వీక్లీ కరెంట్ అఫైర్స్ 20 మార్చి 2023 తెలుగులో ఉచితంగా పొందండి. ఏపీపీఎస్సీ, టీఎస్పీఎస్సీ, యూపీఎస్సీ, స్టాఫ్ సెలక్షన్ కమిషన్, రైల్వే, బ్యాంకింగ్ వంటి వివిధ పోటీ పరీక్షలకు సిద్ధమయ్యే ఔత్సాహికుల కోసం తాజాగా చోటు చేసుకున్న జాతీయ, అంతర్జాతీయ సమకాలీన అంశాలను పోటీ పరీక్షల దృక్కోణంలో అందిస్తున్నాం.
-
వీక్లీ కరెంట్ అఫైర్స్ : 6 మార్చి 2023
-
వీక్లీ కరెంట్ అఫైర్స్ : 13 మార్చి 2023
-
వీక్లీ కరెంట్ అఫైర్స్ : 20 మార్చి 2023
-
వీక్లీ కరెంట్ అఫైర్స్ : 27 మార్చి 2023
-
కరెంట్ అఫైర్స్ మ్యాగజైన్ : మార్చి 2023
-
కరెంట్ అఫైర్స్ ప్రాక్టీస్ ప్రశ్నలు : మార్చి 2023
-
ముఖ్యమైన రోజులు & తేదీలు : మార్చి 2023
భారతదేశం - బంగ్లాదేశ్ ఫ్రెండ్‌షిప్ పైప్‌లైన్ ప్రారంభం
భారత ప్రధానమంత్రి నరేంద్ర మోదీ మరియు బంగ్లాదేశ్ ప్రధాని షేక్ హసీనా సంయుక్తంగా భారతదేశం-బంగ్లాదేశ్ ఫ్రెండ్‌షిప్ పైప్‌లైన్ (IBFP) ను మార్చి 18న వర్చువల్ మోడ్‌లో ప్రారంభించారు. ఈ పైప్‌లైన్ నిర్మాణానికి 2018 సెప్టెంబర్‌లో ప్రధానమంత్రులిద్దరూ పునాది రాయి వేశారు. ఇది భారతదేశం మరియు బంగ్లాదేశ్ మధ్య మొదటి క్రాస్-బోర్డర్ ఎనర్జీ పైప్‌లైన్, దీనిని దాదాపు 377 కోట్ల అంచనా వ్యయంతో నిర్మించారు.
ఇండియాకు చెందిన నుమాలిగర్ రిఫైనరీ లిమిటెడ్ 2015 నుండి బంగ్లాదేశ్‌కు పెట్రోలియం ఉత్పత్తులను సరఫరా చేస్తోంది. ప్రసుతం నిర్మించిన పైప్‌లైన్ సంవత్సరానికి ఒక మిలియన్ మెట్రిక్ టన్నుల హై-స్పీడ్ డీజిల్‌ను రవాణా చేయగల సామర్థ్యం కలిగిఉంది. బంగ్లాదేశ్ ఇప్పుడు దక్షిణాసియాలో భారతదేశానికి అతిపెద్ద వాణిజ్య భాగస్వామిగా ఉంది. విద్యుత్ మరియు ఇంధన రంగంలో ఈ సహకారం మరింత ఎక్కువ ఉంది.
చైనా కొత్త ప్రధానమంత్రిగా లీ కియాంగ్ ఎన్నికయ్యారు
చైనా మాజీ కమ్యూనిస్ట్ పార్టీ చీఫ్ లి కియాంగ్, ఆ దేశంలో రెండవ అత్యున్నత పదవిని చేపట్టారు. గత 10 సంవత్సరాలుగా ఆ పదవిలో ఉన్న లీ కెకియాంగ్ తర్వాత 11 మార్చి 2023న ఆయన చైనా ప్రదమంత్రిగా బాధ్యతలు స్వీకరించారు. చైనా రాజకీయ వ్యవస్థలో ప్రధానమంత్రి రెండవ అత్యున్నత పదవి. ఈ హోదాను సాధారణంగా చైనా యొక్క ప్రీమియర్ అని పిలుస్తారు.
