పీఎం యువ 2.0 యోజన : రైటర్స్ యువ మెంటరింగ్ స్కీమ్

యువ రచయితలను ప్రోత్సాహం అందించేందుకు పీఎం యువ 2.0 యోజన ప్రారంభించబడింది. పీఎం యువ : రైటర్స్ యువ మెంటరింగ్ పేరుతొ అందిస్తున్న ఈ పథకాన్ని కేంద్ర విద్యా మంత్రిత్వ శాఖ నిర్వహిస్తుంది. 30 ఏళ్లలోపు వయస్సు ఉన్న యువ రచయితలకు వర్ధమాన భారత యువ రచయితలుగా తీర్చిదిద్దడమే ఈ పథకం యొక్క ప్రధాన లక్ష్యం. ఈ మెంటార్‌షిప్‌ నిడివి 6నెలలు ఉంటుంది.

దేశంలో చదవడం, రాయడం మరియు పుస్తక సంస్కృతిని ప్రోత్సహించడానికి ఈ పథకాన్ని రూపొందించారు. ఇతర ఉద్యోగ ఎంపికలతో సమానంగా పఠనం మరియు రచయితత్వాన్ని కూడా ఒక వృత్తిగా తీర్చదిద్దడానికి ఈ పథకాన్ని అభివృద్ధి పరిచారు. భారతదేశం ప్రపంచంలో మూడవ అతిపెద్ద పుస్తక ప్రచురణకర్తగా ఉంది. ఈ పథకం జాతీయ మరియు అంతర్జాతీయ పుస్తక ప్రియుల కోసం కొత్త తరం రచయితలను అందించనుంది. తద్వారా భారతీయ ప్రచురణ పరిశ్రమకు ప్రోత్సాహాన్ని అందివ్వనుంది.

ఈ పథకం ద్వారా యువ రచయితలకు సాహిత్య ఉత్సవాలు, బుక్ ఫెయిర్స్ వర్చువల్ బుక్ ఫెయిర్, కల్చరల్ ఎక్స్ఛేంజ్ ప్రోగ్రామ్‌లు వంటి మొదలైన అంతర్జాతీయ ఈవెంట్‌ల ద్వారా వారి అవగాహన పరిధిని, వారి నైపుణ్యాలను మెరుగుపరుచుకునే అవకాశాలు కల్పిస్తారు. బుక్ పబ్లిషింగ్ ఎకో-సిస్టమ్ యొక్క అన్ని రకాల అంశాలపై అవగాహన కల్పిస్తారు.

పీఎం యువ 2.0 యొక్క ముఖ్య లక్షణాలు

• పీఎం యువ 2.0 యొక్క థీమ్ - ప్రజాస్వామ్యం (సంస్థలు, సంఘటనలు, వ్యక్తులు, రాజ్యాంగ విలువలు, వర్తమానం, భవిష్యత్తు).
• యువ రచయతల ఎంపిక కోసం ఆల్ ఇండియా స్థాయిలో ఒక కాంటెస్ట్ నిర్వహిస్తారు.
• మెంటర్‌షిప్ స్కీమ్ కింద ఎంపిక అయ్యేందుకు పోటీదారులు పదివేల పదాలలో మాన్యుస్క్రిప్ట్‌ను సమర్పించాల్సి ఉంటుంది.
• ఇంగ్లీష్ భాషతో పాటుగా 22 షెడ్యూల్ భాషల్లో దేని నుండైన ఈ మాన్యుస్క్రిప్ట్‌ను సమర్పించవచ్చు.
• నేషనల్ బుక్ ట్రస్ట్ (ఎన్‌బిటి) ఏర్పాటు చేసిన కమిటీ ఈ ఎంపిక ప్రక్రియను నిర్వహిస్తుంది.
• ఈ పథకం కింద ఏటా 75 మంది యువ రచయతలను ఎంపిక చేస్తారు.
• ఎంపికైన అభ్యర్థుల కోసం నేషనల్ బుక్ ట్రస్ట్ ఇండియా రెండు వారాల రైటర్స్ ఆన్‌లైన్ ప్రోగ్రామ్‌ను నిర్వహిస్తుంది.
• ఎంపికైన యువ రచయితల యొక్క పుస్తకాన్ని పూర్తిస్థాయిలో అభివృద్ధి పర్చేందుకు మార్గదర్శకాలను నియమిస్తారు.
• శిక్షణ మరియు మెంటర్‌షిప్ ముగింపులో ఏకీకృత స్కాలర్‌షిప్ పథకం కింద ప్రతి రచయితకు ఆరు నెలల కాలానికి, నెలకు 50,000 చెప్పున 3 లక్షలు చెల్లించబడుతుంది.
• మెంటర్‌షిప్ ప్రోగ్రామ్ ముగింపులో విజయవంతమైన ప్రచురణలపై రచయితలకు 10% రాయల్టీ చెల్లించబడుతుంది.

పీఎం యువ 2.0 షెడ్యూల్

• పథకం ప్రారంభ తేదీ : 2 అక్టోబర్ 2022
• రిజిస్ట్రేషన్ వ్యవధి : 2 అక్టోబర్ నుండి 15 జనవరి 2023
• ఎంపిక ప్రక్రియ : 16 జనవరి 2023 నుండి 31 మార్చి 2023
• జాతీయ జ్యూరీ సమావేశం : ఏప్రిల్ 2023
• ఎంపికైన రచయితల పేర్లు విడుదల : మే 2023
• మెంటర్‌షిప్ వ్యవధి : 1 జూన్ 2023 నుండి - 30 నవంబర్ 2023
• మొదటి సెట్ పుస్తకాల ప్రచురణ : 1 ఫిబ్రవరి 2024