తెలుగు కరెంట్ అఫైర్స్ జనవరి 2023 : బిజినెస్ & ఎకానమీ

ఇండియా ఫాస్టెస్ట్ పేమెంట్ యాప్ పేరూప్ ప్రారంభం

భారతదేశపు అత్యంత వేగవంతమైన చెల్లింపు యాప్ పేరూప్ (PayRup) 9 జనవరి 2023 న ప్రారంభించబడింది. పేరూప్ వెబ్ 3.0 యొక్క అత్యాధునిక సాంకేతికత ద్వారా నిర్మించబడింది.

ఇది డిజిటల్ చెల్లింపుదారులకు అత్యుత్తమ, అధునాతన డిజిటల్ చెల్లింపు అనుభవాన్ని అందిస్తుంది. పేరూప్ ద్వారా వినియోగదారులు అన్ని రకాల యుటిలిటీ బిల్లులు చెల్లించే అవకాశం ఉంది. దీనిని బెంగుళూరుకు చెందిన మహదేవప్ప హలగట్టి రూపొందించారు.

కాగ్నిజెంట్‌ నూతన సీఈఓగా రవి కుమార్

ప్రముఖ ఐటీ సంస్థ కాగ్నిజెంట్ తన కొత్త చీఫ్ ఎగ్జిక్యూటివ్ ఆఫీసర్‌గా రవి కుమార్‌ను నియమించింది. ఇటీవలే పదవీ విరమణ చేసిన బ్రియాన్ హంఫ్రీస్ స్థానంలో ఆయన తక్షణమే బాధ్యతలు స్వీకరించనున్నారు. రవి కుమార్ అక్టోబర్ 2022 వరకు ఇన్ఫోసిస్ ప్రెసిడెంట్ మరియు సీఓఓగా ఉన్నారు. ఇన్ఫోసిస్ యందు దాదాపు 20 ఏళ్ళు వర్క్ అనుభవం కలిగి ఉన్నారు.

కాగ్నిజెంట్ ఒక అమెరికన్ బహుళజాతి సమాచార సాంకేతిక మరియు కన్సల్టింగ్ సేవలు అందించే కంపెనీ. దీని ప్రధాన కార్యాలయం యునైటెడ్ స్టేట్స్‌లోని న్యూజెర్సీలోని టీనెక్‌లో ఉంది. కాగ్నిజెంట్ బ్యాంకింగ్, హెల్త్ కేర్, మాన్యుఫ్యాక్చరింగ్, మీడియా మరియు ఎంటర్‌టైన్‌మెంట్‌తో సహా పరిశ్రమల కోసం ఐటీ కన్సల్టింగ్ మరియు బిజినెస్ ప్రాసెస్ అవుట్‌సోర్సింగ్ సేవలను అందిస్తుంది.

మహిళల ఐపీఎల్ మీడియా హక్కులు వయాకామ్18 సొంతం

వచ్చే 5 సంవత్సరాలకు ( 2023-27 ) సంబంధించి మహిళల ఇండియన్ ప్రీమియర్ లీగ్ (WIPL) మీడియా హక్కులను ప్రముఖ టెలివిజన్ సంస్థ వయాకామ్18 రూ. 951 కోట్లకు దక్కించుకుంది. దీనికి సంబంధించిన జరిగిన వేలంలో డిస్నీ+ హాట్‌స్టార్, సోనీ, జీ వంటి సంస్థలు పోటీ పడగా, అత్యధిక బిడ్ వేచిన వయాకామ్18 ఈ హక్కులను దక్కించుకుంది. ఈ ఏడాది నుండి మహిళల ఐపిఎల్ ఐదు జట్లతో పూర్తిసాయిలో జరగనుంది.

