మేజర్ ధ్యాన్ చంద్ స్పోర్ట్స్ యూనివర్సిటీకి ప్రధాని శంకుస్థాపన
ఉత్తరప్రదేశ్‌లోని మీరట్ జిల్లాలో మేజర్ ధ్యాన్ చంద్ స్పోర్ట్స్ యూనివర్సిటీకి ప్రధాని నరేంద్ర మోదీ ఆదివారం శంకుస్థాపన చేశారు. 700 కోట్ల అంచనా వ్యయంతో జిల్లాలోని సర్ధానా పట్టణం శివార్లలోని సలావా మరియు కైలీ గ్రామాలలో యూనివర్సిటీని స్థాపించనున్నారు. ధ్యాన్ చంద్ భారతీయ హాకీ సూపర్ స్టారుగా ప్రసిద్ధి. ఈయన్ను అభిమానంగా హాకీ విజర్డ్ లేదా మాంత్రికుడిగా సంబోధిస్తారు. ధ్యాన్ చంద్ 1928, 1932, మరియు 1936 ఒలింపిక్స్‌లో భారతదేశానికి ప్రాతినిధ్యం వహించి, విజేతగా నిలిచాడు.
హైదరాబాద్‌ ఆల్ ఇండియా ఇండస్ట్రియల్ ఎగ్జిబిషన్ 'నుమాయిష్ 2022'
తెలంగాణ గవర్నర్ తమిళిసై సౌందరరాజన్, హైదరాబాద్‌లో 81వ ఆల్ ఇండియా ఇండస్ట్రియల్ ఎగ్జిబిషన్ ' నుమాయిష్ 2022'ను ప్రారంభించారు. నుమాయిష్ (Numaish) ఎగ్జిబిషన్ ఏటా తెలంగాణాలోని హైదరాబాద్‌లో జరిగే వార్షిక వినియోగదారుల ప్రదర్శన. ఈ ఎగ్జిబిషన్ నాంపల్లిలోని 23 ఎకరాల శాశ్వత వేదికలో ఏటా 46 రోజుల పాటు నిర్వహించబడే ప్రపంచంలోని ఏకైక ఈవెంట్‌గా ప్రసిద్ధికెక్కింది. ఈ ఏడాది 1 జనవరి నుండి ఫిబ్రవరి 15 వరకు ఈ ఎగ్జిబిషన్ నిర్వహించనున్నారు.
ఈ ఎగ్జిబిషన్ ద్వారా వివిధ రాష్ట్ర మరియు కేంద్ర ప్రభుత్వ శాఖలు అలాగే ప్రభుత్వ రంగ సంస్థలు తమ ఉత్పత్తులను ప్రజలకు చేరువయ్యేందుకు ఉపయోగించుకుంటాయి. దీనిని మొదట గవర్నర్ జనరల్ ఆఫ్ ఇండియా సి రాజగోపాలాచారి ప్రారంభించారు. 1949 నుండి ఇది ఆల్ ఇండియా ఇండస్ట్రియల్ ఎగ్జిబిషన్‌గా పేరు మార్చబడింది. 2009లో దీని పేరు నుమాయిష్‌గా మార్చబడింది. నుమాయిష్ అనగా Numaish Masnuāt-e-Mulki (స్థానిక ఉత్పత్తుల ప్రదర్శన) అని అర్ధం.
ఒడిశా బాల్య వివాహ రహిత జిల్లాగా గంజాం
ఒడిశాలోని గంజాం జిల్లాను బాల్య వివాహ రహిత జిల్లాగా ప్రకటిస్తున్నట్లు ఆ జిల్లా కలెక్టర్ విజయ్ అమృత కులంగే తెలిపారు. ఒడిశా రాష్ట్రంలో బాల్య వివాహ రహిత జిల్లాగా ప్రకటించిన మొదటి జిల్లా గంజాం చరిత్రకెక్కింది. ఈ జిల్లా పరిధిలో 3,309 గ్రామాలు, 503 గ్రామ పంచాయతీలు బాల్య వివాహ రహితంగా ఉన్నట్లు వెల్లడించారు. బాల్య వివాహలను రూపుమాపేందుకు ఈ జిల్లా అడ్మినిస్ట్రేషన్ 2019 లో ప్రారంభించిన నిర్భయ కాధీ ప్రోగ్రాంలో భాగంగా యూనిసెఫ్ సహాయ సహకారాలతో ఈ అద్భుతాన్ని సాధించారు.