సుప్రీం ఆడిట్ ఇన్‌స్టిట్యూషన్ మొదటి సమావేశం ప్రారంభం
మొదటి సుప్రీం ఆడిట్ ఇన్‌స్టిట్యూషన్ 20 (SAI20) యొక్క సీనియర్ ఆఫీసర్స్ మీటింగ్, మార్చి 13న గౌహతిలో నిర్వహించారు. ఈ కార్యక్రమాన్ని 'బ్లూ ఎకానమీ' మరియు 'రెస్పాన్సిబుల్ ఆర్టిఫిషియల్ ఇంటెలిజెన్స్' థీమ్‌లతో జరిపారు. జీ20 సభ్య దేశాలు, అతిథి దేశాలు మరియు ఇతర అంతర్జాతీయ సంస్థల ప్రతినిధులు ఈ కార్యక్రమంలో పాల్గొన్నారు.
బ్లూ ఎకానమీ ద్వారా పర్యావరణ వ్యవస్థ ఆరోగ్యాన్ని కాపాడుతూ జీ20 దేశాల ఆర్థిక వృద్ధి, మెరుగైన జీవనోపాధి మరియు సముద్ర వనరులను స్థిరంగా ఉపయోగించడం వంటి చర్యల ద్వారా ఆర్థిక వ్యవస్థను బలోపేతం చేయడం ఈ సమావేశం యొక్క ముఖ్య ఉద్దేశ్యం.
జీ20 యొక్క సుప్రీం ఆడిట్ ఇన్‌స్టిట్యూషన్, 2022లో ఇండోనేషియా జీ20 ప్రెసిడెన్సీ సమయంలో సహకార పర్యవేక్షణ ద్వారా ఆర్థిక పాలనను మెరుగుపరచడానికి స్థాపించబడింది. ఈ ఎంగేజ్‌మెంట్ గ్రూప్ విధాన సంభాషణ మరియు ప్రభుత్వ రంగ ఆడిట్ ఎకోసిస్టమ్‌లోని ఉత్తమ పద్ధతులను గుర్తించి వాటిని అమలు చేస్తుంది.
హుబ్బళ్లిలో ప్రపంచంలోనే అత్యంత పొడవైన రైల్వే ప్లాట్‌ఫారమ్‌
కర్ణాటకలోని హుబ్బల్లిలో ప్రపంచంలోనే అత్యంత పొడవైన రైల్వే ప్లాట్‌ఫారమ్‌ను మార్చి 12న ప్రధాని మోదీ ప్రారంభించారు. 20 కోట్ల వ్యయంతో నిర్మించిన ఈ 1,507 మీటర్ల పొడవైన ప్లాట్‌ఫారమ్‌ను ఇటీవలే గిన్నిస్ బుక్ ఆఫ్ వరల్డ్ రికార్డ్స్ గుర్తించిందని అధికారులు తెలిపారు. ఈ హుబ్బళ్లి రైల్వే స్టేషన్‌కు శ్రీ సిద్ధారూఢ స్వామీజీ స్టేషన్‌గా నామకరణం చేసినట్లు కూడా వెల్లడించారు.
ఇదే వేదిక ద్వారా 850 కోట్ల రూపాయలతో అభివృద్ధి చేసిన ఐఐటి ధార్వాడ్ కొత్త క్యాంపస్‌ను ప్రధాని నరేంద్ర మోదీ జాతికి అంకితం చేశారు. హోస్‌పేట-హుబ్బళ్లి-తీనాఘాట్ సెక్షన్‌ల విద్యుద్దీకరణ మరియు అప్‌గ్రేడ్ చేసిన హోసపేట స్టేషన్ ప్రాజెక్టులను కూడా ప్రారంభించారు. అలానే హుబ్బళ్లిలో జయదేవ ఆసుపత్రి, పరిశోధనా కేంద్రానికి శంకుస్థాపన చేశారు.
- అదే సమయంలో కొత్తగా నిర్మించిన బెంగళూరు మైసూరు ఎక్స్‌ప్రెస్‌వేని మార్చి 12 న ప్రధాని నరేంద్ర మోదీ ప్రారంభించారు. దాదాపు రూ. 8,480 కోట్లతో నిర్మించిన ఈ ప్రాజెక్ట్ ద్వారా బెంగళూరు మైసూరు మధ్య ప్రయాణ సమయం 3 గంటల నుండి 75 నిముషాలకు తగ్గనుంది. ఈ ఎక్స్‌ప్రెస్‌వే బీఎంపీ (భారతమాల పరియోజన) పథకం కింద అభివృద్ధి చేయబడింది.
