తెలుగులో కరెంట్ అఫైర్స్ 14 మార్చి 2023 | తెలుగు ఎడ్యుకేషన్

మీరాబాయి చానుకు ఇండియన్ స్పోర్ట్స్ ఉమెన్ ఆఫ్ ది ఇయర్ అవార్డు

టోక్యో ఒలింపిక్ గేమ్స్ రజత పతక విజేత వెయిట్‌లిఫ్టర్ మీరాబాయి చాను 2022 బిబిసి ఇండియన్ స్పోర్ట్స్ ఉమెన్ ఆఫ్ ది ఇయర్ అవార్డును కైవసం చేసుకుంది. ప్రజాభిప్రాయం ద్వారా ఏటా ఉత్తమ బారతీయ మహిళా క్రీడాకారులకు బీబీసీ ఈ అవార్డు అందిస్తుంది. గత ఏడాది కూడా ఈ అవార్డును మీరాబాయినే సొంతం చేసుకుంది. దీనితో వరుసగా రెండుసార్లు ఈ అవార్డును గెలుచుకున్న మొదటి అథ్లెట్‌గా చాను నిలిచింది.

మీరాబాయి చాను 2020 టోక్యో ఒలింపిక్స్‌లో వెయిట్‌లిఫ్టింగ్‌లో రజత పతకాన్ని గెలుచుకున్న మొదటి భారతీయురాలుగా నిలిచింది. 2022లో ఇంగ్లాండ్‌లోని బర్మింగ్‌హామ్‌లో జరిగిన కామన్వెల్త్ గేమ్స్‌లో స్వర్ణం సాధించింది. అలానే ప్రపంచ వెయిట్ లిఫ్టింగ్ ఛాంపియన్‌షిప్ 2022లో ఆమె రజత పతకాన్ని గెలుచుకుంది.

భారత హాకీ పురుషుల జట్టుకు కొత్త కోచ్‌గా క్రైగ్ ఫుల్టన్

భారత పురుషుల హాకీ జట్టుకు కొత్త చీఫ్ కోచ్‌గా దక్షిణాఫ్రికా మాజీ ఆటగాడు క్రెయిగ్ ఫుల్టన్‌ను హాకీ ఇండియా (హెచ్‌ఐ) నియమించింది. గత నెలలో ఇండియాలో జరిగిన ఎఫ్ఐహెచ్ హాకీ ప్రపంచ కప్‌లో భారత్ క్వార్టర్-ఫైనల్‌కు చేరుకోవడంలో విఫలమైన కారణంగా రాజీనామా చేసిన గ్రాహం రీడ్ స్థానంలో క్రెయిగ్ ఫుల్టన్ నియమితులయ్యారు.

క్రెయిగ్ ఫుల్టన్ 1996 మరియు ఏథెన్స్ 2004 ఒలింపిక్స్‌లో దక్షిణాఫ్రికాకు ప్రాతినిధ్యం వహించాడు. ఆయన కెరీర్‌లో మొత్తం 195 అంతర్జాతీయ మ్యాచులు ఆడారు. 2014 నుండి 2018 మధ్య ఐరిష్ పురుషుల హాకీ టీమ్‌కు కోచ్‌గా సేవలు అందించారు. రియో ​​2016 ఒలింపిక్స్‌కు ఆ జట్టు అర్హత సాధించడంలో క్రెయిగ్ ఫుల్టన్ కీలక పాత్ర పోషించాడు.

యువ ఉత్సవ్‌ను ప్రారంభించిన కేంద్ర మంత్రి అనురాగ్ ఠాకూర్

కేంద్ర యువజన వ్యవహారాల మంత్రి అనురాగ్ సింగ్ ఠాకూర్, మార్చి 4న పంజాబ్‌లోని ఐఐటీ రోపర్ నుండి యువ ఉత్సవ-ఇండియా@2047ను ప్రారంభించారు. ఈ కార్యక్రమం ఏకకాలంలో ప్రతాప్‌గఢ్ (యుపి), హరిద్వార్ (ఉత్తరాఖండ్), ధార్ మరియు హోసంగాబాద్ (ఎంపి), హనుమాన్‌గఢ్ (రాజస్థాన్), సరైకేలా (జార్ఖండ్), కపుర్తలా (పంజాబ్), జల్గావ్ (మహారాష్ట్ర), విజయవాడ (ఆంధ్రప్రదేశ్), కర్సర్ (తెలంగాణ), పాలఖడ్ (కేరళ), కడలూరు (తమిళనాడు) లో ప్రారంభం అయ్యింది.

