January 19, 2024 Current affairs in Telugu. రోజువారీ జాతీయ, అంతర్జాతీయ సమకాలీన అంశాలను తెలుగులో పొందండి. యూపీఎస్‌సి, ఏపీపీఎస్‌సి, టీఎస్‌పీఎస్‌సి, స్టాఫ్ సెలక్షన్ కమిషన్, బ్యాంకింగ్, రైల్వే వంటి నియామక పరీక్షల కొరకు సిద్దమవుతున్న ఆశావహుల కోసం వీటిని అందిస్తున్నాం.
పొల్లాచ్చిలో తమిళనాడు అంతర్జాతీయ బెలూన్ ఫెస్టివల్ 2024
తమిళనాడు పర్యాటక శాఖ మద్దతుతో తమిళనాడు అంతర్జాతీయ బెలూన్ ఫెస్టివల్ యొక్క 9వ ఎడిషన్ జనవరి 12 నుండి 16 వరకు నిర్వహించబడుతుంది. కోయంబత్తూరు జిల్లాలోని పొల్లాచ్చిలో తమిళనాడు చాంబర్ ఆఫ్ కామర్స్ ప్రెసిడెంట్ జీడీ గోపాలకృష్ణన్ దీనిని ప్రారంభించారు. 8 దేశాలకు చెందిన హాట్ ఎయిర్ బెలూన్‌లు ఈ వేడుకలో పాల్గొన్నాయి.
గ్లోబల్ మీడియా బాక్స్ సహకారంతో తమిళనాడు పర్యాటక శాఖ ఈ వైబ్రెంట్ ఫెస్టివల్ నిర్వహించింది. ఈ వేడుకకు భారతదేశం మరియు విదేశాల నుండి వేలాది మంది సందర్శకులు హాజరయ్యారు. యునైటెడ్ కింగ్‌డమ్, ఫ్రాన్స్, నెదర్లాండ్స్, స్పెయిన్, జపాన్, థాయిలాండ్ మరియు వియత్నాం వంటి దేశాల నుండి 10కి పైగా హాట్ ఎయిర్ బెలూన్‌లు ఇందులో పాల్గొన్నాయి.
దావోస్‌ సదస్సులో 40 వేల కోట్ల పెట్టుబడులు రాబట్టిన తెలంగాణ ప్రభుత్వం
దావోస్‌లో ఇటీవల జరిగిన వరల్డ్ ఎకనామిక్ ఫోరమ్ సమావేశాలలో తెలంగాణ ప్రభుత్వం 40,232 కోట్లకు పైగా పెట్టుబడులను ప్రకటించింది. ఈ సమావేశాలకు తెలంగాణ నూతన ముఖ్యమంత్రి ఎ. రేవంత్ రెడ్డి మరియు ఐటీ & పరిశ్రమల శాఖ మంత్రి శ్రీధర్ బాబు నేతృత్వంలోని బృందం నేరుగా హాజరయ్యారు. వీరి బృందం 3 రోజుల్లో 200కు పైగా ప్రముఖ వ్యాపార సంస్థలు, నాయకులతో సమావేశమైంది. గత ఏడాది దావోస్‌లో రాష్ట్రం దాదాపు రూ. 21,000 కోట్ల విలువైన అవగాహన ఒప్పందాలపై సంతకం చేసిన దానికంటే ఇది దాదాపు రెట్టింపు
ఈ పెట్టుబడుల్లో అంతర్జాతీయ కంపెనీలు అయిన ఐరన్ మౌంటైన్ మరియు దాని భారతీయ జాయింట్ వెంచర్ భాగస్వామి వెబ్ వర్క్స్ పాటుగా, అదానీ గ్రూప్ మరియు జేఎస్‌డబ్ల్యు గ్రూప్, అరజెన్ లైఫ్ సైన్సెస్ మరియు గోడి ఇండియా వంటి భారతీయ బహుళజాతి సమ్మేళన సంస్థలు కూడా ఉన్నాయి.
