వీక్లీ కరెంట్ అఫైర్స్ 03 ఏప్రిల్ 2023 తెలుగులో ఉచితంగా పొందండి. ఏపీపీఎస్సీ, టీఎస్పీఎస్సీ, యూపీఎస్సీ, స్టాఫ్ సెలక్షన్ కమిషన్, రైల్వే, బ్యాంకింగ్ వంటి వివిధ పోటీ పరీక్షలకు సిద్ధమయ్యే ఔత్సాహికుల కోసం తాజాగా చోటు చేసుకున్న జాతీయ, అంతర్జాతీయ సమకాలీన అంశాలను పోటీ పరీక్షల దృక్కోణంలో అందిస్తున్నాం.
అసోచామ్ నూతన అధ్యక్షుడిగా అజయ్ సింగ్
స్పైస్‌జెట్ ఛైర్మన్ & మేనేజింగ్ డైరెక్టర్ అజయ్ సింగ్, అసోసియేటెడ్ ఛాంబర్స్ ఆఫ్ కామర్స్ అండ్ ఇండస్ట్రీ ఆఫ్ ఇండియా (అసోచామ్) యొక్క నూతన అధ్యక్షుడిగా బాధ్యతలు స్వీకరించారు. ఇటీవలే అసోచామ్ అధ్యక్షుడుగా పదవీకాలాన్ని పూర్తి చేసిన సుమంత్ సిన్హా స్థానంలో ఈ నూతన బాధ్యతలు నిర్వర్తించనున్నారు.
అసోసియేటెడ్ ఛాంబర్స్ ఆఫ్ కామర్స్ అండ్ ఇండస్ట్రీ ఆఫ్ ఇండియా అనేది న్యూ ఢిల్లీలో ఉన్న ప్రభుత్వేతర వాణిజ్య మరియు న్యాయవాద సమూహం. ఈ సంస్థ భారతదేశంలో వ్యాపార మరియు వాణిజ్య సమస్యలు మరియు కార్యక్రమాల మధ్య ఇంటర్‌ఫేస్‌గా పనిచేస్తుంది. దేశీయ వ్యాపార సంస్థలకు అంతర్జాతీయ వాణిజ్యాన్ని ప్రోత్సహించడంలో ఈ అసోసియేషన్ ప్రత్యేక పాత్ర వహిస్తుంది. దీనిని 1920లో డాక్టర్ నిరంజన్ హిరానందని స్థాపించారు.
స్టార్ స్పోర్ట్స్ బ్రాండ్ అంబాసిడర్‌గా రణ్‌వీర్ సింగ్
ప్రముఖ బాలీవుడ్ నటుడు రణవీర్ సింగ్, స్టార్ స్పోర్ట్స్ ఇండియా నూతన బ్రాండ్ అంబాసిడర్‌గా సంతకం చేశారు. ప్రస్తుతం ప్రారంభమైన ఇండియన్ ప్రీమియర్ లీగ్‌తో పాటుగా ఇతర స్టార్ స్పోర్ట్స్ క్రీడా ఈవెంట్‌ల ప్రచారాలలో కూడా పాల్గొంటాడు. ఈ జాబితాలో త్వరలో జరగబోయే వరల్డ్ టెస్ట్ ఛాంపియన్షిప్ ఫైనల్, ప్రీమియర్ లీగ్, ప్రో కబడ్డీ, ఆసియా కప్ మరియు ఐసీసీ క్రికెట్ ప్రపంచ కప్ వంటి స్పోర్ట్స్ ఈవెంట్స్ ఉన్నాయి.
