తెలుగు కరెంట్ అఫైర్స్ జనవరి 2023 : ఆర్ట్ & కల్చర్

సెకండ్ ఫేజ్ "విరాసత్" చీరల పండుగ ప్రారంభం

టెక్స్‌టైల్స్ మంత్రిత్వ శాఖ నిర్వహిస్తున్న చీరల పండుగ "విరాసత్" యొక్క రెండవ దశ న్యూఢిల్లీలో ప్రారంభమైంది. దాదాపు 75 రకాల చేనేత చీరలు ఈ ఎగ్జిబిషన్ ద్వారా వినియోగదారులకు అందుబాటులో ఉంచుతున్నారు. చేనేత వస్త్రాలకు ప్రాచుర్యం కల్పించేందుకు దీనిని నిర్వహిస్తున్నారు. గత ఏడాది డిసెంబర్16 నుండి 30 మధ్య 'మై శారీ, మై ప్రైడ్ - ఏక్ విరాసత్ ' పిలుపుతో మొదటి దశ ఎగ్జిబిషన్ పూర్తియింది.

ప్రస్తుతం నిర్వహిస్తున్న రెండవ దశ విరాసత్ ఎగ్జిబిషన్ జనవరి 3 నుండి 17వ తేదీ వరకు న్యూఢిల్లీలోని హ్యాండ్లూమ్ హాత్ యందు నిర్వహిస్తున్నారు. ఈ ఎగ్జిబిషనులో ఆంధ్రప్రదేశ్ నుండి ఉప్పాడ జమధాని చీర, వెంకటగిరి జమదాని కాటన్ చీర, కుప్పడం చీర, చీరాల సిల్క్ కాటన్ చీర, మాధవరం చీర మరియు పోలవరం చీరలు, తెలంగాణ నుండి పోచంపల్లి చీర, సిద్దిపేట గొల్లబమ్మ చీర, నారాయణపేట చీరలు ప్రదర్శనకు ఉండనున్నాయి.

ఛత్తీస్‌గఢ్‌లో చెర్ చేరా ఫెస్టివల్ 2023

ఛత్తీస్‌గఢ్‌ సాంప్రదాయ పండగలలో ఒకటైన చెర్ చేరా ఫెస్టివల్ జనవరి 6న ఘనంగా జరుపుకున్నారు. ఈ పండగను హిందూ క్యాలెండరులోని పౌష్  నెల పౌర్ణమి రోజున జరుపుకుంటారు. పంటలు చేతి కొచ్చిన ఆనందంలో రైతులు ఈ పండగను జరుపుకుంటారు. ఈ రోజున కూరగాయలు, ఆహార ధాన్యాలను ఒకరికి ఒకరు పంచుకుంటారు. ఛత్తీస్‌గఢ్ ముఖ్యమంత్రి భూపేష్ బఘె.ల్ రాజధాని రాయ్‌పూర్‌లోని దుధాధారి మఠంలో సంప్రదాయ పండుగ జరుపుకున్నారు.

'బ్రేవింగ్ ఎ వైరల్ స్టార్మ్' పుస్తకం ఆవిష్కరణ

కేంద్ర ఆరోగ్య మరియు కుటుంబ సంక్షేమ శాఖ మంత్రి మన్సుఖ్ మాండవియా "బ్రేవింగ్ ఎ వైరల్ స్టార్మ్: ఇండియాస్ కోవిడ్-19 వ్యాక్సిన్ " అనే పుస్తకాన్ని అధికారికంగా ఆవిష్కరించారు. ఈ పుస్తకాన్ని ఆశిష్ చందోర్కర్ మరియు సూరజ్ సుధీర్'లు రచించారు.

2021 జనవరిలో కోవిడ్-19 వ్యాక్సినేషన్ డ్రైవ్‌ను ప్రారంభించిన తేదీ యొక్క రెండవ వార్షికోత్సవం జరుపుకోనున్న సందర్భంగా ఈ పుస్తకావిష్కరణ జరిగింది. ఈ పుస్తకం కోవిడ్ 19 ను భారత్ ఎదుర్కున్న తీరును, వాక్సిన్ ఆవిష్కరణ సంబంధించి తెలియజేస్తుంది.

