తెలుగులో 28 ఫిబ్రవరి 2024 కరెంట్ అఫైర్స్ అంశాలను చదవండి. వివిధ పోటీ పరీక్షలకు ఉపయోగపడే జాతీయ, అంతర్జాతీయ సమకాలీన అంశాలను ఈ ఆర్టికల్ ద్వారా మీకు అందిస్తున్నాం.
ఐఎల్ఒ కన్వెన్షన్‌ను ఆమోదించిన మొదటి ఆసియా దేశంగా ఫిలిప్పీన్స్
వాణిజ్య కార్యాలయాల్లో హింస మరియు వేధింపుల ఒప్పందాన్ని ఆమోదించిన మొదటి ఆసియా దేశంగా ఫిలిప్పీన్స్ అవతరించినట్లు ఇంటర్నేషనల్ లేబర్ ఆర్గనైజేషన్ (ఐఎల్ఒ) ప్రకటించింది. ఐఎల్ఒ యొక్క హింస మరియు వేధింపుల కన్వెన్షన్ 2019 (నం. 190) యొక్క ధృవీకరణను డిసెంబర్ 20 న ఫిలిప్పీన్స్ పొందినట్లు ఐఎల్ఒ డిప్యూటీ డైరెక్టర్ జనరల్ సెలెస్టే డ్రేక్‌ తెలిపారు.
దీనితో ఫిలిప్పీన్స్ ఈ ఒప్పందం ఆమోదించిన ప్రపంచంలోని 38వ దేశంగా మరియు కన్వెన్షన్ నంబర్ 190ని ఆమోదించిన మొదటి ఆసియా దేశంగా అవతరించింది. ఈ చొరవ కార్యాలయాలలో హింస మరియు వేధింపులు లేని పని వాతావరణాన్ని పెంపొందించడానికి ఫిలిప్పీన్స్ నిబద్ధతను సూచిస్తుంది.
కన్వెన్షన్ నంబర్ 190 అనేది కార్యాలయలలో అన్ని రకాల హింస మరియు వేధింపులను పరిష్కరించడానికి ప్రత్యేకంగా రూపొందించబడిన మొదటి అంతర్జాతీయ ఒప్పందం. ఇందులో శారీరక, మానసిక మరియు లైంగిక హింస మరియు వేధింపులు ఉన్నాయి. సమావేశాన్ని ఆమోదించడం ద్వారా, అటువంటి దుర్వినియోగం నుండి కార్మికులను రక్షించే సమగ్ర ఫ్రేమ్‌వర్క్‌ను అమలు చేయడానికి ఫిలిప్పీన్స్ కట్టుబడి ఉంది.
కన్వెన్షన్ నంబర్ 190ని ఆమోదించిన ప్రపంచవ్యాప్తంగా 38 అభివృద్ధి చెందుతున్నదేశాల జాబితాలో ఫిలిప్పీన్స్ చేరింది. కార్మికుల శ్రేయస్సుకు ప్రాధాన్యత ఇవ్వడం మరియు గౌరవప్రదమైన పని వాతావరణాన్ని పెంపొందించడంలో ఇతర ఆసియా దేశాలు అనుసరించడానికి ఇది ఒక శక్తివంతమైన ఉదాహరణ.
బ్రిటిష్ కాలం నాటి ముస్లిం వివాహ చట్టాన్ని రద్దు చేసిన అస్సాం
అస్సాం ప్రభుత్వం 1935 నాటి అస్సాం ముస్లిం వివాహ మరియు విడాకుల నమోదు చట్టాన్ని రద్దు చేస్తూ కీలక నిర్ణయం తీసుకుంది. బ్రిటీష్ రాజ్ కాలంలో స్థాపించబడిన ఈ చట్టం, అస్సాంలోని ముస్లిం సమాజంలో వివాహాలు మరియు విడాకుల నమోదు ప్రక్రియను నియంత్రిస్తుంది.
ఈ చట్టాన్ని అత్యంత పురాతన (కాలం చెల్లిన) చట్టంగా భావించి రద్దు చేస్తున్నట్లు ముఖ్యమంత్రి హిమంత బిస్వా శర్మ వెల్లడించారు. ఈ నిర్ణయం అస్సాంలో బాల్య వివాహాలను నిషేధించే ప్రయత్నాలలో గణనీయమైన పురోగతిని సూచిస్తుందని ఆయన తన సోషల్ మీడియా వేదికగా వెల్లడించారు.