- అదానీ గ్రూప్: గ్రీన్ ఎనర్జీ, మొబిలిటీ, లైఫ్ సైన్సెస్, డిఫెన్స్ మరియు ఏరోస్పేస్ రంగాలలో 12,400 కోట్లు పెట్టుబడులు ప్రతిపాదించింది.
- జేఎస్‌డబ్ల్యు ఎనర్జీకి అనుబంధంగా ఉన్న జేఎస్‌డబ్ల్యు నియో ఎనర్జీ తెలంగాణలో 9,000 కోట్ల రూపాయల పెట్టుబడితో పంప్‌డ్ స్టోరేజీ ప్రాజెక్ట్‌ను ఏర్పాటు చేయనున్నట్లు ప్రకటించింది.
- ప్రముఖ ఐటీ ఇన్‌ఫ్రాస్ట్రక్చర్ ప్రొవైడర్ అయిన వెబ్ వర్క్స్ తెలంగాణలో డేటా సెంటర్లను ఏర్పాటు చేసేందుకు 5,200 కోట్లను ప్రకటించింది.
- లైఫ్ సైన్సెస్ రంగంలో ఉన్న అరజెన్ లైఫ్ సైన్సెస్ ప్రస్తుతం ఉన్న ప్లాంట్‌పై రూ. 2,000 కోట్ల పెట్టుబడి పెట్టనున్నట్లు ప్రకటించింది.
- హైదరాబాద్‌కు చెందిన లిథియం-అయాన్ సెల్ తయారీదారు అయిన గోడి ఇండియా వచ్చే ఐదేళ్ల కాలంలో రూ.8,000 కోట్లు పెట్టుబడులు పెట్టనుంది. దీని కింద కంపెనీ 12.5 GWh సెల్ తయారీ యూనిట్‌ను ఏర్పాటు చేస్తుంది.
తెలంగాణ ప్రభుత్వం వివిధ అభివృద్ధి ప్రాజెక్టుల సహకారం కోసం ప్రపంచ బ్యాంకుతో సహా పలు కంపెనీలు మరియు సంస్థలతో అవగాహన ఒప్పందాలు కుదుర్చుకుంది. ఈ భాగస్వామ్యాలు రాష్ట్ర మౌలిక సదుపాయాలు మరియు సామాజిక సేవలను మరింత మెరుగుపరుచనున్నాయి.
ఈ పెట్టుబడి హామీలు తెలంగాణలో వేలాది కొత్త ఉద్యోగాలను సృష్టించి రాష్ట్ర ఆర్థికాభివృద్ధికి, అభివృద్ధికి దోహదపడతాయని భావిస్తున్నారు . గ్రీన్ ఎనర్జీ, డేటా సెంటర్లు మరియు లైఫ్ సైన్సెస్ వంటి రంగాలపై దృష్టి కేంద్రీకరించడం రాష్ట్ర ప్రభుత్వ దృష్టిలో స్థిరమైన మరియు విజ్ఞాన ఆధారిత ఆర్థిక వ్యవస్థకు అనుగుణంగా ఉంటుంది.
206 అడుగుల ఎత్తైన అంబేద్కర్ విగ్రహాన్ని ఆవిష్కరించిన ఏపీ సీఎం జగన్
ఆంధ్రప్రదేశ్ ముఖ్యమంత్రి వైఎస్ జగన్ మోహన్ రెడ్డి విజయవాడలో జనవరి 19న డాక్టర్ బిఆర్ అంబేద్కర్ యొక్క ఎత్తైన విగ్రహాన్ని ఆవిష్కరించారు. స్టాట్యూ ఆఫ్ సోషల్ జస్టిస్ పేరుతొ ప్రారంభించిన ఈ కాంస్య విగ్రహం, 206 అడుగుల పొడవుతో విజయవాడలోని స్వరాజ్ మైదానంలో ఉన్న స్మృతి వనం వద్ద ఏర్పాటు చేశారు. ఈ విగ్రహం మొత్తం పొడవు 206 అడుగులు కాగా దీనిలో 81 అడుగుల పీఠం, 125 అడుగుల డాక్టర్ బీఆర్ అంబేద్కర్ విగ్రహం ఉంది.
