January 02, 2024 Current affairs in Telugu. పోటీ పరీక్షల రోజువారీ జాతీయ, అంతర్జాతీయ సమకాలీన అంశాలను తెలుగులో పొందండి. యూపీఎస్‌సి, ఏపీపీఎస్‌సి, టీఎస్‌పీఎస్‌సి, స్టాఫ్ సెలక్షన్ కమిషన్, బ్యాంకింగ్, రైల్వే వంటి నియామక పరీక్షల కొరకు సిద్దమవుతున్న ఆశావహులకు ఉపయోగపడతాయి.
గౌహతిలో 200 ఎలక్ట్రిక్ బస్సులను ఫ్లాగ్ ఆఫ్ చేసిన హిమంత బిస్వా శర్మ
అస్సాం ముఖ్యమంత్రి హిమంత బిస్వా శర్మ జనవరి 1న గౌహతి నుండి 200 ఎలక్ట్రిక్ బస్సులను జెండా ఊపి ప్రారంభించారు. గౌహతిని క్లీనర్ మరియు హెల్తీ సిటీ దిశగా మార్చే లక్ష్యంలో భాగంగా ప్రభుత్వం వీటిని అందుబాటులోకి తీసుకొచ్చింది. గౌహతిని 2025 నాటికి 100 శాతం గ్రీన్ పబ్లిక్ ట్రాన్స్‌పోర్టేషన్ సిస్టమ్‌తో నడిచే దేశంలోని మొదటి నగరంగా స్థాపించాలనే లక్ష్యంతో ఉన్నట్లు ప్రభుత్వం పేర్కొంది.
హిమంత బిస్వా శర్మ ఇదే వేదిక ద్వారా నేషనల్ కామన్ మొబిలిటీ కార్డ్ (ఎన్‌సిఎంసి)ని కూడా లాంఛనంగా ప్రారంభించారు. హౌసింగ్ అండ్ అర్బన్ అఫైర్స్ మంత్రిత్వ శాఖ ప్రవేశపెట్టిన ఈ కార్డు, ప్రయాణ ఛార్జీలు, టోల్ పన్నులు మరియు రిటైల్ కొనుగోళ్ల చెల్లింపులను సులభతరం చేయడానికి అనుమతిస్తుంది.
200 గ్రీన్ బస్సులను ప్రారంభించేందుకు అస్సాం సిఎం శర్మ చొరవ తీసుకోవడం కాలుష్యానికి వ్యతిరేకంగా గౌహతి చేస్తున్న పోరాటానికి ప్రధాన ప్రోత్సాహంగా భావించవచ్చు. ఈ చర్య ఉద్గారాలను గణనీయంగా తగ్గించడంతో పాటుగా స్థానిక నివాసితులకు గాలి నాణ్యతను మెరుగుపరుస్తుంది.
సామూహిక సూర్య నమస్కారంలో గిన్నిస్ రికార్డు నెలకొల్పిన గుజరాత్
సామూహిక సూర్య నమస్కారంలో ఈ ఏడాది మొదటి రోజునే గుజరాత్ గిన్నిస్ రికార్డు నెలకొల్పింది. గుజరాత్ రాష్ట్ర వ్యాప్తంగా 108 ప్రదేశాల్లో ఏకకాలంలో సామూహిక సూర్య నమస్కారాన్ని నిర్వహించడం ద్వారా ఈ గిన్నిస్ రికార్డు సృష్టించింది. మహేసనా జిల్లాలోని మోధేరాలోని ఐకానిక్ సూర్య దేవాలయంలో జరిగిన రాష్ట్ర స్థాయి కార్యక్రమానికి ముఖ్యమంత్రి భూపేంద్ర పటేల్ మరియు హోంశాఖ మంత్రి హర్ష్ సంఘవి హాజరయ్యారు.
రాష్ట్ర వ్యాప్తంగా నిర్వహించిన ఈ మాస్ సూర్య నమస్కార కార్యక్రమంలో 50,000 మందికి పైగా ప్రజలు పాల్గొన్నారు. ఈ 108 ప్రదేశాలలో రాష్ట్రంలోని 51 చారిత్రక ప్రదేశాలు ఉన్నాయి. ఐకానిక్ మోధేరా సూర్య దేవాలయంలో జరిగిన రాష్ట్ర స్థాయి కార్యక్రమంలో 2500 మందికి పైగా సూర్య నమస్కారం చేశారు. ఈ కార్యక్రమంలో రాష్ట్ర స్థాయి మెగా సూర్య నమస్కార పోటీ విజేతలకు సన్మానం కూడా చేసారు. ప్రజలలో సూర్య నమస్కార్ అభ్యాసాన్ని ప్రాచుర్యంలోకి తీసుకురావడానికి గుజరాత్ రాష్ట్ర యోగ్ బోర్డు మరియు రాష్ట్ర ప్రభుత్వం ఈ కార్యక్రమాన్ని నిర్వహించాయి.