ప్రజాస్వామ్య శిఖరాగ్ర సదస్సులో ప్రసంగించిన ప్రధాని మోదీ
ప్రధాన మంత్రి నరేంద్ర మోదీ, మార్చి 29న నిర్వహించిన ప్రజాస్వామ్య శిఖరాగ్ర సదస్సులో వర్చువల్‌గా, వీడియో కాన్ఫరెన్సింగ్ ద్వారా ప్రసంగించారు. ప్రపంచ వ్యాప్తంగా అనేక సవాళ్లు ఉన్నప్పటికీ నేడు భారత్ అత్యంత వేగంగా అభివృద్ధి చెందుతున్న ప్రధాన ఆర్థిక వ్యవస్థగా ఉందని ప్రధాని మోదీ అన్నారు. ప్రజాస్వామ్యం అనేది పౌరుల నమ్మకంపై ఆధారపడి ఉంటుందని, వారి అవసరాలు మరియు ఆకాంక్షలు నెరవేర్చడమే ప్రభుత్వాల ప్రధాన కర్తవ్యమని వెల్లడించారు. భారతదేశంలో పాలకులు వారసత్వంగా లేరని, భారతదేశం నిజానికి ప్రజాస్వామ్యానికి తల్లి అని మోదీ అభివర్ణించారు.
29 మరియు 30 తేదీలలో యునైటెడ్ స్టేట్స్ నిర్వహించే ఈ సమ్మిట్ ఫర్ డెమోక్రసీ 2023కి దక్షిణ కొరియా అధ్యక్షుడు యూన్ సుక్ యోల్ ఆతిథ్యం ఇస్తున్నారు. సహ-హోస్ట్‌లుగా నెదర్లాండ్స్, కోస్టా రికా, జాంబియా దేశాలు వ్యవహరిస్తున్నాయి. గ్రీస్, ఇజ్రాయెల్, ఇటలీ, కెన్యా, క్రొయేషియా మరియు తైమూర్-లెస్టే అనే ఆరు దేశాల అధ్యక్షులు మరియు ప్రధానమంత్రులు కూడా శిఖరాగ్ర సమావేశంలో ప్రసంగించారు. ఈ సమావేశానికి పాకిస్తాన్ గైర్హాజరు అయ్యింది.
సమ్మిట్ ఫర్ డెమోక్రసీ అనేది "స్వదేశంలో ప్రజాస్వామ్యాన్ని పునరుద్ధరించడానికి మరియు విదేశాలలో నిరంకుశ పాలనలను ఎదుర్కోవడానికి" యునైటెడ్ స్టేట్స్ నిర్వహించే వర్చువల్ సమ్మిట్. దీనికి సంబంధించి మొదటి శిఖరాగ్ర సమావేశం డిసెంబర్ 9-10, 2021లో జరిగింది. ప్రస్తుతం జరుగుతున్నది రెండవది. ప్రజాస్వామ్యాన్ని బలోపేతం చేయడం మరియు నిరంకుశత్వానికి వ్యతిరేకంగా రక్షించడం, అవినీతిని పరిష్కరించడం, మానవ హక్కుల పట్ల గౌరవాన్ని ప్రోత్సహించడం దీని ప్రధాన లక్ష్యం.
ఐడబ్ల్యుఎఫ్ వరల్డ్ యూత్ ఛాంపియన్‌షిప్‌లో భారత వెయిట్‌లిఫ్టర్‌కి కాంస్యం
అల్బేనియాలోని డ్యూరెస్‌లో జరిగిన ఐడబ్ల్యుఎఫ్ వరల్డ్ యూత్ ఛాంపియన్‌షిప్‌లో భారత వెయిట్‌లిఫ్టర్ భరాలీ బెడబ్రేట్, పురుషుల 67 కిలోల కాంస్య పతకాన్ని కైవసం చేసుకున్నాడు. 15 ఏళ్ల భరాలీ బెడబ్రేట్, మొత్తం 267kg (119kg+148kg) బరువును ఎత్తి మూడవ స్థానంలో నిలిచాడు. 13-17 సంవత్సరాల మధ్య వయస్సు గల లిఫ్టర్లు వరల్డ్ యూత్ ఛాంపియన్‌షిప్‌లో పాల్గొనేందుకు అర్హులు.
అర్మేనియాకు చెందిన సెరియోజా బర్సెఘ్యాన్ 275 కేజీలు (128 కేజీ+147 కేజీలు) మరియు సౌదీ అరేబియాకు చెందిన మహ్మద్ అల్ మార్జౌక్ 270 కేజీలు (119 కేజీలు+148 కేజీలు) వరుసగా బంగారు, రజత పతకాలను గెలుచుకున్నారు. కాంటినెంటల్ మరియు వరల్డ్ ఛాంపియన్‌షిప్‌లలో స్నాచ్, క్లీన్ & జెర్క్ మరియు టోటల్ లిఫ్ట్‌లకు విడివిడిగా పతకాలు ఇవ్వబడతాయి, అయితే ఒలింపిక్ క్రీడలలో మొత్తం లిఫ్ట్‌కు కేవలం ఒక పతకం మాత్రమే ఇవ్వబడుతుంది.
