తెలుగు కరెంట్ అఫైర్స్ 27 ఫిబ్రవరి 2023 | పోటీ పరీక్షల స్పెషల్

76వ బ్రిటిష్ అకాడమీ ఫిల్మ్ అవార్డుల విజేతలు

76వ బ్రిటిష్ అకాడమీ ఫిల్మ్ అవార్థుల వేడుక 19 ఫిబ్రవరి 2023న లండన్ సౌత్‌బ్యాంక్ సెంటర్‌లోని రాయల్ ఫెస్టివల్ హాల్‌లో ఘనంగా నిర్వహించారు. 2022లో ఉత్తమ జాతీయ మరియు విదేశీ చిత్రాలను సత్కరిస్తూ ఈ అవార్డులు అందజేశారు. ఈ కార్యక్రమానికి రిచర్డ్ ఇ. గ్రాంట్  మరియు అలిసన్ హమ్మండ్ హోస్టులుగా వ్యవహరించారు.

• ఉత్తమ నటుడు : ఆస్టిన్ బట్లర్ (ఎల్విస్)
• ఉత్తమ నటి : కేట్ బ్లాంచెట్ (తార్)
• ఉత్తమ చిత్రం : ఆల్ క్విట్ ఆన్ ది వెస్టర్న్ ఫ్రంట్
• ఉత్తమ డైరెక్టర్ - ఎడ్వర్డ్ బెర్గెర్ (ఆల్ క్విట్ ఆన్ ది వెస్టర్న్ ఫ్రంట్)
• ఉత్తమ డాక్యుమెంటరీ - నవల్నీ
• ఉత్తమ బ్రిటిష్ చిత్రం - ది బన్షీస్ ఆఫ్ ఇనిషెరిన్

ఇండియన్ టెలిఫోన్ ఇండస్ట్రీస్ సీఎండీగా రాజేష్ రాయ్

కేంద్ర ప్రభుత్వం ఇండియన్ టెలిఫోన్ ఇండస్ట్రీస్ (ఐటిఐ) సీఎండీగా రాజేష్ రాయ్‌ని నియమిస్తూ ఉత్తర్వ్యూలు జారీ చేసింది. వచ్చే ఐదేళ్ల కాలానికి ఆయన ఈ బాధ్యతలు నిర్వర్తించనున్నారు.

ఇండియన్ టెలిఫోన్ ఇండస్ట్రీస్ లిమిటెడ్ అనేది బెంగుళూరు కేంద్రంగా ఉన్న కేంద్ర ప్రభుత్వ రంగ సంస్థ. ఇది డిపార్ట్‌మెంట్ ఆఫ్ టెలికమ్యూనికేషన్స్, మినిస్ట్రీ ఆఫ్ కమ్యూనికేషన్స్, భారత ప్రభుత్వం యాజమాన్యంలో ఉంది. దీనిని 1948 లో ఏర్పాటు చేశారు.

డా. మహేంద్ర మిశ్రాకు అంతర్జాతీయ మదర్ లాంగ్వేజ్ అవార్డు

భారతీయ విద్యావేత్త మరియు ఒడిషా సామాజిక కార్యకర్త డాక్టర్ మహేంద్ర కుమార్ మిశ్రాకు అంతర్జాతీయ మదర్ లాంగ్వేజ్ అవార్డు లభించింది. ఈ అవార్డును ఫిబ్రవరి 21న ఢాకాలో బంగ్లాదేశ్ ప్రధాన మంత్రి షేక్ హసీనా అంతర్జాతీయ మాతృభాష దినోత్సవం రోజున ప్రదానం చేశారు. దీనితో మహేంద్ర మిశ్రా ఈ అవార్డు అందుకున్న మొదటి భారతీయుడిగా నిలిచాడు.