మొదటి దశలో భాగంగా 31 మార్చి 2023 నాటికి దేశవ్యాప్తంగా 150 జిల్లాల్లోని పాఠశాలలు మరియు కళాశాలలలో యువ ఉత్సవాలను నిర్వహించేందుకు ఏర్పాట్లు చేస్తున్నారు. ఈ కార్యక్రంను యువజన వ్యవహారాలు & క్రీడల మంత్రిత్వ శాఖ మరియు నెహ్రూ యువ కేంద్ర సంఘటన్ (NYKS) ఉమ్మడిగా నిర్వహిస్తున్నాయి. దేశంలోని యువతను మమేకం చేసేందుకు ఈ కార్యక్రమం నిర్వహిస్తున్నారు. దీనిలో భాగంగా జిల్లా, రాష్ట్ర స్థాయిలో యువ కళాకారులు, రచయితలు, ఫోటోగ్రాఫర్లు, వక్తలకు వివిధ పోటీలు నిర్వహించి బహుమతులు అందిస్తారు.

ఢిల్లీలో క్వాడ్ విదేశాంగ మంత్రుల సమావేశం

అమెరికా, ఆస్ట్రేలియా, భారతదేశం మరియు జపాన్ దేశాలకు చెందిన క్వాడ్ విదేశాంగ మంత్రుల సమావేశం మార్చి 3, 2023న దేశ రాజధాని న్యూ ఢిల్లీలో నిర్వహించారు. ఈ సమావేశానికి విదేశాంగ మంత్రి ఎస్ జైశంకర్ అధ్యక్షత వహించారు. సెప్టెంబరు 2022లో న్యూయార్క్‌లో జరిగిన చివరి సమావేశంకు కొనసాగింపుగా దీనిని నిర్వహించారు.

క్వాడ్ సమ్మిట్‌లో అమెరికా విదేశాంగ మంత్రి ఆంటోనీ బ్లింకెన్, జపాన్ విదేశాంగ మంత్రి హయాషి యోషిమాసా, ఆస్ట్రేలియా విదేశాంగ మంత్రి పెన్నీ వాంగ్, భారత విదేశాంగ మంత్రి ఎస్ జైశంకర్ పాల్గొన్నారు. ఇండో-పసిఫిక్ ప్రాంతంలో ఇటీవలి పరిణామాలు మరియు పరస్పర ఆసక్తి ఉన్న ప్రాంతీయ సమస్యలపై చర్చలు జరిపారు. అలానే క్వాడ్ దేశాలలో సైబర్ భద్రతను మెరుగుపరచడానికి ఇటీవలే ప్రారంభించిన 'క్వాడ్ సైబర్ ఛాలెంజ్ ' ప్రచార కార్యక్రమం కోసం కూడా చర్చించారు.

క్వాడ్ అనగా క్వాడ్రిలేటరల్ సెక్యూరిటీ డైలాగ్ (చతుర్భుజ భద్రతా సంభాషణ) అని అర్ధం. ఇది ఆస్ట్రేలియా, భారతదేశం, జపాన్ మరియు యునైటెడ్ స్టేట్స్ దేశాల మధ్య చర్చల ద్వారా నిర్వహించబడే వ్యూహాత్మక భద్రతా డైలాగ్. దీనిని మొదటిసారి 2007లో అప్పటి జపాన్ ప్రధాని షింజో అబే ప్రారంభించారు. రాజకీయ కారణాలతో ఆస్ట్రేలియా వైదొలగడంతో 2008లోనే దీని ప్రస్థానం ముగిసింది. అయితే వివిధ చర్చల ద్వారా 2017లో దీనిని తిరిగి పునఃప్రారంభించారు.

