తెలుగులో వీక్లీ కరెంట్ అఫైర్స్ 27 మార్చి 2023 | పోటీ పరీక్షల ప్రత్యేకం

వాయు ప్రహార్ శిక్షణ వ్యాయామం విజయవంతం

భారత సైన్యం మరియు వైమానిక దళం, చైనా సరిహద్దు వెంబడి వాస్తవ నియంత్రణ రేఖకు (LAC) సమీపంలో  వాయు ప్రహార్ అనే 92 గంటల ఉమ్మడి వ్యాయామాన్ని విజయవంతంగా పూర్తి చేశాయి. ఇరు సాయుధదళాల మధ్య అవగహన పెంపొందించేందుకు మరియు వివిధ ఏజెన్సీల మధ్య సమన్వయం కల్పించేందుకు ఈ శిక్షణ వ్యాయామం నిర్వహిస్తారు.

యూఎన్ హ్యూమన్ రైట్స్ కౌన్సిల్ 52వ సెషన్‌లో వార్ & ఉమెన్ బుక్ విడుదల

బంగ్లాదేశ్ లిబరేషన్ వార్ సమయంలో జరిగిన యుద్ధ నేరాలను వివరిస్తూ 'వార్ అండ్ ఉమెన్' అనే పుస్తకాన్ని మార్చి 24న జెనీవాలో జరిగిన ఐక్యరాజ్యసమితి మానవ హక్కుల మండలి 52వ సెషన్‌లో విడుదల చేశారు. డాక్టర్ ఎంఏ హసన్ రాసిన ఈ పుస్తకంలో, 1971 లిబరేషన్ వార్ సమయంలో పాకిస్తాన్ సైన్యం మహిళలపై చేసిన లైంగిక వేధింపులు, హింసలు మరియు హత్యల పరిమాణాన్ని వివరించారు.

లోక్‌సభ ఎంపీగా రాహుల్‌గాంధీపై అనర్హత వేటు

కాంగ్రెస్ నాయకుడు మరియు వాయనాడ్ ఎంపీ రాహుల్ గాంధీ లోక్‌సభ సభ్యత్వంపై అనర్హత వేటు పడింది. 2019 ఎన్నికల సమయంలో మోడీ ఇంటి పేరుపై రాహుల్ గాంధీ చేసిన వివాదాస్పద వ్యాఖ్యలకు నేరపూరిత పరువు నష్టం కేసులో సూరత్ కోర్టు దోషిగా నిర్ధారించింది. ఈ పరువు నష్టం కేసులో రాహుల్‌కి కోర్టు రెండేళ్ల జైలు శిక్ష విధించింది. అదే సమయంలో అతనికి బెయిల్ కూడా మంజూరు చేసింది. పై కోర్టులో అప్పీల్ చేసుకోవడానికి వీలుగా శిక్షను 30 రోజుల పాటు సస్పెండ్ చేసింది.

అయితే ఈ కోర్టు కేసు వెలువడిన మరుసటి రోజే లోక్‌సభ సెక్రటేరియట్, రాహుల్ గాంధీని వాయనాడ్ లోక్‌సభ సభ్యునిగా అనర్హులుగా ప్రకటిస్తూ నోటిఫికేషన్ జారీ చేసింది. ఈ నేరారోపణపై ఉన్నత న్యాయస్థానం స్టే విధించకపోతే, వచ్చే ఎనిమిదేళ్లపాటు రాహుల్ గాంధీ ఎన్నికలలో పోటీ చేయకుండా నిషేధించబడతారు. ఈ పరిణామాలన్నింటిని, కాంగ్రెస్ పార్టీ రాజకీయ ప్రతీకార చర్యగా ఆరోపిస్తూ దేశవ్యాప్త సత్యాగ్రహ దీక్షను ప్రారంభించింది.

ప్రజాప్రాతినిధ్య చట్టంలోని సెక్షన్ 8(4) ప్రకారం ఎన్నికైన ప్రజాప్రతినిధులపై అనర్హుత వేసే ముందు, వారి నేరారోపణపై అప్పీలు చేసుకోవడానికి మూడు నెలలు సమయం ఇవ్వాలనే నిబంధన ఉంది. అయితే భారత సర్వోన్నత న్యాయస్థానం 10 జూలై 2013 నాటి తీర్పులో లిల్లీ థామస్ వర్సెస్ యూనియన్ ఆఫ్ ఇండియా కేసును పరిష్కరిస్తూ, ఎవరైనా పార్లమెంటు సభ్యుడు (MP), సభ్యుడు శాసన సభ (MLA) లేదా శాసన మండలి సభ్యుడు (MLC) ఒక నేరానికి పాల్పడి, కనీసం రెండు సంవత్సరాల జైలు శిక్ష విధించబడినట్లయితే, తక్షణమే ఆ సభ్యుడుపై అనర్హుత అమలులోకి వస్తుందని వెల్లడించింది.

