2023 జనవరి నెలకు సంబంధించిన సమకాలిన సైన్స్ మరియు టెక్నాలజీ అంశాలను తెలుగులో చదవండి. యూపీఎస్సీ, ఎస్ఎస్సీ, రైల్వే, బ్యాంకింగ్, స్టేట్ పబ్లిక్ సర్వీస్ కమిషన్ వంటి వివిధ పోటీ పోటీ పరీక్షలకు సిద్దమౌతున్న అభ్యర్థులకు ఈ అంశాలు ఉపయోగపడతాయి.
వైరోవోర్ జీవులను కనుగొన్న అమెరికా పరిశోధకులు
యునైటెడ్ స్టేట్స్‌లోని నెబ్రాస్కా-లింకన్ విశ్వవిద్యాలయానికి చెందిన మైక్రోబయాలజిస్ట్ జాన్ డెలాంగ్ మరియు అతని బృందం వైరస్లను తినే మొట్టమొదటి వైరోవోర్ జీవిని కనుగొన్నారు. న్యూట్లాస్ అనే సైన్స్ మ్యాగజైన్ ప్రకారం జాన్ డెలాంగ్ బృంధం సూక్ష్మ జీవులను తినే జీవులపై చేస్తున్న పరిశోధనలో ఈ అద్భుతం బయటపడింది.
వీరి అధ్యయనం ప్రకారం హాల్టేరియా జాతికి చెందిన మంచినీటి మైక్రోస్కోపిక్ సిలియేట్‌లు భారీ సంఖ్యలో ఇన్ఫెక్షియస్ క్లోరో వైరస్లను తింటున్నట్లు వెల్లడించారు. వీరి అంచనా ప్రకారం ఒక చిన్న చెరువులోని సిలియేట్స్ రోజుకు 10 ట్రిలియన్ వైరస్లను తినే అవకాశం ఉన్నట్లు తెలిపారు. వీరి గణాంకాలు నిజమైతే ప్రపంచ కార్బన్ సైక్లింగ్‌పై పరిశోధకుల అభిప్రాయాలని మార్చుకోవాల్సి ఉంటుంది.
నేషనల్ గ్రీన్ హైడ్రోజన్ మిషన్‌కు కేంద్ర మంత్రివర్గం ఆమోదం
గ్రీన్ హైడ్రోజన్ ఉత్పత్తి, వినియోగం మరియు ఎగుమతికి సంబంధించిన 2023 నేషనల్ గ్రీన్ హైడ్రోజన్ మిషన్‌కు జనవరి 4న కేంద్ర మంత్రివర్గం ఆమోదం తెలిపింది. భారతదేశాన్ని గ్రీన్ హైడ్రోజన్ గ్లోబల్ హబ్‌గా మార్చడమే లక్ష్యంగా ఈ మిషన్ రూపొందించారు. ఈ మిషన్ భారతదేశంను ఇంధన స్వతంత్ర దేశంగా మార్చడంతో పాటుగా ఆర్థిక వ్యవస్థలోని ప్రధాన రంగాలను డీకార్బనైజేషన్ చేయడంలో సహాయపడనుంది.
ఈ మిషన్ ప్రారంభ వ్యయంగా రూ.19,744 కోట్లు కేటాయించారు. దేశంలో దాదాపు 125 గిగావాట్ల అనుబంధ పునరుత్పాదక శక్తితో పాటు సంవత్సరానికి కనీసం 5 మిలియన్ మెట్రిక్ టన్నుల గ్రీన్ హైడ్రోజన్ ఉత్పత్తి సామర్థ్యాన్ని అభివృద్ధి చేయడమే లక్ష్యంగా పని చేయనున్నారు. 2030 నాటికీ ఈ రంగంలో దాదాపు 6 లక్షల ఉద్యోగ అవకాశాలు అందుబాటులోకి రానున్నాయి.
యూస్‌లో ప్రపంచ మొట్టమొదటి హనీ బీ వ్యాక్సిన్ ఆమోదం
తేనెటీగలకు సంబంధించి ప్రపంచ మొట్టమొదటి వ్యాక్సిన్‌ను యునైటెడ్ స్టేట్స్ వ్యవసాయ శాఖ ఆమోదం తెలిపింది. ఈ వాక్సిన్ తేనెటీగల జనాభాను నాశనం చేయడానికి కారణమైన బ్యాక్టీరియాను లక్ష్యంగా పనిచేస్తుంది. ప్రధానంగా అమెరికన్ ఫౌల్‌బ్రూడ్ వ్యాధి మరణాలను నివారించడానికి ఇది రూపొందించబడింది.