ఈ స్మృతి వనం సుమారు 18 ఎకరాలలో 400 కోట్ల వ్యయంతో నిర్మించబడింది. స్వరాజ్ మైదాలో డాక్టర్ బిఆర్ అంబేద్కర్ చైత్య మ్యూజియం, కన్వెన్షన్ సెంటర్, బిఆర్ అంబేద్కర్ జీవిత సంఘటనల మ్యూరల్ ఆర్ట్ వర్క్స్‌తో పాటు మ్యూజికల్ ఫౌంటెన్ మరియు గార్డెన్‌తో కూడిన కొలనేడ్ కూడా అభివృద్ధి చేసారు. సాంఘిక న్యాయం కోసం బాబాసాహెబ్ చేసిన కృషికి గౌరవంగా ఈ విగ్రహం ఏర్పాటు చేశారు.
కంచుతో రూపొందించిన ఈ విగ్రహం భారత రాజ్యాంగాన్ని చేతిలో పట్టుకుని మూడు పాయింట్ల భంగిమలో దృఢంగా నిలబడి ఉన్న డాక్టర్ అంబేద్కర్‌ను ప్రదర్శిస్తుంది. సమానత్వం, న్యాయం మరియు సమాజంలోని అట్టడుగు వర్గాల సాధికారత పట్ల ఆయనకున్న అచంచలమైన నిబద్ధతకు ఈ విగ్రహం ప్రతీక. ఇది ప్రస్తుతం ప్రపంచంలోనే అత్యంత ఎత్తైన బీఆర్ అంబేద్కర్ విగ్రహంగా అవతరించింది.
గత ఏడాది 14 ఏప్రిల్ 2023 న డాక్టర్ బిఆర్ అంబేద్కర్ 132వ జయంతి సందర్భంగా హుస్సేన్ సాగర్ సరస్సు వద్ద ఏర్పాటు చేసిన 125 అడుగుల ఎత్తైన కాంస్య విగ్రహం ఇది వరకు ప్రపంచంలోనే అత్యంత ఎత్తైన బీఆర్ అంబేద్కర్ విగ్రహంగా ఉండేది. దీని మొత్తం ఎత్తు 175 అడుగులు కాగా, ఇందులో విగ్రహం 125 అడుగులు, కింద స్తంభం 50 అడుగులు ఉంటుంది. దీనిని మాజీ తెలంగాణ సీఎం కేసీఆర్ ఏర్పాటు చేశారు.
మహతారీ వందన యోజన ప్రారంభించిన ఛత్తీస్‌గఢ్ ప్రభుత్వం
ఛత్తీస్‌గఢ్ ప్రభుత్వం ఇటీవలే మహతారీ వందన యోజన 2024 అనే కొత్త పథకాన్ని ప్రారంభించింది. ఈ పథకం ద్వారా, 23 నుండి 60 సంవత్సరాల మధ్య వయస్సు గల వివాహిత మహిళలకు ప్రతి నెలా ₹1,000 ఆర్థిక సహాయం అందించబడుతుంది. ఈ పథకం ద్వారా, రాష్ట్రంలోని 1.5 మిలియన్ మంది మహిళలకు ప్రయోజనం చేకూరుతుందని అంచనా వేస్తున్నారు.
