తెలుగు కరెంట్ అఫైర్స్ జనవరి 2023 : ప్రభుత్వ పథకాలు & పాలసీలు

కంటి వెలుగు రెండో దశను ప్రారంభించిన కేసీఆర్

తెలంగాణ ముఖ్యమంత్రి కె చంద్రశేఖర్ రావు కంటి వెలుగు రెండవ దశ కార్యక్రమంను జనవరి 18న ఖమ్మంలో ప్రారంభించారు. ఈ కార్యక్రమం ప్రపంచంలోనే అతిపెద్ద కంటి స్క్రీనింగ్ ప్రోగ్రామ్‌గా పరిగణించబడుతుంది. ఈ కార్యక్రమంలో ఇతర రాష్ట్రాలకు చెందిన ముగ్గురు ముఖ్యమంత్రులు పినరయి విజయన్, భగవంత్ సింగ్ మాన్, అరవింద్ కేజ్రీవాల్ పాల్గొన్నారు. అలానే ఉత్తరప్రదేశ్ మాజీ ముఖ్యమంత్రి అఖిలేష్ యాదవ్ కూడా హాజరయ్యారు.

కంటి వెలుగు కార్యక్రమం ద్వారా జనవరి 19 నుండి వచ్చే 100 రోజుల పాటు, దాదాపు 1500 వైద్య బృందాలతో ప్రత్యేక ఆరోగ్య శిబిరాల్లో ఉచిత కంటి పరీక్షలు నిర్వహించనున్నారు. దీనికి సంబంధించిన మొదటి దశ కార్యక్రమంను 827 ఆరోగ్య బృందాలు, ఎనిమిది నెలల పాటు నిర్వహించారు. మిగిలిన ప్రాంతాల్లో ప్రస్తుతం ఆరోగ్య శిబిరాలు ప్రారంభం కానున్నాయి.

కంటి వెలుగు పథకంను 15 ఆగష్టు 2018లో మెదక్ జిల్లా, మల్కాపూరులో ప్రారంభించారు. తెలంగాణ రాష్టంలో కంటిచూపు సమస్యలతో బాధపడుతున్న ప్రజలకు వైద్య సేవలు అందించేందుకు ఈ పథకం రూపుదిద్దుకుంది. ప్రభుత్వ ఖర్చుతో ఉచితంగా ప్రజలకు కంటి పరీక్షలు నిర్వహించి, కళ్లద్దాలు, అవసరమైన వారికి శస్త్రచికిత్సలు, మందులను అందజేస్తారు.

నదులు ప్రాముఖ్యత హైలెట్ చేసేందుకు భారత్ ప్రవాహ్ కార్యక్రమం

సాహిత్యం, సంభాషణలు మరియు కమ్యూనికేషన్ ద్వారా సామాన్యుడి దైనందిన జీవితంలో నదులు, నౌకాశ్రయాలు మరియు షిప్పింగ్ యొక్క ప్రాముఖ్యతను తెలియజెప్పేందుకు 'భారత్ ప్రవాహ్- ఇండియా అలాంగ్ ఇట్స్ షొర్స్' అనే నూతన కార్యక్రమంను కేంద్ర  షిప్పింగ్ మరియు ఓడరేవుల మంత్రిత్వ శాఖ ప్రారంభించింది.

షిప్పింగ్, నదులు, సముద్రాల గురించి విశాలమైన దృక్పథాన్ని సృష్టించే ఉద్దేశ్యంతో వివిధ రంగాలకు చెందిన వాటాదారులను ఒకచోట చేర్చడానికి రాబోయే కాలంలో భారత్ ప్రవాహ్ ఒక ఉమ్మడి వేదికగా మారనుంది. సముద్ర రంగానికి సంబంధించిన సవాళ్లు, విధాన సమస్యలు మరియు భవిష్యత్తు లక్ష్యాలను ఈ కార్యక్రమం హైలైట్ చేస్తుంది.

కేరళ విద్యార్థినులకు రుతుక్రమ సెలవులు

కేరళ ప్రభుత్వం, ఆ రాష్ట్ర ఉన్నత విద్యా శాఖ డిపార్ట్‌మెంట్ పరిధిలోని అన్ని విశ్వవిద్యాలయాలలో రుతుక్రమ సెలవులను అనుమతిస్తూ అధికారిక ఉత్తర్వును జారీ చేసింది. అలానే 18 ఏళ్లు నిండిన విద్యార్థినులకు గరిష్టంగా 60 రోజుల వరకు ప్రసూతి సెలవులు మంజూరు చేసినట్లు కూడా వెల్లడించించి. దీనితో విద్యార్థినులకు రుతుక్రమ మరియు ప్రసూతి సెలవులు మంజూరు చేసిన మొదటి రాష్ట్రంగా నిలిచింది.

