తెలుగు వీక్లీ కరెంట్ అఫైర్స్ 13 ఫిబ్రవరి 2023 : పోటీ పరీక్షల స్పెషల్

వీక్లీ కరెంట్ అఫైర్స్ 13 ఫిబ్రవరి 2023 తెలుగులో ఉచితంగా పొందండి. వివిధ పోటీ పరీక్షలకు సిద్ధమయ్యే విద్యార్థులు, నిరుద్యోగుల సౌలభ్యం కోసం జాతీయంగా, అంతర్జాతీయంగా చోటు చేసుకున్న తాజా సమకాలిన అంశాలను మీకు ఇక్కడ అందిస్తున్నాం. ఈ సమాచారం మీ పోటీపరీక్షల సన్నద్ధతను మరింత మెరుగుపరుచుస్తుందని భావిస్తున్నాం.

12 రాష్ట్రాలకు కొత్త గవర్నర్ల నియామకం

రాష్ట్రపతి ద్రౌపది ముర్ము 12 రాష్ట్రాలు మరియు ఒక కేంద్రపాలిత ప్రాంతానికి కొత్త గవర్నర్‌లను నియమించారు. ఇందులో ఏడు రాష్ట్రలకు ఇతర రాష్ట్రాల గవర్నర్లను బదిలీ చేయగా మిగతా రాష్ట్రలకు నూతన గవర్నర్లను నియమించారు. ప్రస్తుత ఆంధ్రప్రదేశ్ గవర్నర్ బిశ్వ భూషణ్ హరిచందన్ ఛత్తీస్‌గఢ్ గవర్నర్‌గా బదిలీకాగా, ఆయన స్థానంలో సుప్రీంకోర్టు రిటైర్డ్ జస్టిస్ ఎస్. అబ్దుల్ నజీర్‌ను ఆంధ్రప్రదేశ్ గవర్నర్‌గా నియమించారు.

మహారాష్ట్ర గవర్నర్‌ కోష్యారీ స్థానంలో జార్ఖండ్ గవర్నర్ రమేష్ బైస్ నియమితులయ్యారు. లడఖ్ లెఫ్టినెంట్ గవర్నర్ ఆర్కే మాథుర్ రాజీనామాను ఆమోదించిన రాష్ట్రపతి ద్రౌపది ముర్ము, ఆయన స్థానంలో అరుణాచల్ ప్రదేశ్ గవర్నర్ బీడీ మిశ్రాను నియమించారు.

• ఆంధ్రప్రదేశ్ - జస్టిస్ ఎస్. అబ్దుల్ నజీర్
• అరుణాచల్ ప్రదేశ్ - త్రివిక్రమ్ పర్నాయక్
• అస్సాం - గులాబ్ చంద్ కటారియా
• బీహార్ - రాజేంద్ర విశ్వనాథ్ అర్లేకర్
• ఛత్తీస్‌ఘడ్ - బిశ్వ భూషణ్ హరిచందన్
• జార్ఖండ్ - సిపి రాధాకృష్ణన్
• హిమాచల్ ప్రదేశ్ - శివ ప్రతాప్ శుక్లా
• మహారాష్ట్ర - రమేష్ బైస్
• మణిపూర్ - అనసూయ ఉయికీ
• మేఘాలయ - ఫాగు చౌహాన్
• నాగాలాండ్ - ఎల్.ఏ గణేశన్
• సిక్కిం - లక్ష్మణ్ ప్రసాద్ ఆచార్య
• లడఖ్ (యుటి) - డా. బీడీ మిశ్రా (లెఫ్టినెంట్ గవర్నర్)

భారత రాష్ట్రల గవర్నర్లు స్టేట్ చీఫ్ ఎగ్జిక్యూటివ్ ఆఫీసర్‌గా ప్రభుత్వ కార్యనిర్వాహక శాఖ యొక్క విధులను పర్యవేక్షిస్తారు. రాష్ట్ర గవర్నర్‌ను ఐదు సంవత్సరాల కాలానికి రాష్ట్రపతి నియమిస్తారు. కనీసం 35 ఏళ్లు నిండిన భారత పౌరులు మాత్రమే ఈ పదివికి అర్హులు. గవర్నర్‌ భారత రాజ్యాంగంలోని ఆర్టికల్ 159 ప్రకారం ప్రమాణస్వీకారం చేస్తారు.