జన్ ఔషధి రైలును జెండా ఊపి ప్రారంభించిన కేంద్ర మంత్రులు

కేంద్ర ఆరోగ్య మంత్రి డాక్టర్ మన్సుఖ్ మాండవియా మరియు కేంద్ర రైల్వే మంత్రి అశ్విని వైష్ణవ్ 3 మార్చి 2023న, ప్రధాన మంత్రి భారతీయ జన్ ఔషధి పరియోజన (PMBJP) కి సంబంధించిన జన్ ఔషధి రైలును న్యూఢిల్లీ నుండి జెండా ఊపి ప్రారంభించారు. ఈ కార్యక్రమం బ్రాండింగ్ కోసం ఛత్తీస్‌గఢ్ సంపర్క్ క్రాంతి ఎక్స్‌ప్రెస్ రైలును జన్ ఔషధి రైలుగా ఉపయోగించుకుంటున్నారు.

ఈ రైలు ద్వారా వచ్చే రెండు నెలల్లో నాలుగు రాష్ట్రాల పరిధిలో దాదాపు 184 స్టేషన్ల పరిధిలో ఈ కార్యక్రమం కోసం ప్రచారం చేయనున్నారు. జన్ ఔషధి కేంద్రాలలో లభించే జనరిక్ ఔషధాల గురించి ప్రజలకు అవగాహన కల్పించడానికి ఈ కార్యక్రమంను దేశ వ్యాప్తంగా నిర్వహించనున్నారు.

దేశంలో ప్రస్తుతం తొమ్మిది వేలకు పైగా జన్ ఔషధి కేంద్రాలు అందుబాటులో ఉన్నాయి. ఈ ఏడాది చివరి నాటికి ప్రధాన మంత్రి భారతీయ జనౌషధి కేంద్రాల సంఖ్యను 10 వేలకు పెంచాలని ప్రభుత్వం లక్ష్యంగా పెట్టుకుంది. జన్ ఔషధి కేంద్రల ద్వారా ఔషధాలను బ్రాండెడ్ మందుల ధరల కంటే 50 నుంచి 90 శాతం తక్కువ ధరకే అందిస్తున్నారు.

స్వచ్ఛ సుజల్ శక్తి సమ్మాన్ 2023 అవార్డులు ప్రదానం

గ్రామీణ నీరు మరియు పారిశుద్ధ్య రంగంలో మహిళా ఛాంపియన్లను సత్కరించేందుకు జల్ శక్తి మంత్రిత్వ శాఖ నిర్వహించిన “స్వచ్ఛ సుజల్ శక్తి సమ్మాన్ 2023” ను భారత రాష్ట్రపతి ద్రౌపది ముర్ము ప్రారంభించారు. అంతర్జాతీయ మహిళా దినోత్సవాన్ని పురస్కరించుకుని, స్వచ్ఛ సుజల్ శక్తి సమ్మాన్ 2023 ద్వారా జలశక్తి మంత్రిత్వ శాఖ యొక్క స్వచ్ఛ్ భారత్ మిషన్ – గ్రామీణ్ (SBM - G), జల్ జీవన్ మిషన్ (JJM) మరియు నేషనల్ వాటర్ మిషన్ (NWM) పరిధిలో అసాధారణ సేవలు అందించిన 18 మంది మహిళలను రాష్ట్రపతి ద్రౌపది ముర్ము సన్మానించారు.

ఇదే వేదిక ద్వారా కేంద్ర జలశక్తి శాఖ మంత్రి శ్రీ. గజేంద్ర సింగ్ షెకావత్ జల శక్తి అభియాన్: క్యాచ్ ది రెయిన్-2023ని ప్రారంభించారు. తాగునీటి వనరుల స్థిరత్వానికి ప్రాధాన్యత ఇవ్వడం అనేది దీని ప్రధాన ప్రాధన్యత. అలానే జల్ శక్తి సే నారీ శక్తిపై వీడియో మరియు స్మారక స్టాంప్‌ను విడుదల చేసారు. అలానే మిగతా కార్యక్రమాలకు చెందిన సంకలనాలు ప్రారంభించారు.

