్ కరెన్సీ (CBDC) ఇ-రూపాయి (e₹)ని ఆమోదించిన మొదటి బీమా కంపెనీగా అవతరించింది. దీని కోసం ఈ సంస్థ ఎస్ బ్యాంకుతో ఒప్పందం కుదుర్చుకుంది. దీనితో రిలయన్స్ జనరల్ ఇన్సూరెన్స్ యొక్క ఖాతాదారులు తమ ప్రీమియం చెప్పింపు కోసం ఇ-రూపాయిని ఉపయోగించుకోవచ్చు.

సెంట్రల్ బ్యాంక్ డిజిటల్ కరెన్సీ (CBDC) అనేది దేశం యొక్క సాధారణ భౌతిక కరెన్సీ యొక్క డిజిటల్ రూపం. దీనిని ఇ-రూపాయి (e₹) అంటారు. దీనిని రిజర్వ్ బ్యాంక్ ఆఫ్ ఇండియా  నియంత్రిస్తుంది. ప్రస్తుతం ఇది ఆర్‌బిఐ క్లోజ్డ్ యూజర్ గ్రూప్ మరియు ఎంచుకున్న బ్యాంకులలో హోల్‌సేల్ మరియు రిటైల్ లావాదేవీల్లో మాత్రమే ఉపయోగించబడుతుంది.

ఇ-రూపాయిని 2022-23 బడ్జెట్‌లో ప్రారంభించనున్నట్లు భారత ప్రభుత్వం ప్రకటించింది. 7 అక్టోబర్ 2022 న సెంట్రల్ బ్యాంక్ డిజిటల్ కరెన్సీ (CBDC)పై కాన్సెప్ట్ నోట్‌ను విడుదల చేసింది. 01 డిసెంబర్ 2022న డిజిటల్ రూపాయి-రిటైల్ సెగ్మెంట్ (e₹-R) యొక్క మొదటి పైలట్‌ ప్రాజెక్టు ప్రారంభించింది.

రాజస్థాన్‌లో మూడు కొత్త యానిమల్ కన్జర్వేషన్ పార్కులు

రాజస్థాన్ రాష్ట్ర ప్రభుత్వం కొత్తగా మూడు యానిమల్ కన్జర్వేషన్ పార్కులను నోటిఫై చేసింది. ఈ జాబితాలో బరన్‌లోని సోర్సన్, జోధ్‌పూర్‌లోని ఖిచాన్ మరియు భిల్వారాలోని హమీర్‌ఘర్ ప్రాంతాలు ఉన్నాయి. రాజస్థాన్‌ అటవీ శాఖ ఈ జాబితాను ఏప్రిల్ 22న, ఎర్త్ డే సందర్భంగా ప్రకటించింది. దీనితో ఈ రాష్ట్రంలో యానిమల్ కన్జర్వేషన్ పార్కుల సంఖ్య 26కి చేరుకుంది.

రక్షణ మంత్రి రాజ్‌నాథ్ సింగ్ మూడు రోజుల మాల్దీవుల పర్యటన

రక్షణ మంత్రి రాజ్‌నాథ్ సింగ్, మే 1 నుండి 3 మధ్య అధికారిక మాల్దీవుల పర్యటనకు వెళ్లారు. ఈ మూడు రోజుల పర్యటనలో మాల్దీవుల కౌంటర్ మరియా అహ్మద్ దీదీ మరియు ఆ దేశ విదేశాంగ మంత్రి అబ్దుల్లా షాహిద్‌తో ద్వైపాక్షిక చర్చలు జరిపారు. మాల్దీవుల అధ్యక్షుడు ఇబ్రహీం మొహమ్మద్ సోలిహ్‌ను కూడా మంత్రి కలుసుకున్నారు.

ఇరు దేశాల మధ్య సైనిక సంబంధాలు పెంపొందిచడంలో భాగంగా మాల్దీవుల జాతీయ రక్షణ దళాలకు ఒక ఫాస్ట్ పెట్రోల్ వెసెల్ షిప్ మరియు ల్యాండింగ్ క్రాఫ్ట్‌ను బహుమతిగా ప్రకటించారు. ఈ సందర్బంగా సముద్ర భద్రత, తీవ్రవాదం, రాడికలైజేషన్, పైరసీ, అక్రమ రవాణా, వ్యవస్థీకృత నేరాలు మరియు ప్రకృతి వైపరీత్యాలతో సహా భాగస్వామ్య సవాళ్లను సమర్థవంతంగా పరిష్కరించడానికి ఇరు దేశాలు సన్నిహితంగా పని చేయనున్నాయి.

