10వ తరగతి తర్వాత ఒకేషనల్ మరియు బ్రిడ్జి కోర్సులు

ఇంజనీరింగ్ & టెక్నాలజీ ఒకేషనల్ కోర్సులు

10+2 అర్హుతతో ఇండస్ట్రియల్ మరియు సాంకేతిక రంగాల్లో స్థిరపడాలనుకునే విద్యార్థుల కోసం రెండేళ్ల నిడివితో వివిధ ఇంజనీరింగ్ & టెక్నాలజీ ఒకేషనల్ కోర్సులు అందుబాటులో ఉన్నాయి. ఈ కోర్సులు పూర్తి చేసిన విద్యార్థులు ఆటోమొబైల్, ఐటీ, ఎలక్ట్రికల్, నిర్మాణ, కంప్యూటర్ సర్వీసెస్, రూరల్ ఇంజనీరింగ్ రంగాలలో ఉపాధి పొందొచ్చు. అలానే డీటీపీ, ప్రింటింగ్ టెక్నాలజీ, టీవీ, రేడియో, వైరింగ్ & రిపేరింగ్, కంప్యూటర్ సర్వీసెస్ కోర్సులు పూర్తిచేయడం ద్వారా స్వయం ఉపాధి పొందొచ్చు.

ఉన్నత విద్య చేయాలనే ఆలోచన ఉన్న వారు బీఎస్సీ మేథమెటిక్స్, బీఏ, బీకామ్ వంటి బ్యాచిలర్ డిగ్రీలలో చేరొచ్చు. ఒకేషనల్ ఇంజనీరింగ్ కోర్సుతో పాటుగా మ్యాథ్స్ స్ట్రీమ్ బ్రిడ్జి కోర్సు పూర్తిచేసిన వారు ఎంసెట్ ద్వారా బీటెక్ కోర్సులలో అడ్మిషన్ పొందొచ్చు. అలానే పాలిటెక్నిక్ రెండవ ఏడాదిలో కూడా చేరే అవకాశం ఉంటుంది. అందుబాటులో ఉన్న వివిధ ఇంజనీరింగ్ ఒకేషనల్ కోర్సులు.

• ఆటోమొబైల్ ఇంజినీరింగ్ టెక్నీషియన్
• కనస్ట్రక్షన్ టెక్నాలజీ
• కంప్యూటర్ సైన్సెస్ & ఇంజనీరింగ్
• ఎలక్ట్రానిక్స్ ఇంజినీరింగ్ టెక్నీషియన్
• ఎలక్ట్రికల్ వైరింగ్ & సర్వీసింగ్
• రూరల్ ఇంజినీరింగ్ టెక్నీషియన్
• వాటర్ సప్లై & శానిటరీ ఇంజనీరింగ్
• డీటీపీ & ప్రింటింగ్ టెక్నాలజీ
• రేడియో & టీవీ

హోమ్ సైన్స్ ఒకేషనల్ కోర్సులు

హోటల్ ఆపరేషన్స్, కేటరింగ్, రెస్టారెంట్ నిర్వహణ, హౌస్ కీపింగ్, బ్యూటీ పార్లర్ నిర్వహణ, ప్రీ స్కూల్ టీచింగ్, ఫాషన్ డిజైనింగ్ మరియు గార్మెంట్ మేకింగ్ అంశాల యందు ఆసక్తి ఉండే విద్యార్థులకు హోమ్ సైన్స్ కేటగిరిలో వివిధ ఒకేషనల్ కోర్సులు అందుబాటులో ఉన్నాయి. ఈ కోర్సులు పూర్తిచేయడం ద్వారా స్వయం ఉపాధి పొందటంతో పాటుగా ఆయా రంగాలలో ఉద్యోగ అవకాశాలు దక్కించుకోవచ్చు. అలానే ఉన్నత విద్య చేయాలనుకుంటే బీఏ, బీకామ్ వంటి బ్యాచిలర్ డిగ్రీల యందు అడ్మిషన్ పొందొచ్చు. హోమ్ సైన్స్ కేటగిరిలో వివిధ ఒకేషనల్ కోర్సులు.

• కమర్షియల్ గార్మెంట్ డిజైనింగ్ & మేకింగ్
• ఫ్యాషన్ గార్మెంట్ మేకింగ్
• హోటల్ ఆపరేషన్స్
• ప్రీ-స్కూల్ టీచర్ ట్రైనింగ్
• క్యాటరింగ్ మరియు రెస్టారెంట్ మానేజ్మెంట్
• హెల్త్ కేర్ & బ్యూటీ కల్చర్
• ఇంస్టిట్యూషనల్ హౌస్ కీపింగ్

హ్యూమానిటీస్ ఒకేషనల్ కోర్సులు

టూరిజం & ట్రావెల్, ఆర్ట్, కంప్యూటర్ గ్రాఫిక్స్ & యానిమేషన్ వంటి అంశాల యందు ఆసక్తి కలిగిన విద్యార్థులకు పది తరువాత వివిధ హ్యూమానిటీస్ ఒకేషనల్ కోర్సులు అందుబాటులో ఉన్నాయి. వీటిని పూర్తిచేయడం ద్వారా ఆయా రంగాల్లో ఉపాధి అవకాశాలు అందిపుచ్చుకోవచ్చు, అలానే స్వయం ఉపాధి కూడా పొందొచ్చు. అదేవిధంగా బీఏ, బీకామ్ మరియు కొన్ని బీఎస్సీ కోర్సుల యందు చేరి బ్యాచిలర్ డిగ్రీ పట్టా పొందొచ్చు. హ్యూమానిటీస్ కేటగిరిలో అందుబాటులో ఉన్న వివిధ ఒకేషనల్ కోర్సులు.

• కంప్యూటర్ గ్రాఫిక్స్ & యానిమేషన్
• టూరిజం మరియు ట్రావెల్ టెక్నిక్
• కమర్షియల్ ఆర్ట్స్