- మార్చి 2023 నాటికి, భారతదేశంలో 4,067.27 కిమీ పొడవుతో 44 ఎక్స్‌ప్రెస్‌వేలు అందుబాటులోకి వచ్చాయి. ప్రస్తుతం దేశంలో ఆగ్రా లక్నో ఎక్స్‌ప్రెస్‌వే 302 కి.మీ పొడవుతో భారతదేశంలోనే అత్యంత పొడవైన ఎక్స్‌ప్రెస్‌వేగా ఉంది. భారతదేశపు మొట్టమొదటి ఎక్స్‌ప్రెస్ వేను ముంబై-పూణే నగరాల మధ్య నిర్మించారు.
భారత్ గౌరవ్ పథకం కింద భారత్ నేపాల్ అష్ట యాత్ర
భారత్ గౌరవ్ టూరిస్ట్‌ల రైలు కింద "భారత్ నేపాల్ అష్ట యాత్ర" టూర్ ప్యాకేజీని ఐఆర్సీటీసీ అందుబాటులోకి తీసుకొచ్చింది. మార్చి 30న శ్రీరామ నవమిని పురస్కరించుకుని 31 మార్చి, 2023న జలందర్ నుండి ఈ రైలు బయలుదేరుతుంది. 9 రాత్రుల 10 రోజుల నిడివితో సాగే ఈ యాత్రలో భారతదేశంలోని అయోధ్య, వారణాసి & ప్రయాగ్‌రాజ్ మరియు నేపాల్‌లోని పశుపతినాథ్ (ఖాట్మండు) వంటి ప్రదేశాలను కవర్ చేస్తుంది.
ఇండియన్ రైల్వే 2021లో భారత్ గౌరవ్ స్కీమ్‌ను ప్రారంభించి. ఇది భారతదేశంలోని వివిధ చారిత్రక, సాంస్కృతిక మరియు మతపరమైన దేశీయ పర్యాటకాన్ని ప్రోత్సహించడానికి అందుబాటులో తీసుకొచ్చారు. మొదటి భారత్ గౌరవ్ రైలు కోయంబత్తూర్ మరియు షిర్డీ మధ్య నడపబడింది. తెలుగు రాష్ట్రాల నుండి మొదటి 'ఆరిజినేటింగ్ భారత్ గౌరవ్ రైలును పూరీ-కాశి-అయోధ్య పేరుతొ మార్చి 18న సికింద్రాబాద్ రైల్వే స్టేషన్ యందు ప్రారంభించారు.
బెంగళూరులో మొట్టమొదటి మిథనాల్‌తో నడిచే బస్సు ప్రారంభం
కేంద్ర రోడ్డు రవాణా మరియు రహదారుల శాఖ మంత్రి నితిన్ గడ్కరీ మార్చి 12 న బెంగళూరులో మొట్టమొదటి మిథనాల్‌తో నడిచే బస్సులను ప్రవేశపెట్టారు. ఈ ప్రాజెక్ట్‌ను కార్బన్ ఉద్గారాల స్థాయిని తగ్గించే లక్ష్యంతో బెంగళూరు మెట్రోపాలిటన్ ట్రాన్స్‌పోర్ట్ కార్పొరేషన్, నీతీ ఆయోగ్, ఇండియన్ ఆయిల్ కార్పొరేషన్ మరియు అశోక్ లేలాండ్ కలిసి నిర్వహిస్తున్నాయి.
మిథనాల్ ఎకానమీ భావనను ఇప్పటికే చైనా, ఇటలీ, స్వీడన్, ఇజ్రాయెల్, యూఎస్, ఆస్ట్రేలియా, జపాన్ మరియు అనేక ఇతర యూరోపియన్ దేశాలు అందిపుచ్చుకున్నట్లు, ఇండియాను కూడా ఈ జాబితాలో చేర్చేందుకు ఈ ప్రయత్నాలు జరుగుతున్నట్లు నీతీ ఆయోగ్ ఒక ప్రకటనలో పేర్కొంది.
