ముఖ్యమైన రోజులు మరియు తేదీలు మే 2023

ముఖ్యమైన రోజులు మరియు తేదీలు మే 2023 కోసం చదవండి. మే నెలలో జరుపుకునే వివిధ జాతీయ దినోత్సవాలు మరియు అంతర్జాతీయ దినోత్సవాల వివరాలు తెలుసుకోండి. ప్రముఖుల పుట్టిన రోజులు, మరణాల సమాచారం కూడా పొందండి. వివిధ పోటీ పరీక్షలకు సిద్ధమయ్యే విద్యార్థులకు ఈ సమాచారం ఉపయోగపడుతుంది.

అంతర్జాతీయ కార్మికుల దినోత్సవం | మే 01

ఏటా మే 1వ తేదీన అంతర్జాతీయ కార్మిక దినోత్సవం జరుపుకుంటారు. అంతర్జాతీయ కార్మికుల దినోత్సవంను మే డే అని కూడా పిలుస్తారు. ఈ కార్యక్రమంను కార్మికుల పోరాటాలు మరియు త్యాగాలను గుర్తుచేసుకోవడానికి జరుపుకుంటారు. 1886 లో చికాగో కార్మిక సమ్మెలో బాంబు దాడి తరువాత, దాని జ్ఞాపకార్దంగా 1889లో మార్క్సిస్ట్ ఇంటర్నేషనల్ సోషలిస్ట్ కాంగ్రెస్ ఈ వేడుకను ప్రతిపాదించింది.

ఉజ్వల దివస్ | మే 01

ఏటా మే 1వ తేదీని ఉజ్వల దివాసుగా జరుపుకుంటారు. ఈ కార్యక్రమంను ప్రధాన్ మంత్రి ఉజ్వల యోజన పథకం యొక్క విజయోత్సవ కార్యక్రమంగా జరుపుకొనున్నారు. ప్రధాన్ మంత్రి ఉజ్వల యోజన (PMUY) అనేది దేశంలోని ప్రతి బీపీఎల్ కుటుంబాలకు ఉచిత ఎల్పీజీ కనెక్షన్‌ని అందించే లక్ష్యంతో రూపొందించబడింది. ఈ పథకంను 1 మే 2016న ఉత్తరప్రదేశ్‌లోని బల్లియాలో ప్రధానమంత్రి నరేంద్ర మోదీ ప్రారంభించారు. ఉజ్వల దివాసును మొదటిసారి 2022 లో నిర్వహించారు.

వరల్డ్ లాఫ్టర్ డే | మే మొదటి ఆదివారం

ప్రతి సంవత్సరం మే మొదటి ఆదివారంను ప్రపంచ నవ్వుల దినోత్సవంగా జరుపుకుంటారు. ఈ వార్షిక కార్యక్రమం నవ్వు మరియు దాని యొక్క అనేక వైద్యం ప్రయోజనాల గురించి అవగహన కల్పించేందుకు నిర్వహిస్తారు. ఇది మొదటిసారి 1998లో భారతదేశంలోని ముంబై నగరంలో నిర్వహించబడింది, దీనిని ప్రపంచవ్యాప్త నవ్వుల యోగా ఉద్యమాన్ని స్థాపించిన డాక్టర్ మదన్ కటారియా ప్రారంభించారు.

ప్రపంచ ట్యూనా దినోత్సవం | మే 02

ప్రపంచ ట్యూనా దినోత్సవంను ప్రతి ఏడాది మే 2వ తేదీన నిర్వహిస్తారు. దీనిని ట్యూనా చేపలకు సంబంధించి స్థిరమైన ఫిషింగ్ పద్ధతుల గురించి అవగాహన కల్పించడంతో పాటుగా ఆ జాతుల సంరక్షణ కోసం తెలియజెప్పేందుకు నిర్వహిస్తారు. దీనిని 2017 లో ఐక్యరాజ్యసమితి మొదటిసారి ప్రారంభించింది.

వరల్డ్ ప్రెస్ ఫ్రీడమ్ డే | మే 03

ప్రపంచ పత్రికా స్వేచ్ఛా దినోత్సవంను ఏటా మే 3వ తేదీన నిర్వహిస్తారు. ఈ వార్షిక కార్యక్రమంను పత్రికా స్వేచ్ఛ మరియు భావప్రకటనా స్వేచ్ఛ గురించి అంతర్జాతీయ సమాజానికి తెలియజేయడానికి నిర్వహిస్తారు. దీని ప్రధాన వేడుకను యూఎన్ ఎడ్యుకేషనల్, సైంటిఫిక్ అండ్ కల్చరల్ ఆర్గనైజేషన్ (యునెస్కో) నిర్వహిస్తుంది.

