తెలుగు కరెంట్ అఫైర్స్ జనవరి 2023 : డిఫెన్స్ అఫైర్స్

వెస్ట్రన్ ఎయిర్ కమాండ్ అధిపతిగా పంకజ్ మోహన్ సిన్హా

ఎయిర్ మార్షల్ పంకజ్ మోహన్ సిన్హా, జనవరి 1న ఇండియన్ ఎయిర్ ఫోర్స్ యొక్క వెస్ట్రన్ ఎయిర్ కమాండ్‌కు కమాండ్‌గా బాధ్యతలు స్వీకరించారు. ఎయిర్ మార్షల్ పూణేలోని నేషనల్ డిఫెన్స్ అకాడమీ నుండి 1985లో గ్రాడ్యుయేట్ పూర్తిచేశారు. అదే ఏడాది ఇండియన్ ఎయిర్ ఫోర్స్ యందు ఫైటర్ పైలట్‌గా కెరీర్ ప్రారంభించారు.

వెస్ట్రన్ ఎయిర్ కమాండ్ అనేది న్యూ ఢిల్లీ కేంద్రంగా 1949లో ఏర్పాటు చేయబడ్డ ఇండియన్ ఎయిర్ ఫోర్స్ యొక్క ప్రాంతీయ కమాండ్లలో ఒకటి. ఇది ఇండియన్ ఎయిర్ ఫోర్స్ యొక్క అతిపెద్ద మరియు అతి ముఖ్యమైన ఎయిర్ కమాండ్. ఈ వెస్ట్రన్ ఎయిర్ కమాండ్ పరిధిలో పదహారు వైమానిక స్థావరాలు ఉన్నాయి. ఇది ఉత్తర భారతదేశ వైమానిక రక్షణకు బాధ్యత వహిస్తుంది. దీని ప్రధాన కార్యాలయం న్యూ ఢిల్లీలోని సుబ్రోటో పార్క్‌లో ఉంది.

సియాచిన్‌లో మోహరించిన మొదటి మహిళా అధికారిగా శివ చౌహాన్‌

ఇండియన్ ఆర్మీకి చెందిన ఫైర్ అండ్ ఫ్యూరీ కార్ప్స్ కెప్టెన్ శివ చౌహాన్, ప్రపంచంలోనే అత్యంత ఎత్తైన యుద్దభూమి అయినా సియాచిన్ గ్లేసియర్‌ ఆపరేషన్‌లో మోహరించిన మొదటి మహిళా అధికారిగా నిలిచారు. 1984లో సియాచిన్ గ్లేసియర్‌ను స్వాధీనం చేసుకునేందుకు భారత సైనిక దళాలు చేపట్టిన మేఘదూత్ ఆపరేషన్ తర్వాత ఇంతవరకు ఏ మహిళా అధికారి ఇక్కడ నియమింపబడలేదు.

సియాచిన్‌లో ఉష్ణోగ్రత మైనస్ 60 డిగ్రీల సెల్సియస్‌కు పడిపోతుంది. చౌహాన్ ఇప్పుడు 15,632 అడుగుల ఎత్తులో ఉన్న కుమార్ పోస్ట్ వద్ద మోహరించారు. హిమానీనదంపై దాదాపు 80% పోస్ట్‌లు 16,000 అడుగుల పైన ఉన్నాయి, ఇతర సైనికుల మాదిరిగానే చౌహాన్ కూడా మూడు నెలల పాటు ఘనీభవించిన ల్యాండ్‌స్కేప్‌లో మోహరిస్తారు.

తొలి వార్‌గేమ్‌ మహిళా ఫైటర్ పైలట్‌గా అవని ​​చతుర్వేది

భారతదేశపు మొదటి ముగ్గురు మహిళా ఫైటర్ పైలట్‌లలో ఒకరైన అవనీ చతుర్వేది త్వరలో అంతర్జాతీయ వైమానిక యుద్ధ క్రీడల్లో భారతదేశానికి ప్రాతినిధ్యం వహించనున్నారు. ఈ ఏడాది జనవరి 12 నుండి 26 వరకు హ్యకురి ఎయిర్ బేస్‌లో భారత్ మరియు జపాన్ మధ్య జరిగే తొలి 'వీర్ గార్డియన్ 2023' ఉమ్మడి వ్యాయామంలో ఈమె భారత బృందంతో పాల్గొనున్నారు.

ఏడేళ్ల క్రితం దేశ వైమానిక దళంలో ఫైటర్ పైలట్‌లుగా నియమితులైన మహిళల తొలి బ్యాచ్‌లో అవనీ చతుర్వేది ఒకరు. స్క్వాడ్రన్ లీడర్‌గా ఆమె అంతర్జాతీయ ఎయిర్ డ్రిల్స్‌లో భాగమవడం ద్వారా భారత దేశం నుండి ఈ ఘనత దక్కించుకున్న మొదటి ఫైటర్ పైలట్‌గా నిలిచారు. అలానే సుఖోయ్ విమానాన్ని నడపబోతున్న భారత తొలి మహిళా పైలట్‌గా కూడా నిలవనుంది.