25 అడిక్షన్ ట్రీట్‌మెంట్ ఫెసిలిటీస్ (ATF) జాతికి అంకితం

కేంద్ర సామాజిక న్యాయం & సాధికారత మంత్రి డాక్టర్ వీరేంద్ర కుమార్ 25 అడిక్షన్ ట్రీట్‌మెంట్ ఫెసిలిటీస్ సెంటర్లను ఫిబ్రవరి 9న జాతికి అంకితం చేశారు. నషా ముక్త్ భారత్ అభియాన్ కింద ప్రారంభించిన ఈ ఏటీఎఫ్‌ కేంద్రాల ద్వారా సమాజంలోని మాదకద్రవ్యాలను నిర్మూలించడంలో పాటుగా డ్రగ్స్‌ రహిత దేశంగా మార్చేందుకు పని చేయనున్నారు.

యువత, పిల్లలు మరియు సమాజంలో డ్రగ్స్ దుర్వినియోగం వల్ల కలిగే దుష్ప్రభావాల గురించి అవగాహన కల్పించేందుకు సామాజిక న్యాయం మరియు సాధికారత విభాగం ఆగస్టు 2020లో నషా ముక్త్ భారత్ అభియాన్‌ను ప్రారంభించింది.

ఈ కార్యక్రమం ద్వారా మాదకద్రవ్యాల దుర్వినియోగం ఎక్కువగా ఉన్న 372 సున్నితమైన జిల్లాలను గుర్తించారు. ఇప్పటివరకు, తొమ్మిది కోట్ల 40 లక్షల మందికి పైగా ప్రజలు మరియు వేలాది విద్యా సంస్థలు ఈ దేశవ్యాప్త ప్రచారంలో భాగమయ్యాయి.

మిషన్ అంత్యోదయ సర్వే 2022-23 ప్రారంభం

కేంద్ర గ్రామీణాభివృద్ధి మరియు పంచాయితీ రాజ్ మంత్రి శ్రీ గిరిరాజ్ సింగ్, మిషన్ అంత్యోదయ సర్వే (MAS) 2022-23 దాని పోర్టల్ మరియు మొబైల్ అప్లికేషన్‌ను ఫిబ్రవరి 8న ఢిల్లీలో ప్రారంభించారు. గ్రామీణాభివృద్ధి శాఖ 2017-18 నుండి దేశంలోని అన్ని గ్రామ పంచాయితీలలో మిషన్ అంత్యోదయ సర్వేను నిర్వహిస్తోంది. ఇది గ్రామీణ పరిపాలనను మెరుగుపర్చేందుకు సంబంధించిన కార్యక్రమం.

ఈ కార్యక్రమం ద్వారా బ్లాక్ మరియు జిల్లా స్థాయిలో వార్షిక పంచాయతీ మౌలిక సదుపాయాలు, పంచాయతీ సేవలు, గ్రామ మౌలిక సదుపాయాలు, గ్రామ సేవలు, ప్రభుత్వ పథకాల అమలు వంటి మొదలగు అంశాల ప్రాథమిక డాటాను సేకరిస్తారు.

మయన్మార్, రష్యా మధ్య అణుశక్తి అభివృద్ధిపై ఒప్పందం

రష్యా మరియు మయన్మార్ ప్రభుత్వాలు శాంతియుత అణు సాంకేతిక పరిజ్ఞానాన్ని ఉపయోగించే రంగంలో సహకారాన్ని అభివృద్ధి చేయడానికి ఒక ఒప్పందంపై సంతకం చేశాయి. 2015లో మయన్మార్ మరియు రష్యా యొక్క అణు విద్యుత్ సంస్థ రోసాటమ్ మధ్య జరిగిన ప్రాథమిక ఒప్పందంకు కొనసాగింపుగా ఇది ఉండనుంది. మయన్మార్‌లోని యాంగాన్‌లోని న్యూక్లియర్ టెక్నాలజీ ఇన్ఫర్మేషన్ సెంటర్‌లో ఈ ఒప్పందంపై సంతకం చేయబడింది.