మహతారి వందన యోజన మహిళలను ఆర్థికంగా బలోపేతం చేయడం మరియు వారి మొత్తం శ్రేయస్సుకు దోహదం చేయడం లక్ష్యంగా పెట్టుకుంది. ఈ పథకం మహిళలు వారి కుటుంబాల ఆర్థిక అవసరాలను తీర్చడంలో సహాయపడుతుంది, వారి విద్య, ఆరోగ్యం మరియు ఇతర అవసరాలపై దృష్టి పెట్టడానికి వీలు కల్పిస్తుంది. ఈ పథకం ప్రయోజనాలను పొందేందుకు, మహిళల వయస్సు 23 నుండి 60 సంవత్సరాల మధ్య ఉండాలి మరియు వారి కుటుంబ వార్షిక ఆదాయం ₹2.5 లక్షల కంటే తక్కువ ఉండాలి.
9 ఏళ్ళ నిషేధం తర్వాత అస్సాంలో బఫెలో ఫైట్‌ పునఃప్రారంభం
అస్సాంలోని మాగ్ బిహు పండగ సందర్భంగా, ప్రభుత్వ మార్గదర్శకాల ప్రకారం సాంప్రదాయ గేదెల పోరాటం 9 ఏళ్ళ నిషేధం తర్వాత మొదటిసారి నిర్వహించబడింది. 2014లో తమిళనాడులో జల్లికట్టుపై సుప్రీంకోర్టు నిషేధం విధించిన నేపథ్యంలో అస్సాం రాష్ట్ర ప్రభుత్వం 2015లో దీనిని నిషేధించింది.
అయితే గత డిసెంబర్ 27న అసోం ప్రభుత్వం ఈ నిర్ణయాన్ని పునఃసమీక్షించింది. మాగ్ బిహు సందర్భంగా గేదెలు మరియు బుల్బుల్ ఫైట్‌లను నిర్వహించడానికి అనుమతిస్తూనే, ఆ క్రూరత్వాన్ని నిర్ధారించడానికి కఠినమైన మార్గదర్శకాలు రూపొందించింది. గతంలో కనీసం 25 సంవత్సరాల పాటు ఇటువంటి కార్యక్రమాలు నిర్వహించిన చరిత్ర ఉన్న ప్రదేశాలలో మాత్రమే ఈ పోరాటాలు నిర్వహించడానికి మాత్రమే అనుమతి అందించింది.
అయితే ఈ పునరుద్ధరణ వేడుకలు కొత్త సంతోషాన్ని కలిగిస్తూనే, వివాదాన్ని కూడా రేకెత్తించింది. ఈ అభ్యాసం చుట్టూ ఉన్న సంక్లిష్ట సాంస్కృతిక ప్రాముఖ్యత మరియు జంతు సంక్షేమ ఆందోళనలను వెలుగులోకి తెచ్చింది. మోహ్-జుజ్ అస్సాంలో లోతైన సాంస్కృతిక ప్రాముఖ్యతను కలిగి ఉంది. ఇది బలం మరియు పరాక్రమానికి ప్రతీక. దీని పునరుద్ధరణ వారసత్వ పునరుద్ధరణగా భావించబడింది.
అయితే జంతు హక్కుల కార్యకర్తలు ఈ వేడుకుల పునరుజ్జీవనాన్ని వ్యతిరేకించారు, నియంత్రిత పరిస్థితుల్లో కూడా పోరాటాలు ఎటువంటి రక్తపాతంతో సంబంధం లేకుండా జంతువులకు ఒత్తిడి మరియు శారీరక హాని కలిగిస్తాయని వాదిస్తున్నారు.
అరుణాచల్ ప్రదేశ్‌లో పక్కే పాగా హార్న్‌బిల్ ఫెస్టివల్
పక్కే పాగా హార్న్‌బిల్ ఫెస్టివల్ యొక్క 9వ ఎడిషన్ అరుణాచల్ ప్రదేశ్‌లోని పక్కే కేసాంగ్ జిల్లాలోని సీజోసా పట్టణంలో జనవరి 18 నుండి 20 వరకు నిర్వహించబడింది. 2019లో అప్పటి అరుణాచల్ ముఖ్యమంత్రి పెమా ఖండూ పిపిహెచ్‌ఎఫ్‌ని ఆ రాష్ట్ర పండుగగా ప్రకటించారు.