సదరన్ ఎయిర్ కమాండ్‌కి కొత్త చీఫ్‌గా బాలకృష్ణన్ మణికంఠన్

సదరన్ ఎయిర్ కమాండ్ యొక్క నూతన ఎయిర్ ఆఫీసర్ కమాండింగ్-ఇన్-చీఫ్ (ఏఓసీ)గా ఎయిర్ మార్షల్ బాలకృష్ణన్ మణికంఠన్ మే 1న బాధ్యతలు స్వీకరించారు. సైనిక్ స్కూల్ కజకూటం మరియు నేషనల్ డిఫెన్స్ అకాడమీ పూర్వ విద్యార్థి అయినా బాలకృష్ణన్, 7 జూన్ 1986న భారత వైమానిక దళంలోకి ప్రవేశించినట్లు మంత్రిత్వ శాఖ ప్రకటనలో పేర్కొంది.

బాలకృష్ణన్ ఫిక్స్‌డ్ వింగ్ ఎయిర్‌క్రాఫ్ట్‌లలో 5400 గంటలకు పైగా ప్రయాణ అనుభవాన్ని కలిగిఉన్నాడు. ఎయిర్ మార్షల్ నేషనల్ డిఫెన్స్ అకాడమీలో మరియు టాక్టిక్స్ అండ్ ఎయిర్ కంబాట్ డెవలప్‌మెంట్ ఎస్టాబ్లిష్‌మెంట్ (TACDE)లో బోధనా సిబ్బందిగా పనిచేశారు. ఈయన అతి విశిష్ట సేవా పతకంతో పాటుగా వాయు సేన పతకం యొక్క రాష్ట్రపతి అవార్డు కూడా అందుకున్నారు.

ఆర్ఐటీఈఎస్‌తో హౌసింగ్ అండ్ అర్బన్ అవగాహన ఒప్పందం

గృహనిర్మాణ మరియు పట్టణ వ్యవహారాల మంత్రిత్వ శాఖ, సాలిడ్ వేస్ట్ అంశానికి సంబంధించి సాంకేతిక సహాయం కోసం రైల్ ఇండియా టెక్నికల్ అండ్ ఎకనామిక్ సర్వీస్ లిమిటెడ్‌తో అవగాహన ఒప్పందంపై సంతకం చేసింది. గృహనిర్మాణ & పట్టణ వ్యవహారాల మంత్రిత్వ శాఖ కొత్తగా లక్ష కంటే తక్కువ జనాభా ఉన్న పట్టణాల కోసం యూజ్డ్ వాటర్ మేనేజ్‌మెంట్ పాలసీని అందుబాటులోకి తీసుకొచ్చింది.

పట్టణ పారిశుధ్యంలో ఒక నమూనా మార్పుగా సాలిడ్ వేస్ట్ మరియు వాడిన నీటి నిర్వహణను వేగవంతం చేయడంపై ఈ పాలసీ దృష్టి సారిస్తుంది. ఈ అంశంలో సాంకేతిక సహాయం కోసం రైల్ ఇండియా టెక్నికల్ అండ్ ఎకనామిక్ సర్వీస్ లిమిటెడ్‌తో వచ్చే మూడేళ్ళ కాలానికి అవగాహన ఒప్పందం కుదుర్చుకుంది. స్వచ్ఛ భారత్ మిషన్-అర్బన్ 2.0లో భాగంగా దీనిని అమలు చేయనుంది. చెత్త రహిత నగరాలను సృష్టించడమే దీని ప్రధాన ఉద్దేశ్యం.

ఎంఎస్ఎంఈల ఉపశమనం కోసం వివాద్ సే విశ్వాస్ పథకం

కోవిడ్-19 కాలంలో విఫలమైన సూక్ష్మ, చిన్న మరియు మధ్య తరహా పరిశ్రమలకు ఉపశమనాన్ని అందించడానికి ఆర్థిక మంత్రిత్వ శాఖ ఖర్చుల విభాగం కొత్తగా వివాద్ సే విశ్వాస్ I -రిలీఫ్ టూ ఎంఎస్ఎంఈస్ పథకాన్ని ప్రకటించింది. దీనిని కేంద్ర ఆర్థిక మంత్రి నిర్మలా సీతారామన్ యూనియన్ బడ్జెట్ 2023-24లో ప్రకటించారు. ఈ పథకం ద్వారా కోవిడ్ -19 కాలంలో ప్రభావితమైన ఎంఎస్ఎంఈలకు కింది అదనపు ప్రయోజనాలను ఇవ్వాలని నిర్ణయించింది.

• కాంట్రాక్టుల పూర్తిచేయడంలో విఫలమైన లేదా జప్తు చేయబడిన ఫెరఫార్మన్స్ సెక్యూరిటీలో 95% తిరిగి చెల్లిస్తారు.
• ఎంఎస్ఎంఈల బిడ్ సెక్యూరిటీలో 95% తిరిగి చెల్లిస్తారు.
• తొలగించిన లిక్విడేటెడ్ డ్యామేజెస్‌లో 95% తిరిగి చెల్లిస్తారు.
• సేకరించిన రిస్క్ కొనుగోలు మొత్తంలో 95% రీఫండ్ చెల్లిస్తారు.
• డిఫాల్ట్ కారణంగా డిబార్ చేయబడిన సంస్థలకు, ప్రొక్యూరింగ్ ఎంటిటీ ఆర్డర్ జారీ చేయడం ద్వారా డిబార్మెంట్ కూడా రద్దు చేయబడుతుంది.