మయన్మార్ (గతంలో బర్మా) భారతదేశం, బంగ్లాదేశ్, చైనా, లావోస్ మరియు థాయ్‌లాండ్‌ల సరిహద్దులతో ఉన్న ఆగ్నేయాసియా దేశం. దీని రాజధాని నగరం నైపిడావ్. ఈ దేశం 1948లో స్వాతంత్ర్యం పొందింది . 1962లో తిరుగుబాటు తరువాత, బర్మా సోషలిస్ట్ ప్రోగ్రామ్ పార్టీ క్రింద సైనిక నియంతృత్వంగా మారింది.

2020 మయన్మార్ సార్వత్రిక ఎన్నికల తరువాత ఆంగ్ సాన్ సూకీ పార్టీ ఉభయ సభలలో స్పష్టమైన మెజారిటీతో ప్రభుత్వంను ఏర్పాటు చేసింది. అయితే 2021లో ఆంగ్ సాన్ సూకీని నిర్బంధించిన బర్మీస్ మిలిటరీ మళ్లీ అధికారాన్ని చేజిక్కించుకుంది. ప్రస్తుతం ఈ దేశ తాత్కాలిక అధ్యక్షుడుగా మైంట్ స్వే ఉన్నారు. మయన్మార్ మిలటరీ చీఫ్ మిన్ ఆంగ్ హ్లైంగ్ ప్రధానమంత్రిగా ఉన్నారు.

గతంలో మయన్మార్ ఇండియాలో భాగంగా ఉండేది. బర్మా జాతీయవాద ఉద్యమాన్ని బలహీనపరిచేందుకు బ్రిటీష్ ప్రభుత్వం 1937లో బర్మాను భారతదేశం నుండి విభజించింది. రెండవ ప్రపంచ యుద్ధం తరువాత, యు ఆంగ్ సాన్ నాయకత్వంలో, ఈ ఉద్యమం పతాక స్థాయికి చేరుకుంది. బర్మా జనవరి 4, 1948న స్వాతంత్ర్యం పొందింది.

సల్మాన్ రష్దీ కొత్త నవల 'విక్టరీ సిటీ' విడుదల

ప్రముఖ రచయిత సల్మాన్ రష్దీ తన కొత్త నవల “విక్టరీ సిటీ”ని పెంగ్విన్ రాండమ్ హౌస్ ద్వారా ప్రచురించాడు. ఇది 14వ శతాబ్దానికి చెందిన ఒక మహిళా కథ, ఒక నగరాన్ని పాలించడానికి పితృస్వామ్య ప్రపంచాన్ని ధిక్కరించిన ఒక స్త్రీ పురాణ కథ. గత ఆగస్టులో న్యూయార్క్‌లోని చౌటుప్పల్ ఇన్‌స్టిట్యూషన్‌ వేదికపై కత్తిపోటుకు గురైన తర్వాత సల్మాన్ రష్దీ ఒక కంటి చూపును మరియు అతని చేతిని ఉపయోగించగల సామర్థ్యాన్ని కోల్పోయాడు.

సల్మాన్ రష్దీ భారతీయ సంతతికి చెందిన బ్రిటీషు నవలా రచయిత, వ్యాసకర్త. 1981లో ఈయన రెండవ నవల మిడ్‌నైట్ చిల్డ్రన్ బుకర్ ప్రైజు గెలవడంతో ప్రపంచ వ్యాప్తంగా పాపులయ్యారు. ఈయన రచనా శైలి భారత ఉపఖండము నేపథ్యంలో చారిత్రక కాల్పనికతతో మిళితమైన మాజిక్ రియలిజంగా ఉంటుంది.