గ్లోబల్ రిస్క్ రిపోర్ట్ 2023
ప్రపంచ భౌగోళిక, రాజకీయ, ఆర్థిక మరియు సామాజిక అభివృద్ధి మరియు సంక్షోభాలకు సంబంధించి వరల్డ్ ఎకనామిక్ ఫోరమ్ (WEF) యొక్క గ్లోబల్ రిస్క్ రిపోర్ట్ 2023 విడుదల అయ్యింది. ఇది గ్లోబల్ రిస్క్ రిపోర్ట్ యొక్క 18 వ ఎడిషన్. ఈ నివేదిక ప్రధానంగా ప్రస్తుత ఏడాది మరియు రాబోయే దశాబ్దంలో పెరుగుతున్న ప్రమాదాలను హైలైట్ చేస్తుంది.
- ద్రవ్యోల్బణ ఒత్తిళ్లు, సరఫరా గొలుసులో అంతరాయం, భౌగోళిక ఆర్థిక ఉద్రిక్తతలతో ఈ ఏడాది కూడా వ్యాపారాలు గందరగోలన్ని ఎదుర్కొంటాయిని తెలిపింది.
- క్వాంటం కంప్యూటింగ్ వంటి కొత్త సాంకేతికతల అభివృద్ధి, సైబర్ సెక్యూరిటీ ప్రోటోకాల్‌లలో గణనీయమైన పురోగతి ఉన్నప్పటికీ, వ్యాపార సంస్థలు, ప్రభుత్వాలు ఎమర్జెన్సీ సైబర్ బెదిరింపులను ఎదుర్కొంటాయని వెల్లడించింది.
- రాబోయే దశాబ్దంలో వాతావరణ మార్పులతో ప్రపంచం అత్యంత తీవ్రమైన ప్రమాదాలను ఎదుర్కోబోతుందని, ప్రకృతి వైపరీత్యాలు మరియు విపరీత వాతావరణ సంఘటనలతో జీవవైవిధ్య నష్టం మరియు పర్యావరణ వ్యవస్థ పతనం తప్పదని హెచ్చరించింది.
- వాతావరణ మార్పు వేగవంతం కావడంతో వినియోగదారుల డిమాండ్‌లకు అనుగుణంగా వ్యాపార సంస్థలు నూతన ఉత్పాదకతతో సిద్దమవ్వాల్సి ఉంటుందని నివేదించింది.
- వాతావరణంలో కార్బన్ డయాక్సైడ్, మీథేన్ మరియు నైట్రస్ ఆక్సైడ్ స్థాయిలు రికార్డు స్థాయికి చేరుకున్నాయని, వాతావరణ వేడిని 1.5°Cకి పరిమితం చేయాలనే గ్లోబల్ ఆశయాలను సాధించడం చాలా అసంభవం అని వెల్లడించింది.
- ఆర్థిక ఒత్తిళ్లు, దీర్ఘకాలిక ఆరోగ్య సంరక్షణ సామర్థ్య సమస్యలు మరియు తీవ్రతరం అవుతున్న వాతావరణ పరిస్థితులు మానవ ఆరోగ్యానికి అతిపెద్ద ముప్పును తెచ్చిపెడతాయని తెలిపింది.
వరల్డ్ ఎకనామిక్ ఫోరమ్ అనేది స్విట్జర్లాండ్‌లోని జెనీవా కేంద్రంగా ఉన్న అంతర్జాతీయ ప్రభుత్వేతర మరియు లాబీయింగ్ సంస్థ. దీనిని జర్మన్ ఇంజనీర్ మరియు ఆర్థికవేత్త క్లాస్ స్క్వాబ్ 24 జనవరి 1971న స్థాపించారు. ఇది ప్రపంచ, ప్రాంతీయ మరియు పరిశ్రమల ఎజెండాలను రూపొందించడానికి వ్యాపారం, రాజకీయ, విద్యా మరియు సమాజంలోని ఇతర నాయకులను, నిపుణులను భాగస్వామ్యం చేస్తుంది.