డిజిటల్ యాక్సెస్ కోసం కే-స్మార్ట్ యాప్‌ను ప్రారంభించిన కేరళ
కేరళ ప్రభుత్వం తన స్థానిక ప్రభుత్వ సేవలను డిజిటలైజ్ చేయడంలో భాగంగా జనవరి 1న కె-స్మార్ట్ (కేరళ సొల్యూషన్స్ ఫర్ మేనేజింగ్ అడ్మినిస్ట్రేటివ్ రిఫార్మేషన్ అండ్ ట్రాన్స్‌ఫర్మేషన్) ప్రోగ్రామ్‌ను ప్రారంభించింది. కె-స్మార్ట్ అనేది ఒకరకమైన ఏకీకృత డిజిటల్ ప్లాట్‌ఫారమ్. ఇది కేరళలోని స్థానిక స్వపరిపాలన సంస్థలు, కార్పొరేషన్‌లు, మునిసిపాలిటీలు మరియు గ్రామ పంచాయితీలు వంటి అన్ని సేవలను ఒకే పైకప్పు క్రిందకు తీసుకురావాలని లక్ష్యంగా పెట్టుకుంది.
ఈ ప్లాట్‌ఫారమ్ పౌరులకు అనేక రకాల సేవలకు ఆన్‌లైన్ యాక్సెస్‌ను అందిస్తుంది. వాటిలో జనన, మరణ మరియు వివాహ రిజిస్ట్రేషన్లు, వ్యాపార లైసెన్సులు, ఆస్తి, పన్ను చెల్లింపులు భవన నిర్మాణ అనుమతులు, భూమి రికార్డులు మరియు ఫిర్యాదుల పరిష్కారం వంటి సేవలకు అనుమతి ఇస్తుంది.
ఈ సేవల సురక్షితమైన యాక్సెస్ కోసం కె-స్మార్ట్ ఆధార్ ఆధారిత వేలిముద్ర ప్రమాణీకరణను స్వీకరిస్తుంది. ప్రభుత్వ సేవల డిజిటలైజేషన్ అవినీతి మరియు మానవ తప్పిదాల అవకాశాలను తగ్గించడంలో సహాయపడుతుదని ప్రభుత్వం భావిస్తుంది. అదే సమయంలో పౌరులు నేరుగా ఇంటి నుండి ఈ సేవలు పొందేందుకు అవకాశం కల్పిస్తుంది.
కొత్త చట్టం ప్రకారం హిట్ అండ్ రన్ కేసుల్లో పదేళ్ల జైలు శిక్ష
భారత శిక్షాస్మృతి (ఐపీసీ) స్థానంలో తీసుకొచ్చిన భారతీయ న్యాయ సంహిత కింద హిట్-అండ్-రన్ కేసులలో ప్రమాదం తర్వాత సంఘటన స్థలం నుండి పారిపోయిన వారికి 10 సంవత్సరాల వరకు జైలు శిక్ష మరియు 7 లక్షల జరిమానాతో కూడిన కఠినమైన నిబంధనలను ప్రతిపాదించింది. ఇంతకుముందు, నిందితుడికి ఐపీసీ సెక్షన్ 304ఎ (నిర్లక్ష్యంగా మరణానికి కారణం) కింద రెండేళ్ల వరకు మాత్రమే జైలు శిక్ష విధించబడేది. దేశవ్యాప్తంగా 22 కోట్ల మంది డ్రైవర్లను ప్రభావితం చేసే ఈ నిబంధనను ప్రభుత్వం ఉపసంహరించుకోవాలని ట్రక్ డ్రైవర్లు నిరసన వ్యక్తం చేస్తున్నారు.
దేశంలో రోడ్డు ప్రమాదాల్లో మరణాల సంఖ్య ఏటా పెరుగుతున్నందున చట్టాలను కఠినతరం చేయాల్సిన అవసరం ఉందని ప్రభుత్వం భావిస్తుంది. అలానే డ్రైవింగ్ లైసెన్సుల విషయంలో కూడా ఈ చట్టం కొత్త రూల్ తీసుకొచ్చింది. అక్టోబర్ 1, 2024 నుండి, అన్ని వాహనాలకు ఫిట్‌నెస్ సర్టిఫికేట్ పొందడం తప్పనిసరి చేస్తుంది. ఈ నిబంధనలు డ్రైవర్లు మరింత జాగ్రత్తగా వాహనం నడిపేందుకు మరియు ట్రాఫిక్ నియమాలను మరింత శ్రద్దగా పాటించేందుకు ప్రోత్సహిస్తాయని ప్రభుత్వం భావిస్తుంది.