ఈ పండుగ అరుణాచల్ ప్రదేశ్‌లోని అతిపెద్ద తెగ అయిన నైషి తెగ యొక్క గొప్ప సంస్కృతి మరియు వారసత్వానికి సంబంధించిన వేడుక. అంతరించిపోతున్న పక్షుల సమూహం అయిన హార్న్‌బిల్‌ల పరిరక్షణ గురించి అవగాహన కల్పించడానికి ఇది ఒక వేదిక.
హైదరాబాద్‌లో వింగ్స్ ఇండియా 2024 ఈవెంట్
కేంద్ర పౌర విమానయాన మంత్రి శ్రీ జ్యోతిరాదిత్య ఎం సింధియా బేగంపేట విమానాశ్రయంలో ఆసియాలోనే అతిపెద్ద ఏవియేషన్ ఎక్స్‌పో వింగ్స్ ఇండియా 2024ను జనవరి 18న ప్రారంభించారు. ఈ వేడుకను అమృత్ కాల్‌లో భారతదేశాన్ని ప్రపంచానికి కనెక్ట్ చేయడం అనే థీమ్ ఆధారితంగా నిర్వహించారు. భారత ప్రభుత్వ పౌర విమానయాన మంత్రిత్వ శాఖ మరియు ఫెడరేషన్ ఆఫ్ ఇండియన్ ఛాంబర్స్ ఆఫ్ కామర్స్ అండ్ ఇండస్ట్రీ సంయుక్తంగా ఈ కార్యక్రమాన్ని నిర్వహించాయి.
ఈ ప్రతిష్టాత్మక ఈవెంట్, భారతీయ మరియు ప్రపంచ విమానయాన పరిశ్రమలో తాజా పురోగతి మరియు ఆవిష్కరణలను ప్రదర్శించింది. ఈ వేడుకకు 106 దేశాల నుండి 1500 మంది ప్రతినిధులు, 5000 మంది వ్యాపార సందర్శకులు మరియు ప్రపంచవ్యాప్తంగా 200 మంది ఎగ్జిబిటర్లు హాజరయ్యారు.
ఈ ఈవెంట్ 2047 నాటికి ప్రపంచంలోని మూడవ అతిపెద్ద దేశీయ విమానయాన మార్కెట్‌గా అవతరించే లక్ష్యంతో విమానయాన రంగానికి భారతదేశం యొక్క ప్రతిష్టాత్మక లక్ష్యాలపై దృష్టి సారించింది. వింగ్స్ ఇండియా 2024లో ఏడు ప్రధాన ప్రకటనలు చేయబడ్డాయి.
- ఫెడరేషన్ ఆఫ్ ఇండియన్ ఛాంబర్స్ ఆఫ్ కామర్స్ అండ్ ఇండస్ట్రీ మరియు కేపీఎంజీ లిమిటెడ్ ద్వారా పౌర విమానయానంపై ఉమ్మడి నాలెడ్జ్ పేపర్ విడుదల విడుదల చేయబడింది.
- ఉడాన్ 5.3 కార్యక్రమం ప్రారంభించబడింది. దీని కింద రాబోయే సంవత్సరాల్లో 10 ఫ్లైట్ సిమ్యులేటర్లు మరియు 10,000 మంది పైలట్లతో శిక్షణ అందిస్తారు.
- వచ్చే సంవత్సరాలలో ఎయిర్‌బస్-ఎయిర్ ఇండియా ట్రైనింగ్ సెంటర్ ప్రారంభం.