ఈ ఏడాది ఢాకాలో జరిగిన ఈ కార్యక్రమంలో ప్రధాన మంత్రి షేక్ హసీనా మొత్తం నలుగురు గ్రహీతలకు రెండు జాతీయ అవార్డులు మరియు రెండు అంతర్జాతీయ అవార్డులను ప్రదానం చేశారు. బంగ్లాదేశ్ జాతీయులు హబీబుర్ రెహమాన్ మరియు రంజిత్ సింఘాలకు జాతీయ అవార్డులు లభించగా, మహేంద్ర కుమార్ మిశ్రా మరియు కెనడాలోని వాంకోవర్‌లోని మదర్ లాంగ్వేజ్ లవర్స్ ఆఫ్ వరల్డ్ సొసైటీకి అంతర్జాతీయ అవార్డులు లభించాయి.

డాక్టర్ మిశ్రా ఒడిశాలోని అట్టడుగు భాషల భాష, సంస్కృతి మరియు విద్యపై మూడు దశాబ్దాలుగా పని చేస్తున్నారు. అంతర్జాతీయ మదర్ లాంగ్వేజ్ అవార్డు 2021లో యునెస్కో ద్వారా స్థాపించబడింది. ఈ అవార్డును మాతృభాషల పరిరక్షణ, పునరుజ్జీవనం మరియు అభివృద్ధి కోసం పనిచేసే వ్యక్తులకు, సంస్థలకు అందిస్తారు.

కొత్త డ్రగ్ కంట్రోలర్ జనరల్ ఆఫ్ ఇండియాగా రాజీవ్ రఘువంశీ

కొత్త డ్రగ్ కంట్రోలర్ జనరల్ ఆఫ్ ఇండియా (డిసిజిఐ)గా రాజీవ్ రఘువంశీ నియమితులయ్యారు. రాజీవ్ రఘువంశీ ప్రస్తుతం ఇండియన్ ఫార్మాకోపోయియా కమిషన్‌లో సెక్రటరీ-కమ్-సైంటిఫిక్ డైరెక్టర్‌గా విధులు నిర్వర్తిస్తున్నారు. ఫిబ్రవరి 28 నుండి నూతన డిసిజిఐగా బాధ్యతలు స్వీకరిస్తారు.

డ్రగ్స్ కంట్రోలర్ జనరల్ ఆఫ్ ఇండియా హోదా అనేది భారత ప్రభుత్వం యొక్క సెంట్రల్ డ్రగ్స్ స్టాండర్డ్ కంట్రోల్ ఆర్గనైజేషన్ విభాగ అధిపతి. ఈ సంస్థ వ్యాక్సిన్‌లు మరియు  ఔషధాల యొక్క లైసెన్స్‌ల ఆమోదానికి బాధ్యత వహిస్తుంది. డ్రగ్స్ కంట్రోలర్ జనరల్ ఆఫ్ ఇండియా, ఆరోగ్య & కుటుంబ సంక్షేమ మంత్రిత్వ శాఖ కిందకు వస్తుంది. భారతదేశంలో ఔషధాల తయారీ, అమ్మకాలు, దిగుమతి మరియు పంపిణీకి ప్రమాణాలను కూడా నిర్దేశిస్తుంది.

సంసద్ రత్న అవార్డు విజేతలు 2023

సంసద్ రత్న అవార్డుల 13వ ఎడిషన్ విజేతలు ప్రకటించబడ్డారు. సంసద్ రత్న అవార్డ్స్ 2023 కోసం లోక్‌సభ నుండి 8 మంది, రాజ్యసభ నుండి ఐదుగురు ఎంపీలు. అదనంగా రెండు డిపార్ట్‌మెంట్ సంబంధిత స్టాండింగ్ కమిటీలు (DRSC) మరియు ఇద్దరు ఇతర నాయకులు ప్రత్యేక అవార్డుల కేటగిరీ కింద నామినేట్ చేయబడ్డారు.