ఇండియా, ఫ్రాన్స్ ద్వైపాక్షిక వ్యాయామం 'వరుణ' ప్రారంభం

ఇండియా మరియు ఫ్రాన్స్‌ల మధ్య నిర్వహించే ద్వైపాక్షిక నౌకాదళ వ్యాయామం 'వరుణ' యొక్క 21వ ఎడిషన్, జనవరి 16న గోవా తీరంలో ప్రారంభమైంది. ఈ రెండు నౌకాదళాల మధ్య ద్వైపాక్షిక విన్యాసాన్ని 1993లో ప్రారంభించారు. 2001 నుండి దీనిని 'వరుణ వ్యాయామం' పేరుతొ నిర్వహిస్తున్నారు.

భారతదేశం-ఫ్రాన్స్ నౌకా దళాల మధ్య వ్యూహాత్మక ద్వైపాక్షిక బంధాన్ని పెంపొందించే లక్ష్యంగా దీనిని జరుపుతారు. ఈ వ్యాయామం 2023 జనవరి 16 నుండి 20 వరకు ఐదు రోజుల పాటు నిర్వహించబడుతుంది. ఈ వ్యాయామం ద్వారా రెండు నౌకాదళాల యూనిట్లు సముద్ర రంగంలో తమ యుద్ధ-పోరాట నైపుణ్యాలను మెరుగుపరుచుకోనున్నాయి.

ఇండో- ఈజిప్ట్ జాయింట్ ఎక్సర్‌సైజ్ సైక్లోన్ - I ప్రారంభం

సైక్లోన్ పేరుతొ నిర్వహిస్తున్న ఇండో- ఈజిప్ట్ దళాల జాయింట్ ట్రైనింగ్ ఎక్సర్‌సైజ్ యొక్క ప్రారంభ ఎడిషన్, జనవరి 14న జైసల్మేర్‌లో ప్రారంభమైంది. ఈ సైనిక కసరత్తు 14 రోజులు పాటు సుదీర్ఘంగా కొనసాగనుంది. రెండు దేశాల ప్రత్యేక దళాల నైపుణ్యాలను మెరుగుపర్చుకోవడంతో పాటుగా రెండు సైన్యాల మధ్య సహకారం మరింత పెంపొందించుకోవడమే ఈ వ్యాయామం లక్ష్యం.

భారత్ మరియు ఈజిప్టుల మధ్య 75 ఏళ్ళ దైపాక్షిక సంబంధం పూర్తియిన సంధర్బంగా, ఈ ఏడాది రిపబ్లిక్ డే వేడుకలకు ఈజిప్టు అధ్యక్షుడు అడ్బెల్ ఫట్టా ఎల్-సిసి ముఖ్య అతిథిగా హాజరుకానున్నారు. భారత రిపబ్లిక్ డే పరేడ్‌కు అరబ్ రిపబ్లిక్ ఆఫ్ ఈజిప్ట్ అధ్యక్షుడు ముఖ్య అతిథిగా రావడం ఇదే తొలిసారి.

ఇండో-జపాన్ వీర్ గార్డియన్ ఎక్సర్‌సైజ్ 2023

ఇండియా మరియు జపాన్ వైమానిక దళాల ద్వైపాక్షిక వైమానిక రక్షణ వ్యాయామం 'వీర్ గార్డియన్ 2023' యొక్క ప్రారంభ ఎడిషన్ జపాన్‌లోని హ్యకురి ఎయిర్ బేస్ వద్ద జనవరి 12 నుండి 26 మధ్య నిర్వహించినట్లు భారత రక్షణ మంత్రిత్వ శాఖ వెల్లడించింది. 16 రోజుల పాటు సాగిన ఉమ్మడి శిక్షణ సమయంలో రెండు వైమానిక దళాలు సంక్లిష్టమైన మరియు సమగ్రమైన వైమానిక విన్యాసాలలో పాల్గొన్నాయి.

జపాన్ ఎయిర్ సెల్ఫ్ డిఫెన్స్ ఫోర్స్ నుండి F-2 మరియు F-15 విమానాలు పాల్గొనగా, ఇండియన్ ఎయిర్ ఫోర్స్ నుండి Su-30 MKI విమానాలు పాల్గున్నాయి. ఈ 'వీర్ గార్డియన్ 2023' వ్యాయామం రెండు వైమానిక దళాల మధ్య పరస్పర అవగాహనను పెంపొందించే లక్ష్యంతో నిర్వహిస్తున్నారు.