1. ప్రధాని నరేంద్ర మోడీ 2014లో స్వచ్ఛ్ భారత్ మిషన్ ప్రారంభించారు. ఈ కార్యక్రమం ప్రారంభించిన కేవలం 5 సంవత్సరాలలో దేశంలోని దాదాపు అన్ని గ్రామాలు తమను తాము బహిరంగ మలవిసర్జన రహితంగా మార్చుకున్నాయి.
2. 2019 లో ప్రారంభించిన జల్ జీవన్ మిషన్ ద్వారా దేశంలో 11 కోట్లకు పైగా గ్రామీణ గృహాలకు కుళాయిల ద్వారా త్రాగు నీటిని అందిస్తున్నారు.
3. స్వచ్ఛ సుజల్ శక్తి సమ్మాన్ 2023 ద్వారా అట్టడుగు స్థాయి నుండి మహిళా సాధకులను నీటి-సురక్షిత భవిష్యత్తు కోసం పని చేసేలా, వారు ఇతరులను ప్రేరేపించేలా ప్రణాళిక రుపొందిస్తున్నారు.
4. జల్ శక్తి అభియాన్: క్యాచ్ ద రెయిన్-2023 కార్యక్రమంను "జల్ శక్తి సే నారీ శక్తి" అనే థీమ్‌తో నిర్వహిస్తున్నారు. దీని ద్వారా జల సురక్షిత కార్యక్రమాలలో మహిళలను భాగస్వామ్యం చేయనున్నారు.
5. ప్రధాని మోదీ 2019లో జల శక్తి అభియాన్ ప్రారంభించారు. ఈ కార్యక్రమం ద్వారా ఇప్పటి వరకు పట్టణ ప్రాంతాల్లో 46 లక్షలకు పైగా నీటి సంరక్షణ మరియు నీటి సేకరణ పనులు జరిపారు.
6. నేషనల్ వాటర్ మిషన్ 2022 లో ప్రారంభించబడింది. ఇది నీటి సంరక్షణ, వృధాను తగ్గించడం మరియు సమీకృత నీటి వనరుల అభివృద్ధి మరియు నిర్వహణకు సంబంధించిన కార్యక్రమం. ఇది జల్ జీవన్ మిషన్ యందు భాగం.

నోబెల్ శాంతి బహుమతి గ్రహీత అలెస్ బిలియాట్స్కీకి పదేళ్ల జైలు శిక్ష

2022 నోబెల్ శాంతి బహుమతి గ్రహీత అలెస్ బిలియాట్స్కీకి బెలారస్ కోర్టు పదేళ్ల జైలు శిక్ష విధించింది. స్మగ్లింగ్ మరియు ఫైనాన్సింగ్ ఉల్లంఘన చర్యలలో దోషిగా నిర్ధారించబడ్డాడని వియాస్నా మానవ హక్కుల సంఘం తెలిపింది. 2022 నోబెల్ శాంతి బహుమతి అందించిన ముగ్గురిలో అలెస్ బిలియాట్స్కీకి ఒకరు.

బెలారసియన్ నాయకుడు అలెగ్జాండర్ లుకాషెంకో యొక్క నిరంకుశ పాలనను అంతమొందించేందుకు బిలియాట్స్కీ విస్తృత స్థాయిలో ప్రభుత్వ వ్యతిరేఖ ఉద్యమాలు నిర్వహించారు. దీనికి ప్రతి చర్యగా ప్రభుత్వం వివిధ కారణాలతో ఆయనని అనేక సార్లు అరెస్టు చేసింది. అందులో ప్రధానంగా 2021 బెలారస్ ఎన్నికలలో ప్రతిపక్ష కార్యకలాపాలకు నిధులు సమకూర్చడానికి బెలారస్‌లోకి అధికమొత్తంలో నగదును అక్రమంగా తరలించాడని ఆరోపించింది. ఇప్పుడు ఇదే కేసులో ఆయనికి జైలు శిక్ష విధించబడింది.

బెలారస్ తూర్పు యూరప్లో ఉన్న ఒక భూపరివేష్టిత దేశం. దీని తూర్పుసరిహద్దులలో రష్యా, దక్షిణసరిహద్దులో ఉక్రెయిన్, పశ్చిమసరిహద్దులో పోలాండ్, ఉత్తరసరిహద్దులో లిథువేనియా, లాత్వియా దేశాలు ఉన్నాయి. దీని రాజధాని నగరం మిన్‌స్క్.

సశాస్త్ర సీమ బల్‌ డైరెక్టర్ జనరల్‌గా రష్మీ శుక్లా

సీనియర్ ఇండియన్ పోలీస్ సర్వీస్ (ఐపిఎస్) అధికారి రష్మీ శుక్లాను సశాస్త్ర సీమా బల్ (ఎస్‌ఎస్‌బి) డైరెక్టర్ జనరల్‌గా నియమితులయ్యారు. ఈమె మహారాష్ట్ర కేడర్‌కు చెందిన 1988 బ్యాచ్ ఐపీఎస్ అధికారిణి. ఈమె గతంలో సెంట్రల్ రిజర్వ్ పోలీస్‌లో విధులు నిర్వర్తించారు. ఈమె హోదాలో జూన్ 2024 వరకు బాధ్యతలు నిర్వర్తించనున్నారు.