ఇంటర్నేషనల్ ఫైర్ ఫైటర్స్ డే | మే 04

విధి నిర్వహణలో ప్రాణాలు కోల్పోయిన అగ్నిమాపక నిపుణులకు నివాళులర్పించేందుకు ప్రతి సంవత్సరం మే 4న అంతర్జాతీయ అగ్నిమాపక దినోత్సవాన్ని జరుపుకుంటారు. ఈ ప్రతిపాదన మొదట 1999 లో ఆస్ట్రేలియాలోని బుష్‌ఫైర్‌లో ఐదుగురు అగ్నిమాపక సిబ్బంది మరణించిన కారణంగా చోటుచేసుకుంది.

కోల్ మైనర్స్ డే | మే 04

బొగ్గు గని కార్మికుల త్యాగం మరియు దేశానికి వారు చేసిన కృషిని గౌరవిస్తూ ప్రతి సంవత్సరం మే 4వ తేదీన బొగ్గు గని కార్మికుల దినోత్సవాన్ని జరుపుకుంటారు. మైనింగ్ కార్మికులు ఎక్కువ సమయం ఫీల్డింగ్ ప్రక్రియలో గడుపుతారు. బొగ్గు గనులలో పనిచేయడం కష్టతరమైన వృత్తులలో ఒకటిగా పరిగణిస్తారు.

ప్రపంచ రెడ్ క్రాస్ మరియు రెడ్ క్రెసెంట్ డే | మే 08

అంతర్జాతీయ రెడ్‌క్రాస్ మరియు రెడ్ క్రెసెంట్ మూవ్‌మెంట్ సూత్రాలను స్మరించుకునే ప్రయత్నంలోభాగంగా ప్రతి సంవత్సరం మే 8 వ తేదీని ప్రపంచ రెడ్ క్రాస్ మరియు రెడ్ క్రెసెంట్ డేగా జరుపుకుంటారు. ఈ తేదీ అంతర్జాతీయ రెడ్‌క్రాస్ కమిటీ (ICRC) స్థాపకుడు మరియు మొదటి నోబెల్ శాంతి బహుమతి గ్రహీత అయినా జీన్-హెన్రీ డ్యునాంట్ యొక్క జన్మదినోత్సవం.

రెడ్‌క్రాస్ అనేది 1863లో స్విట్జర్లాండ్‌లో స్థాపించబడిన అంతర్జాతీయ మానవతావాద నెట్‌వర్క్, ఇది ప్రపంచవ్యాప్తంగా విపత్తులు, సాయుధ పోరాటాలు మరియు ఆరోగ్య సంక్షోభాల బాధితులకు పూర్తిస్థాయి సహాయం అందించేందుకు పనిచేస్తుంది. ఈ సంస్థకు ప్రపంచ వ్యాప్తంగా 97 మిలియన్ల వాలంటీర్లు, సభ్యులు మరియు సిబ్బందితో కూడిన మానవతా వ్యవస్థ ఉంది.

ప్రపంచ లూపస్ డే | మే 10

లూపస్ అనే దీర్ఘకాలిక స్వయం ప్రతిరక్షక వ్యాధి గురించి అవగాహన పెంచడానికి ప్రతి సంవత్సరం మే 10న ప్రపంచ లూపస్ దినోత్సవాన్ని జరుపుకుంటారు. లూపస్‌పో వ్యాధితో ప్రపంచవ్యాప్తంగా ఐదు మిలియన్ల మంది ప్రజలు పోరాడుతున్నారు.

లూపస్ అనేది మానవ శరీరం యొక్క రోగనిరోధక వ్యవస్థ తన స్వంత కణజాలం మరియు అవయవాలపై దాడి చేసినప్పుడు సంభవించే వ్యాధి (ఆటో ఇమ్యూన్ డిసీజ్). లూపస్ వల్ల కీళ్ళు వాపు, చర్మపై దద్దర్లతో పాటుగా మూత్రపిండాలు, రక్త కణాలు, మెదడు, గుండె మరియు ఊపిరితిత్తులతో సహా అనేక విభిన్న శరీర వ్యవస్థలను ప్రభావితం అవుతాయి. రోగ లక్షణాలను నియంత్రించడం మినహా లూపస్‌కు ఎటువంటి చికిత్స అందుబాటులో లేదు.

నేషనల్ టెక్నాలజీ డే | మే 11

జాతీయ సాంకేతిక దినోత్సవాన్ని ప్రతి సంవత్సరం మే 11న దేశవ్యాప్తంగా జరుపుకుంటారు. స్వాతంత్రం తర్వాత దేశంలో సాంకేతిక పురోగతికి కారణమైన శాస్త్రవేత్తలు, పరిశోధకుల సహకారాన్ని గౌరవించటానికి ఈ దినోత్సవాన్ని జరుపుకుంటారు. 1998 మే 11న జరిపిన భారత అణు పరీక్షల విజయవంతం తర్వాత,  అప్పటి భారత ప్రధాని, దివంగత అటల్ బిహారీ వాజ్‌పేయి.. మే 11 ని భారతదేశంలో జాతీయ సాంకేతిక దినోత్సవంగా ప్రకటించారు. 1999 లో భారత్ తన మొదటి తీయ సాంకేతిక దినోత్సవాన్ని జరుపుకుంది.