స్వయం ప్రభ టీవీ : 34 ఉచిత డీటీహెచ్ ఎడ్యుకేషనల్ ఛానెల్స్

విద్యా వ్యవస్థ ఆధునికరణలో భాగంగా స్వయం ప్రభ టీవీని భారత మానవ వనరుల అభివృద్ధి మంత్రిత్వ శాఖ అందుబాటులోకి తీసుకొచ్చింది. ఆన్‌లైన్ విద్యతో పాటుగా టెలివిజన్ ద్వారా బోధన తరగతులు ప్రచారం చేయాలనే లక్ష్యంతో దీనిని ఏర్పాటు చేసింది.

ఇంటర్నెట్ అందుబాటులో లేని విద్యార్థులకు, ఇంటర్నెట్ సమకూర్చుకోలేని విద్యార్థులకు 34 DTH చానల్స్ ద్వారా 2017 జూన్ 9 నుండి విద్యా ప్రచారాలు ప్రారంభించింది. 9వ తరగతి నుండి పోస్టు గ్రాడ్యుయేషన్ వరకు ప్రతిరోజూ 4 గంటల నిడివితో అకాడమిక్ తరగతులు నిర్వహిస్తున్నారు. ఇవే తరగతులను ఒక రోజులో 5 సార్లు పునరావృతం చేస్తున్నారు.

స్వయం ప్రభలో తరగతులను NPTEL, IITs, UGC, CEC, IGNOU, NCERT ల సహాయంతో నిర్వహిస్తున్నారు. ప్రస్తుతం ఈ వేదికలో 3 లక్షలకు పైగా వీడియో తరగతులు అందుబాటులో ఉన్నాయి.

ఆర్ట్స్, సైన్స్, కామర్స్, పెర్ఫార్మింగ్ ఆర్ట్స్, సోషల్ సైన్సెస్ అండ్ హ్యుమానిటీస్, ఇంజనీరింగ్, టెక్నాలజీ, లా, మెడిసిన్, అగ్రికల్చర్ కోర్సులకు సంబంధించి అండర్ గ్రాడ్యుయేషన్, పోస్ట్ గ్రాడ్యుయేషన్ తరగతులను స్వయం పోర్టల్ సహాయంతో పూర్తి అకాడమిక్ పాఠ్య ప్రణాళికను నిర్వహిస్తుంది. ఇందులో ఉత్తీర్ణత సాధించిన వారికీ స్వయం ఉత్తీర్ణత సర్టిఫికెట్ అందజేస్తుంది.

స్కూల్ ఎడ్యుకేషన్ సంబంధించి 9 నుండి 12 లెవెల్ విద్యార్థులకు అకాడమిక్ తరగతులతో పాటుగా కాంపిటేటివ్ పరీక్షకు ఉపయోగపడే కంటెంట్ ఆఫర్ చేస్తుంది. అలానే దేశంలో మరియు విదేశాల్లో ఉండే భారతీయ పౌరుల నిరంతర, జీవితకాల అభ్యాసకుల అవసరాలను తీర్చగల పాఠ్య ప్రణాళిక ఆధారిత కోర్సులు కూడా అందుబాటులో ఉంచింది. ఈ కోర్సులన్నీ స్వయం ప్రభ యూట్యూబ్ ఛానెళ్లలో ఎల్లవేళలా అందుబాటులో ఉంటాయి.