2019లో శివసేన నాయకుడు సంజయ్ రౌత్ మరియు నేషనలిస్ట్ కాంగ్రెస్ పార్టీ నాయకుడు ఏక్నాథ్ ఖడ్సేల ఫోన్లు ట్యాప్ చేయబడినప్పుడు ఆమె మహారాష్ట్ర పోలీసులో రాష్ట్ర ఇంటెలిజెన్స్ విభాగానికి నేతృత్వం వహిస్తున్నారు. ఈ చర్యతో 2019లో బీజేపీతో విడిపోయిన శివసేన, కాంగ్రెస్, ఎన్సీపీల కూటమి మహా వికాస్ అఘాడి (ఎంవీఏ) ప్రభుత్వం ఏర్పాటు చేసింది. ఈ కూటమి నుండి విడిపోయిన ఏక్నాథ్ షిండే వర్గం తిరిగి బీజేపీ సహాయంతో ప్రభుత్వం ఏర్పాటు చేసింది.

సశాస్త్ర సీమా బల్ అనేది నేపాల్ మరియు భూటాన్‌లతో సరిహద్దుల వెంబడి బోర్డర్ రక్షణ కార్యకలాపాలు నిర్వహించే భారతదేశ సరిహద్దు రక్షణ దళం. ఇది హోం వ్యవహారాల మంత్రిత్వ శాఖ యొక్క పరిపాలనా నియంత్రణలో ఉన్న ఏడు కేంద్ర సాయుధ పోలీసు బలగాలలో ఒకటి. దీనిని 1963లో ఏర్పాటు చేసారు. దీని ప్రధాన కార్యాలయం న్యూఢిల్లీలో ఉంది.

ఈసీ నియామకాలపై సుప్రీంకోర్టు చారిత్రత్మక తీర్పు

భారత ప్రధాన ఎన్నికల కమీషనర్లు భారత ఉప ఎన్నికల కమిషనర్లు నియామక విధానానికి సంబంధించి మార్చి 2న సుప్రీంకోర్టు చారిత్రాత్మక తీర్పునిచ్చింది. ఈ తీర్పు నివేదిక ప్రకారం ప్రధానమంత్రి, లోక్‌సభ ప్రతిపక్ష నేత, భారత ప్రధాన న్యాయమూర్తితో కూడిన కమిటీ సలహా మేరకు ప్రధాన ఎన్నికల కమిషనర్‌, ఎన్నికల కమిషనర్‌ల నియామకాన్ని రాష్ట్రపతి ఆమోదించాల్సి ఉంటుంది.

జస్టిస్ కెఎం జోసెఫ్ నేతృత్వంలోని ఐదుగురు న్యాయమూర్తుల రాజ్యాంగ ధర్మాసనం ఈ తీర్పును వెలువరించింది. దీనికి సంబంధించి పార్లమెంటు చట్టం చేసే వరకు ఈ ప్యానెల్ అమలులో ఉంటుందని పేర్కొంది. భారత ఎన్నికల సంఘం సభ్యుల నియామక ప్రక్రియలో సంస్కరణలు కోరుతూ దాఖలైన పిటిషన్లపై ధర్మాసనం విచారణ చేపట్టింది.

ఎన్నికల కమిషన్ ఏకపక్ష ధోరణితో, ఎగ్జిక్యూటివ్‌ వ్యవస్థని అధికార పక్షానికి అనుకూలంగా అన్ని రకాలగా ఉపయోగించుకోవడానికి దూరంగా ఉండాలని నొక్కి చెప్పింది. రాజ్యాంగంలోని నిబంధనలకు లోబడి న్యాయమైన మరియు చట్టబద్ధమైన పద్ధతిలో ఎన్నికలు నిర్వహించేందుకు ఎన్నికల కమిషన్ బాధ్యత వహించాలని అత్యున్నత న్యాయస్థానం వెల్లడించింది

