2023 జనవరి నెలకు సంబంధించిన సమకాలిన డిఫెన్స్ మరియు సెక్యూరిటీ అంశాలను తెలుగులో చదవండి. యూపీఎస్సీ, ఎస్ఎస్సీ, రైల్వే, బ్యాంకింగ్, స్టేట్ పబ్లిక్ సర్వీస్ కమిషన్ వంటి వివిధ పోటీ పోటీ పరీక్షలకు సిద్దమౌతున్న అభ్యర్థులకు ఈ అంశాలు ఉపయోగపడతాయి.
ఎఈఆర్‌బి ఛైర్మన్‌గా దినేష్ కుమార్ శుక్లా
అటామిక్ ఎనర్జీ రెగ్యులేటరీ బోర్డ్ (AERB) నూతన చైర్మనుగా సీనియర్ అణు శాస్త్రవేత్త దినేష్ కుమార్ శుక్లా బాధ్యతలు స్వీకరించారు. వచ్చే మూడేళ్ళ కాలానికి ఆయన ఈ హోదాలో ఉండనున్నారు దినేష్ కుమార్ గతంలో ఇదే సంస్థలో ఎగ్జిక్యూటివ్ డైరెక్టరుగా విధులు నిర్వర్తించారు.
దినేష్ కుమార్ శుక్లా న్యూక్లియర్ సేఫ్టీ రంగంలో అంతర్జాతీయంగా గుర్తింపు పొందిన నిపుణుడుగా ఉన్నారు. మధ్యప్రదేశ్‌లోని జబల్‌పూర్‌ ప్రభుత్వ ఇంజినీరింగ్ కళాశాల నుండి 1980లో మెకానికల్ ఇంజినీరింగ్‌లో గ్రాడ్యుయేషన్ పూర్తి చేసిన ఈయన, 1981లో భాభా అటామిక్ ఎనర్జీ రీసెర్చ్ సెంటర్ (BARC)లో నుండి తన కెరీర్ ప్రారంభించారు
అటామిక్ ఎనర్జీ రెగ్యులేటరీ బోర్డ్‌ను 15 నవంబర్ 1983న భారత రాష్ట్రపతి అటామిక్ ఎనర్జీ యాక్ట్, 1962 (60 KB) చట్టం ద్వారా దేశంలో అణు నియంత్రణ మరియు భద్రతా విధులను నిర్వహించడానికి ఏర్పాటు చేశారు. దీని ప్రధాన కార్యాలయం ముంబైలో ఉంది.
కాకినాడలో AMPHEX 2023 ఎక్సర్సైజ్
భారత నౌకాదళం యొక్క ద్వైవార్షిక ట్రై-సర్వీసెస్ యాంఫిబియస్ ఎక్సర్సైజ్ (AMPHEX 2023) ఆంధ్ర ప్రదేశ్‌లోని కాకినాడలో జనవరి 17 నుండి 23 మధ్య నిర్వహించబడింది. ఈ 6 రోజుల మెగా సైనిక విన్యాసాలలో ఇండియన్ ఆర్మీ మరియు ఇండియన్ ఎయిర్ ఫోర్స్ దళాలు కూడా పాల్గొన్నాయి. ఇలాంటి సైనిక ఎక్సర్సైజ్ కాకినాడ తీరంలో నిర్వహించడం ఇదే తొలిసారి.
భారత నౌకాదళానికి చెందిన లార్జ్ ప్లాట్‌ఫాం డాక్ (LPD), ల్యాండింగ్ షిప్‌లు, ల్యాండింగ్ క్రాఫ్ట్‌లు, మెరైన్ కమాండోలు (మార్కోస్), హెలికాప్టర్లు మరియు విమానాలతో కూడిన అనేక ఉభయచర నౌకలు ఈ వ్యాయామంలో పాల్గొన్నాయి. అలానే భారత సైన్యం నుండి స్పెషల్ ఫోర్సెస్, ఆర్టిలరీ మరియు సాయుధ వాహనాలతో సహా 900 మంది సైనికులు పాల్గొనగా. వైమానిక దళం నుండి జాగ్వార్ యుద్ధ విమానాలు, C 130 విమానాలు ఈ వ్యాయామంలో పాల్గొన్నాయి.