చండీగఢ్‌లో జీ20 రెండో వ్యవసాయ ప్రతినిధుల సమావేశం
భారతదేశం యొక్క G20 ప్రెసిడెన్సీలో అగ్రికల్చరల్ వర్కింగ్ గ్రూప్ (AWG) రెండవ అగ్రికల్చరల్ డిప్యూటీస్ మీటింగ్ 2023ను మార్చి 29 నుండి 31 మధ్య చండీగఢ్‌లో నిర్వహించారు. ఈ సమావేశానికి 19 సభ్య దేశాలు, 10 ఆహ్వానించబడిన దేశాలు మరియు 10 అంతర్జాతీయ సంస్థల నుండి ప్రతినిధులు హాజరయ్యారు. దీనికి సంబంధించిన మొదటి అగ్రికల్చర్ డిప్యూటీస్ మీటింగ్ ఇండోర్‌లో, 15 ఫిబ్రవరి 2023న జరపబడింది.
ఈ కార్యక్రమంలో నాలుగు వ్యవసాయ నేపథ్య రంగాలపై దృష్టి సారించారు. అందులో మొదటిది ఆహార భద్రత మరియు పోషకాహారం, రెండోవది వాతావరణ స్మార్ట్ విధానంతో స్థిరమైన వ్యవసాయం, మూడవది సమగ్ర వ్యవసాయ విలువ గొలుసులు, ఇక చివరిగా ఆహార, వ్యవసాయ రంగాల్లో డిజిటలైజేషన్ అంశాలు ఉన్నాయి.
ముంబైలో మొదటి ట్రేడ్ అండ్ ఇన్వెస్ట్‌మెంట్ వర్కింగ్ గ్రూప్ మీటింగ్
కేంద్ర ఆర్థిక శాఖ సహాయ మంత్రి డాక్టర్ భగవత్ కిషన్‌రావ్ కరద్, మొదటి ట్రేడ్ & ఇన్వెస్ట్‌మెంట్ వర్కింగ్ గ్రూప్ మీటింగ్‌ను మార్చి 29న ముంబైలో ప్రారంభించారు. ఈ సమావేశానికి జీ20 సభ్య దేశాలు, ఆహ్వానిత దేశాలు, ప్రాంతీయ సమూహాలు మరియు అంతర్జాతీయ సంస్థల నుండి 100 మందికి పైగా ప్రతినిధులు హాజరయ్యారు.
మొదటి సెషన్‌లో, 'ట్రేడ్ ఫర్ గ్రోత్ అండ్ ప్రోస్పెరిటీ' అంశంపై ఇన్‌స్టిట్యూట్ ఆఫ్ ఎకనామిక్ గ్రోత్ (IEG), ఢిల్లీ, వరల్డ్ బ్యాంక్ (WB), మరియు యునైటెడ్ నేషన్స్ ఎకనామిక్ అండ్ సోషల్ కమిషన్ ఫర్ ఆసియా అండ్ పసిఫిక్ (UNESCAP) ప్రెజెంటేషన్‌ అందించాయి. రెండవ సెషన్‌లో ఇండియన్ స్కూల్ ఆఫ్ బిజినెస్ హైదరాబాద్ & యునైటెడ్ నేషన్స్ కాన్ఫరెన్స్ ఆన్ ట్రేడ్ అండ్ డెవలప్మెంట్ ద్వారా 'ట్రేడ్ అండ్ రెసిలెంట్ గ్లోబల్ వాల్యూ చెయిన్స్' అనే అంశంపై ప్రదర్శన ఇచ్చారు.