కుప్పకూలిన సిలికాన్ వ్యాలీ బ్యాంక్
స్టార్టప్ ఎకోసిస్టమ్‌లో ప్రముఖ రుణదాతలలో ఒకటైన యునైటెడ్ స్టేట్స్‌లోని సిలికాన్ వ్యాలీ బ్యాంక్, మార్చి 10న కుప్పకూలింది. 2007–2008లో చోటు చేసుకున్న ప్రపంచ ఆర్థిక సంక్షోభం తర్వాత ఇది అతిపెద్ద బ్యాంక్ వైఫల్యంగా నమోదుయ్యింది. బీమా చేయని డిపాజిట్ల యొక్క అధిక నిష్పత్తి మరియు హోల్డ్-టు-మెచ్యూరిటీ సెక్యూరిటీలలో పెట్టుబడి పెట్టబడిన డిపాజిట్ల యొక్క అధిక భాగం కారణంగా ఈ సంక్షోభం నెలకొంది.
సిలికాన్ వ్యాలీ బ్యాంక్ (SVB) పతనం భారతీయ స్టార్టప్ పరిశ్రమను అప్రమత్తం చేసింది. మెజారిటీ భారతీయ స్టార్టప్ కంపెనీలు ఎస్వీబీ కేంద్రంగా పనిచేస్తున్నాయి. ఈ బ్యాంకు పతనంతో ఈ కంపెనీల ఆర్థిక వనరులపై ప్రభావం పడనుంది. ఎస్వీబీ 2003 నుండి భారతదేశంలో కార్యకలాపాలు నిర్వహిస్తుంది. 20కి పైగా భారతీయ కంపెనీలలో ఈ సంస్థ పెట్టుబడులు పెట్టింది.
సిలికాన్ వ్యాలీ బ్యాంక్, కాలిఫోర్నియా ప్రధాన కేంద్రంగా 1983లో స్థాపించబడింది. ఇది ప్రధానంగా స్టార్టప్ కంపెనీల ఆర్థిక అవసరాలను తీర్చే లక్ష్యంతో రోజర్ వి స్మిత్ ప్రారంభించారు. దాదాపు 40 సంవత్సరాల సిలికాన్ వ్యాలీ బ్యాంక్ చరిత్రలో 30,000 కంటే ఎక్కువ వ్యవస్థాపక సంస్థలకు విజయపథంలో మద్దతునిచ్చింది.
షీ చేంజ్ క్లైమేట్ భారత అంబాసిడర్‌గా శ్రేయా ఘోదావత్
ప్రముఖ క్లైమేట్ ఎంటర్‌ప్రెన్యూర్ శ్రేయా ఘోదావత్ 13 మార్చి 2023న 'షీ చేంజ్స్ క్లైమేట్' యొక్క భారత అంబాసిడర్‌గా నియమితులయ్యారు. షీ చేంజ్స్ క్లైమేట్ అనేది పర్యావరణ పరిరక్షణకు సంబంధించిన గ్లోబల్ క్యాంపెయిన్. ఇది మహిళ భాగస్వామ్యతో వాతావరణ మార్పుల ప్రభావాలపై అవగాహనా కల్పించడంతో పాటుగా పర్యావరణ పరిరక్షణ కోసం ప్రచార కార్యక్రమాలు నిర్వహిస్తుంది.
తమిళ రచయిత్రి శివశంకరికి సరస్వతి సమ్మాన్ పురస్కారం
ప్రముఖ తమిళ రచయిత్రి శివశంకరి, 2019 లో పబ్లిష్ చేసిన తన సూర్య వంశం పుస్తకం కోసం సరస్వతి సమ్మాన్ 2022 పురస్కారంను దక్కించుకున్నారు. సరస్వతీ సమ్మాన్ అనేది భారత రాజ్యాంగంలోని షెడ్యూల్ VIIIలో జాబితా చేయబడిన 22 భాషలలో ఏదైనా అత్యుత్తమ గద్య లేదా పద్య సాహిత్య రచనలకు అందించే వార్షిక పురస్కారం. దీనిని 1991లో కేకే బిర్లా ఫౌండేషన్ స్థాపించింది. విజేతకు 15 లక్షల నగదు బహుమతి, జ్ఞాపిక అందజేస్తారు.
ప్రపంచ అత్యంత కాలుష్య నగరాల జాబితాలో ఢిల్లీకి 4వ స్థానం
ప్రపంచ ఎయిర్ క్వాలిటీ నివేదిక 2022 ప్రకారం ప్రపంచంలోని అత్యంత కలుషితమైన 50 నగరాల జాబితాలో ఢిల్లీ నాల్గవ స్థానంలో నిలిచింది. ఐక్యూ ఎయిర్ రిపోర్ట్ 2022, ఢిల్లీలో సగటు PM2.5 స్థాయి 92.6 μg/m3 నమోదు కాబడినట్లు తెలిపింది. ఈ జాబితాలో పాకిస్తాన్ లోని లాహోర్‌ అత్యంత కాలుష్య నగరంగా ప్రధమ స్థానంలో ఉండగా, చైనాలోని హోటాన్ రెండవ స్థానంలో ఉంది.