- ఈ ఏడాది ఫిబ్రవరి 23న అస్సాం క్యాబినెట్ ఈ పాత అస్సాం ముస్లిం వివాహాలు మరియు విడాకుల నమోదు చట్టాన్ని రద్దు చేసింది.
- ఈ చట్టంలో వధువు మరియు వరుడు 18 మరియు 21 సంవత్సరాలకు చేరుకోకపోయినా వివాహ నమోదును అనుమతించే నిబంధనలను కలిగి ఉంది.
- ఈ నిర్ణయం రాష్ట్రంలో బాల్య వివాహాలను నిషేధించడం మరియు యూనిఫాం సివిల్ కోడ్ (యూసీసీ)ని అమలు చేయడం లక్ష్యంగా పెట్టుకుంది.
- యూసీసీ మతంతో సంబంధం లేకుండా భారతీయ పౌరులందరికీ వివాహం, విడాకులు, వారసత్వం మరియు దత్తతలను నియంత్రించే సాధారణ చట్టాలను ప్రతిపాదిస్తుంది.
- అయితే ముస్లిం జనాభా గణనీయంగా ఉన్న అస్సాంలో ఈ నిర్ణయం ఉద్రిక్తతలను రేకెత్తించింది.
- 2011 జనాభా లెక్కల ప్రకారం అస్సాం మొత్తం జనాభాలో ముస్లింలు 34% ఉన్నారు. ఈ రాష్ట్రంలోని మొత్తం 3.12 కోట్ల జనాభాలో 1.06 కోట్ల మంది ముస్లింలు ఉన్నారు.
- ఈ చట్టాన్ని రద్దు చేసిన తర్వాత వారి పునరావాసానికి మద్దతుగా అస్సాం ప్రభుత్వం ₹ 2 లక్షల పరిహారాన్ని ప్రకటించింది.
అస్సాం ముస్లిం వివాహ చట్టాన్ని రద్దు చేయడం వివాదాస్పద నిర్ణయం. ఇది చాలా విస్తృతమైన పరిణామాలతో కూడుకున్నది. ఇది నిజంగా బాల్య వివాహాలను పరిష్కరిస్తుందా లేదా విభజన రాజకీయ ఎజెండాను ముందుకు తీసుకువెళుతుందా అనేది కొనసాగుతున్న చర్చనీయాంశం. ఈ చర్య అస్సాంలోని ముస్లింల జీవితాలను మరియు భారతదేశంలో యూసీసీ చుట్టూ ఉన్న అనుమానాలను ఎలా ప్రభావితం చేస్తుందో కాలమే చెబుతుంది.
సుదర్శన్ సేతును ప్రారంభించిన ప్రధాని మోడీ
గుజరాత్‌లోని ద్వారకలో భారతదేశంలోనే అతి పొడవైన తీగల వంతెనను ప్రధాని నరేంద్ర మోదీ ఫిబ్రవరి 25న ప్రారంభించారు. అరేబియా సముద్రంపై నిర్మించిన ఈ 2.32 కి.మీ పొడవున్న తీగల వంతెన, దేశంలోనే అతి పొడవైనదిగా గుర్తించబడింది. ఇది గుజరాత్‌లోని దేవభూమిగా భావించే ద్వారక జిల్లాలో బేట్ ద్వారకా ద్వీపాన్ని, ఓఖా ప్రధాన భూభాగానికి కలుపుతుంది.
గతంలో బేట్ ద్వారకా ద్వీపానికి చేరుకోవడానికి ఫెర్రీలు మాత్రమే అందుబాటులో ఉండేవి, ఇవి కూడా పగలు మాత్రమే సేవలు అందించేవి. సుదర్శన్ సేతు ఈ అంతరాన్ని తగ్గించి, బేట్ ద్వారకా ద్వీపానికి వేగవంతమైన మరియు మరింత విశ్వసనీయమైన రవాణా సదుపాయాన్ని అందుబాటులోకి తెచ్చింది.
- సుదర్శన్ సేతు వంతెన నిర్మాణానికి 2017 లో ప్రధాని మోడీ శంకుస్థాపన చేశారు.
- సిగ్నేచర్ బ్రిడ్జ్'గా పిలిచే ఈ వంతెనకు సుదర్శన్ సేతు లేదా సుదర్శన్ బ్రిడ్జ్ అని పేరు పెట్టారు.