- టాటా ఏరోస్పేస్ లిమిటెడ్ మరియు మహీంద్రా ఏరోస్పేస్ స్ట్రక్చర్స్ ప్రైవేట్ లిమిటెడ్‌తో ఎయిర్‌బస్ తయారీ ఒప్పందాలు.
- ఏరోస్పేస్ పరిశ్రమలో స్థిరమైన శిక్షణను అభివృద్ధి కోసం జీఎమ్ఆర్ మరియు ఇండిగోతో సంతకం.
- జీఎమ్ఆర్ స్కూల్ ఆఫ్ ఏవియేషన్ ప్రారంభోత్సవం.
- 17 నెలల వ్యవధిలో 200 విమానాల ట్రిపుల్ ఆర్డర్‌తో అకాసా ఎయిర్ డీల్ ప్రకటన.
ఖాదీ సనాతన్ వస్త్రాను ప్రారంభించిన కెవిఐసి
ఖాదీ అండ్ విలేజ్ ఇండస్ట్రీస్ కమిషన్, 20% తగ్గింపుతో 'సనాతన్ ఖాదీ వస్త్రా' యొక్క కొత్త శ్రేణిని ప్రారంభించింది. ఢిల్లీలోని కన్నాట్ ప్లేస్‌లోని ఫ్లాగ్‌షిప్ ఖాదీ భవన్‌లో ఖాదీ దుస్తులతో తయారు చేసిన 'సనాతన్ వస్త్రా'ను కెవిఐసి ఛైర్మన్ మనోజ్ కుమార్ ప్రారంభించారు. ఈ సనాతన్ దుస్తుల రూపకల్పన నిఫ్ట్ యందు ఉన్న ఖాదీ సెంటర్ ఆఫ్ ఎక్సలెన్స్ యందు తయారు చేశారు.
సనాతన్ ఖాదీ వస్త్రా శ్రేణి సాంప్రదాయ భారతీయ వస్త్రాలు మరియు డిజైన్‌ల నుండి ప్రేరణ పొందింది. ఇది కుర్తాలు, చీరలు, సూట్లు మరియు ఉపకరణాలతో సహా అనేక రకాల వస్త్రాలను కలిగి ఉంటుంది. బట్టలు పత్తి, పట్టు మరియు ఉన్ని వంటి 100% సహజ ఫైబర్‌లతో తయారు చేయబడతాయి.
సనాతన్ ఖాదీ వస్త్రా' శ్రేణిని ప్రారంభించడం ఖాదీ మరియు సాంప్రదాయ భారతీయ వస్త్రాలను ప్రోత్సహించడానికి కెవిఐసి చేస్తున్న ప్రయత్నాలలో భాగం. ఖాదీని మరింత చౌకగా మరియు యువతకు అందుబాటులోకి తీసుకురావడానికి ఖాదీ కమిషన్ కృషి చేస్తోంది.
గుజరాత్‌కు చెందిన కచ్చి ఖరెక్‌కు జిఐ ట్యాగ్
గిర్ కేసర్ మామిడి తర్వాత గుజరాత్ నుండి జిఐ ట్యాగ్ పొందిన రెండవ ఫలంగా కచ్చి ఖరెక్ (ఖజ్జురం) అవతరించింది. కచ్చి ఖరెక్ అనేది గుజరాత్‌లోని కచ్ ప్రాంతానికి చెందిన ఒక రకం ఖర్జూరం. ఇది బంగారు-గోధుమ రంగు మరియు తీపి, వగరు రుచికి ప్రసిద్ధి చెందింది. స్థానిక యూనిడేట్ ఫార్మర్ ప్రొడ్యూసర్ కంపెనీ లిమిటెడ్ ఈ ఉత్పత్తి జిఐ ట్యాగ్ కోసం దరఖాస్తు చేసుకుంది.
