తెలుగులో అబ్దుల్ కలాం బయోగ్రఫీ | APJ Abdul Kalam

భారత 11వ రాష్ట్రపతిగా కలాం ప్రమాణస్వీకారం

కలాంకు  మొదటి నుండి రాజకీయాలపై లేదు. కలాంను రాజకీయాల్లోకి రప్పించేందుకు వాజ్‌పేయి గారు ఎన్నో ప్రయత్నాలు చేశారు. ఆయన ఆహ్వానించిన ప్రతిసారి కలాం సున్నితంగా తిరస్కరించేసే వారు. వాజ్‌పేయి రెండవ సారి ప్రభుత్వం ఏర్పాటు చేసిన సంధర్భంలో, ఏకంగా క్యాబినేట్ మినిస్టర్ పదవి ఆఫర్ చేశారు. కాని కలాం ఆసక్తి చూపలేదు.

2002 ప్రధానిమంత్రి కార్యాలయం నుండి కలాంకు పిలుపు వచ్చింది. ఈ సారి ఏకంగా కలాంను రాష్ట్రపతి కావాలని వాజ్‌పేయి ఆకాంక్షించరు. ఈసారి కలాంకు తిరస్కరించే అవకాసం లభించలేదు. దీనితో 2002 అధ్యక్ష ఎన్నికలలో, బీజేపీ ఆధ్వర్యంలో ఉన్న ఎన్డిఏ ప్రభుత్వం ద్వారా కలాం రాష్ట్రపతి అభ్యర్థిగా నిలబడ్డారు. కలాం బరిలో ఉండటంతో కాంగ్రెస్ కూడా సంపూర్ణ మద్దతు ప్రకటించింది. వామపక్షాలు లక్ష్మి సహగల్'ను మరో అభ్యర్థిగా నిలబెట్టినా ..కలాం 922,884 ఓట్లతో చారిత్రాత్మక విజయం సాధించి, కెఆర్ నారాయణన్ తరువాత భారత 11 వ రాష్ట్రపతిగా ప్రమాణస్వీకారం చేసారు.

వాజ్‌పేయి గారు కలాంను ఏ ఉద్యేశంతో రాష్ట్రపతిగా అవకాశం కల్పించినా..కలాం రాష్ట్రపతిగా బాధ్యతలు స్వీకరించడం దేశం గర్వించదగ్గ కొన్ని గొప్ప సంఘటనలలో ఒకటిగా చెప్పొచ్చు. అధ్యక్షుడైన తరువాత కూడా, కలాం సాధారణ పౌరుడుగానే రాష్ట్రపతి భవన్ యందు జీవించారు. కామన్‌ సివిల్‌ కోడ్‌కు రాష్ట్రపతిగా కలాం మద్దతు ప్రకటించి ప్రత్యేకత సాటుకున్నారు.

సామాన్య పౌరులకు రాష్ట్రపతి గేట్లు తెరిచి పీపుల్ ప్రెసిడెంటుగా పేరు తెచ్చుకున్నారు. ఆయన అధ్యక్ష పదవిలో ఉన్న ఐదేళ్లు రాష్ట్రపతి భవన్ పిల్లలు, పెద్దలతో చిన్నపాటి జాతరను తలపించేది. రాష్ట్రపతిగా కలాం చూపిన హుందాతనం ప్రతీ భారతీయుడు మనషులో చెరగని ముద్ర వేచింది. కలాంకు రెండవ సారి భారత అధ్యక్షులుగా ఉండే అవకాశం దక్కినా, తనకు ఎంతో ఇష్టమైన టీచింగ్ వృత్తి కోసం ఆ అవకాశాన్ని వదులుకున్నారు .

అసాధారణమైన జీవనశైలి కలాం సొంతం

కలాం తుది శ్వాస వరకు అతి సాధారణమైన జీవితాన్ని గడిపారు. ఆయన ఏరోజు హోదాను ప్రదర్శించలేదు. రామేశ్వరంలో తండ్రి దగ్గర నేర్చుకున్న విలువలకు జీవితాంతం కట్టుబడి ఉన్నారు. బతికున్నంత కాలం ప్రకృతి కోసం, సైన్స్ కోసం, దేశం కోసమే ఆలోచించారు. ఒక్క మాటలో చెప్పాలంటే విజ్ఞానం, నిరాడంబరత, నిజాయితీల కలబోతే శ్రీ అబ్దుల్ కలాం. ఆయన భారత రక్షణ, క్షిపణి వ్యవస్థను బలోపేతం చేసేందుకు ఎంతగా కృషి చేశారో, దేశ యువతలో ఆత్మవిశ్వసం నింపేందుకు అంతే మనసు పెట్టారు.