'డిజిటల్ పేమెంట్స్ ఉత్సవ్' ప్రారంభించిన మంత్రి అశ్విని వైష్ణవ్

ఎలక్ట్రానిక్స్ & ఇన్ఫర్మేషన్ టెక్నాలజీ మరియు రైల్వేల మంత్రి శ్రీ అశ్విని వైష్ణవ్, దేశంలో డిజిటల్ చెల్లింపులను ప్రోత్సహించే లక్ష్యంతో 'డిజిటల్ పేమెంట్స్ ఉత్సవ్' అనే సమగ్ర ప్రచారాన్ని ఫిబ్రవరి 9న ప్రారంభించారు. జీ20 డిజిటల్ ఎకానమీ వర్కింగ్ గ్రూప్ (DEWG) ఈవెంట్‌లో భాగంగా దేశంలో, ముఖ్యంగా లక్నో, పూణే, హైదరాబాద్ మరియు బెంగళూరు నగరాల్లో 2023 ఫిబ్రవరి 9 నుండి అక్టోబర్ 9 మధ్య వివిధ కార్యక్రమాలు నిర్వహించనున్నారు.

ఈ సందర్బంగా భారతదేశం వెలుపల యూనిఫైడ్ పేమెంట్ ఇంటర్‌ఫేస్ (యూపీఐ) పరిధిని విస్తరించేందుకు జరుగుతున్న ప్రయత్నాల గురించి వెల్లడించారు. యూపీఐని గ్లోబల్ పేమెంట్ పద్ధతిగా మార్చడంపై దృష్టి సారిస్తున్నట్లు తెలిపారు.

ఆస్ట్రేలియా, కెనడా, హాంకాంగ్, ఒమన్, ఖతార్, సౌదీ అరేబియా, సింగపూర్, యూఏఈ, యూకే మరియు అమెరికా వంటి 10 దేశాల్లో నివసిస్తున్న ప్రవాస భారతీయులకు త్వరలో ఈ సేవలు అందుబాటులోకి రానున్నట్లు ప్రకటించారు.

కెనరా బ్యాంకు కొత్త ఎండీ & సీఈఓగా కె సత్యనారాయణ రాజు

బెంగుళూరు కేంద్రంగా ఉన్న కెనరా బ్యాంక్ కొత్త మేనేజింగ్ డైరెక్టర్ మరియు సీఈఓగా కె సత్యనారాయణ రాజు నియమితులయ్యారు. మాజీ సీఈఓ శ్రీ ఎల్‌వి ప్రభాకర్ గత 31 డిసెంబర్ 2022న రాజీనామా చేసిన తర్వాత ఈ స్థానం ఖాళీగా ఉన్నది. సత్యనారాయణ రాజు 7 ఫిబ్రవరి 2023 నుండి ఈ కొత్త బాధ్యతలు స్వీకరించారు.

కెనరా బ్యాంక్ అనేది భారత ప్రభుత్వ ఆర్థిక మంత్రిత్వ శాఖ నియంత్రణ మరియు యాజమాన్యంలోని భారతీయ ప్రభుత్వ రంగ బ్యాంకు. ఇది 1906లో మంగళూరులో అమ్మెంబాల్ సుబ్బారావు పాయ్ చేత స్థాపించబడింది. ప్రస్తుతం ఈ బ్యాంకుకు లండన్, దుబాయ్ మరియు న్యూయార్క్‌లలో కూడా కార్యాలయాలు ఉన్నాయి.

జర్నలిస్టు ఎబికె ప్రసాద్‌కు రాజా రామ్ మోహన్ రాయ్ అవార్డు

ప్రముఖ తెలుగు జర్నలిస్టు ఎబికె ప్రసాద్‌ను జర్నలిజంలో ప్రతిష్టాత్మకమైన రాజా రామ్ మోహన్ రాయ్ జాతీయ అవార్డుకు ఎంపిక చేసినట్లు ప్రెస్ కౌన్సిల్ ఆఫ్ ఇండియా ప్రకటించింది. ఏబీకేగా పేరుగాంచిన అన్నే భవానీ కోటేశ్వర ప్రసాద్ గత 75 ఏళ్లుగా పాత్రికేయ వృత్తిలో సేవలు అందిస్తున్నారు.