- ఇది ఓఖా ప్రధాన భూభాగ పట్టణాన్ని హిందువులకు ముఖ్యమైన పుణ్యక్షేత్రమైన బేట్ ద్వారక అనే పవిత్ర ద్వీపానికి కలుపుతుంది.
- 27.20 మీటర్ల వెడల్పుతో ఉన్న ఈ వంతెన నాలుగు లేన్లతో, ప్రతి వైపు 2.50 మీటర్ల వెడల్పు ఫుట్‌పాత్‌లు కలిగిఉంది.
- సుదర్శన్ సేతు ఫుట్‌పాత్‌ల పొడుగునా సౌర ఫలకాలను అమర్చారు. ఇవి స్థిరమైన 1 మెగావాట్ విద్యుత్‌ను ఉత్పత్తి చేసే సామర్థ్యం కలిగి ఉన్నాయి.
- ఈ వంతెన కాలిబాటలు భగవద్గీతలోని శ్లోకాలు మరియు శ్రీకృష్ణుడి చిత్రాలతో అలంకరించబడి ఉన్నాయి. ఈ మార్గం మతపరమైన ప్రాముఖ్యతను ప్రతిబింబిస్తుంది.
- సుదర్శన్ సేతు ప్రాజెక్టు మొత్తం ₹980 కోట్ల వ్యయంతో నిర్మించబడింది.
పాకిస్థాన్‌కు రావి నది నీటి ప్రవాహాన్ని పూర్తిగా నిలిపేచిన భారత్
షాపూర్ కంది బ్యారేజీ పనులు పూర్తికావడంతో, 45 ఏళ్ల నిరీక్షణ తర్వాత రావి నది నుంచి పాకిస్థాన్‌లోకి వెళ్లే నీటిని భారత్ పూర్తిగా నిలిపివేసింది. పంజాబ్, జమ్మూ కాశ్మీర్ సరిహద్దులో ఉన్న షాపూర్ కంది బ్యారేజీ నిర్మాణ పనులు గత నాలుగు దశాబ్దాలుగా కొనసాగుతున్నాయి. పంజాబ్, కాశ్మీర్ రాష్ట్రాల మధ్య అంతర్గత వివాదాల కారణంగా ఈ ఆటంకం ఏర్పడింది. దీని నిర్మాణం ఎట్టకేలకు పూర్తవడంతో, భారతదేశం ఇప్పుడు రావి జలాల్లో తనకు కేటాయించిన వాటాను పూర్తిగా వినియోగించుకోనుంది.
భారతదేశం మరియు పాకిస్తాన్ మధ్య 1960 లో సంతకం చేయబడిన సింధు జల ఒప్పందం (ఐడబ్ల్యుటి) ప్రకారం, రావి, సట్లెజ్ మరియు బియాస్ నదుల జలాలపై భారతదేశం ప్రత్యేక హక్కును కలిగి ఉంది, అయితే సింధు, జీలం మరియు చీనాబ్ నదులకు సంబంధించిన జలాల పూర్తి ప్రాప్యతను పాకిస్తాన్ కలిగి ఉంది. సింధు నదీ వ్యవస్థ నుండి నీటి హక్కులను కేటాయించే ఈ ఒప్పందం ప్రపంచ బ్యాంకు మధ్యవర్తిత్వంలో జరిగింది.
ఇప్పుడు ఐడబ్ల్యుటి ఒప్పందం ప్రకారం భారతదేశం రావి నదిని గరిష్టంగా ఉపయోగించుకోగలదు. పాత లఖన్‌పూర్ డ్యామ్ నుండి ఈ నది నీటిని మధోపూర్ కాలువకు మళ్లించడానికి, అలానే గతంలో పాకిస్తాన్ వైపు ప్రవహించే నీరు ఇప్పుడు జమ్మూ & కాశ్మీరు మరియు పంజాబ్‌లకు తరలించడానికి వీలు కలుగుతుంది.
తాజా నిర్ణయం కారణంగా జమ్మూ మరియు కాశ్మీర్‌లోని కతువా మరియు సాంబా జిల్లాల్లోని 32,000 హెక్టార్లకు పైగా భూములకు ఇప్పుడు సాగునీరు అందుతుందని ఒక నివేదిక తెలిపింది. సాగునీటితో సహా ఈ ప్రాజెక్ట్ 206 మెగావాట్ల జల విద్యుత్ ఉత్పత్తి చేసే సామర్థ్యం కలిగిఉంది. ఈ ప్రాజెక్ట్ నుండి ఉత్పత్తి చేయబడే విద్యుత్తులో పంజాబ్ ప్రధాన లబ్ధిదారునిగా ఉంటుంది. అలానే ఈ ప్రాంతంలో నూతన పర్యాటక శోభను కూడా తేనుంది.