భారతదేశం 2022లో ప్రపంచంలో ఎనిమిదవ అత్యంత కలుషితమైన దేశంగా ర్యాంక్ పొందింది. ప్రపంచంలోని టాప్ 50 అత్యంత కలుషితమైన నగరాల్లో 39 నగరాలకు ఇండియా నిలయంగా ఉంది. రాజస్థాన్‌లోని భివాడి ప్రపంచ ర్యాంకింగులో మూడో స్థానంలో ఉండగా, దేశంలో ప్రధమ స్థానంలో ఉంది. ఐక్యూ ఎయిర్ అనేది స్విస్ కేంద్రంగా పని చేస్తున్న ఎయిర్ క్వాలిటీ టెక్నాలజీ కంపెనీ. ఇది గాలి నాణ్యత పర్యవేక్షణ మరియు పరిశోధన కార్యకలాపాలు నిర్వహిస్తుంది.
మేఘాలయ ఇంటర్నేషనల్ ఫిల్మ్ ఫెస్టివల్ మొదటి ఎడిషన్ ప్రారంభం
మేఘాలయ ఇంటర్నేషనల్ ఫిల్మ్ ఫెస్టివల్ మొదటి ఎడిషన్ మార్చి 14న షిల్లాంగ్‌లో ప్రారంభమైంది. ఈ వేడుకను మేఘాలయ టూరిజం సహకారంతో మేఘాలయ ఫిల్మ్‌మేకర్స్ అసోసియేషన్ మొట్టమొదటిసారిగా నిర్వహిస్తుంది. స్థానిక ఫిల్మ్ మేకర్లను ప్రోత్సహించేందుకు, పర్యాటకులను ఆకర్శించేందుకు దీనిని నిర్వహిస్తున్నారు. 5 రోజుల్లో నిర్వహిస్తున్న ఈ వేడుకలో దాదాపు 40 సినిమాలు ప్రదర్శించబడ్డాయి. దాదాపు 5,000 మంది వీక్షకులు హాజరయ్యారు.
అత్యల్ప అక్షరాస్యత రేటు కిలిగిన రాష్ట్రంగా బీహార్
విద్యా మంత్రిత్వ శాఖ ప్రకారం, బీహార్ దేశంలో అత్యల్ప అక్షరాస్యత రేటును కలిగిన రాష్ట్రంగా నిలిచింది. అదే సమయంలో కేరళ దేశంలో అత్యధిక అక్షరాస్యత కలిగిన రాష్ట్రంగా ఉంది. ఈ జాబితాలో కేరళ 94 శాతం, లక్షద్వీప్ 91.85, మిజోరం 91.33 శాతంతో మొదటి మూడు స్థానాల్లో నిలవగా, రాజస్థాన్ 66.1 శాతం, అరుణాచల్ ప్రదేశ్ 65.3 శాతం, బీహార్ 61.8 శాతంతో దిగువ మూడు స్థానాల్లో నిలిచాయి.
ఈ జాబితాలో ఆంధప్రదేశ్ 67.02 శాతం, తెలంగాణ 72.80శాతంతో దిగువ స్థానాల్లో ఉన్నాయి. గ్రామీణ భారతదేశంలో అక్షరాస్యత రేటు 67.77 శాతంగా ఉండగా, పట్టణ భారతదేశంలో 84.11 శాతంగా ఉంది. లోక్‌సభలో ఒక లిఖితపూర్వక ప్రశ్నకు సమాధానమిస్తూ కేంద్ర విద్యాశాఖ సహాయ మంత్రి అన్నపూర్ణాదేవి ఈ సమాచారాన్ని అందించారు.