ఎలిఫెంటా కేవ్స్ వరకు ఈత కొట్టిన మొదటి వ్యక్తిగా కృష్ణ ప్రకాష్
'డ్రౌనింగ్ ప్రివెన్షన్ అవేర్‌నెస్' ప్రచారంలో భాగంగా, ఇండియన్ పోలీస్ సర్వీస్ అధికారి కృష్ణ ప్రకాష్, గేట్‌వే ఆఫ్ ఇండియా నుండి ముంబైలోని ఎలిఫెంటా గుహలకు ఈదుకుంటూ వెళ్లిన మొదటి వ్యక్తిగా నిలిచారు. 16.20 కిలోమీటర్ల ఈ యాత్రను కేవలం 5 గంటల 26 నిమిషాల్లో పూర్తి చేసిన తొలి వ్యక్తిగా నిలిచారు. డ్రౌనింగ్ ప్రివెన్షన్ అవేర్‌నెస్ అనేది 1-24 సంవత్సరాల వయస్సు గల పిల్లలు మరియు యువకులు నీటిలో మునిగిపోకుండా అవగహన కల్పించే కార్యక్రమం. దీనిని ఏటా జూలై 25న నిర్వహిస్తారు. 2021లో యూఎన్ జనరల్ అసెంబ్లీ దీనిని ప్రారంభించింది.
2017లో ఐరన్‌మ్యాన్ ట్రయాథ్లాన్‌ను పూర్తిచేసిన తర్వాత ఈయన ఐరన్‌మ్యాన్‌గా ప్రసిద్ధి చెందాడు. ట్రయాథ్లాన్‌ ఈవెంట్‌లో భాగంగా 15 గంటల వ్యవధిలో 3.8 కిలోమీటర్ల ఈత, 180.2 కిలోమీటర్ల సైకిల్ రైడ్ మరియు 42.2 కిలోమీటర్ల పరుగును పూర్తి చేయాల్సి ఉంటుంది. ఏ ఘనత సాధించిన మొదటి సివిల్ సర్వెంట్ ఆఫీసరుగా గుర్తింపు పొందాడు.
నవీన్ జిందాల్‌కి లైఫ్‌టైమ్ అచీవ్‌మెంట్ అవార్డు
డల్లాస్‌లోని టెక్సాస్ విశ్వవిద్యాలయం, భారతీయ పారిశ్రామికవేత్త నవీన్ జిందాల్‌కు లైఫ్‌టైమ్ అచీవ్‌మెంట్ అవార్డు అందించింది. ఈ అవార్డును 25 మార్చి 2023న విశ్వవిద్యాలయం నిర్వహించిన ఒక వేడుకలో అందుకున్నారు. వ్యాపార, రాజకీయ, విద్యారంగంలో ఆయన సేవలకు గాను ఈ గౌరవాన్ని అందించారు. 1992లో ఇదే యూనివర్సిటీ నుంచి నవీన్ జిందాల్‌ గ్రాడ్యుయేషన్ పూర్తిచేశారు. ఈ అవార్డు యూనివర్సిటీ ఆఫ్ టెక్సాస్ పూర్వ విద్యార్ధులకు అందించే అత్యున్నత గౌరవంగా పరిగణించబడుతుంది.
గ్రామీణ నిరుద్యోగుల కోసం 'క్యాప్టివ్ ఎంప్లాయ్‌మెంట్' పథకం
దీన్ దయాళ్ ఉపాధ్యాయ కౌశల్య యోజన కింద 'క్యాప్టివ్ ఎంప్లాయ్‌మెంట్' అనే నూతన కార్యక్రమాన్ని కేంద్ర గ్రామీణాభివృద్ధి శాఖ మంత్రి శ్రీ గిరిరాజ్ సింగ్, మార్చి 28న న్యూఢిల్లీలో ప్రారంభించారు. ఈ ప్రోగ్రాం కింద 31,000 మందికి పైగా గ్రామీణ యువతకు వివిధ అంశాల యందు నైపుణ్య శిక్షణ అందివ్వనున్నారు. శిక్షణ పొందిన యువతకు వారి కంపెనీ లేదా అనుబంధ సంస్థలో ఉపాధి కల్పిస్తారు.