ఈ పథకం 17.04.2023 నుండి అమలులోకి వచ్చింది. దీని పరిధిలో క్లెయిమ్‌ల సమర్పణకు 30.06.2023 చివరి తేదీగా ప్రకటించారు. మానవ చరిత్రలో అతిపెద్ద సంక్షోభాలలో ఒకటైన కొవిడ్-19 మహమ్మారి ఆర్థిక వ్యవస్థపై, ముఖ్యంగా ఎంఎస్ఎంఈలపై వినాశకరమైన ప్రభావాన్ని చూపింది. ఈ పథకం కింద అందించబడిన ఉపశమనం ఎంఎస్ఎంఈల రంగాన్ని ప్రోత్సహించడంలో మరియు నిలబెట్టడంలో ప్రభుత్వం చేస్తున్న ప్రయత్నాలకు కొనసాగింపుగా ఉంటుంది.

వివాద్ సే విశ్వాస్ పథకం అనేది పన్ను చెల్లింపుదారులు మరియు ఆదాయపు పన్ను శాఖ మధ్య వివాదాలను పరిష్కరించేందుకు భారత ప్రభుత్వం ప్రవేశపెట్టిన ప్రత్యక్ష పన్ను పథకం. ఇది 2020 లో అందుబాటులోకి తీసుకొచ్చారు. ఈ పథకం కింద, వివాదాస్పద పన్ను మొత్తానికి సంబంధించిన వడ్డీ మరియు పెనాల్టీ పూర్తిగా మాఫీ చేశారు.

ఐసీసీ టెస్ట్ ర్యాంకింగులో భారత జట్టుకు అగ్రస్థానం

ఐసీసీ పురుషుల టెస్ట్ టీమ్ ర్యాంకింగ్స్‌లో భారతదేశం తిరిగి నంబర్ వన్ స్థానాన్ని కైవసం చేసుకుంది. 2021 డిసెంబర్‌లో ఒక నెల పాటు అగ్రస్థానంలో కొనసాగక తిరిగి నంబర్ వన్ స్థానాన్ని దక్కించుకోవడం ఇదే తొలిసారి. అంతర్జాతీయ క్రికెట్ మండలి మే 2న విడుదల చేసిన తాజా ర్యాంకింగ్స్‌లో రోహిత్ శర్మ నేతృత్వంలోని భారత్ ఆస్ట్రేలియాను అధిగమించి నంబర్ వన్‌గా నిలిచింది. ఈ ఏడాది ప్రారంభంలో ఆస్ట్రేలియాపై భారత్ 2-1తో సిరీస్ గెలిచి వరుసగా నాలుగోసారి బోర్డర్-గవాస్కర్ ట్రోఫీని నిలబెట్టుకుంది.

వచ్చే నెలలో జరగనున్న ఐసీసీ వరల్డ్ టెస్ట్ ఛాంపియన్‌షిప్ ఫైనల్‌ టెస్టులో భారత్ నెంబర్ వన్ ర్యాంకుతో ఆస్ట్రేలియాతో  తలపడనుంది. ప్రస్తుతం భారత్ 121 పాయింట్లతో అగ్రస్థానంలో ఉండగా, 116 పాయింట్లతో ఆస్ట్రేలియా రెండో స్థానంలో ఉంది. ఇంగ్లండ్ (116), దక్షిణాఫ్రికా (104), న్యూజిలాండ్ (100)లు తర్వాత మూడు స్థానాలలో ఉన్నాయి.

దుబాయ్‌లో ఇంటర్నేషనల్ అపెరల్ & టెక్స్‌టైల్ ఫెయిర్

ఇంటర్నేషనల్ అపెరల్ & టెక్స్‌టైల్ ఫెయిర్ యొక్క పదిహేనవ ఎడిషన్‌ను మే 1 నుండి 3వ తేదీల మధ్య దుబాయ్ వరల్డ్ ట్రేడ్ సెంటర్‌లో నిర్వహించారు. ఈ ప్రదర్శనలో 22 దేశాల నుండి 200 మంది ఎగ్జిబిటర్లు పాల్గొన్నారు. దీనిని భారత ప్రభుత్వం, ఫెడరేషన్ ఆఫ్ ఇండియన్ ఎక్స్‌పోర్ట్ ఆర్గనైజేషన్ మరియు అపెరల్ ఎక్స్‌పోర్ట్ ప్రమోషన్ కౌన్సిల్ మినిస్ట్రీ ఆఫ్ టెక్స్‌టైల్స్ నిర్వహించాయి.

ఈ ఫెయిర్ ప్రధాన దుస్తులు, ఫ్యాషన్ వస్త్రాలు, ప్రింట్లు, ఉపకరణాలు, గృహ వస్త్రాలు, పాదరక్షలు వంటి మొదలగు ఫ్యాషన్ ఉత్పత్తులకు ఔట్ సోర్సింగ్ వేదికగా ప్రసిద్ధి చెందింది. ఇండియా పెవిలియన్‌లో దాదాపు 67 స్టాల్స్ ఏర్పాటు చేసారు. ఇండియన్ పెవిలియన్‌ను భారత కాన్సుల్ జనరల్ డాక్టర్ అమన్ పూరి ప్రారంభించారు. ఈ కార్యక్రమంలో ఎఇపిసి ఛైర్మన్ అశోక్ జి రజనీ కూడా పాల్గొన్నారు.