రుతుక్రమ సమయంలో విద్యార్థినులు ఎదుర్కొంటున్న మానసిక, శారీరక ఇబ్బందులను పరిగణనలోకి తీసుకుని అన్ని యూనివర్సిటీల్లో ఈ రుతుక్రమ సెలవులు అమలు అయ్యేలా ఆ రాష్ట్ర ఉన్నత విద్యాశాఖ ఏర్పాట్లు చేసింది.

165 వెటర్నరీ అంబులెన్స్‌లను ప్రారంభించిన ఏపీ సీఎం జగన్‌

ఆంధ్రప్రదేశ్ పశువైద్య సంరక్షణను బలోపేతం చేసే ప్రయత్నంలో భాగంగా ఏపీ ముఖ్యమంత్రి వైఎస్ జగన్ మోహన్ రెడ్డి 165 వెటర్నరీ అంబులెన్స్ యూనిట్లను జనవరి 25న జెండా ఊపి ప్రారంభించారు. డా. వైఎస్ఆర్ సంచార పశు ఆరోగ్య సేవ పథకం రెండవ విడతలో భాగంగా వీటిని అందుబాటులోకి తీసుకొచ్చారు. మే 2021లో మొదటి బ్యాచ్‌లో భాగంగా 175 అంబులెన్స్ యూనిట్లను ప్రారంభించారు.

ఈ పథకంలో భాగంగా మొత్తం 340 వెటర్నరీ అంబులెన్స్‌లను ప్రభుత్వం అందుబాటులోకి తీసుకొచ్చింది. ఈ పశువైద్య అంబులెన్స్‌లు ప్రాథమిక వైద్య సేవలతో పాటుగా, గొర్రెలు, మేకలు, పశువులు మరియు పెంపుడు జంతువులకు చిన్న శస్త్రచికిత్సలు చేయడానికి అనుకూలంగా రూపొందించబడ్డాయి. రాష్ట్ర ప్రభుత్వం ప్రతి అసెంబ్లీ నియోజకవర్గానికి కనీసం రెండు వెటర్నరీ అంబులెన్స్‌లను అందుబాటులో ఉంచుతుంది.

అంబులెన్స్ సేవలతో పాటు, జిల్లా పశువైద్యశాలల్లో మౌలిక సదుపాయాల అభివృద్ధితో పాటు విజయవాడ, పులివెందులలో రెండు సూపర్ స్పెషాలిటీ ఆసుపత్రులను కూడా ఏర్పాటు చేయాలని ప్రభుత్వం యోచిస్తోంది.

రైల్వే సీట్ ఆక్యుపెన్సీని పెంచడానికి 'ఐడియాల్ ట్రైన్ ప్రొఫైల్'

రైల్వే ప్రయాణికుల రిజర్వేషన్ వెయిటింగ్ లిస్ట్‌ సమస్యను పరిష్కరించడానికి రూపొందించిన ఆర్టిఫిషియల్ ఇంటెలిజెన్స్ ప్రోగ్రామ్ యొక్క భారీ ట్రయల్‌ కార్యక్రమాన్ని ఇండియన్ రైల్వే విజయవంతంగా పూర్తిచేసింది. దీనికి సంబంధించి మెయిల్ ఎక్స్‌ప్రెస్ రైళ్లలో సీట్ ఆక్యుపెన్సీని పెంచడానికి కొత్తగా 'ఆదర్శ రైలు ప్రొఫైల్'ను అందుబాటులోకి తీసుకొచ్చింది.

ఆదర్శ రైలు ప్రొఫైల్ అనేది ఒకరకమైన సీట్ కెపాసిటీ ఆప్టిమైజేషన్ డెసిషన్ సపోర్టు చేసే ఏఐ టెక్నాలజీ. ఇది ఒక రైలు ప్రయాణంకు సంబంధించి 5,000 కంటే ఎక్కువ టికెట్ మరియు క్లాస్ కాంబినేషన్‌లను ప్రయాణికులకు అందుబాటులో ఉంచుతుంది. ఇది రైల్వే ప్రయాణికుల డిమాండ్ నమూనాను క్రమం తప్పకుండా విశ్లేషిస్తుంది. ఈ వివరాలు ఆధారంగా ఆయా తేదీలలో, ఆయా మార్గాలలో సీట్ల లభ్యతను పెంచడమో లేదా స్పెషల్ రైళ్లను ఏర్పాటు చేయడమో జరుగుతుంది.

ఈ AI మాడ్యూల్‌ను సెంటర్ ఆఫ్ రైల్వే ఇన్ఫర్మేషన్ సిస్టమ్స్ (CRIS)కి చెందిన ఆర్ గోపాలకృష్ణన్ నేతృత్వంలోని అంతర్గత బృందం అభివృద్ధి చేసింది. రెండు సంవత్సరాల పాటు బృందం చేసిన విస్తృత ప్రయత్నం తర్వాత ఈ మాడ్యూల్ అందుబాటులోకి వచ్చింది.