16వ ఆర్థిక సంఘం చైర్మన్‌గా అరవింద్ పనగారియా
కేంద్ర ప్రభుత్వం 16వ ఆర్థిక సంఘం చైర్మన్‌గా నీతి ఆయోగ్ మాజీ వైస్ చైర్మన్ అరవింద్ పనగారియాను నియమించింది. అలానే ఈ కమిషన్ కార్యదర్శిగా రిత్విక్ రంజనం పాండే నియమితులయ్యారు. అరవింద్ పనగారియా ఒక భారతీయ-అమెరికన్ ఆర్థికవేత్త. ఈయన ప్రస్తుతం కొలంబియా విశ్వవిద్యాలయంలో ప్రొఫెసరుగా పనిచేస్తున్నారు.
అరవింద్ పనగారియా జనవరి 2015 నుండి ఆగస్టు 2017 మధ్య భారత ప్రభుత్వ థింక్-ట్యాంక్ నీతి ఆయోగ్ యొక్క మొదటి వైస్-ఛైర్మన్‌గా పనిచేశారు. ఆర్థిక శాస్త్రం మరియు పబ్లిక్ పాలసీ రంగంలో ఆయన చేసిన కృషికి గాను 2012లో భారత ప్రభుత్వం ఆయన్ని పద్మభూషణ్‌తో సత్కరించింది.
పదహారవ ఆర్థిక సంఘం అనేది రాజ్యాంగంలోని ఆర్టికల్ 280 ప్రకారం భారత ప్రభుత్వంచే ఏర్పాటు చేయబడిన ఫైనాన్స్ కమిషన్. ఇది ఏప్రిల్ 1, 2026 నుండి ఐదు సంవత్సరాల కాలానికి కేంద్ర ప్రభుత్వం మరియు రాష్ట్ర ప్రభుత్వాల మధ్య ఆదాయ భాగస్వామ్యాన్ని నిర్దేశిస్తుంది.
పదిహేనవ ఫైనాన్స్ కమీషన్ నవంబర్ 2017లో ఏర్పాటు చేయబడింది. 15వ ఫైనాన్స్ కమిషన్ ఏప్రిల్ 2020 నుండి ప్రారంభమయ్యే ఐదు ఆర్థిక సంవత్సరాలకు పన్నులు మరియు ఇతర ఆర్థిక విషయాలకు సంబంధించి సిఫార్సులను అందించింది. 15వ ఫైనాన్స్ కమీషన్ కాల పరిమితి ఏప్రిల్ 2024 తో ముగుస్తుంది. ఈ కమిషన్ ఛైర్మన్‌గా నంద్ కిషోర్ సింగ్ బాధ్యతలు నిర్వర్తించారు.
పవర్‌గ్రిడ్ సీఎండీగా రవీంద్ర కుమార్ త్యాగి
ప్రభుత్వ యాజమాన్యంలోని పవర్ గ్రిడ్ కార్పొరేషన్ ఆఫ్ ఇండియా కొత్త చైర్మన్ మరియు మేనేజింగ్ డైరెక్టర్‌గా (సీఎండీ) రవీంద్ర కుమార్ త్యాగి బాధ్యతలు స్వీకరించారు. ఢిల్లీలోని ఇండియన్ ఇన్‌స్టిట్యూట్ ఆఫ్ టెక్నాలజీ పూర్వ విద్యార్థి అయిన కుమార్ త్యాగి విద్యుత్ రంగంలో 33 ఏళ్ళ వృత్తి అనుభవం కలిగి ఉన్నారు.
పవర్ గ్రిడ్ కార్పొరేషన్ ఆఫ్ ఇండియా లిమిటెడ్ అనేది భారత ప్రభుత్వ విద్యుత్ మంత్రిత్వ శాఖ యాజమాన్యంలోని భారతీయ కేంద్ర ప్రభుత్వ రంగ సంస్థ. దీనిని 1989లో స్థాపించారు. దీని ప్రధాన కార్యాలయం గురుగ్రామ్‌లో ఉంది. పవర్ గ్రిడ్ భారతదేశంలోని అంతర్రాష్ట్ర మరియు అంతర్-ప్రాంతీయ విద్యుత్ శక్తి ప్రసార వ్యవస్థలో 90% కవర్ చేస్తుంది.