దుబాయ్‌లో అరేబియన్ ట్రావెల్ మార్కెట్ 30వ ఎడిషన్

అరేబియన్ ట్రావెల్ మార్కెట్ యొక్క 30వ ఎడిషన్ మే 1 న దుబాయ్ వరల్డ్ ట్రేడ్ సెంటర్‌లో నిర్వహించబడింది. ఈ ఈవెంట్‌లో 150కి పైగా దేశాల నుండి 2,000 మంది ఎగ్జిబిటర్లు పాల్గొన్నారు. వీరిలో ప్రముఖ హోటళ్లు, ట్రావెల్ ఏజెన్సీలు, విమానయాన సంస్థలు మరియు టెక్నాలజీ కంపెనీలు  పాల్గొన్నాయి. ఈ 30వ ఎడిషన్ 'వర్కింగ్ టువర్డ్స్ నెట్ జీరో' అనే థీమ్‌తో నిర్వహించారు.

ఈ ఈవెంట్ యొక్క ఇండియా పెవిలియన్ మరియు ఇతర రాష్ట్ర పెవిలియన్‌లను యుఎఇలోని భారత రాయబారి సంజయ్ సుధీర్ ప్రారంభించారు. ఈ సంవత్సరం ఈవెంట్ ట్రావెల్ పరిశ్రమలో కర్బన ఉద్గారాలను తగ్గించడంపై ప్రధానంగా దృష్టి సారించింది. భారతీయ పెవిలియన్ బాధ్యతాయుతమైన వన్యప్రాణి పర్యాటకంతో సహా దేశం యొక్క పర్యావరణ అనుకూల కార్యక్రమాలను హైలైట్ చేసింది.

ఉజ్బెకిస్థాన్ కొత్త రాజ్యాంగ నిర్మాణంపై ప్రజాభిప్రాయ సేకరణ

ఉజ్బెకిస్థాన్ కొత్త రాజ్యాంగ నిర్మాణంపై ఆ దేశ అధ్యక్షుడు షావ్కత్ మిర్జియోయెవ్ ప్రజాభిప్రాయ సేకరణ చేపట్టారు. ఈ ప్రజాభిప్రాయ సేకరణలో దేశ రాజ్యాంగాన్ని తిరిగి వ్రాయాలన్న అధ్యక్షుడు షావ్కత్ మిర్జియోయెవ్ యొక్క ఆలోచనకు ఉజ్బెకిస్థాన్ ఓటర్లలో అత్యధికులు "అవును" అని ఓటు వేశారు.

ఉజ్బెకిస్తాన్‌లో పాలన మరియు జీవన నాణ్యతను మెరుగుపరిచేందుకు రాజ్యాంగాన్ని సరిదిద్దాలని మిర్జిజ్యోయెవ్ నొక్కిచెప్పారు. మానవ హక్కులు పరిరక్షణ, జండర్ ఈక్వాలిటీ, వ్యక్తిగత స్వాతంత్రం మరియు దేశ ఆర్థిక వృద్ధికి దోహదపడే కీలక మార్పులు కొత్త రాజ్యాంగంలో పొందుపర్చేందుకు పిలుపునించారు. 2016లో ఇస్లాం కరీమోవ్ మరణం తర్వాత 65 ఏళ్ల మిర్జియోయెవ్ ఆ దేశ అధ్యక్షుడుగా బాధ్యతలు స్వీకరించారు.

• ఉజ్బెకిస్తాన్ మధ్య ఆసియాలోని ఒక ఇస్లామిక్ దేశం
• ఇది మాజీ సోవియట్ రిపబ్లిక్ యందు భాగం.
• ఈ దేశం చైనా మరియు మధ్యధరా మధ్య పురాతన వాణిజ్య మార్గం అయిన సిల్క్ రోడ్‌తో అనుసంధానించబడి ఉంటుంది.
• రాజధాని నగరం : తాష్కెంట్
• అధికారిక కరెన్సీ : ఉజ్బెకిస్తానీ సోమ్
• అధికారిక భాష : ఉజ్బెక్
• ప్రస్తుత అధ్యక్షుడు : షావ్కత్ మిర్జియోయెవ్

మైరాజ్ అహ్మద్ ఖాన్ & గనేమత్ సెఖోన్‌లకు స్వర్ణం

ఈజిప్ట్‌లోని కైరోలో జరిగిన ఇంటర్నేషనల్ షూటింగ్ స్పోర్ట్ ఫెడరేషన్ (ISSF)లో భారత షూటర్లు మైరాజ్ అహ్మద్ ఖాన్ మరియు గనేమత్ సెఖోన్‌లు స్వర్ణ పతకాలు గెలుచుకున్నారు. అంతర్జాతీయ షూటింగ్ స్పోర్ట్ ఫెడరేషన్ నిర్వహించిన ఈ క్రీడా ఈవెంటులో భారత్ మొత్తంగా రెండు బంగార పథకాలు, ఒక వెండి పథకం మరియు 4 కంచు పథకాలు గెలుచుకున్నారు.