ఎబికె ప్రసాద్‌ గతంలో ఆంధ్రప్రదేశ్‌లోని అన్ని ప్రధాన స్రవంతి పత్రికలకు సంపాదకునిగా పనిచేశారు. ఉమ్మడి ఆంధ్రప్రదేశ్‌లో 2004 నుంచి 2009 మధ్య రాష్ట్ర అధికార భాషా సంఘం చైర్మన్‌గా కూడా పనిచేశారు. ఈ అవార్డును ఫిబ్రవరి 28, 2023న న్యూ ఢిల్లీలోని రఫీ మార్గ్‌లోని కాన్‌స్టిట్యూషన్ క్లబ్ ఆఫ్ ఇండియాలోని డిప్యూటీ స్పీకర్ హాల్‌లో ప్రదానం చేస్తారు.

భారతీయ జర్నలిజానికి రాజా రామ్ మోహన్ రాయ్‌ని మార్గదర్శకుడుగా భావిస్తారు. దేశ ప్రజలలో సామాజిక-సాంస్కృతిక మరియు రాజకీయ అవగాహన కల్పించేందుకు బెంగాలీ (సంబాద్ కౌముది), పర్షియన్ (మిరాత్-ఉల్-అక్బర్) మరియు హిందీ వంటి ప్రధాన భాషలలో జర్నల్స్‌ను తీసుకువచ్చాడు. 1828లో ఈయన బ్రహ్మ సమాజాన్ని స్థాపించారు. ఇది భారతదేశపు మొదటి సామాజిక-మత సంస్కరణ ఉద్యమాలలో ఒకటిగా పరిగణించబడుతుంది.

ప్రపంచంలోని టాప్ 5 అక్రిడిటేషన్ సిస్టమ్స్‌లో భారతదేశం

క్వాలిటీ కౌన్సిల్ ఆఫ్ ఇండియా (QCI ) కింద భారతదేశ జాతీయ అక్రిడిటేషన్ సిస్టమ్ ఇటీవలి ప్రచురించిన గ్లోబల్ క్వాలిటీ ఇన్‌ఫ్రాస్ట్రక్చర్ ఇండెక్స్ (GQII) యందు 5వ స్థానంలో నిలిచింది. గ్లోబల్ క్వాలిటీ ఇన్‌ఫ్రాస్ట్రక్చర్ ఇండెక్స్ ప్రపంచంలోని 184 ఆర్థిక వ్యవస్థలకు నాణ్యమైన మౌలిక సదుపాయాల ఆధారంగా ర్యాంక్ ఇస్తుంది.

అయితే  భారతదేశం యొక్క మొత్తం QI సిస్టమ్ ర్యాంకిగులో 10 వ స్థానంలో ఉండగా, స్టాండర్డైజేషన్ సిస్టమ్ (BIS కింద) 9 వ స్థానంలో మరియు మెట్రాలజీ సిస్టమ్ (NPL-CSIR కింద) ప్రపంచంలో 21 వ స్థానంలో నిలిచింది. ఈ నివేదిక 2021 డేటా ఆధారంగా రూపొందనించారు. అక్రిడిటేషన్ బాడీలు ఐఎస్ఓ/ఐఈసీ వంటి అంతర్జాతీయ ప్రమాణాల ప్రకారం కన్ఫర్మిటీ అసెస్‌మెంట్ బాడీల యొక్క యోగ్యత మరియు నిష్పాక్షికతను ధృవీకరిస్తాయి.