త్వరలో స్వదేశీ మొబైల్ ఆపరేటింగ్ సిస్టమ్ భరోస్‌

ఐఐటీ మద్రాస్ అభివృద్ధి చేసిన మేడ్-ఇన్-ఇండియా మొబైల్ ఆపరేటింగ్ సిస్టమ్ 'భరోస్'ను కేంద్ర మంత్రులు ధర్మేంద్ర ప్రధాన్ మరియు అశ్విని వైష్ణవ్ విజయవంతంగా పరీక్షించారు. పూర్తి స్వదేశీ వనరులతో రూపొందించిన ఈ ఆపరేటింగ్ సిస్టమ్, వినియోగదారులకు పూర్తి వ్యక్తిగత సమాచార భద్రతను కల్పిస్తుందని వెల్లడించారు.

లినక్స్ ఓపెన్‌సోర్సు సాఫ్ట్‌వేర్ ఆధారంగా రూపొందించబడిన ఈ ఆపరేటింగ్ సిస్టమ్, ప్రధానంగా గూగుల్ యొక్క ఆండ్రాయిడ్ మరియు ఆపిల్ యొక్క ఐఓఎస్ లకు పోటీగా రూపొందించబడింది. ఐఐటీ మద్రాస్, జండాక్ ఆపరేషన్స్ ప్రైవేట్ లిమిటెడ్ ద్వారా అభివృద్ధి చేయబడిన ఈ స్వదేశీ మొబైల్ ఆపరేటింగ్ సిస్టమ్ త్వరలో వాణిజ్యపరంగా అందుబాటులోకి రానుంది.

ఇండియా పోస్ట్ నుండి తరంగ్ మెయిల్ సర్వీస్‌ ప్రారంభం

ఇండియా పోస్ట్ సముద్ర మార్గం ద్వారా పార్సెల్‌లు మరియు మెయిల్‌లను డెలివరీ చేయడానికి తరంగ్ మెయిల్ సర్వీస్‌ను ప్రారంభించింది. సూరత్‌లోని హజీరా ఓడరేవులో కేంద్ర సమాచార ప్రసారాల శాఖ సహాయ మంత్రి దేవుసిన్హ చౌహాన్ జనవరి 20న జెండా ఊపి ప్రారంభించారు.

సౌరాష్ట్ర మరియు దక్షిణ గుజరాత్ నుండి ముంబై మధ్య వేగవంతమైన పోస్టల్ సేవల కోసం గోఘ-హజీరా మార్గంలో రోపాక్స్ ఫెర్రీ సేవలను ఉపయోగించుకోవాలని ఇండియా పోస్ట్ భావించింది. దీని ద్వారా డెలివరీ రవాణా సమయాన్ని 10-12 గంటల నుండి 3-4 గంటల వరకు తగ్గించడమే కాకుండా ఈ నగరాల మధ్య పారిశ్రామిక ప్యాకేజీల వేగవంతమైన కదలికలకు అవకాశం కల్పిస్తుంది.

ఇండియాలో 'షీ ఫీడ్స్ ది వరల్డ్ ' కార్యక్రమం ప్రారంభం

పెప్సికో ఫౌండేషన్, పెప్సికో మరియు కేర్ యొక్క దాతృత్వ విభాగం భారతదేశంలో ' షీ ఫీడ్స్ ది వరల్డ్ ' కార్యక్రమాన్ని ప్రారంభించింది. గ్రామీణ కుటుంబాల ఆహార భద్రత మరియు పోషణను మెరుగుపరచడం లక్ష్యంగా గ్రామీణ మహిళా రైతులకు ఆహార ఉత్పత్తి సంబంధిత శిక్షణ అందించి, గ్రామీణ ఆర్థిక వ్యవస్థలో వారిని భాస్వామ్యం చేస్తారు.

మొదటి విడతలో భాగంగా ఈ కార్యక్రమంను పశ్చిమ బెంగాల్‌లోని అలీపుర్‌దువార్ మరియు కూచ్ బెహార్ జిల్లాలలో అమలు చేస్తున్నారు. ఈ ప్రోగ్రాం ద్వారా 48 వేల మహిళల జీవితంలో నూతన వెలుగులు నింపనున్నారు.