- షాపూర్ కంది బ్యారేజీ ప్రాజెక్టుకు 1995లో మాజీ ప్రధాని పీవీ నరసింహారావు శంకుస్థాపన చేశారు.
- ఇది నీటిపారుదల మరియు జలవిద్యుత్ ఉత్పత్తి లక్ష్యంతో ప్రణాళిక చేయబడింది.
- పంజాబ్, జమ్మూ & కాశ్మీర్ రాష్ట్రాల మధ్య అంతర్గత వివాదాల కారణంగా ఈ బ్యారేజ్ పనులు వాయిదా పడుతూ వచ్చాయి.
- తిరిగి డిసెంబరు 2018లో కేంద్ర ప్రభుత్వం ఈ ప్రాజెక్టుకు పునఃప్రారంభించింది.
షాపూర్ కంది బ్యారేజీని పూర్తి చేయడం తన సొంత వ్యవసాయ అభివృద్ధికి నీటి నిర్వహణను ఆప్టిమైజ్ చేయడానికి భారతదేశం చేస్తున్న ప్రయత్నాలను సూచిస్తుంది. అయితే ఇది పాకిస్తాన్ వ్యవసాయ అవసరాల నీటి లభ్యతలో తగ్గుదలకు కారణం కావొచ్చు. ఈ ప్రాజెక్ట్, పాకిస్థాన్‌ను ప్రభావితం చేయగలిగినప్పటికీ, మౌలిక సదుపాయాల అభివృద్ధి మరియు నీటి భాగస్వామ్యంపై అంతర్జాతీయ ఒప్పందాలకు కట్టుబడి ఉండటం యొక్క ప్రాముఖ్యతను హైలైట్ చేస్తుంది.
తమిళనాడులో ఇస్రో యొక్క రెండో రాకెట్ లాంచ్‌పోర్టుకు శంకుస్థాపన
తమిళనాడులోని తూత్తుకుడి జిల్లాలోని కులశేఖర పట్టణంలో ఇస్రో యొక్క రెండవ రాకెట్ లాంచ్‌పోర్టు నిర్మాణ పనులకు ప్రధాన మంత్రి నరేంద్ర మోదీ, ఫిబ్రవరి 28, 2024న శంకుస్థాపన చేశారు. ఈ కార్యక్రమంలో ఇస్రో చైర్మన్ సోమనాథ్, అంతరిక్ష శాఖ కార్యదర్శి డాక్టర్ పవన్ కుమార్ గోయెం కూడా పాల్గొన్నారు.
కులశేఖరపట్నం, సాతంకుళం తాలూకాల్లోని పదుక్కపత్తు, పల్లకురిచ్చి, మాతవాన్‌కురిచ్చి గ్రామాల్లోని 2,233 ఎకరాల విస్తీర్ణంలో దీనిని నిర్మించనున్నరు. ఈ ప్రాజెక్టు రూ.950 కోట్ల అంచనాతో రూపొందనుంది. భారత అంతరిక్ష రంగంలో 100 శాతం ఎఫ్‌డిఐని కేంద్రం అనుమతించిన నేపథ్యంలో ఇది వాణిజ్య ఉపగ్రహ ప్రయోగాలకు వేదిక కానుంది.
ఈ ప్రాంతంలో అంతరిక్ష పరిశ్రమ కోసం పర్యావరణ వ్యవస్థను రూపొందించడానికి, తమిళనాడు ప్రభుత్వం ఇప్పటికే ఈ జిల్లాలో 2,000 ఎకరాల విస్తీర్ణంలో స్పేస్ ఇండస్ట్రియల్ మరియు ప్రొపెల్లెంట్స్ పార్క్‌ను ఏర్పాటు చేయడానికి సిద్దమోతుంది.
- ప్రస్తుతం ఆంధ్రప్రదేశ్‌లోని శ్రీహరికోటలో ఉన్న సతీష్ ధావన్ అంతరిక్ష కేంద్రం మాత్రమే దేశంలో ఉన్న ఏకైక స్పేస్‌పోర్ట్‌.