కార్గిల్‌లో ప్రాజెక్ట్ కోసం ప్రభుత్వ గ్రాంట్‌ ప్రకటించిన ఆస్ట్రేలియన్ హైకమిషన్

భారతదేశంలోని ఆస్ట్రేలియన్ హైకమిషన్ ఇటీవల కార్గిల్‌లో ఒక ప్రాజెక్ట్ కోసం తన ప్రభుత్వ గ్రాంట్‌ను ప్రకటించింది. భారత జాతీయ విద్యా విధానం యొక్క లక్ష్యాలకు అనుగుణంగా సాంప్రదాయ జ్ఞానాన్ని ప్రస్తుత పాఠశాల సైన్స్ పాఠ్యాంశాలతో ఏకీకృతం చేయడం లక్ష్యంగా చేపట్టిన ప్రాజెక్ట్ "రిటర్న్ టు రూట్స్" కోసం ఇది ప్రకటించబడింది. ఇటీవలే శ్రీనగర్‌లో జరిగిన ప్రత్యేక సమావేశంలో ఆస్ట్రేలియా హైకమిషనర్ఓ ఫారెల్ ఈ విషయాన్ని ప్రకటించారు.

గోవాలో ఎస్‌సిఓ విదేశాంగ మంత్రుల సమావేశం

షాంఘై కోఆపరేషన్ ఆర్గనైజేషన్ (ఎస్‌సిఓ) యొక్క విదేశాంగ మంత్రుల రెండు రోజుల సమావేశం మే 3, 4 తేదీలలో గోవాలో నిర్వహించబడింది. ఈ కీలక సమావేశంకు పాకిస్థాన్, చైనా సహా 8 ఎస్‌సిఓ దేశాల విదేశాంగ మంత్రులు హాజరయ్యారు. గతేడాది సెప్టెంబరు నుండి భారత్ ఎస్‌సిఓ యొక్క అధ్యక్ష హోదాలో కొనసాగుతుంది.

విదేశాంగ మంత్రి ఎస్ జైశంకర్ అధ్యక్షతన జరిగిన ఈ సమావేశానికి చైనా విదేశాంగ మంత్రి క్విన్ గ్యాంగ్, రష్యాకు చెందిన సెర్గీ లావ్‌రోవ్, పాకిస్థాన్‌కు చెందిన బిలావల్ భుట్టో-జర్దారీలు హజారయ్యారు. ఈ సమావేశంలో వాణిజ్యం, పెట్టుబడి మరియు కనెక్టివిటీ రంగాలతో సహా సభ్యదేశాల మధ్య సహకారాన్ని విస్తరించే అంశాలపై చర్చలు నిర్వహించారు. ఆఫ్గనిస్తాన్ ఉగ్రవాద సవాళ్లతో పాటు ఉక్రెయిన్‌లో యుద్ధ పరిస్థితులపై కూడా చర్చలు నిర్వహించారు.

షాంఘై కోఆపరేషన్ ఆర్గనైజేషన్ అనేది యురేషియా రాజకీయ, ఆర్థిక, అంతర్జాతీయ భద్రత మరియు రక్షణ సంస్థ. ఇది 15 జూన్ 2001లో స్థాపించబడింది. దీని ప్రధాన కార్యాలయం బీజింగ్ నగరంలో ఉంది. ఇందులో రష్యా, భారతదేశం, చైనా, పాకిస్తాన్ దేశాలతో పాటుగా నాలుగు మధ్య ఆసియా దేశాలైన కజకిస్తాన్, కిర్గిజ్‌స్థాన్‌, తజికిస్తాన్ మరియు ఉజ్బెకిస్తాన్ సభ్యులుగా ఉన్నాయి.

ప్రపంచ పత్రికా స్వేచ్ఛ సూచికలో భారతదేశంకు 161వ ర్యాంక్‌

2023 ప్రపంచ ప్రెస్ ఫ్రీడమ్ ఇండెక్స్‌లో భారతదేశ ర్యాంకు 11 స్థానాలు దిగజారి ఆల్ టైమ్ అట్టడుగు స్థానానికి చేరువయ్యింది. గ్లోబల్ మీడియా వాచ్‌డాగ్ రిపోర్టర్స్ వితౌట్ బోర్డర్స్ (RSF) తాజా నివేదిక ప్రకారం భారతదేశం 180 స్థానాల్లో 161 వ స్థానానికి పడిపోయింది. తాజా నివేదిక తజికిస్తాన్, ఇండియా మరియు టర్కీ అనే మూడు దేశాలలో మీడియా పరిస్థితి 'సమస్యాత్మక' నుండి 'చాలా చెడ్డ' స్థితికి చేరుకుందని ఆందోళన వ్యక్తం చేసింది.