భారతదేశంలో గుర్తింపు పొందిన ఉన్నత విద్య అక్రిడిటేషన్ సంస్థలు

• ఆల్ ఇండియా కౌన్సిల్ ఫర్ టెక్నికల్ ఎడ్యుకేషన్ (AICTE)
• అసోసియేషన్ ఆఫ్ ఇండియన్ యూనివర్సిటీస్ (AIU)
• నేషనల్ అసెస్‌మెంట్ అండ్ అక్రిడిటేషన్ కౌన్సిల్ (NAAC)
• నేషనల్ బోర్డ్ ఆఫ్ అక్రిడిటేషన్ (NBA)
• బార్ కౌన్సిల్ ఆఫ్ ఇండియా (BCI)
• ఆల్ ఇండియా మేనేజ్‌మెంట్ అసోసియేషన్ (AIMA)
• డిస్టెన్స్ ఎడ్యుకేషన్ కౌన్సిల్ (DEC)
• మెడికల్ కౌన్సిల్ ఆఫ్ ఇండియా (MCI)
• డెంటల్ కౌన్సిల్ ఆఫ్ ఇండియా (DCI)
• ఫార్మసీ కౌన్సిల్ ఆఫ్ ఇండియా (PCI)
• నేషనల్ కౌన్సిల్ ఫర్ టీచర్ ఎడ్యుకేషన్ (NCTE)
• ఇండియన్ నర్సింగ్ కౌన్సిల్ (INC)
• ఇండియన్ కౌన్సిల్ ఆఫ్ అగ్రికల్చరల్ రీసెర్చ్ (ICAR)

ముంబైలో రాష్ట్రీయ సంస్కృతి మహోత్సవ్ 2023 ప్రారంభం

రాష్ట్రీయ సంస్కృతి మహోత్సవ్ 2023ని మహారాష్ట్ర గవర్నర్ భగత్ సింగ్ కోష్యారీ ముంబైలోని ఆజాద్ మైదాన్‌లో ప్రారంభించారు. ఈ మహోత్సవ్‌ను కేంద్ర సాంస్కృతిక మంత్రిత్వ శాఖ నిర్వహించింది. ఫిబ్రవరి 11 నుండి 19 వరకు జరిగే ఈ మహోత్సవంను జాతీయ ఐక్యత మరియు సమగ్రతను ప్రోత్సహించడానికి నిర్వహిస్తారు. ఈ ప్రారంభోత్సవంలో కేంద్ర సాంస్కృతిక శాఖ మంత్రి శ్రీ కిషన్ రెడ్డి కూడా పాల్గొన్నారు.

భారతదేశపు మొట్టమొదటి డ్రోన్ ఎయిర్ ట్రాఫిక్ మేనేజ్‌మెంట్ సిస్టమ్ ప్రారంభం

గురుగ్రామ్‌కు చెందిన డ్రోన్ సొల్యూషన్స్ ప్రొవైడర్ అయిన స్కై ఎయిర్, భారతదేశపు మొట్టమొదటి డ్రోన్ ఎయిర్ ట్రాఫిక్ మేనేజ్‌మెంట్ సిస్టమ్‌ను ప్రారంభించింది. స్కై యూటీఎం పేరుతొ అందుబాటుకి తీసుకొచ్చిన ఈ సాంకేతికత డ్రోన్‌లకు సిట్యువేషనల్ అవేర్‌నెస్, అటానమస్ నావిగేషన్, రిస్క్ అసెస్‌మెంట్ మరియు ట్రాఫిక్ మేనేజ్‌మెంట్ అందించడానికి నిర్మించబడింది.

భారత రోడ్డు రవాణా మరియు రహదారుల మంత్రి నితిన్ గడ్కరీ సమక్షంలో ప్రారంభించబడిన ఈ సాఫ్ట్‌వేరును డైరెక్టరేట్ జనరల్ ఆఫ్ సివిల్ ఏవియేషన్ (DGCA) నిర్వహించనుంది. ప్రపంచవ్యాప్తంగా యూఎస్-ఆధారిత ఎయిర్‌మ్యాప్ మరియు నెదర్లాండ్స్-ఆధారిత ఎయిర్‌బస్ వంటి అనేక కంపెనీలు ఇటువంటి పరిష్కారాలను అందిస్తున్నాయి. మన దేశంలో ఇదే మొదటిది.