- కులశేఖర పట్టణంలో ఇస్రో యొక్క రాకెట్ లాంచ్‌పోర్టు సిద్ధమైతే అది దేశంలో రెండవ అంతరిక్ష కేంద్రం కానుంది.
- ఈ నూతన సదుపాయానికి ఫిబ్రవరి 28న ప్రధాని నరేంద్ర మోదీ శంకుస్థాపన చేయనున్నారు.
- ప్రభుత్వం రూ.950 కోట్లతో ఈ ప్రతిష్టాత్మక ప్రాజెక్టును నిర్మిస్తుంది.
సతీష్ ధావన్ అంతరిక్ష కేంద్రం నుంచి లిఫ్ట్‌ఆఫ్ తర్వాత ఆగ్నేయ దిశలో ఎగిరే ఉపగ్రహాల మాదిరిగా కాకుండా, కొత్తగా నిర్మించే కులశేఖరపట్నం ప్రయోగించే ఉపగ్రహాలు నేరుగా దక్షిణం వైపు ప్రయాణించగలవని ఇస్రో ఒక ప్రకటనలో పేర్కొంది. తద్వారా ఈ చొరవ శ్రీలంక మీదుగా రాకెట్ ఎగరకుండా దాని ఇంధనాన్ని ఆదా చేస్తుందని ఇస్రో శాస్త్రవేత్తలు తెలిపారు.
గగన్‌యాన్‌కు ఎంపికైన నలుగురు పైలట్ల పేర్లను వెల్లడించిన ప్రధాని మోదీ
భారతదేశపు మొట్టమొదటి మానవ అంతరిక్ష యాత్ర గగన్‌యాన్ కోసం ఎంపికైన నలుగురు పైలట్ల పేర్లను ప్రధాన మంత్రి నరేంద్ర మోదీ ఫిబ్రవరి 27న ప్రకటించారు. ఎంపికైన నలుగురిలో ప్రశాంత్ బాలకృష్ణన్, నాయర్, అజిత్ కృష్ణన్, అంగద్ ప్రతాప్ మరియు సుభాన్షు శుక్లా ఉన్నారు. వీరు రష్యా అంతరిక్ష సంస్థలో 13 నెలల కఠిన శిక్షణ పొందారు.
- గ్రూప్ కెప్టెన్ ప్రశాంత్ బాలకృష్ణన్ నాయర్.
- గ్రూప్ కెప్టెన్ అజిత్ కృష్ణన్.
- గ్రూప్ కెప్టెన్ అంగద్ ప్రతాప్.
- వింగ్ కమాండర్ సుభాన్షు శుక్లా.
ఈ పరిచయ కార్యక్రమం తిరువనంతపురంలోని విక్రమ్ సారాభాయ్ స్పేస్ సెంటర్ (విఎస్‌ఎస్‌సి)లో నిర్వహించబడింది. ఈ పర్యటనలో ప్రధాని వెంట కేరళ ముఖ్యమంత్రి పినరయి విజయన్, కేంద్ర మంత్రి మురళీధరన్, ఇస్రో చైర్మన్ ఎస్ సోమనాథ్ ఉన్నారు.
- గన్‌యాన్ మిషన్ భారతదేశపు మొట్టమొదటి మానవ అంతరిక్ష విమాన కార్యక్రమం.
- ఈ ప్రాజెక్టుకు క్రాఫ్ట్ లేదా వెహికల్ టు ది స్కై అనే సంస్కృత పదంతో పేరు పెట్టారు.
- గగన్‌యాన్ ప్రాజెక్ట్ 90 బిలియన్ రూపాయల వ్యయంతో అభివృద్ధి చేయబడుతుంది.
- ఈ ప్రాజెక్టు విజయవంతమైతే రష్యా, యుఎస్ మరియు చైనా తర్వాత మానవుడిని అంతరిక్షంలోకి పంపిన నాల్గవ దేశంగా భారతదేశం అవతరిస్తుంది.
- భారత్ దేశం నుండి అంతరిక్షంలో గడిపిన ఏకైక వ్యోమగామిగా రాకేష్ శర్మ ఉన్నారు. 1984లో దాదాపు ఎనిమిది రోజులు రష్యా అంతరిక్ష నౌకలో ఆయన గడిపారు.
- 2025 లో భారత్ ఈ ప్రయోగం నిర్వహించేందుకు ప్రణాళిక చేసింది.