దీన్ దయాళ్ ఉపాధ్యాయ కౌశల్య యోజన కింద గ్రామీణ యువతకు జీవనోపాధి కల్పించడం కోసం, ప్రభుత్వం 19 మంది పరిశ్రమ, శిక్షణ సంస్థల యజమానులతో అవగాహన ఒప్పందాలు కుదుర్చుకుంది. ఎంపిక చేయబడిన క్యాప్టివ్ ఎంప్లాయర్‌లు గ్రామీణ పేద యువతకు వారి సంబంధిత పరిశ్రమలతో పాటుగా ఆతిథ్యం, దుస్తులు & వస్త్రాలు, తయారీ, ఐటీ, టెలికాం, రిటైల్, పవర్ మొదలైన వాటిలో శిక్షణను అందిస్తారు.
దీన్ దయాళ్ ఉపాధ్యాయ గ్రామీణ కౌశల్య యోజన అనేది నేషనల్ రూరల్ లైవ్లీహుడ్ మిషన్ ఆధ్వర్యంలో గ్రామీణాభివృద్ధి మంత్రిత్వ శాఖ యొక్క ప్లేస్‌మెంట్ లింక్డ్ స్కిల్లింగ్ ప్రోగ్రామ్. ఈ కార్యక్రమం గ్రామీణ పేద యువతకు ఉపాధి కల్పిస్తుంది. ఇది 25 సెప్టెంబర్ 2014న ప్రారంభించబడింది. ఈ కార్యక్రమం ప్రస్తుతం 27 రాష్ట్రాలు, 4 యుటిలలో 877 ప్రాజెక్ట్ ఇంప్లిమెంటేషన్ ఏజెన్సీలతో, 2,369 శిక్షణా కేంద్రాల ద్వారా అమలు చేయబడుతుంది.
ఢిల్లీలో మొదటి అంతర్జాతీయ క్వాంటం కమ్యూనికేషన్ కాన్‌క్లేవ్
మార్చి 27-28 తేదీలలో న్యూ ఢిల్లీలోని విజ్ఞాన్ భవన్‌లో 'ఫస్ట్ ఇంటర్నేషనల్ క్వాంటం కమ్యూనికేషన్ కాన్‌క్లేవ్'ను నిర్వహించారు. రైల్వేల మంత్రి అశ్విని వైష్ణవ్ మరియు కమ్యూనికేషన్స్ శాఖ సహాయ మంత్రి దేవుసిన్హ చౌహాన్‌లు ఈ కాన్‌క్లేవ్ ప్రారంభించారు. ఈ సమావేశంలో క్వాంటం కమ్యూనికేషన్ టెక్నాలజీలలో తాజా పురోగతుల గురించి చర్చలు జరిపారు.
ఈ కార్యక్రమాన్ని టెలికమ్యూనికేషన్స్ స్టాండర్డ్స్ డెవలప్మెంట్ సొసైటీ ఇండియా మరియు సిడాట్ కలిసి నిర్వహించాయి. ఇదే వేదిక ద్వారా పండిట్ దీనదయాళ్ ఉపాధ్యాయ టెలికాం స్కిల్ ఎక్సలెన్స్ అవార్డులను కూడా అందించారు. డిపార్ట్‌మెంట్ ఆఫ్ టెలికమ్యూనికేషన్స్ అందించే ఈ అవార్డులను టెలికాం రంగంలో అత్యుత్తమ సేవలు అందించే సంస్థలకు అందజేస్తారు.
- స్టెరిలైట్ టెక్నాలజీస్ లిమిటెడ్ (పూణే) : టెలికాం రంగంలో పూణే నైపుణ్యాభివృద్ధి సేవలు
- విహాన్ నెట్‌వర్క్స్ లిమిటెడ్ (గురుగ్రామ్) : గ్రామీణ ప్రాంతాలలో సౌరశక్తితో నడిచే 4జీ ర్యాన్ యొక్క సాంకేతిక అభివృద్ధి
- క్యూన్యూ ల్యాబ్స్ ప్రైవేట్ లిమిటెడ్ (బెంగళూరు) : క్వాంటం కమ్యూనికేషన్ మరియు సెక్యూరిటీ సొల్యూషన్‌లో సేవలు
- ధృవ స్పేస్ ప్రైవేట్ లిమిటెడ్ (హైదరాబాద్) : శాటిలైట్ కమ్యూనికేషన్ రంగంలో సేవలు
- ఇంటోట్ టెక్నాలిజీస్ ప్రైవేట్ లిమిటెడ్ (ఎర్నాకులం) : సాఫ్ట్‌వేర్ డిఫైన్డ్ రేడియో రిసీవర్ అభివృద్ధి కోసం
ఆల్ టైమ్ గరిష్ఠ స్థాయిని తాకిన భారతీయ ఎగుమతులు
2021-22 ఆర్థిక సంవత్సరంలో భారతదేశ మొత్తం ఎగుమతులు $750 బిలియన్ల ఆల్ టైమ్ గరిష్ఠ స్థాయిని అధిగమించినట్లు కేంద్ర వాణిజ్య మంత్రి పీయూష్ గోయల్ వెల్లడించారు. ఈ ఘనతను స్వాతంత్ర్యం వచ్చిన 75వ సంవత్సరంలో, మనం ఆజాదీ కా అమృత్ మహోత్సవ్‌ను జరుపుకుంటున్న సమయంలో సాధించడం సంతోషకరమని ఆనందం వ్యక్తం చేశారు.