తజికిస్థాన్‌ గత ఏడాది కంటే ఒక స్థానం దిగజారి 153 వద్ద నిలవగా, భారత్‌ 11 స్థానాలు దిగజారి 161వ ర్యాంక్‌లో నిలిచింది. 2022లో 150వ ర్యాంకులో ఉండే టర్కీ 16 స్థానాలు దిగజారి 165వ స్థానంలో నిలిచింది. ఈ జాబితాలో పాకిస్తాన్ 150వ స్థానంలో భారత్ కంటే 11 స్థానాలు ముందంజ ఉండటం గమనార్హం. ఇకపోతే నార్వే, ఐర్లాండ్ మరియు డెన్మార్క్ దేశాలు మొదటి మూడు స్థానాలలో ఉండగా వియత్నాం, చైనా, ఉత్తర కొరియాలు అట్టడుగు మూడు స్థానాలలో నిలిచాయి.

 ప్రముఖ తమిళ నటుడు మనోబాల కన్నుమూశారు

ప్రముఖ తమిళ నటుడు మరియు దర్శకుడు మనోబాల మే 3న 69 ఏళ్ళ వయస్సులో అనారోగ్యంతో మరణించారు. మనోబాల 1979 భారతీరాజా చిత్రం పుతియా వార్పుగల్‌తో నటుడిగా మరియు సహాయ దర్శకుడిగా పరిచయం అయ్యారు. ఐదు దశాబ్దాల కెరీర్‌లో నటుడిగా 900కు పైగా చిత్రాల్లో నటించారు.

రష్యన్ కవయిత్రి మరియా స్టెపనోవాకు లీప్‌జిగ్ బుక్ ప్రైజ్

ప్రస్తుతం బెర్లిన్‌లో నివసిస్తున్న ప్రఖ్యాత రష్యన్ రచయిత్రి మరియా స్టెపనోవాకు యూరోపియన్ అండర్‌స్టాండిగ్ కోసం ప్రతిష్టాత్మక లీప్‌జిగ్ బుక్ ప్రైజ్‌ను గెలుచుకున్నారు. ఆమె కవితా సంపుటి "గర్ల్స్ వితౌట్ క్లాత్స్" కోసం ఈ అవార్డును అందుకున్నారు.

ఇది స్త్రీ శరీరంపై తరచుగా దాగి ఉన్న హింస మరియు ఈ అణచివేతకు దారితీసే శక్తి అసమతుల్యతపై సున్నితమైన మరియు అత్యంత కవితాత్మకమైన అధ్యయనంగా వర్ణించబడింది. స్టెపనోవా 2021లో బుకర్ ప్రైజ్‌కు కూడా నామినేట్ అయ్యారు.

ఫోర్బ్స్ జాబితాలో 100 మిలియన్ డాలర్ల సంపాదనలో ఎనిమిది మంది అథ్లెట్లు

ఫోర్బ్స్ 2023 అత్యధిక పారితోషికం పొందుతున్న అథ్లెట్ల జాబితాలో క్రిస్టియానో ​​రొనాల్డో, లియోనెల్ మెస్సీలు టాప్ రెండు స్థానాలలో నిలిచారు. ఈ జాబితాలో దాదాపు 8 మంది కీడాకారులు 100 మిలియన్ డాలర్ల కంటే ఎక్కువ సంపాదిస్తున్నారు. ఈ ఏడాది ప్రపంచంలో అత్యధికంగా చెల్లించే 50 మంది అథ్లెట్లలో ఒక్క మహిళ (సెరెనా విలియమ్స్) మాత్రమే చోటు దాక్కించుకుంది.

1. $136 మిలియన్లు. క్రిస్టియానో ​​రోనాల్డో
2. $130 మిలియన్. లియోనెల్ మెస్సీ
3. $120 మిలియన్. కైలియన్ ఎంబాప్పే
4. $119.5 మిలియన్. లేబ్రోన్ జేమ్స్
5. $110 మిలియన్. కానెలో అల్వారెజ్
6. $107 మిలియన్. డస్టిన్ జాన్సన్
7. $106 మిలియన్. ఫిల్ మికెల్సన్
8. $100.4 మిలియన్. స్టీఫెన్ కర్రీ

ప్రపంచ స్నూకర్ ఛాంపియన్‌షిప్ టైటిల్ విజేతగా లూకా బ్రెసెల్

28 ఏళ్ల బెల్జియన్ స్నూకర్ ఆటగాడు లూకా బ్రెసెల్, ఉత్కంఠభరితమైన ఫైనల్‌లో మార్క్ సెల్బీని ఓడించి తన మొదటి ప్రపంచ టైటిల్‌ను కైవసం చేసుకున్నాడు. దీనితో లూకా బ్రెసెల్ యూరప్ నుండి టైటిల్ గెలుచుకున్న మొదటి ఆటగాడుగా నిలిచాడు.