ఈ నిర్ణయాన్ని తోసిపుచ్చే ప్రయత్నంలో భాగంగా అప్పటి కాంగ్రెస్ ఎంపీ మరియు న్యాయశాఖ మంత్రి కపిల్ సిబల్, ప్రజాప్రాతినిధ్యం బిల్లు సవరించేందుకు 2013 ఆగస్టు 30న రాజ్యసభలో ప్రవేశపెట్టారు. నేరారోపణ జరిగిన వెంటనే ప్రతినిధులు అనర్హులుగా కాకుండా ఉండేందుకు భారత ప్రభుత్వం కూడా ఒక రివ్యూ పిటిషన్‌ను దాఖలు చేసింది. అయితే ఈ రెంటిని సుప్రీంకోర్టు తోసిపుచ్చింది.

దీనితో అప్పటి యూపీఏ ప్రభుత్వం ఈ బిల్లును ఆర్డినెన్స్‌గా అమలులోకి తీసుకురావడానికి ప్రయత్నించింది. అయితే అప్పటిలో భారత జాతీయ కాంగ్రెస్ ఉపాధ్యక్షుడుగా ఉన్న రాహుల్ గాంధీ దీనిని తీవ్రంగా విమర్శించారు. మీడియా ముఖంగా ఈ బిల్లు కాగితాలను చించిపాడేశారు. ఏకంగా తమ యూపీఏ ప్రధాన మంత్రి మన్మోహన్ సింగ్ రాజీనామాకే పిలుపునిచ్చారు.

దీనితో 2 అక్టోబర్ 2013న ఈ ఆర్డినెన్స్ మరియు బిల్లు రెండింటిని యూపీఏ ప్రభుత్వం ఉపసంహరించుకుంది. ఇప్పుడు అదే అంశం రాహుల్ గాంధీ పేరట శాపంగా మారింది. ఒక రాజకీయ సంబంధిత పరువు నష్టం కేసులో ఒక పార్లమెంట్ సభ్యుడు, ప్రతిపక్ష పార్టీ ప్రధాన నాయకుడు అనర్హుడు అవ్వడంతో దేశ రాజకీయాల్లో అలజడి మొదలైంది. ప్రజాస్వామ్య వ్యవస్థలు, న్యాయ వ్యవస్థల పనితీరుపై మేధావుల్లో అసంతృప్తి నెలకొంది. ఇప్పుడు దీనిని సరి చేయాల్సిన బాధ్యత సుప్రీం కోర్టు చేతిలో ఉంది. అయితే ఈ కొత్త మార్గదర్శకాల ప్రకారం పార్లమెంటు సభ్యత్వాన్ని కోల్పోయిన మొదటి ఎంపీగా రషీద్ మసూద్ నిలిచారు.

ఇస్రో యొక్క అతిపెద్ద ఎల్‌విఎం3 రాకెట్‌ ప్రయోగం విజయవంతం

భారత అంతరిక్ష పరిశోధనా సంస్థ (ఇస్రో), 26 మార్చి 2023న 36 ఉపగ్రహాలతో భారతదేశపు అతిపెద్ద ఎల్‌విఎం3 రాకెట్‌ను విజయవంతంగా ప్రయోగించింది. శ్రీహరికోటలోని సతీష్ ధావన్ స్పేస్ సెంటర్ నుండి నిర్వహించిన ఈ ప్రయోగం ద్వారా వన్‌వెబ్ గ్రూప్ కంపెనీకి చెందిన 36 ఉపగ్రహాల రెండో సెట్‌ను భూకక్ష్యలో ప్రవేశపెట్టింది. ఎల్‌విఎం3 43.5 మీటర్ల పొడవుతో 643 టన్నుల బరువును కలిగిఉంది.

యూకేకు చెందిన నెట్‌వర్క్ యాక్సెస్ అసోసియేట్స్ లిమిటెడ్ (వన్‌వెబ్ గ్రూప్ కంపెనీ) 72 ఉపగ్రహాలను లో-ఎర్త్ ఆర్బిట్స్ (LEO)లోకి ప్రవేశపెట్టడానికి ఇస్రో యొక్క వాణిజ్య విభాగం న్యూస్పేస్ ఇండియా లిమిటెడ్‌తో ఒక ఒప్పందంపై సంతకం చేసింది. వన్‌వెబ్ గ్రూప్ కంపెనీకి చెందిన 36 ఉపగ్రహాల మొదటి సెట్‌ను ఇస్రో ఇదివరకే అక్టోబర్ 23, 2022న ప్రయోగించింది. వన్‌వెబ్ అనేది అంతరిక్ష ఆధారితమైన గ్లోబల్ కమ్యూనికేషన్ నెట్‌వర్క్. ఇది ప్రభుత్వాలు మరియు వ్యాపారాల కోసం మెరుగైన ఇంటర్నెట్ కనెక్టివిటీని అందిస్తుంది.