ఇస్రో తొలి ఎక్స్-రే పోలారిమీటర్‌ ప్రయోగం విజయవంతం
భారత అంతరిక్ష పరిశోధనా సంస్థ (ఇస్రో) తన పోలార్ శాటిలైట్ లాంచ్ వెహికల్ (పీఎస్ఎల్వీ - సీ58) ద్వారా ఎక్స్-రే పొలారిమీటర్ శాటిలైట్ (XPoSat)ని విజయవంతంగా ప్రయోగించింది. ఈ ప్రయోగం ఆంధ్రప్రదేశ్‌లోని శ్రీహరికోటలోని సతీష్ ధావన్ అంతరిక్ష కేంద్రం నుంచి జనవరి 1, 2024 ఉదయం 9.10 గంటలకు నిర్వహించారు. ఇది ఇస్రో ఈ సంవత్సరంలో చేసిన మొదటి అంతరిక్ష ప్రయోగం.
ఈ ప్రయోగంలో ఎక్స్‌పోశాట్‌తో పాటు మరో పది శాస్త్రీయ పేలోడ్‌లను (ఉపగ్రహాలను) కూడా ఇస్రో ప్రయోగించింది. ఈ మిషన్ ఖగోళ మూలాల నుండి కాస్మిక్ ఎక్స్-కిరణాల ధ్రువణాన్ని అధ్యయనం చేయడానికి రూపొందించబడింది. ఈ కేటగిరికి సంబంధించి ఇది భారతదేశం యొక్క మొట్టమొదటి ప్రయత్నం. మన గెలాక్సీలోని బ్లాక్ హోల్స్ మరియు న్యూట్రాన్ నక్షత్రాలను అధ్యయనం చేయడానికి యునైటెడ్ స్టేట్స్ పంపిన ఒక ప్రత్యేక ఖగోళ శాస్త్ర అబ్జర్వేటరీ తర్వాత, అలాంటి ప్రయత్నం చేసిన ప్రపంచంలోని రెండవ దేశంగా భారతదేశం అవతరించింది.
ఎక్స్‌పోశాట్‌ యొక్క ప్రాథమిక పేలోడ్ జీవితం సుమారు ఐదు సంవత్సరాలు ఉంటుంది. ఎక్స్‌పోశాట్‌ను 650 కిలోమీటర్ల లోపలి భూమి కక్ష్యలోకి విజయవంతంగా ప్రవేశపెట్టినట్లు ఇస్రో చీఫ్ ఎస్ సోమనాథ్ తెలిపారు. పీఎస్ఎల్వీ - సీ58 ద్వారా పంపించిన 10 ఇతర పేలోడ్‌లలో టేక్‌మీ2స్పేస్, ఎల్బీఎస్ ఇన్‌స్టిట్యూట్ టెక్నాలజీ ఫర్ ఉమెన్, కేజే సోమయ్య ఇన్‌స్టిట్యూట్ ఆఫ్ టెక్నాలజీ, ఇన్‌స్పెసిటీ స్పేస్ ల్యాబ్స్ ప్రైవేట్ లిమిటెడ్, ధృవ్ స్పేస్ ప్రైవేట్ లిమిటెడ్, బెల్లాట్రిక్స్ ఏరోస్పేస్ ప్రైవేట్ లిమిటెడ్ (రెండు పేలోడ్‌లు) మరియు ఇస్రోకి చెందిన మూడు పేలోడ్‌లు ఉన్నాయి.
ఎక్స్‌పోశాట్‌ రెండు ముఖ్యమైన భాగాలను కలిగి ఉంది. అవి ఇండియన్ ఎక్స్-రే పొలారిమీటర్ (POLIX) మరియు ఎక్స్-రే స్పెక్ట్రోస్కోపీ మరియు టైమింగ్ (XSPECT). ప్రాధమిక పేలోడ్ POLIX ఖగోళ మూలం యొక్క 8-30 కిలోల ఎలక్ట్రాన్ వోల్ట్‌ల ఫోటాన్‌ల మధ్యస్థ ఎక్స్-రే శక్తి పరిధిలో ధ్రువణ పారామితులను కొలుస్తుంది. XSPECT పేలోడ్ 0.8-15 కిలోల ఎలక్ట్రాన్ వోల్ట్‌ల శక్తి పరిధిలో స్పెక్ట్రోస్కోపిక్ సమాచారాన్ని అందిస్తుంది.
