లేటెస్ట్ ప్రభుత్వ మరియు ప్రైవేట్ బ్యాంకు ఉద్యోగాలు 2023

గత దశాబ్దకాలంగా దేశ ఆర్థిక ప్రగతిలో ముఖ్యభూమిక పోషిస్తున్న బ్యాంకింగ్ రంగం, అదే మొత్తంలో మానవ వనరుల నియామకాలు కూడా చేపట్టింది. బ్యాంకుల జాతీయం తర్వాత ప్రభుత్వ బ్యాంకులతో పాటుగా ప్రైవేట్ బ్యాంకులు కూడా తమ వ్యాపార వృద్ధిలో భాగంగా పెద్ద నగరాల నుండి చిన్న పట్టణాలు, అటునుండి గ్రామాల వరకు తమ బ్రాంచులను విస్తరించడం మొదలుపెట్టాయి.

ఈ క్రమములో వీరికి అధికమొత్తంలో మానవ వనరుల అవసరం వచ్చిపడింది. ఈ అవసరం ఈ పదేళ్లలో ప్రత్యక్షంగా, పరోక్షంగా దాదాపు 20 లక్షల ఎంట్రీ లెవెల్ ఉద్యోగాలు బ్యాంకింగ్ రంగంలో సృష్టించగల్గింది. ప్రస్తుతం బ్యాంకుల నియామకాల వరవడి తగ్గుముఖం పడుతున్నా, అది నిరుద్యోగులు భయపడేంత ఎక్కువయితే కాదు.

2019 లో ప్రభుత్వ బ్యాంకుల విలీనం తర్వాత ప్రస్తుతం దేశవ్యాప్తంగా 12 ప్రభుత్వ బ్యాంకులతో పాటుగా 22 ప్రైవేట్ బ్యాంకులు దేశంలో ఆర్థిక సేవలు అందిస్తున్నాయి. ప్రభుత్వ బ్యాంకులు తమ సిబ్బందిని ఐబిపిఎస్ నియామక పరీక్షల ద్వారా చేసుకుంటుండగా, ప్రైవేట్ బ్యాంకులు వేటికి అవి తమ సొంత నియామక ప్రక్రియల ద్వారా భర్తీచేసుకుంటున్నాయి.

జీతం, అలవెన్సులు, పని ఒత్తిడి వంటి వివిధ అంశాలు దృష్టిలో పెట్టుకుంటే ప్రభుత్వ బ్యాంకుల ఉద్యోగాల కంటే ప్రైవేట్ బ్యాంకు ఉద్యోగాలు సౌకర్యంగా కనిపిస్తుండంతో  బ్యాంకు ఉద్యోగ ఆశావాహులంతా ప్రైవేట్ బ్యాంకులకు ఎక్కువ ప్రాధాన్యత ఇస్తున్నారన్నది వాస్తవం.