భారత రాజ్యాంగంలోని ఆర్టికల్ 324(2) ప్రకారం, ప్రధాన ఎన్నికల కమిషనర్ మరియు ఎన్నికల కమిషనర్లను నియమించడానికి భారత రాష్ట్రపతికి అధికారం ఉంది. భారత ప్రధాన ఎన్నికల కమీషనర్ భారత ఎన్నికల కమిషన్‌కు నేతృత్వం వహిస్తారు. ఇది జాతీయ మరియు రాష్ట్ర శాసనసభలకు మరియు రాష్ట్రపతి మరియు ఉపరాష్ట్రపతికి ఎంపికకు సంబధించి నిష్పక్షపాతంగా ఎన్నికలను నిర్వహించడానికి రాజ్యాంగబద్ధంగా అధికారం కలిగి ఉంటుంది.

వియత్నాం కొత్త అధ్యక్షుడిగా వో వాన్ థుంగ్‌

వియత్నాం నేషనల్ అసెంబ్లీ వో వాన్ థుంగ్‌ను ఆ దేశ కొత్త అధ్యక్షుడిగా ఎన్నుకుంది. అవినీతి ఆరోపణలతో జనవరి 2023లో ప్రెసిడెంట్ పదవికి రాజీనామా చేసిన న్గుయెన్ జువాన్ ఫుక్ స్థానంలో వో వాన్ థుంగ్‌ నూతన ప్రెసిడెంటుగా బాధ్యతలు స్వీకరించారు.

వియత్నాం ఆగ్నేయ ఆసియాలోని ఒక దేశం. దీనికి ఉత్తరాన చైనా, వాయవ్యాన లావోస్, నైరుతిన కాంబోడియా, తూర్పు దిక్కున మలేషియా, ఫిలిప్ఫీన్స్, ఇండోనేషియాలు సరిహద్దులుగా ఉన్నాయి. దీని రాజధాని నగరం హనోయి.

అదానీ-హిండెన్‌బర్గ్ వివాదంపై నిపుణుల కమిటీ ఏర్పాటు

అదానీ గ్రూప్‌పై హిండెన్‌బర్గ్ నివేదికను పరిశీలించడానికి మాజీ న్యాయమూర్తి జస్టిస్ అభయ్ మనోహర్ సప్రే నేతృత్వంలో ఐదుగురు సభ్యుల నిపుణుల కమిటీని సుప్రీంకోర్టు ఏర్పాటు చేసింది. ఈ కమిటీ హిండెన్‌బర్గ్ ఆరోపణల కారణంగా పెట్టుబడిదారులు కోట్ల నష్టానికి దారితీసిన నియంత్రణ వైఫల్యానికి కారణమైన అంశాలు మరియు ఉనికిని పరిశోధించి పూర్తి నివేదికను ఇవ్వనుంది.

ఈ కమిటీలో స్టేట్ బ్యాంక్ ఆఫ్ ఇండియా మాజీ చైర్మన్ ఓపీ భట్, రిటైర్డ్ బాంబే హైకోర్టు న్యాయమూర్తి జస్టిస్ జేపీ దేవధర్, బ్రిక్ దేశాల న్యూ డెవలప్‌మెంట్ బ్యాంక్ మాజీ చీఫ్ కేవీ కామత్, ఇన్ఫోసిస్ సహ వ్యవస్థాపకుడు నందన్ నీలేకని, సెక్యూరిటీ నిపుణుడు మరియు న్యాయవాది సోమశేఖర్ సుందరేశన్ ఉన్నారు.

ఈక్విటీ, క్రెడిట్ మరియు డెరివేటివ్ మార్కెట్‌లను విశ్లేషించడానికి నాథన్ ఆండర్సన్ 2017లో ఈ హిండెన్‌బర్గ్ రీసెర్చ్‌ను స్థాపించారు. అదానీ గ్రూప్‌పై గత రెండేళ్ల పరిశోధన అనంతరం వారు అదానీ గ్రూపు నర్మగర్భంగా స్టాక్ మానిప్యులేషన్, అకౌంటింగ్ మోసం మరియు పన్ను మినహాయింపు పద్దతులను అక్రమంగా ఉపయోగించుకుందని ఆరోపించింది.