ఆసియాలోనే తొలి మహిళా లోకో పైలట్‌గా సురేఖ యాదవ్
కొత్తగా ప్రవేశపెట్టిన సెమీ-హై-స్పీడ్ వందే భారత్‌ను ఆపరేట్ చేసిన మొదటి మహిళా లోకో పైలట్‌గా సురేఖ యాదవ్ నిలిచారు. సురేఖ యాదవ్ గతంలో 2011లో ఆసియాలో మొట్టమొదటి మహిళా లోకో పైలట్‌గా గుర్తింపు పొందారు. 13, 2023న షోలాపూర్ స్టేషన్ మరియు ముంబైలోని ఛత్రపతి శివాజీ మహారాజ్ టెర్మినస్ మధ్య వందే భారత్‌ను నడిపి నూతన గుర్తింపును పొందారు. ఈమె 1988లో మొదటి మహిళా లోకో పైలట్‌గా భారతీయ రైల్వేలో కెరీర్ ప్రారంభించారు.
బెంగుళూరులో "అగ్రియూనిఫెస్ట్"ను ప్రారంభించిన నరేందర్ సింగ్ తోమర్
ఇండియన్ కౌన్సిల్ ఆఫ్ అగ్రికల్చరల్ రీసెర్చ్ (ICAR) సహకారంతో బెంగుళూరు వ్యవసాయ విశ్వవిద్యాలయం నిర్వహించిన 5-రోజుల సాంస్కృతిక కార్యక్రమం “అగ్రియూనిఫెస్ట్” ను కేంద్ర మంత్రి శ్రీ తోమర్ మార్చి 15న ప్రారంభించారు. ఈ వేడుకకు దేశంలోని 60 రాష్ట్ర వ్యవసాయ విశ్వవిద్యాలయాలు/డీమ్డ్ యూనివర్సిటీలు/సెంట్రల్ యూనివర్శిటీల నుండి 2500 మందికి పైగా ప్రతిభావంతులైన విద్యార్థులు పాల్గొన్నారు.
సంగీతం, నృత్యం, సాహిత్యం, థియేటర్, లలిత కళలు వంటి 18 ఈవెంట్‌లలో విద్యార్థులు తమ నైపుణ్యాలను ప్రదర్శించారు. వివిధ భారతీయ సంస్కృతులను అనుసంధానం చేయడం ద్వారా భారతీయ వ్యవసాయాన్ని ఏకీకృతం చేయాలనే లక్ష్యంతో 1999-2000లో ఈ అఖిల భారత అంతర్ వ్యవసాయ విశ్వవిద్యాలయ యువజనోత్సవాన్ని ప్రారంభించారు. తద్వారా వ్యవసాయ విశ్వవిద్యాలయాలలోని యువత ప్రతిభకు ప్రోత్సహం అందిస్తున్నారు.
టీసీఎస్ సీఈవో మరియు ఎండీగా కే కృతివాసన్
ప్రముఖ భారత సాఫ్ట్‌వేర్ & ఐటీ సర్వీస్ ప్రొవైడర్ టాటా కన్సల్టెన్సీ సర్వీసెస్ సిఇఒ రాజేష్ గోపీనాథన్ తన పదవికి రాజీనామా సమర్పించారు. నూతన నాయకత్వానికి అవకాశం ఇవ్వాలనే ఆలోచనతో ఆయన ఈ హోదా నుండి వైదొలిగారు. రాజేష్ గోపీనాథన్ స్థానంలో తదుపరి టీసీఎస్ సిఇఒ మరియు మేనేజింగ్ డైరెక్టర్‌గా కె కృతివాసన్ త్వరలో బాధ్యతలు స్వీకరించనున్నారు.
భారత్ పెట్రోలియం కార్పొరేషన్ చైర్మన్‌గా జి కృష్ణకుమార్
భారత్ పెట్రోలియం కార్పొరేషన్ చైర్మన్ మరియు మేనేజింగ్ డైరెక్టర్‌గా జి కృష్ణకుమార్ నియమితులయ్యారు. గత అక్టోబరు 2022లో బిపిసిఎల్ ఛైర్మన్‌గా పదవీ విరమణ చేసిన అరుణ్ కుమార్ సింగ్ స్థానంలో ఆయన త్వరలో బాధ్యతలు స్వీకరిస్తారు. ఈ హోదాలో ఆయన 2025 వరకు సేవలు అందించనున్నారు.