లాంచ్ వెహికల్ మార్క్-3 ( ఎల్‌విఎం3 ) అనేది జియోసింక్రోనస్ శాటిలైట్ లాంచ్ వెహికల్ మార్క్ III ( జీఎస్ఎల్వీ) యొక్క ఆధునాతన వెర్షన్. ఇది మూడు-దశల మీడియం-లిఫ్ట్ ప్రయోగ వాహనం. దీనిని భారత అంతరిక్ష పరిశోధనా సంస్థ (ఇస్రో) అభివృద్ధి చేసింది. జియోస్టేషనరీ కక్ష్యలోకి కమ్యూనికేషన్ ఉపగ్రహాలను ప్రయోగించడానికి ఇది రూపొందించబడింది. ఇస్రో మానవ సహిత అంతరిక్ష ప్రయోగాలకు సిద్దమవుతుండటంతో దీనిని అభివృద్ధి చేసింది.

మహిళల ప్రపంచ బాక్సింగ్ ఛాంపియన్‌షిప్‌లో భారత్‌కు 4 స్వర్ణాలు

ఐబీఏ మహిళల ప్రపంచ బాక్సింగ్ ఛాంపియన్‌షిప్‌లో భారత బాక్సర్లు నిఖత్ జరీన్, లోవ్లినా బోర్గోహైన్, నీతు ఘంఘాస్ మరియు సావీటీ బూరాలు బంగారు పతకాలు సాధించారు. అంతర్జాతీయ బాక్సింగ్ అసోసియేషన్ (ఐబీఏ) నిర్వహిస్తున్న ఈ 13వ ఎడిషన్ టోర్నమెంట్‌కు భారత్ ఆతిధ్యం ఇస్తుంది. దీనిని దేశ రాజధాని న్యూ ఢిల్లీలో మార్చి 15 నుండి 26 మార్చి 2023 వరకు నిర్వహించారు. రష్యా మరియు బెలారస్ నుండి అథ్లెట్లు పాల్గొనడం వలన ఈ ఈవెంట్‌ను మెజారిటీ దేశాలు బహిష్కరించాయి.

1. నిఖత్ జరీన్, మేరీ కోమ్ తర్వాత ప్రపంచ ఛాంపియన్‌షిప్‌లో 2 స్వర్ణాలు గెలుచుకున్న మొదటి భారతీయ బాక్సర్‌గా నిలిచింది. 50 కేజీల ఫైనల్‌లో నిఖత్ జరీన్ వియత్నాంకు చెందిన న్గుయెన్ థి థామ్‌ను ఓడించడం ద్వారా ఈ స్వర్ణం సొంతం చేసుకుంది. నిఖత్ గతంలో 52 కేజీల విభాగంలో స్వర్ణం గెలుచుకుంది. తెలంగాణకు చెందిన జరీన్ 2022 కామన్వెల్త్ గేమ్స్ బంగారు పతక విజేతగా నిలిచి చరిత్ర సృష్టించింది.
2. మహిళల ప్రపంచ బాక్సింగ్ ఛాంపియన్‌షిప్‌లోని 81 కిలోల విభాగంలో సావీటీ బూరా బంగారు పతకం సాధించింది.
3. టోక్యో ఒలింపిక్ కాంస్య పతక విజేత లోవ్లినా బోర్గోహైన్ మహిళల ప్రపంచ బాక్సింగ్ ఛాంపియన్‌షిప్‌లోని 75 కిలోల విభాగంలో  బంగారు పతకం సొంతం చేసుకుంది.
4. ఏస్ ఇండియా బాక్సర్ నీతూ ఘంఘాస్ 48 కిలోల విభాగంలో బంగారు పతకం పొందారు. నీతూ గత ఏడాది 2022 కామన్వెల్త్ గేమ్స్‌లో కూడా బంగారు పతక విజేతగా నిలిచింది.

కాశ్మీర్‌కు చెందిన అలియా మీర్‌కు వన్యప్రాణి సంరక్షణ అవార్డు

కాశ్మీర్‌కు చెందిన వన్యప్రాణి సంరక్షకురాలు అలియా మీర్‌కు వన్యప్రాణి సంరక్షణ అవార్డుతో సత్కరించారు. జమ్మూ కాశ్మీర్ కలెక్టివ్ ఫారెస్ట్స్ నిర్వహించిన ప్రపంచ అటవీ దినోత్సవ వేడుకల్లో లెఫ్టినెంట్ మనోజ్ సిన్హా ఆమెకు ఈ అవార్డును అందించారు. కాశ్మీర్‌ ఎలుగుబంటి వంటి వివిధ వన్యప్రాణుల సంరక్షణకు చేస్తున్న సేవకు గాను ఈ అవార్డు అందించారు.