దేశంలోనే నంబర్ వన్ పీఎస్‌గా అస్కా పోలీస్ స్టేషన్
పోలీసు స్టేషన్‌ల వార్షిక ర్యాంకింగ్‌లో ఒడిశాలోని గంజాం జిల్లాలోని అస్కా మోడల్ పోలీస్ స్టేషన్ 2022 సంవత్సరానికి గాను దేశంలోనే నంబర్ వన్ పోలీస్ స్టేషన్‌గా నిలిచింది. ఈ జాబితాలో రెండవ స్థానంను ఇదే రాష్ట్రం నుండి గంగాపూర్ పీఎస్ దక్కించుకోగా, మూడవ స్థానంలో ఉత్తరాఖండ్ రాష్ట్రంకు చెందిన చంపావత్ పీఎస్ నిలిచింది.
జనవరి 20న న్యూఢిల్లీలోని నేషనల్ అగ్రికల్చర్ సైన్స్ కాంప్లెక్స్‌లో జరిగిన డీజీఎస్పీ/ఐజీఎస్పీ కాన్ఫరెన్స్ 2022 సందర్భంగా కేంద్ర హోంమంత్రి అమిత్ షా ఈ జాబితాను విడుదల చేశారు.
డిజిసిఎ తదుపరి డైరెక్టర్ జనరల్‌గా విక్రమ్ దేవ్ దత్
డైరెక్టరేట్ జనరల్ ఆఫ్ సివిల్ ఏవియేషన్ (DGCA) తదుపరి డైరెక్టర్ జనరల్‌గా విక్రమ్ దేవ్ దత్ నియమితులయ్యారు. విక్రమ్ దేవ్ దత్ నియామకానికి సంబంధించి జనవరి 21న కేంద్రం ఆమోదం తెలిపింది. ఫిబ్రవరి 28 నుండి ఆయన ఈ బాధ్యతలు స్వీకరించనున్నారు.
డైరెక్టరేట్ జనరల్ ఆఫ్ సివిల్ ఏవియేషన్ అనేది భారతదేశంలోని పౌర విమానయానాన్ని నియంత్రించే చట్టబద్ధమైన సంస్థ. ఇది పౌర విమానయాన మంత్రిత్వ శాఖ పరిధిలో పని చేస్తుంది. దీని ప్రధాన కార్యాలయం న్యూఢిల్లీలో ఉంది.
ఇండియన్ నేవీ మెరిటైమ్ ఎక్సర్సైజ్ - ట్రోపెక్స్ 2023
ఇండియన్ నేవీ యొక్క ద్వైవార్షిక మెరిటైమ్ ఎక్సర్సైజ్ - ట్రోపెక్స్ (TROPEX) 2023 ఎడిషన్ హిందూ మహాసముద్ర ప్రాంతంలో ప్రారంభమైంది. ఈ సైన్యక విన్యాశాలలో ఇండియన్ నేవీతో పాటుగా భారత సైన్యం, భారత వైమానిక దళం మరియు ఇండియన్ కోస్ట్ గార్డ్ దళాలు పాల్గొంటాయి.
ట్రోపెక్స్ ఎక్సర్సైజ్ జనవరి - మార్చి 23 నుండి మూడు నెలల పాటు నిర్వహించబడుతోంది. ఈ వ్యాయామంలో భాగంగా, డిస్ట్రాయర్‌లు, ఫ్రిగేట్‌లు, కొర్వెట్‌లు అలాగే సబ్‌మెరైన్‌లు మరియు ఎయిర్‌క్రాఫ్ట్‌లతో సహా భారత నావికాదళంలోని ఉపరితల పోరాట యోధులందరూ పాల్గొంటారు. దీనిని మొదటిసారి 2019లో ప్రారంభించారు.