కచ్చి ఖరెక్, కచ్ ప్రాంతానికి విలువైన పంట. ఈ ప్రాంతంలోని వేలాది మంది రైతులకు ఇది ఆదాయ వనరు. జిఐ ట్యాగ్ ఈ పంట యొక్క స్థిరత్వాన్ని మరియు దానిని ఉత్పత్తి చేసే రైతుల జీవనోపాధిని నిర్ధారించడానికి సహాయపడుతుంది. చ్చి ఖరెక్ ఒక రుచికరమైన మరియు పోషకమైన పండు. ఇది విటమిన్లు, ఖనిజాలు మరియు ఫైబర్ యొక్క మంచి మూలం.
ఖేలో ఇండియా యూత్ గేమ్స్ 2023ని ప్రారంభించిన ప్రధాని
ప్రధాన మంత్రి నరేంద్ర మోదీ జనవరి 19, 2024న చెన్నైలో ఖేలో ఇండియా యూత్ గేమ్స్ ఆరవ ఎడిషన్‌ను ప్రారంభించారు. చెన్నైలోని జవహర్‌లాల్ నెహ్రూ స్టేడియంలో జనవరి 19 నుండి 31 వరకు క్రీడలు నిర్వహించారు. ఇప్పటి వరకు జరిగిన గేమ్స్‌లో ఇదే అతిపెద్ద ఎడిషన్. ఖేలో ఇండియా యూత్ గేమ్స్ యొక్క ఈ ఎడిషన్‌లో 5,600 మంది అథ్లెట్లు పాల్గొన్నారు. 13 రోజుల పాటు 15 వేదికల్లో 26 క్రీడా విభాగాలకు సంబంధించి 275కి పైగా పోటీ ఈవెంట్‌లు జరిగాయి.
సౌత్ ఇండియాలో ఖేలో ఇండియా యూత్ గేమ్స్ జరగడం ఇదే తొలిసారి. తమిళనాడులోని చెన్నై, మధురై, తిరుచ్చి మరియు కోయంబత్తూర్ అనే నాలుగు నగరాల్లో ఈ క్రీడలు నిర్వహించారు. 26 క్రీడా విభాగాలలో ఫుట్‌బాల్, వాలీబాల్, బ్యాడ్మింటన్ వంటి ఆధునిక ఆటలు, కలరిపయట్టు, గట్కా, తంగ్ టా, కబడ్డీ మరియు యోగాసన వంటి సంప్రదాయ క్రీడలు వంటివి ఉన్నాయి. ఖేలో ఇండియా యూత్ గేమ్స్ చరిత్రలో తొలిసారిగా తమిళనాడు సంప్రదాయ క్రీడ అయిన సిలంబంను డెమో స్పోర్ట్‌గా పరిచయం చేశారు.
దక్షిణాది రాష్ట్రాలలో ప్రధాని మోడీ పర్యటన
ప్రధాని మోదీ జనవరి 19న తమిళనాడు, మహారాష్ట్ర మరియు కర్ణాటక రాష్ట్రాలలో పర్యటించారు. మహారాష్ట్రలోని షోలాపూర్‌లో బహుళ అభివృద్ధి ప్రాజెక్టుల ప్రారంభోత్సవం మరియు శంకుస్థాపన చేశారు. 2,000 కోట్ల విలువైన 8 అమృత్ (అటల్ మిషన్ ఫర్ రిజువెనేషన్ అండ్ అర్బన్ ట్రాన్స్‌ఫర్మేషన్) ప్రాజెక్టులకు ఆయన శంకుస్థాపన చేశారు.
మహారాష్ట్రలో ప్రధాన మంత్రి ఆవాస్ యోజన-అర్బన్ కింద పూర్తి చేసిన 90,000 ఇళ్లను ప్రధాని లబ్దిదారులకు అందజేశారు. షోలాపూర్‌లోని రాయ్‌నగర్ హౌసింగ్ సొసైటీకి చెందిన 15,000 ఇళ్లను కూడా ప్రజలకు అందజేశారు. ఈ కార్య‌క్ర‌మంలో మహారాష్ట్రలోని 10,000 మంది పీఎం-స్వనిది లబ్దిదారులకు 1వ మరియు 2వ విడతల పంపిణీని పూర్తిచేశారు.