బ్రిక్స్ డెవలప్‌మెంట్ బ్యాంక్ అధ్యక్షురాలుగా దిల్మా వానా రౌసెఫ్

మార్కస్ ట్రోయ్జో తర్వాత న్యూ డెవలప్‌మెంట్ బ్యాంక్ (NDB) కొత్త అధినేతగా బ్రెజిల్ మాజీ అధ్యక్షురాలు దిల్మా రౌసెఫ్ ఏకగ్రీవంగా ఎన్నికయ్యారు. న్యూ డెవలప్‌మెంట్ బ్యాంక్ అనేది 2014లో బ్రిక్స్ దేశాలతో స్థాపించబడిన బహుపాక్షిక అభివృద్ధి బ్యాంకు. దీనిని గతంలో బ్రిక్స్ డెవలప్‌మెంట్ బ్యాంక్ అని పిలిచేవారు. ఇది బ్రెజిల్‌లోని సియరాలో ఉంది.

న్యూ డెవలప్‌మెంట్ బ్యాంక్, బ్రిక్స్ దేశాల ప్రభుత్వ లేదా ప్రైవేట్ అభివృద్ధి ప్రాజెక్ట్‌లకు ఆర్థిక సహాయం చేస్తుంది. బ్రిక్స్ అనేది ఐదు ప్రముఖ వర్ధమాన ఆర్థిక వ్యవస్థలకు సంక్షిప్త రూపం. బ్రిక్స్ అనగా బ్రెజిల్, రష్యా, ఇండియా, చైనా మరియు దక్షిణాఫ్రికా అని అర్ధం. దీనిని 16 జూన్ 2009లో స్థాపించారు. దీనిని సభ్యదేశాల మధ్య శాంతి, భద్రత, అభివృద్ధి మరియు పరస్పర సహకారాన్ని ప్రోత్సహించడం కోసం ఏర్పాటు చేసారు. దీని ప్రధాన కార్యాలయం చైనాలోని షాంఘైలో ఉంది.

వైజాగ్‌లో 2వ జీ20 ఇన్‌ఫ్రాస్ట్రక్చర్ వర్కింగ్ గ్రూప్ సమావేశం

జీ20 ఇండియన్ ప్రెసిడెన్సీలో రెండవ జీ20 ఇన్‌ఫ్రాస్ట్రక్చర్ వర్కింగ్ గ్రూప్ (IWG) సమావేశం 2023 మార్చి 28 మరియు 29 తేదీల్లో ఆంధ్రప్రదేశ్‌లోని విశాఖపట్నంలో నిర్వహించారు. రేపటి ఆర్థిక నగరాలు అనే థీమ్‌తో ఈ సదస్సు జరిగింది. ఈ సదస్సులో జీ20 సభ్య దేశాలు, ఆహ్వానిత దేశాలు మరియు అంతర్జాతీయ సంస్థల నుండి దాదాపు 63 మంది ప్రతినిధులు పాల్గొన్నారు.

ఈ ఏడాది జనవరిలో పూణేలో జరిగిన మొదటి జీ20 ఇన్‌ఫ్రాస్ట్రక్చర్ వర్కింగ్ గ్రూప్ సమావేశంకు కొనసాగింపుగా దీనిని నిర్వహిచారు. భారత G20 ప్రెసిడెన్సీలో 2023 మౌలిక సదుపాయాల ఎజెండాపై ప్రధానంగా చర్చలు నిర్వహించారు. ఏటా పట్టణీకరణ శాతం పెరుగుతన్న నేపథ్యంలో, దానికి తగ్గట్టుగా పట్టణ మౌలిక సదుపాయాల కల్పనకు ప్రణాళికలు రూపొందించనున్నారు. ఈ సమావేశానికి ఇతర కేంద్ర మంత్రులతో సహా ఏపీ సీఎం జగన్ కూడా హాజరయ్యారు.

• వీక్లీ కరెంట్ అఫైర్స్ : 6 మార్చి 2023

• వీక్లీ కరెంట్ అఫైర్స్ : 13 మార్చి 2023

• వీక్లీ కరెంట్ అఫైర్స్ : 20 మార్చి 2023

• వీక్లీ కరెంట్ అఫైర్స్ : 27 మార్చి 2023

• కరెంట్ అఫైర్స్ మ్యాగజైన్ : మార్చి 2023

• కరెంట్ అఫైర్స్ ప్రాక్టీస్ ప్రశ్నలు : మార్చి 2023

• ముఖ్యమైన రోజులు & తేదీలు : మార్చి 2023