న్యూఢిల్లీలో జరిగిన అసోచామ్ వార్షిక సెషన్ 2023లో ప్రసంగించిన ఆయన, భారతదేశం యొక్క పోటీతత్వాన్ని బలోపేతం చేయడంలో తమ ప్రభుత్వం విజయవంతమైందని, ప్రపంచం మొత్తం మాంద్యంలో ఉన్నప్పటికీ, మెజారిటీ అభివృద్ధి చెందిన దేశాలలో ద్రవ్యోల్బణం ఎప్పుడూ లేనంత ఎక్కువగా ఉన్నప్పటికీ, భారతదేశ ఆర్థిక వ్యవస్థ పనితీరు పురోగమనంతో ముందుకు సాగుతుందని వెల్లడించారు. బలమైన స్థూల ఆర్థిక వ్యవస్థ, దృఢమైన విదేశీ మారక నిల్వలు, తక్కువ ద్రవ్యోల్బణం దేశ విజయ రహస్యాలని వెల్లడించారు.
నేషనల్ ఇన్‌ఫ్రాస్ట్రక్చర్ పైప్‌లైన్, పీఎం గతి శక్తి, యూనిఫైడ్ లాజిస్టిక్స్ ఇంటర్‌ఫేస్ ప్లాట్‌ఫారమ్ మొదలైన మౌలిక సదుపాయాల అభివృద్ధికి ప్రభుత్వం చేపట్టిన వివిధ కార్యక్రమాలు చక్కని ఫలితాలను అందించినట్లు వెల్లడించారు. ఆస్ట్రేలియా మరియు యుఎఇతో భారతదేశం సంతకం చేసిన స్వేచ్ఛా వాణిజ్య ఒప్పందాలు (ఎఫ్‌టిఎ) ద్వారా మూడు దేశాల పారిశ్రామిక అభివృద్ధికి దోహద పడనుందని తెలియజేసారు.
నాగాలాండ్ మున్సిపల్ చట్టం 2001 రద్దుకు తీర్మానం
నాగాలాండ్ మున్సిపల్ చట్టం 2001ని తక్షణమే రద్దుచేసే తీర్మానానికి ఆ రాష్ట్ర అసెంబ్లీ ఏకగ్రీవంగా ఆమోదం తెలిపింది అలానే కొత్త చట్టం ఏర్పాటుకు నడుంబిగించింది. వివాదాస్పదమైన ఈ బిల్లు 2016 నుండి ఆ రాష్ట్రంలో స్థానిక సంస్థల ఎన్నికల నిర్వహణకు ఆటంకం కల్గిస్తుంది. నాగాలాండ్ మున్సిపల్ చట్టం 2021ని సమీక్షించాలని డిమాండ్ చేస్తూ వివిధ గిరిజన హోహోలు మరియు పౌర సంఘాల నుండి తీవ్ర నిరసన వ్యక్తం కావడంతో ఈ చట్టాన్ని ఉపసంహరించుకోవాల్సిన అవసరం ఏర్పడింది.