క్రెడిట్ కార్డ్‌ చెల్లింపులకు సపోర్ట్ చేసే భారతదేశపు మొట్టమొదటి యాప్‌గా మోబిక్విక్

భారతదేశపు ప్రముఖ ఫిన్‌టెక్ ప్లాట్‌ఫారమ్ మోబిక్విక్,  క్రెడిట్ కార్డ్‌ యూపీఐ చెల్లింపులకు సపోర్ట్ చేసే భారతదేశపు మొట్టమొదటి యాప్‌గా అవతరించింది. ప్రస్తుతం ఈ సేవలు రూపే క్రెడిట్ కార్డ్‌ వినియోగదారులకు మాత్రమే అందుబాటులోకి రానుంది. రూపే క్రెడిట్ కార్డ్‌ కలిగిన మోబిక్విక్ వియోగదారులు ఇక మీదట యూపీఐ క్యూఆర్ కోడ్‌ ఆధారిత పేమెంట్ సేవలను ఉపయోగించుకోవచ్చు.

ఎంఆర్ఎఫ్ చైర్మన్ కేఎం మమ్మెన్‌కి ఆత్మ లైఫ్‌టైమ్ అచీవ్‌మెంట్ అవార్డు

ఎంఆర్ఎఫ్ ఛైర్మన్ మరియు మేనేజింగ్ డైరెక్టర్ కేఎం మమ్మెన్‌ను ఆటోమోటివ్ టైర్ మ్యానుఫ్యాక్చరర్స్ అసోసియేషన్ (ATMA) లైఫ్‌టైమ్ అచీవ్‌మెంట్ అవార్డుతో సత్కరించింది. ఈ అవార్డును న్యూఢిల్లీలో జరిగిన ఆత్మ వార్షిక కాన్‌క్లేవ్ 2023లో మారుతీ సుజుకి ఇండియా మేనేజింగ్ డైరెక్టర్ & సీఈవో హిసాచి టేకుచి అందజేశారు. మమ్మెన్‌ యొక్క విలక్షణమైన మరియు అత్యుత్తమ నాయకత్వ లక్షణాలు, సహకారంకు గుర్తింపుగా ఈ అవార్డును ప్రదానం చేసింది.

జమ్మూ కాశ్మీర్‌లో 5.9 మిలియన్ టన్నుల భారీ లిథియం నిక్షేపాలు

జమ్మూ మరియు కాశ్మీర్‌లోని రియాసి జిల్లాలోని సలాల్-హైమానా ప్రాంతంలో 5.9 మిలియన్ టన్నుల భారీ లిథియం నిక్షేపాలను కనుగొన్నట్లు జియోలాజికల్ సర్వే ఆఫ్ ఇండియా (జిఎస్ఐ) ప్రకటించింది. లిథియం నిక్షేపాలను ఇండియాలో కనుగొనబడటం ఇదే మొదటిసారి. మెరిసే బూడిదరంగులో కనిపించే లిథియం లోహాన్ని 'వైట్ గోల్డ్' అని కూడా పిలుస్తారు. 8 మిలియన్ టన్నులతో, చిలీ ప్రపంచంలోనే అతిపెద్ద లిథియం నిల్వలను కలిగి ఉంది.

దాదాపు 26 సంవత్సరాల క్రితం, జియోలాజికల్ సర్వే ఆఫ్ ఇండియా జమ్మూ కాశ్మీర్‌లోని ఇదే ప్రాంతంలో లిథియం ఉనికి గురించి వివరణాత్మక నివేదికను సమర్పించింది. ప్రస్తుతం దానిని అధికారికంగా ప్రకటించింది. లిథియం ఎలక్ట్రిక్ బ్యాటరీల తయారీలో ప్రధాన మూలకంగా ఉపయోగపడుతుంది. దీనితో ఎలక్ట్రిక్ వాహనాలు, ల్యాప్‌టాప్‌లు మరియు సెల్ ఫోన్‌ల బ్యాటరీలలో తయారీ రంగంలో భారత్ ముందుడుగు వేయనుంది.