పీఎంకేవీవై పథకం ఎలిజిబిలిటీ మరియు రిజిస్ట్రేషన్

పీఎం కౌష‌ల్ వికాస్ యోజ‌న (పీఎంకేవీవై) అనేది నేషనల్ స్కిల్ డెవలప్‌మెంట్ కార్పొరేషన్ ద్వారా అమలు చేయబడుతున్న స్కిల్ డెవలప్‌మెంట్ & ఎంటర్‌ప్రెన్యూర్‌షిప్ మంత్రిత్వ శాఖ (MSDE) యొక్క ప్రధాన పథకం.

నిరుద్యోగ మరియు కాలేజీ డ్రాపౌట్ యువతకు పరిశ్రమలకు సరిపోయే నైపుణ్య అభివృద్ధి శిక్షణ అందించి, వారికీ ఉపాధి కల్పించే లక్ష్యంతో 2015 లో ప్రధాని నరేంద్ర మోడీ ఈ పథకాన్ని ప్రారంభించారు.

స్కిల్ ఇండియా మిషన్

“స్కిల్ ఇండియా మిషన్” లో భాగంగా భారతదేశాన్ని ప్రపంచ ‘నైపుణ్య రాజధానిగా మార్చాలనే లక్ష్యంతో వచ్చిన మొదటి పథకం ఇది. ఈ పథకం ద్వారా 2022 నాటికీ దాదాపు 50 కోట్ల మంది భారతీయ యువతకు నైపుణ్య శిక్షణ అందించి, ఉపాధి కల్పించేడమే లక్ష్యంగా ఈ పథకం రూపొందించారు.

ఈ స్కిల్ సర్టిఫికేషన్ స్కీమ్ అమలు చేసేందుకు దేశవ్యాప్తంగా 700 జిల్లాల్లో 800 లకు పైగా ప్రధాన మంత్రి కౌశల్ కేంద్రాలు (పిఎంకెకెలు) ఏర్పాటు చేసారు. వీటితో పాటుగా 200 కి పైగా ఐటిఐలు మరియు పిఎంకెకెలు కాని ఇతర శిక్షణ సంస్థలు కూడా ఉన్నాయి. ఇందులో అభ్యర్థులు కోరుకునే నైపుణ్య శిక్షణ కోర్సులు మూడు నెలల నుండి ఏడాది నిడివితో అందిస్తారు.

నేషనల్ స్కిల్ క్వాలిఫికేషన్ ఫ్రేమ్‌వర్క్ (NSQF) ప్రకారం శిక్షణ ఇవ్వడమే కాకుండా, వ్యక్తిగత అభివృద్ధికి అవసరమయ్యే సాఫ్ట్ స్కిల్స్, ఎంటర్‌ప్రెన్యూర్‌షిప్, ఫైనాన్షియల్ మరియు డిజిటల్ లిటరసీ అంశాల యందు ప్రత్యేక శిక్షణ అందిస్తారు. ఈ శిక్షణ కార్యక్రమాలు అన్ని నేషనల్ స్కిల్ డెవలప్‌మెంట్ కార్పొరేషన్ (NSDC) ద్వారా అమలు చేయబడతాయి.

ప్రధానమంత్రి స్కిల్ డెవలప్ మెంట్ స్కీం (పీఎంకేవీవై) ట్రైనింగ్ తీసుకోవడానికి ఎలాంటి పీజు చెల్లించాల్సిన అవసరం లేదు. ఈ పథకం అంతర్జాతీయ ప్రమాణాలకు అనుగుణంగా,  యువతకు అంతర్జాతీయ ఉపాధి అవకాశాలను అందిపుచ్చుకునే విదంగా శిక్షణ అందిస్తారు. ఇందులో భాగంగా యాడ్-ఆన్ బ్రిడ్జ్ కోర్సులు, అంతర్జాతీయ భాషలను కూడా నేర్పిస్తారు.  ట్రైనింగ్ విజయవంతంగా పూర్తిచేసిన వారికీ ప్రభుత్వమే రూ.8000ల వరకు ఫ్రైజ్ మనీగా అందిస్తుంది. దీనితో పాటుగా కోర్సు పూర్తిచేసిన తర్వాత సర్టిఫికేట్ కూడా అందిస్తారు.

ట్రైనింగ్ పొందిన వారిలో 50% మందికి ప్లేస్‌మెంట్ కల్పిస్తారు. దీని కోసం ప్రతి ఆరు నెలలకు ఒకసారి వివిధ పరిశ్రమలను ఆహ్వానించి కౌశల్ లేదా రోజ్‌గర్ ఉద్యోగ మేళ నిర్వహిస్తారు. అలానే వ్యాపారం చేసే ఆలోచన ఉన్నవారికి బిజినెస్ లోన్స్ కూడా అందిస్తారు. పీఎంకేవీవై సర్టిఫికెట్ పొందినవారికి జాబ్ రిస్క్ భయాన్ని కవర్ చేసేందుకు మూడేళ్ళ వరకు కౌశల్ బీమా పేరుతో 2 లక్షల వరకు ప్రమాద బీమా కల్పిస్తారు.

పీఎంకేవీవై 3.0 లో భాగంగా అదనపు ప్రయోజనాలతో మహిళలకు, వికలాంగులకు, ట్రాన్స్ జండర్లకు కొత్తగా నైపుణ్యాభివృద్ధి శిక్షణ అందించి, వారి స్వశక్తితో ఎదిగే అవకాశం కల్పిస్తున్నారు. పీఎంకేవీవై 3.0 లో ఎన్రోల్ అయినా ప్రతి ట్రైనీకి జాకెట్, డైరీ, ఐడీ కార్డు హోల్డర్ మరియు బ్యాక్ ప్యాక్ తో కూడిన ఇండక్షన్ కిట్ అందిస్తున్నారు.