నాగాలాండ్ మున్సిపల్ చట్టం 2001 అమలు "ఆర్టికల్ 371-A యొక్క స్ఫూర్తికి విరుద్ధంగా నడుస్తుందనే ప్రజల అభిప్రాయం కారణంగా" ఇది వివాదాస్పదమౌతుంది. మున్సిపాలిటీలు మరియు టౌన్ కౌన్సిల్‌లలో మహిళలకు 33% రిజర్వేషన్‌కు సంబంధించిన భారత రాజ్యాంగంలోని పార్ట్ IX A నిబంధనల నుండి నాగాలాండ్‌ను మినహాయిస్తూ 2012 సంవత్సరంలో ఈ రాష్ట్ర అసెంబ్లీ ఒక తీర్మానం చేసింది. దీనిని తిరిగి 2016లో రద్దు చేసింది.
ఈ తీర్మానం రద్దు తర్వాత 2017లో స్థానిక సంస్థల ఎన్నికలు నిర్వహణకు నోటిఫికేషన్ విడుదల చేయడంతో పెద్దఎత్తున హింసాత్మక ఆందోళనలు చోటు చేసుకున్నాయి. వివిధ గిరిజన సంస్థలు/హోహోలు ప్రభుత్వ యంత్రాంగాన్ని బహిష్కరించాయి. దీనితో స్థానిక సంస్థల ఎన్నికలు రద్దు చేయబడ్డయి. ఇది జరిగిన 4ఏళ్ళ తర్వాత మార్చి 9, 2022న వివిధ గిరిజన సంస్థలు మరియు ప్రభుత్వం మధ్య రాష్ట్ర స్థాయి సంప్రదింపులు జరిగి, రాజ్యాంగంలోని 74వ సవరణ చట్టం ప్రకారం ఎన్నికలను నిర్వహించాలని తీర్మానించారు.
సుప్రీం కోర్టు కూడా ఆ రాష్ట్రంలో తక్షణమే స్థానిక ఎన్నికల జరపాలనే ఆదేశాలు జారీ చేయడంతో నాగాలాండ్ ప్రభుత్వం ఎన్నికలకు సిద్దమయ్యింది. దీనితో వివిధ గిరిజన సంస్థలు నాగాలాండ్ మున్సిపల్ చట్టం 2001ను "ఆర్టికల్ 371-A యొక్క నిబంధనలకు అనుగుణంగా" సవరించాలని డిమాండ్ చేయడం మొదలుపెట్టాయి. ఈ తలనొప్పి పడలేక ప్రభుత్వం ఏకంగా 2001 మున్సిపల్ చట్టాన్ని రద్దు చేసి, దాని స్థానంలో కొత్త చట్టాన్ని రూపొందించేందుకు ఆదేశాలు జారీచేసింది.
భారత రాజ్యాంగంలోని ఆర్టికల్ 371A అనేది నాగాలాండ్ రాష్ట్రానికి సంబంధించి ప్రత్యేక హోదాను, హక్కులను కల్పిస్తుంది. ఇది 1962 సంవత్సరంలో భారత రాజ్యాంగంలోని 21వ భాగంలో చేర్చబడింది. ఇది నాగాల మతపరమైన సామాజిక ఆచారాలు రక్షించుకునే అవకాశం కల్పిస్తుంది. నాగా సంస్కృతిలో మహిళలు ప్రత్యక్ష ఎన్నికలలో పోటీ చేయకుడదనే సాంప్రదాయం ఉంది. ఈ అంశమే మొత్తం వివాదానికి కేంద్ర బిందువుయ్యింది.
అయితే ఇటీవలే జరిగిన ఆ రాష్ట్ర అసెంబ్లీ ఎన్నికలలో మొట్టమొదటి సారి ఇద్దరు మహిళలు సల్హౌతుయోనువో క్రూసే, హెకానీ జఖాలు, ప్రత్యేక్ష ఎన్నికలలో గెలిచి అసెంబ్లీలో అడుగుపెట్టి చరిత్ర సృష్టించారు. అయితే మహిళలకు పట్టణ స్థానిక సంస్థలలో 33% సీట్ల రిజర్వేషన్‌ను కల్పించే ఈ చట్టం రద్దు తీర్మాన చర్చలో ఈ ఇద్దరు మహిళా ఎమ్మెల్యేలు మౌనంగా ఉండటం గమనార్హం.