ప్రపంచ స్నూకర్ ఛాంపియన్‌షిప్ అనేది ప్రొఫెషనల్ స్నూకర్‌లో సుదీర్ఘకాలం నడిచే మరియు అత్యంత ప్రతిష్టాత్మకమైన టోర్నమెంట్. ఇది అత్యంత సంపన్నమైన క్రీడ. ఇది 1927లో మొదటిసారి నిర్వహించారు, విజేతకు £2,395,000 బ్రిటన్ డాలర్ల ప్రైజ్ మనీ అందిస్తారు.

అంతర్జాతీయ మాస్టర్ టైటిల్ సాధించిన 11వ భారత మహిళగా వంతిక అగర్వాల్

చెస్‌లో అంతర్జాతీయ మాస్టర్ టైటిల్ సాధించిన 11వ భారతీయ మహిళగా వంతిక అగర్వాల్ నిలిచారు. గత 2 నెలల్లో 4 అంతర్జాతీయ టోర్నమెంట్‌లు ఆడిన వంతిక, తన ఇంటర్నేషనల్ చెస్ ఫెడరేషన్ రేటింగ్‌ను 61 పాయింట్లు పెంచుకోవడంతో పాటుగా మొత్తం 2428 పాయింట్ల మార్కుకు చేరుకుంది. ఈమె ప్రస్తుతం భారతదేశంలో నం. 3 ఉమెన్ చెస్ ప్లేయర్‌గా ఉంది.

వంతిక గత నెలలో స్పెయిన్‌లో జరిగిన మెనోర్కా ఓపెన్‌లో వంటిక మహిళల ఛాంపియన్‌గా నిలిచింది. ఆమె జనవరి 2023లో కోహ్లాపూర్‌లో జరిగిన జాతీయ మహిళల ఛాంపియన్‌షిప్‌లో కాంస్య పతకాన్ని మరియు ఫిబ్రవరి 2023లో ఎయిర్‌పోర్ట్ అథారిటీ ఆఫ్ ఇండియా తరపున బంగారు పతకాన్ని కూడా గెలుచుకుంది.

ఎసీసీ పురుషుల ప్రీమియర్ కప్ విజేతగా నేపాల్

ఆసియన్ క్రికెట్ కౌన్సిల్ (ఎసీసీ) ప్రీమియర్ కప్ ఫైనల్‌లో యూఏఈని ఓడించి నేపాల్ చారిత్రాత్మక విజయాన్ని సాధించింది. దీనితో ఈ ఏడాది జరిగే ఆసియా కప్ యందు ఆడే అవకాశాన్ని దక్కించుకుంది. ఎసీసీ ప్రీమియర్ లీగ్ అనేది ఆసియా క్రికెట్ కౌన్సిల్ నిర్వహించే వన్డే ఇంటర్నేషనల్ క్రికెట్ టోర్నమెంట్. లీగ్ విధానంలో జరిగే ఈ టోర్నమెంటులో ద్వితీయ స్థాయి ఆసియా జట్లు పోటీపడతాయి.

ఇందులో విజయం సాధించిన జట్టుకు ఆసియా కప్ యందు పాల్గొనే అవకాశం లభిస్తుంది. ఈ మొదటి టోర్నమెంట్ మే 2014లో మలేషియాలో జరిగింది. ఇందులో బహ్రెయిన్, భూటాన్, ఇరాన్, మాల్దీవులు, ఇండోనేషియా, మయన్మార్, సౌదీ అరేబియా, థాయిలాండ్, మలేషియా, నేపాల్, ఒమన్, ఖతార్, సౌదీ అరేబియా, హాంగ్ కాంగ్, కువైట్, సింగపూర్, యునైటెడ్ అరబ్ ఎమిరేట్స్ వంటి దేశాలు పాల్గొంటాయి. ఇందులో అత్యధిక సార్లు ఆఫ్గనిస్తాన్ విజేతగా నిలిచింది.

జైల్లో ఉన్న ముగ్గురు ఇరానియన్ మహిళా జర్నలిస్టులకు యూఎన్ అవార్డు

ఐక్యరాజ్యసమితి, జైలులో ఉన్న ముగ్గురు ఇరానియన్ మహిళా జర్నలిస్టులకు 2023 యునెస్కో వరల్డ్ ప్రెస్ ఫ్రీడమ్ ప్రైజ్ ప్రకటించింది. ఈ ముగ్గురు విజేతలలో నీలౌఫర్ హమీది, ఎలాహెహ్ మొహమ్మది మరియు నర్గేస్ మొహమ్మదిలు ఉన్నారు. సత్యం మరియు జవాబుదారీతనం పట్ల వారు చూపిన నిబద్ధత కోసం ఈ గౌరవం అందించారు.

ఈ విజేతలలో ఒకరైన నీలోఫర్ హమేదీ, ప్రముఖ సంస్కరణవాద దినపత్రిక షార్గ్‌ యందు పనిచేస్తున్నారు. 16 సెప్టెంబర్ 2022న పోలీసు కస్టడీలో మరణించిన మాషా అమిని కేసుపై పరిశోదించడంతో ఆమె సెప్టెంబర్ 2022 నుండి ఇరాన్ యొక్క ఎవిన్ జైలులో ఏకాంత నిర్బంధంలో ఉంచబడింది.