ఇదే రోజు మధ్యాహ్నం కర్ణాటకలో పర్యటించిన ప్రధాని మోదీ, బెంగుళూరులోని బోయింగ్ ఇండియా ఇంజనీరింగ్ & టెక్నాలజీ సెంటర్‌ను ప్రారంభించారు. ఇదే వేదిక ద్వారా బోయింగ్ సుకన్య ప్రోగ్రామ్‌ను ప్రారంభం చేసారు. ఈ కార్యక్రమం భారతదేశం అంతటా ఉన్న బాలికలు మరియు మహిళలకు సైన్స్, టెక్నాలజీ, ఇంజనీరింగ్ మరియు మ్యాథ్స్ రంగాలలో క్లిష్టమైన నైపుణ్యాలను నేర్చుకోవడానికి మరియు విమానయాన రంగంలో ఉద్యోగాల కోసం శిక్షణ పొందేందుకు అవకాశాలను అందిస్తుంది.
ఇదే రోజు సాయంత్రం ఆయన తమినాడులో పర్యటించారు. చెన్నైలోని జవహర్‌లాల్ నెహ్రూ స్టేడియంలో ఖేలో ఇండియా యూత్ గేమ్స్ ఆరవ ఎడిషన్‌ను ప్రారంభించారు. ఇదే వేడుకలో ప్రసార రంగానికి సంబంధించిన సుమారు 250 కోట్ల విలువైన ప్రాజెక్టులను ప్రారంభించి, శంకుస్థాపన చేసారు. ఇందులో పునరుద్ధరించబడిన డీడీ పొదిగై ఛానెల్‌ని, డీడీ తమిళ్‌పునఃప్రారంభించారు. అలానే 8 రాష్ట్రాల్లో 12 ఆకాశవాణి ఎఫ్ఎం ప్రాజెక్ట్‌లను మరియు జమ్మూ మరియు కాశ్మీర్‌లో 4 డీడీ ట్రాన్స్‌మిటర్లను, 12 రాష్ట్రాల్లో 26 కొత్త ఎఫ్ఎం ట్రాన్స్‌మిటర్ ప్రాజెక్ట్‌లను ప్రధాన మంత్రి శంకుస్థాపన చేశారు.
జనవరి 20-21 తేదీలలో తమిళనాడులోని పలు దేవాలయాలను కూడా ప్రధాని సందర్శించారు. వీటిలో తిరుచిరాపల్లిలోని శ్రీ రంగనాథస్వామి ఆలయం, రామేశ్వరంలోని అరుల్మిగు రామనాథస్వామి ఆలయం, ధనుష్కోడిలోని కోదండరామస్వామి ఆలయం ఉన్నాయి. జనవరి 22న అయోధ్య రామాలయం ప్రారంభోత్సవంకు ముందు, ప్రధాని దేశంలోని రామాయణ సంబంధిత ప్రాంతాలను సందర్శించారు. ఇందులో భాగంగానే జనవరి 19న మహారాష్ట్ర పర్యటనలో నాసిక్‌ని సందర్శించి, శ్రీ కాలారామ్ మందిర్‌లో పూజలు మరియు దర్శనం చేసుకున్నారు.
ఆంధ్రప్రదేశ్ పర్యటనలో భాగంగా జనవరి 16న పుట్టపర్తిలోని లేపాక్షిలోని వీరభద్ర ఆలయాన్ని మోదీ సందర్శించారు. కేరళలోని గురువాయూర్‌, శ్రీరామస్వామి ఆలయాలను మోదీ సందర్శించారు. కర్ణాటక పర్యటనలో కిష్కింధ ప్రాంతాన్ని సంద్రించారు.