భారత్ పెట్రోలియం కార్పొరేషన్ లిమిటెడ్ అనేది ప్రభుత్వ మహారత్న కేటగిరిలో ఉన్న పబ్లిక్ సెక్టార్ కంపెనీ. ముంబై, కొచ్చి, నుమాలిగర్ మరియు బినాలోని రిఫైనరీల ద్వారా 40 మిలియన్ మెట్రిక్ టన్నుల కంటే ఎక్కువ చమురు శుద్ధి చేసే సామర్థ్యంతో భారతదేశంలోని రెండవ అతిపెద్ద ఇంధన రిటైలర్ వాటా కలిగి ఉంది. అయితే భారత ప్రభుత్వం ప్రస్తుతం 1.75 లక్షల కోట్ల పెట్టుబడుల ఉపసంహరణతో దీనిని ప్రైవేట్ పరం చేసే ఆలోచనలో ఉంది. ఇప్పటికే పూర్తివ్వాల్సిన ఈ ప్రక్రియ కోవిడ్ సంక్షోభం వలన వాయిదా పడింది.
పీఎం మిత్ర పథకం కింద ఏడు రాష్టాల్లో మెగా టెక్స్‌టైల్ పార్కులు
భారత ప్రభుత్వం పీఎం మెగా ఇంటిగ్రేటెడ్ టెక్స్‌టైల్ రీజియన్స్ మరియు అపెరల్ (PM MITRA) పథకం కింద ఏడు రాష్ట్రాలలో మెగా టెక్స్‌టైల్ పార్కుల ఏర్పాటు చేయనున్నట్లు ప్రకటించింది. ఈ ఏడు టెక్స్‌టైల్ పార్కులను తమిళనాడు, తెలంగాణ, గుజరాత్, కర్నాటక, మధ్యప్రదేశ్, ఉత్తరప్రదేశ్ మరియు మహారాష్ట్రలలో అభివృద్ధి చేయనున్నారు. వీటి కోసం 13 రాష్ట్రాల నుండి వచ్చిన 18 ప్రతిపాదనలు రాగా, వాటిలో పై 7 సైట్లు ఎంపిక చేయబడ్డాయి.
టెక్స్‌టైల్స్ మంత్రిత్వ శాఖ, భారత వస్త్ర పరిశ్రమను బలోపేతం చేయడానికి పీఎం మిత్ర పథకాన్ని ప్రారంభించిది. ఈ రంగంలో కేంద్రం మరియు రాష్ట్ర ప్రభుత్వాల పెట్టుబడులు పెంచడం ద్వారా, నూతన టెక్స్‌టైల్ ఆవిష్కరణలను ప్రోత్సహిస్తూ, భారతదేశాన్ని ప్రపంచ వస్త్ర తయారీ మరియు ఎగుమతుల కేంద్రంగా మార్చడమనేది ఈ పథకం యొక్క ప్రధాన లక్ష్యం. ఇందులో నిరుద్యోగులకు ఉపాధికల్పన కూడా ప్రధానమైనది.
అత్యంత దారుణమైన టెర్రర్ పీడిత దేశాల జాబితాలో భారత్
భారతదేశం 25 అత్యంత దారుణమైన టెర్రర్ పీడిత దేశాలలో ఒకటిగా నిలిచింది. గ్లోబల్ టెర్రరిజం ఇండెక్స్ 2023 ప్రకారం 25 అత్యంత దారుణమైన టెర్రర్ పీడిత దేశాలలో ఇండియా 13వ స్థానంలో ఉంది. గడిసిన ఏడాదిలో పోల్చుకుంటే ప్రపంచ వ్యాప్తంగా తీవ్రవాద దాడులు 9 శాతం తగ్గి 6,701 మరణాలు నమోదయినట్లు నివేదించింది. అఫ్ఘనిస్తాన్ వరుసగా నాల్గవ సంవత్సరం కూడా తీవ్రవాదంతో ప్రభావితమైన దేశంగా అగ్రస్థానంలో కొనసాగుతోంది.
2022లో తీవ్రవాదం ద్వారా ఎక్కువగా ప్రభావితమైన పది దేశాలలో ఆఫ్ఘనిస్తాన్ మరియు పాకిస్తాన్ ముందు వరుసలో ఉన్నట్లు వెల్లడించింది. పాకిస్థాన్‌లో తీవ్రవాద సంబంధిత మరణాలు గణనీయంగా పెరిగినట్లు, అంతకుముందు సంవత్సరంతో పోలిస్తే దాదాపు 120 శాతం పెరుగుదలతో 643 మరణాలు నమోదు కబడినట్లు నివేదించింది.