ఇండియా అతిపెద్ద స్టూడెంట్ కల్చరల్ ఫెస్ట్ సారంగ్ ప్రారంభం

దేశంలోనే అతిపెద్ద విద్యార్థుల కల్చరల్ ఫెస్టివల్ సారంగ్ 2023 మద్రాస్ ఐఐటీలో జనవరి 11న ప్రారంభమైంది. జనవరి 11-15 మధ్య 5 రోజుల పాటు నిర్వహించే ఈ ఉత్సవాలలో 100 కంటే ఎక్కువ ఈవెంట్‌లను నిర్వహిస్తున్నారు. ఈ ఉత్సవాలకు దేశవ్యాప్తంగా 500 కంటే ఎక్కువ కళాశాలల నుండి 80,000 పైగా విద్యార్థులు హాజరవుతున్నారు.

ఇది సారంగ్ ఫెస్టివల్ యొక్క 28వ ఎడిషన్. ఈ ఏడాది 'మిస్టిక్ హ్యూస్' థీమ్'తో ఈ ఉత్సవాలు నిర్వహిస్తున్నారు. కోవిడ్ కారణంగా గత రెండేళ్లుగా నిర్వహించని ఈ విద్యార్థి ఉత్సవాలకు ఈ ఏడాది ఐఐటీ మద్రాస్‌ ఆతిధ్యం ఇస్తుంది.

దేశ వ్యాప్తంగా వివిధ పేర్లతో మకర సంక్రాతి వేడుకలు

ప్రాంతీయ వైవిధ్యాలకు మరియు ఆచారాలకు పుట్టినిళ్లు అయినా భారతదేశంలో వివిధ పేర్లతో జనవరి 15న మకర సంక్రాతి వేడుకలు జరుపుకున్నారు. హిందూ ఆచారం ప్రకారం ఏటా జనవరి 15వ తేదీన సూర్యుడు ధనుస్సు రాశి నుండి మకర రాశికి మారడాన్ని సూచికంగా ఈ వేడుకలు జరుపుకుంటారు. ఈ వేడుకలను దాదాపు అన్ని ప్రాంతాలలో విభిన్న పేర్లతో జరుపుకుంటారు.

• తై పొంగల్ (తమిళనాడు)
• ఉత్తరాయణ్ (గుజరాత్)
• లోహ్రీ (పంజాబ్)
• పౌష్ సంక్రాతి (బెంగాల్)
• సుగ్గి హబ్బా (కర్ణాటక)
• మకర చౌలా (ఒడిశా)
• మాఘి సంక్రాంతి (మహారాష్ట్ర & హర్యానా)
• మాఘ్/భోగాలి బిహు (అస్సాం)
• శిశుర్ సంక్రాత్ (కాశ్మీర్)
• ఖిచ్డీ పర్వ్ (యుపి మరియు బీహార్)
• సంక్రాతి / పెద్ద పండగ (ఏపీ & తెలంగాణ)

గంగాసాగర్ మేళా ఉత్సవం 2023

ఏటా మకర సంక్రాతి సందర్బంగా నిర్వహించే గంగాసాగర్ మేళా ఉత్సవం 2023 ఘనంగా జరిగింది. ఈ ఉత్సవాన్ని కోల్‌కతాలోని సాగర్‌ద్వీప్‌లో ఏటా నిర్వహిస్తారు. ఇది గంగా నది, బంగాళాఖాతంలో కలిసే ప్రదేశం. గంగోత్రి వద్ద ప్రారంభమయ్యే గంగ నది, కోల్‌కతాలోని సాగర్ ద్వీపంవద్ద తన సుదీర్ఘ ప్రయాణాన్ని ముగుస్తుంది.

గంగాసాగర్ మేళా ప్రతి సంవత్సరం మకర సంక్రాంతి సందర్భంగా నిర్వహించబడుతుంది. ఈ రోజున సూర్య భగవానుని ఆరాధిస్తూ ఉదయం పవిత్ర గంగా జలంలో స్నానం చేస్తారు. ఈ పవిత్ర స్నానం చేయడానికి భారతదేశంలోని అనేక రాష్ట్రాల నుండి లక్షలాది మంది యాత్రికులు ఇక్కడకు చేరుకుంటారు. ఇది కుంభ మేళ తర్వాత దేశంలో అతి పెద్ద మేళగా పరిగణించబడుతుంది.