మరో విజేత ఎలాహెహ్ మొహమ్మది, మరో సంస్కరణవాద వార్తాపత్రిక హమ్ - మిహన్ పత్రిక యందు పని చేస్తున్నారు. సామాజిక సమస్యలు మరియు లింగ సమానత్వా అంశాలను కవర్ చేసే ఈమె కూడా మాషా అమిని అంత్యక్రియల గురించి నివేదించింతో అదే జైలు యందు ఖైదీ అయ్యారు.

మరో విజేత నర్గేస్ మొహమ్మది, టెహ్రాన్ ఆధారిత పౌర సమాజ సంస్థ డిఫెండర్స్ ఆఫ్ హ్యూమన్ రైట్స్ సెంటర్ (DHRC)కి రచయిత మరియు వైస్ డైరెక్టర్ కూడా. ఆమె ప్రస్తుతం ఎవిన్ జైలులో 16 ఏళ్ల జైలు శిక్షను అనుభవిస్తోంది.

ఢిల్లీలో 5వ భారత్-కువైట్ విదేశాంగ కార్యాలయ సంప్రదింపులు

5వ భారత్-కువైట్ విదేశాంగ కార్యాలయ సంప్రదింపులు మే 2న న్యూఢిల్లీలో నిర్వహించారు. ఈ ద్విపాక్షిక సమావేశాలలో పరస్పర ప్రయోజనాలకు సంబంధించిన ప్రాంతీయ మరియు అంతర్జాతీయ అంశాలపై అభిప్రాయాలను ఇరుదేశాల నాయకులు పంచుకున్నారు.

ఈ సమావేశంలో పాల్గొన్న భారత ప్రతినిధి బృందానికి విదేశీ వ్యవహారాల మంత్రిత్వ శాఖ జాయింట్ సెక్రటరీ విపుల్ నాయకత్వం వహించగా, కువైట్ ప్రతినిధి బృందానికి కువైట్ ఆసియా వ్యవహారాల సహాయ మంత్రి సమీహ్ ఎస్సా జోహార్ హయత్ నేతృత్వం వహించారు. భారత అధ్యక్షత త్వరలో ఎస్‌సిఓ డైలాగ్ పార్టనర్‌గా కువైట్‌ చేరనుంది.

• కువైట్ పశ్చిమ ఆసియాలోని ఒక దేశం.
• ఇది తూర్పు అరేబియా యొక్క ఉత్తర అంచున పెర్షియన్ గల్ఫ్ యొక్క కొన వద్ద ఉంది.
• ఈ దేశానికి ఉత్తరాన ఇరాక్ మరియు దక్షిణాన సౌదీ అరేబియా సరిహద్దులుగా ఉన్నాయి.
• రాజధాని నగరం : కువైట్ సిటీ
• అధికారిక కరెన్సీ : కువైట్ దినార్
• అధికారిక భాష : అరబిక్
• ప్రధాన మంత్రి : అహ్మద్ నవాఫ్ అల్-అహ్మద్ అల్-సబా

ఐఏఎఫ్ చీఫ్ వీఆర్ చౌదరి శ్రీలంక పర్యటన

ఎయిర్‌స్టాఫ్ చీఫ్ ఎయిర్ మార్షల్ వీఆర్ చౌదరి, నాలుగు రోజుల పర్యటన నిమిత్తం శ్రీలంకలో పర్యటించారు. ఈ పర్యటనలో శ్రీలంక అధ్యక్షుడు రణిల్ విక్రమసింఘేతో భేటీ అవ్వడంతో పాటుగా ఆ దేశ రక్షణ మంత్రి ప్రేమితా బండార తెన్నకోన్‌తో, చీఫ్‌ ఆఫ్‌ స్టాఫ్‌, జాతీయ భద్రతపై సలహాదారు సాగలా రత్నయ్యలతో కూడా సమావేశం అయ్యారు.

ఈ పర్యటనలో శ్రీలంక ఆధీనంలో ఉన్న ఎయిర్‌క్రాఫ్ట్ యొక్క కార్యాచరణ కోసం శ్రీలంక వైమానిక దళ కమాండర్‌కు AN-32 విడిభాగాలను కూడా అందించారు. అలాన్ నేషనల్ డిఫెన్స్ కాలేజీలో విద్యార్థులతో ఇంటరాక్ట్ అయ్యారు. ఈ సందర్బంగా భారత ప్రభుత్వం నుండి 1 కోటి రూపాయల విలువైన పుస్తకాలను బహుమతిగా అందించారు. ఈ పర్యటన ద్వారా రెండు దేశాల మధ్య ఇప్పటికే ఉన్న సంబంధాలను బలోపేతం చేయడంతో పాటుగా ఇరు దేశాల మధ్య రక్షణ, భద్రత అంశాలపై మరింత దృష్టి సారించనున్నారు.