దేశంలో మొదటి ఎల్‌పిజి ఎనేబుల్డ్ & స్మోక్ ఫ్రీ స్టేట్‌గా హిమాచల్ ప్రదేశ్
దేశంలో మొదటి ఎల్‌పిజి ఎనేబుల్డ్ & స్మోక్ ఫ్రీ స్టేట్‌గా హిమాచల్ ప్రదేశ్ రికార్డుకెక్కింది. ఈ అరుదైన ఘనతను కేంద్రం ఉజ్వల పథకంతో పాటుగా రాష్ట్ర ప్రభుత్వం అందుబాటులోకి తెచ్చిన గ్రాహిణి సువిధ యోజన ద్వారా ఈ మైలురాయిని సాధించారు. కట్టెల పొయ్యలను వదిలించుకోవడానికి ప్రభుత్వం ఉజ్వల పథకాన్ని ప్రవేశపెట్టింది. అలానే గ్రామీణ ప్రాంతాల్లోని మహిళలను ఆదుకునేందుకు గ్రాహిణి సువిధ పథకాన్ని ప్రవేశపెట్టారు.
హైద్రాబాదులో భారతదేశపు మొదటి 'ఓపెన్ రాక్' మ్యూజియం ప్రారంభం
కేంద్ర సైన్స్ & టెక్నాలజీ సహాయ మంత్రి (స్వతంత్ర బాధ్యత) డాక్టర్ జితేంద్ర సింగ్ భారతదేశపు మొట్టమొదటి 'ఓపెన్ రాక్ మ్యూజియం'ని హైద్రాబాదులోని కౌన్సిల్ ఆఫ్ సైంటిఫిక్ & ఇండస్ట్రియల్ రీసెర్చ్ - నేషనల్ జియోఫిజికల్ రీసెర్చ్ ఇన్‌స్టిట్యూట్ (CSIR-NGRI) ప్రాంగణంలో ప్రారంభించారు. ఈ మ్యూజియంలో భారతదేశంలోని వివిధ కాలాల నాటి 35 రకాల విభిన్న రాళ్లను ప్రదర్శనకు ఉంచారు. విభిన్న రాళ్లపై ప్రజలకు అవగహన కల్పించేందుకు ఈ మ్యూజియం ఏర్పాటు చేసారు.
ఉత్తరప్రదేశ్‌కు నేషనల్ వాటర్ అవార్డు
కేంద్ర జలశక్తి మంత్రిత్వ శాఖ యొక్క నేషనల్ వాటర్ అవార్డ్ 2020 ను ఉత్తరప్రదేశ్ కైవసం చేసుకుంది. భారతదేశంలో జలవనరుల నిర్వహణకు సంబంధించి సమగ్ర విధానాన్ని అవలంబించినందుకుగానూ ఇది అవార్డు అందిస్తారు. నేషనల్ వాటర్ అవార్డును 2018 నుండి కేంద్ర జలశక్తి మంత్రిత్వ శాఖ అందిస్తుంది.
ఈశాన్య భారత్'లో మొదటి జనశతాబ్ది ఎక్స్ప్రెస్ రైలు
ఈశాన్య రాష్ట్రాలలో మొదటి జనశతాబ్ది ఎక్స్ప్రెస్ రైలును కేంద్ర రైల్వే, కమ్యూనికేషన్, ఎలక్ట్రానిక్స్ మరియు ఇన్ఫర్మేషన్ టెక్నాలజీ మంత్రి అశ్విని వైష్ణవ్ ప్రారంభించారు. మణిపూర్ నుండి అస్సాం మీదుగా త్రిపురను కలిపే మొదటి జనశతాబ్ది ఎక్స్ప్రెస్ రైలును 08 జనవరి 2022న రైల్వే బోర్డు నుండి వీడియో లింక్ ద్వారా జెండా ఊపి ప్రారంభించారు.
జన్ శతాబ్ది ఎక్స్ప్రెస్ అనేది శతాబ్ది ఎక్స్‌ప్రెస్‌కి 'డౌన్-స్కేల్' వెర్షన్‌గా పరిగణించవచ్చు. ఇవి ప్రధాన మెట్రోపాలిటన్ నగరాలను కలుపుతూ, తక్కువ టిక్కెట్ ధరతో ప్రీమియం ప్రయాణ అనుభూతిని అందించే ఇంటర్-సిటీ సూపర్‌ఫాస్ట్ రైళ్లు. దీన్ని సామాన్యుల శతాబ్ది ఎక్స్ప్రెస్. దేశంలో ప్రస్తుతం ప్రధాన నగరాలు మరియు పట్టణాలను కలుపుతూ 23 జతల జన శతాబ్ది రైళ్లు నడుస్తున్నాయి.
కెవాడియా రైల్వే స్టేషన్‌కు ఏక్తా నగర్ రైల్వే స్టేషన్‌గా పేరు మార్పు
గుజరాత్‌లోని నర్మదా జిల్లాకు చెందిన కేవడియా రైల్వే స్టేషన్ పేరును ఏక్తా నగర్ రైల్వేగా మార్చేందుకు రైల్వే మంత్రిత్వ శాఖ ఆమోదం తెలిపింది. రైల్వే స్టేషన్ కోడ్ KDCY నుండి EKNR కు మార్చబడింది.