గాంధీజీ జీవితానికి, కలాం జీవితానికి దగ్గర సారూప్యత ఉంది. వీరిద్దరూ విభిన్న రంగాలకు చెందిన వారైనా జీవనశైలిలో మెజారిటీ అంశాలు ఒకే విధంగా ఉంటాయి. ఒకొనొక సమయంలో వ్యక్తత్వం నిర్మించుకునేందుకు గాంధీజీ గారు ఎంత కఠినమైన నియమాలను నిర్దేశించుకున్నారో..వాటిని కలాం చిన్ననాటి నుండే అలవర్చుకున్నారు. ఇద్దరూ గొప్ప శాంతి కాముకులు, మానవతా వాదులు, అవినీతి వ్యతిరేకులు, మత సామరస్యం కోసం పాటుపడ్డారు. ఇద్దరూ భగవద్గీతతో సహా ఇతర మత గ్రంథలు కూడా చదివేవారు. రాజకీయాలకు దూరంగా ఉన్నారు. దేశం కోసం నిస్వార్ధంగా కృషి చేశారు.

అందుకే కలాంను ఒక శాస్త్రవేత్తగా, ఒక రాష్ట్రపతిగా కంటే ఒక గొప్ప మానవతా వాదిగా చెప్పొచ్చు. వివాహం చేసుకుంటే జీవితాంతం వారి బాగుకోసం, వారికి ఆస్తులు కూడబెట్టేందుకే సమయం వెచ్చించాల్సి వస్తుందని, జీవితాంతం బ్రహ్మచారిగా ఉండిపోయారు. మాంసాహారం తింటే జీవ సమతుల్యం దారి తప్పడంతో పాటుగా మనిషి సహజ ఆలోచన పరిధి మందగిస్తుందని, శాకాహారనికి కట్టుబడ్డారు. జీవితంలో ఏ రోజూ మద్యపానం జోలికి పోలేదు. కచ్చితమైన వ్యక్తిగత క్రమశిక్షణకు మానవ రూపం ఏమైనా ఉండి ఉంటే ..అది ఖచ్చితంగా కలాం అయ్యి ఉంటారు.

కలాంకు వ్యక్తిగత ఆస్తులపైనా ఏనాడూ మమకారం కలగలేదు. మీరు కలాంను ముందు నుండి గమనించి ఉంటె ఒకే రకమైన చొక్కాతో, ఒకే రకమైన హెయిర్ స్టైలతో కనిపిస్తారు. రాష్ట్రపతిగా ఎన్నికయ్యాక, కలాంకు ఎంతో బలవంతంగా సూట్ ధరించాల్సి వచ్చింది. అది నచ్చని కలాం, ఈ తాబేలులాంటి సూటులో తనను చూసుకోవడం ఇబ్బందిగా ఉందని తనపై తాను జోకులు వేచుకునే వారు.

కలాం రాష్ట్రపతి భవన్ యందు ఉన్నన్ని రోజులు ఒక్క రూపాయీ కూడా వృథా చేయలేదు. తన వ్యక్తిగత అభిరుచులు, స్నేహితులు, కుటుంబ సభ్యుల కోసం ఖర్చుచేసే ప్రతీ రూపాయని కలాం వ్యక్తిగత ఖాతా నుండి చెల్లించేవారు. అదే సంధర్భంలో సహాయం ఆశించి వచ్చిన ప్రతీ వారిని లేదనకుండా సాగనంపే వారు.

కలాంకు ముగ్గురమ్మలు అంటే ఇష్టం

కలాంకు కళాకారులు అంటే మహా ఇష్టం. అలానే మానవతా వాదులు అంటే ప్రత్యేక అభిమానం ఉండేది. అలా ఎంఎస్ సుబ్బలక్ష్మి గారిని, మదర్ థెరిస్సా గారిని కలాం ప్రత్యేకంగా ఆరాధించే వారు. అమ్మలకు సంబంధించి అవకాశం వచ్చిన ప్రతీ సందర్భంలోను, నాకు ముగ్గురు అమ్మలు అంటూ సంబర పడేవారు. వారందరిని తాను కలవగలిగానని చెప్పేవారు.

