యూకేలో హయ్యర్ ఎడ్యుకేషన్ : కోర్సులు, వీసా ప్రక్రియ, స్కాలర్‌షిప్‌లు

విదేశీ ఉన్నత విద్య కోసం యూఎస్ తర్వాత యూకే వెళ్లేందుకు అత్యధిక మంది విద్యార్థులు మొగ్గుచూపిస్తారు. ఒకప్పుడు ఉన్నత విద్యకు కేరాఫ్ అడ్రెస్సుగా ఉండే ఇంగ్లీష్ యూనివర్సిటీలు, నేడు అంత జోరు కనబర్చకపోయినా అడ్మిషన్స్ కోసం పోటీపడే విదేశీ విద్యార్థుల సంఖ్యా మాత్రం ఏటా పెరుగుతూనే ఉంది. ఒక్క ఇండియా నుండి ప్రతీ ఏడాది 50 నుండి 60 వేల మంది విద్యార్థులు ఉన్నత విద్య కోసం యూకే లో అడుగుపెడుతున్నారు.

ఆక్స్‌ఫర్డ్‌, కేంబ్రిడ్జి, లండన్‌ స్కూల్‌ ఆఫ్‌ ఎకనామిక్స్‌ అండ్‌ పొలిటికల్‌ సైన్స్‌ లాంటి విశ్వవిఖ్యాత విశ్వవిద్యాలయాలకు నెలవైన యునైటెడ్ కింగ్డమ్, ఉన్నత విద్యకోసం యూకే లో అడుగు పెట్టే విదేశీ విద్యార్థులకు ప్రభుత్వం పరంగా, యూనివర్సిటీల పరంగా ప్రత్యేక ప్రాధాన్యత అందించడంతో పాటుగా ఆర్థిక చేయూతను కూడా అందిస్తున్నాయి. అత్యధిక సంఖ్యలో విద్యార్థులు యూకే వైపు మొగ్గుచూపడానికి ఐడి కూడా ఒక కారణం కావొచ్చు.

దీనితో పాటుగా యూకే, విదేశీ విద్యార్థులకు పార్ట్ టైమ్ జాబ్స్ చేసుకునేందుకు అవకాశం కల్పిస్తుంది. అంతే కాకుండా ఇటీవలే విదేశీ విద్యార్థులు కోర్సు పూర్తయిన తర్వాత అక్కడే ఉండి రెండేళ్ల పాటు ఉపాధి పొందేలా అవకాశం కల్పిస్తూ కొత్త నిబంధనలు తీసుకొచ్చింది బ్రిటన్​. చాలా రోజులుగా వస్తున్న డిమాండ్ల మేరకు రెండేళ్ల వర్క్​ వీసాను ప్రకటించింది. దీని ద్వారా యూకే వెళ్లే భారతీయ విద్యార్థుల సంఖ్య మరింత పెరగనుంది.

మిగిలిన దేశాలతో పోలిస్తే ఇక్కడ యూజీ, పీజీ ప్రోగ్రాములు పూర్తిచేయటానికి తక్కువ వ్యవధి పడుతుంది. దీంతో ట్యూషన్‌ ఫీజు, ఇతర ఖర్చులూ బెడద తగ్గుతుంది. అలానే యూఎస్ స్టూడెంట్ వీసా తో పోల్చుకుంటే యూకే వీసా తక్కువ వ్యవధిలో ఆమోదం పొందుతుంది. వీటితో పాటుగా యూకే స్టూడెంట్ కల్చర్, యూకే ఆహ్లాదకరమైన వాతావరణ మార్పులు, యూరోప్ పర్యాటక ప్రాంతాలు, బ్రిటిష్ ఇంగ్లీషుపై పట్టుసాధించేందుకు వంటి అంశాలు విదేశీ విద్యార్థులను యూకేకు ఆకర్షిస్తుంది.