నేవల్ కమాండర్స్ కాన్ఫరెన్స్ 2023 మొదటి ఎడిషన్ ప్రారంభం

భారతదేశపు మొట్టమొదటి స్వదేశీ విమాన వాహక నౌక ఐఎన్ఎస్ విక్రాంత్‌లో నేవల్ కమాండర్స్ కాన్ఫరెన్స్ 2023 మొదటి ఎడిషన్ మార్చి 6న ప్రారంభమైంది. ఈ నేవల్ కమాండర్స్ కాన్ఫరెన్స్‌ను సైనిక భద్రతా సమస్యలను చర్చించడానికి అలాగే నేవల్ కమాండర్లకు సీనియర్ ప్రభుత్వ కార్యనిర్వాహకులతో సంభాషించే అవకాశం కల్పించేందుకు నిర్వహించారు.

ఏటా నిర్వహించే ఈ నేవల్ కమాండర్స్ కాన్ఫరెన్స్ సముద్రంలో జరగడం మరియు భారతదేశపు మొట్టమొదటి స్వదేశీ విమాన వాహక నౌక ఐఎన్ఎస్ విక్రాంత్‌లో నిర్వహించడం ఇదే మొదటిసారి. చీఫ్ ఆఫ్ డిఫెన్స్ స్టాఫ్ మరియు ఇండియన్ ఆర్మీ మరియు ఇండియన్ ఎయిర్ ఫోర్స్ చీఫ్‌లు కూడా తదుపరి రోజులలో నావల్ కమాండర్లతో ఇంటరాక్ట్ అవుతారు.

నావల్ స్టాఫ్ చీఫ్, ఇతర నావల్ కమాండర్‌లతో కలిసి గత ఆరు నెలల్లో భారత నావికాదళం చేపట్టిన ప్రధాన కార్యాచరణ, మెటీరియల్, లాజిస్టిక్స్, మానవ వనరుల అభివృద్ధి, శిక్షణ మరియు పరిపాలనా కార్యకలాపాలను సమీక్షిస్తారు.

• చీఫ్ ఆఫ్ డిఫెన్స్ స్టాఫ్ : జనరల్ అనిల్ చౌహాన్ (రిటైర్డ్)
• చీఫ్ ఆఫ్ ఆర్మీ స్టాఫ్ : జనరల్ మనోజ్ పాండే
• చీఫ్ ఆఫ్ నావెల్ స్టాఫ్ : అడ్మిరల్ ఆర్. హరి కుమార్
• చీఫ్ ఆఫ్ ఎయిర్ స్టాఫ్ : మార్షల్ వివేక్ రామ్ చౌదరి

సంతోష్ ట్రోఫీ విజేతగా కర్ణాటక

సౌదీ అరేబియా రాజధాని రియాద్‌లోని కింగ్ ఫహద్ ఇంటర్నేషనల్ స్టేడియంలో, మార్చి 4న జరిగిన 76వ జాతీయ ఫుట్‌బాల్ ఛాంపియన్‌షిప్‌ (సంతోష్ ట్రోఫీ) ఫైనల్ మ్యాచ్‌లో కర్ణాటక 3-2తో మేఘాలయను ఓడించి విజేతగా నిలిచింది. కర్ణాటక సంతోష్ ట్రోఫీని గెలవడం 54 ఏళ్ళ తర్వాత ఇదే మొదటిసారి. ఇది కర్ణాటకకు ఐదవ సంతోష్ ట్రోఫీ. ఈ టోర్నమెంటులో అత్యంత విజయవంతమైన జట్టుగా పశ్చిమ బెంగాల్ (32 టైటిల్స్) ఉంది.

నేషనల్ ఫుట్‌బాల్ ఛాంపియన్‌షిప్ లేదా సంతోష్ ట్రోఫీ అనేది రాష్ట్ర స్థాయి జట్టులతో ఆడే జాతీయ ఫుట్‌బాల్ పోటీ. ఆల్ ఇండియా ఫుట్‌బాల్ ఫెడరేషన్ 1996లో మొదటి జాతీయ క్లబ్ లీగ్, నేషనల్ ఫుట్‌బాల్ లీగ్ ప్రారంభానికి ముందు, సంతోష్ ట్రోఫీ భారతదేశంలో అత్యుత్తమ దేశీయ ఫుట్‌బాల్ టోర్నమెంటుగా పరిగణించబడేది. టోర్నమెంట్ ప్రతి సంవత్సరం జోన్‌లుగా విభజించబడిన అర్హత కలిగిన జట్లతో నిర్వహించబడుతుంది.