ఆ ముగ్గురు అమ్మలలో ఒకరు కలాం సొంత అమ్మ కాగా, మరొకరు భారత సంగీత సరస్వతి ఎంఎస్ సుబ్బలక్ష్మి, మరొకరు ప్రపంచానికి అమ్మ అయినా మదర్ థెరిస్సా' అని చెప్పేవారు. 1950లో తిరుచ్చిలో చదువుకునే రోజుల్లో 'ఎందరో మహానుభావులు.. అందరికీ వందనాలు' పాటను పదేపదే వింటూ పరవశించే వారు.. అప్పటి నుంచి ఎంఎస్ సుబ్బలక్ష్మి సంగీతానికి అభిమాని అయ్యారు. అలానే దేశం కాని దేశంలో పుట్టి, భారత దేశానికి నలభైఏళ్ల పాటు అమూల్య సేవల్ని అందించిన మదర్ థెరిస్సా గారు అన్నా కలాంకు ఎనలేని గౌరవం.

కలాం ఒక గొప్ప రచయిత

కలాం సెయింట్ జోసెఫ్ యందు చదువుకునే రోజుల్లో విపరీతంగా పుస్తకాలు చదివేవారు. ఈ క్రమంలోనే కలాంలోని రచయిత మేలుకున్నాడు. తరుసుగా కవితలు, పాటలు రాసేవారు. ఒకొనొక సంధర్భంలో రచనపై విపరీతమైన ప్రేమ పెంచుకున్నారు. రచన ద్వారా దేశాన్ని, సామాన్య ప్రజల జీవితాలను ముఖ్యంగా యువత, విద్యార్థుల ఆలోచన పరిధిని మార్చాలన్న బలమైన ఆకాంక్ష కలాంలో కనిపించేది. వివిధ అంశాలపై కలాంకు ఉన్న లోతైన అవగాహన, విషయ నైపుణ్యత ఆయన్ని సీరియస్ రచయితగా మార్చాయి.

1998 లో భారతదేశం యొక్క భవిష్యత్తు మరియు దేశ ఆర్థిక అభివృద్ధికి సంబంధించి "ఇండియా 2020: ఎ విజన్ ఫర్ ది న్యూ మిలీనియం" పేరుతో మొదటి పుస్తకం రచించారు. 2020 నాటికి భారతదేశం ప్రపంచంలోని నాలుగు అగ్ర ఆర్థిక శక్తులలో ఎలా ఎదగగలదో ఈ పుస్తకం ద్వారా తెలిపారు. ఈ క్రమంలో సొంతగా మరియు ఇతర సహా రచయితలతో కలిసి దాదాపు 25 గొప్పగొప్ప పుస్తకాలూ మనకు అందించారు. రాష్ట్రపతిగా ఉన్న ఐదేళ్లలో దాదాపు ఐదు పుస్తకాలు రచించారు. ప్రధానంగా యువతను ఉద్దేశించి రాసిన Ignited Minds, Turning Points, Thoughts for Change, You are Unique వంటి పుస్తకాలు ఎందరో యువతని విజయం వైపు నడిపించాయి.

కలాం పుట్టినరోజున ప్రపంచ విద్యార్థి దినోత్సవం

కలాంకు టీచింగ్ అంటే ఎనలేని ఇష్టం. విద్యార్థులతో గడపటం అంతకంటే ఎక్కువ ఇష్టం. రాష్ట్రపతిగా ఉన్న రోజుల్లో కూడా ఎన్నో యూనివర్సిటీలకు, స్కూళ్లకు పోయి విద్యార్థులతో సమయం వెచ్చించే వారు. భవిష్యత్తులో ఏం కావాలని అనుకుంటున్నారో, ఇప్పటి నుండే కలలు కనండి అంటూ ఉత్సాహపరిచే వారు.

చివరికి ఆయన చివరి క్షేణాలలో కూడా, షిల్లాంగ్‌ ఏఐఎంలో విద్యార్థులతో సంభాషిస్తూ తుదిశ్వాస విడిచారు. విద్యార్థులపై కలాంకు ఉన్న ఇష్టానికి గాను, ఉపాధ్యాయ వృత్తిపై కలాంకు ఉన్న అంకితభావంకు గాను 2010 లో కలాం జన్మదినమైన అక్టోబర్ 15 తేదీను, ప్రపంచ విద్యార్థి దినోత్సవంగా ఐక్యరాజ్యసమితి ప్రకటించింది. కలాంకు దక్కిన అతి గొప్ప గౌరవాలలో ఇది ఒకటిగా చెప్పొచ్చు.