2023 జనవరి నెలకు సంబంధించిన సమకాలిన అంతర్జాతీయ అంశాలను తెలుగులో చదవండి. యూపీఎస్సీ, ఎస్ఎస్సీ, రైల్వే, బ్యాంకింగ్, స్టేట్ పబ్లిక్ సర్వీస్ కమిషన్ వంటి వివిధ పోటీ పోటీ పరీక్షలకు సిద్దమౌతున్న అభ్యర్థులకు ఈ అంశాలు ఉపయోగపడతాయి.
యూరోపియన్ యూరోను కరెన్సీగా స్వీకరించిన క్రొయేషియా
యూరోపియన్ యూనియన్ యొక్క సరికొత్త సభ్య దేశమైన క్రొయేషియా 1 జనవరి 2023 నుండి యూరోను కరెన్సీగా స్వీకరించింది. 2015లో లిథువేనియా చేరిన తర్వాత యూరోజోన్‌లో జాయిన్ అయినా 20వ సభ్య దేశంగా అవతరించింది. దీనితో పాటుగా 4 మిలియన్ల క్రొయేషియా జనాభాను ఐరోపా సరిహద్దు రహిత స్కెంజెన్ జోన్‌లో చేర్చింది. క్రొయేషియా రాజధాని నగరం జగ్రెబ్.
క్రొయేషియా 2003 లో ఈయూ సభ్యత్వం కోసం దరఖాస్తు చేసుకుంది. 2005 నుండి 2011 వరకు ఇది అనేక చర్చలతో పెండింగులో ఉంచబడింది. 9 డిసెంబర్ 2011న ఈయూ మరియు క్రొయేషియా నాయకులు చేరిక ఒప్పందంపై సంతకం చేశారు. 1 జూలై 2013న 27వ ఈయూ సభ్య దేశంగా క్రొయేషియా అవతరించింది.
యూరోపియన్ యూనియన్ అనేది ఐరోపాలో ఉన్న 27 సభ్య దేశాలతో కూడిన అత్యున్నత ఖండాంతర రాజకీయ మరియు ఆర్థిక సంఘం. దీనిని 1 నవంబర్ 1993 లో ఏర్పాటుచేశారు. ఈయూ మొత్తం వైశాల్యం 4,233,255.3 కిమీ². మొత్తం జనాభా సుమారు 447 మిలియన్లు. యూరోపియన్ యూనియన్ దేశాల మధ్య ఎటువంటి సరిహద్దు పరిమితులు ఉండవు. ఆయా దేశాల మధ్య సరిహద్దు దాటేందుకు వీసా అవసరం ఉండదు.
27 ఈయూ దేశాలు : ఆస్ట్రియా, బెల్జియం, బల్గేరియా, క్రొయేషియా, రిపబ్లిక్ ఆఫ్ సైప్రస్, చెక్ రిపబ్లిక్, డెన్మార్క్, ఎస్టోనియా, ఫిన్లాండ్, ఫ్రాన్స్, జర్మనీ, గ్రీస్, హంగరీ, ఐర్లాండ్, ఇటలీ, లాట్వియా, లిథువేనియా, లక్సెంబర్గ్, మాల్టా, నెదర్లాండ్స్, పోలాండ్, పోర్చుగల్, రొమేనియా, పోర్చుగల్, , స్లోవేనియా, స్పెయిన్ మరియు స్వీడన్.
బ్రెజిల్ అధ్యక్షుడిగా లూయిజ్ ఇనాసియో లూలా డా సిల్వా
లూయిజ్ ఇనాసియో లూలా డా సిల్వా జనవరి 1న బ్రెజిల్ అధ్యక్షుడిగా మూడవసారి పదవీ బాధ్యతలు స్వీకరించారు. లూలా డా సిల్వా గతంలో 2003 నుండి 2010 వరకు బ్రెజిల్‌కు నాయకత్వం వచించాడు. మిలియన్ల మంది బ్రెజిలియన్లు పేదరికం నుండి తప్పించుకోవడానికి సహాయం చేసిన నాయకుడిగా ఘనత పొందారు.
లూలా డా సిల్వా గతంలో మనీలాండరింగ్‌ సంబంధించి భారీ అవినీతి కుంభకోణంలో చిక్కుకున్నాడు. సుమారు ఏడాదిన్నర జైలు జీవితం గడిపాడు. అయితే 2019లో ఈ కేసు కొట్టివేయబడింది. ఈ కేసులో న్యాయమూర్తి పక్షపాతంతో వ్యవహరించారనే కారణంతో ఆ దేశ అత్యున్నత న్యాయస్థానం అతని నేరారోపణను రద్దు చేసింది.
చైనాలో తొలి సెమీ హైస్పీడ్ హైడ్రోజన్ రైలు ప్రారంభం
అర్బన్ రైల్వేస్ కోసం ఆసియాలో మొట్టమొదటి హైడ్రోజన్ ఆధారిత రైళ్లను ప్రారంభించిన దేశంగా చైనా అవతరించింది. గంటకు160 కిమీ గరిష్ట వేగంతో నడిచే ఈ రైళ్లు, ఒకసారి రీఫిల్ చేస్తే 600 కిలోమీటర్ల వరకు ప్రయాణించనున్నాయి. ఈ రైళ్లను చైనా రైల్వే రోలింగ్ స్టాక్ కార్పొరేషన్ లిమిటెడ్ రూపొందించింది.
ప్రపంచ మొదటి హైడ్రోజన్ రైలును జర్మనీ 2021లో ప్రారంభించింది. ఇది ఒకసారి ఇంధనం నింపితే దాదాపు 1175 కిలోమీటర్ల దూరం ప్రయాణించే సామర్థ్యం కలిగి ఉంది. హైడ్రోజన్ రైళ్లు రాబోయే కాలంలో పర్యావరణ కాలుష్యం తగ్గించడంలో, శిలాజ ఇంధనాల వాడకాన్ని తగ్గించడంలో గణనీయమైన పాత్రను పోషించనున్నాయి. కర్బన ఉద్గారాల తగ్గించేందుకు ఇప్పటికే ప్రపంచ దేశాలన్నీ నడుం బిగించడంతో హైడ్రోజన్ ఆధారిత రవాణా వ్యవస్థ ప్రత్యామ్నాయంగా నిలుస్తుంది.
ఇండియా కూడా డిసెంబర్ 2023 నాటికి హెరిటేజ్ మార్గాల్లో హైడ్రోజన్ రైళ్లను నడిపేందుకు సిద్దమవుతుంది. భారతదేశంలో హైడ్రోజన్‌తో నడిచే కొత్త రైళ్లకు వందే మెట్రో అని పేరు పెట్టనున్నారు. 1950-1960ల నుండి ఉపయోగించబడుతున్న ప్రస్తుత లాట్ రైళ్లతో వీటిని భర్తీ చేయనున్నారు. హైడ్రోజన్ రైళ్లు కర్బన ఉద్గారాలను భారీగా తగ్గించడంలో మరియు వాతావరణ లక్ష్యాలను సాధించడంలో దేశానికి సహాయపడతాయి.