2022 నుండి అనుభవజ్ఞులైన నాయకులను గౌరవించేందుకు "డాక్టర్ ఏపీజే అబ్దుల్ కలాం లైఫ్‌టైమ్ అచీవ్‌మెంట్ అవార్డ్" కొత్తగా ప్రారంభించారు. ఈ ఏడాది ఈ అవార్డును సిపిఎం సీనియర్ నాయకుడు శ్రీ టీకే రంగరాజన్‌కు అందిస్తున్నారు. కింది పేర్కొన్న అన్ని అవార్డులు 25 మార్చి 2023న న్యూ ఢిల్లీలో అందించబడతాయి. సివిల్ సొసైటీ తరపున ఈ అవార్డులను అందజేస్తారు.

సంసద్ రత్న అవార్డులను అత్యుత్తమ పనితీరు కనబరిచిన పార్లమెంటేరియన్లను గౌరవించడం కోసం 2010లో అప్పటి రాష్ట్రపతి డాక్టర్ ఏపీజే అబ్దుల్ కలాం సూచన మేరకు ఏర్పాటు చేశారు. ఆయనే స్వయంగా 2010లో చెన్నైలో ఈ అవార్డు ఫంక్షన్ మొదటి ఎడిషన్‌ను ప్రారంభించారు. ప్రస్తుతం సంసద్ రత్న అవార్డుల కమిటీకి శ్రీ కె. శ్రీనివాసన్ వ్యవస్థాపక చైర్మన్ మరియు శ్రీమతి ప్రియదర్శిని రాహుల్ అధ్యక్షురాలిగా ఉన్నారు.

1.  శ్రీ బిద్యుత్ బరన్ మహతో (బీజేపీ, జార్ఖండ్).
2. డాక్టర్ సుకాంత మజుందార్ (బీజేపీ, పశ్చిమ బెంగాల్).
3. శ్రీ కుల్దీప్ రాయ్ శర్మ (కాంగ్రెస్, అండమాన్ నికోబార్ దీవులు).
4. డాక్టర్ హీనా విజయకుమార్ గావిట్ (బిజెపి, మహారాష్ట్ర).
5. శ్రీ అధిర్ రంజన్ చౌదరి (ఐఎన్‌సి, పశ్చిమ బెంగాల్).
6. శ్రీ గోపాల్ చినయ్య శెట్టి (బిజెపి, మహారాష్ట్ర).
7. శ్రీ సుధీర్ గుప్తా (బిజెపి, మధ్యప్రదేశ్).
8. డాక్టర్ జాన్ బ్రిట్టాస్ (సిపిఎం, కేరళ).
9. డాక్టర్ మనోజ్ కుమార్ ఝా (ఆర్జేడీ బీహార్).
10. ఫౌజియా తహసీన్ అహ్మద్ ఖాన్ (ఎన్సీపీ, మహారాష్ట్ర) .
11. విషంభర్ ప్రసాద్ నిషాద్ (సమాజ్వాది పార్టీ, యూపీ).
12. ఛాయా వర్మ (కాంగ్రెస్, ఛత్తీస్‌గఢ్).
13. పార్లమెంటరీ సంబంధిత స్టాండింగ్ కమిటీలు (DRSC).
14. ఫైనాన్స్ కమిటీ (లోక్‌సభ కమిటీ - ఛైర్మన్ - శ్రీ జయంత్ సిన్హా, బిజెపి, జార్ఖండ్)

ముంబైలోని చర్చ్‌గేట్ రైల్వే స్టేషన్ పేరు మార్పు

ముంబైలోని చర్చ్‌గేట్ రైల్వే స్టేషన్ పేరు మార్చుతూ మహారాష్ట్ర ఏక్‌నాథ్ షిండే ప్రభుత్వం తీర్మానించింది. చర్చ్‌గేట్ రైల్వే స్టేషన్‌ పేరు స్థానంలో భారతీయ రిజర్వ్ బ్యాంక్ మొదటి గవర్నర్ చింతమన్‌రావ్ దేశ్‌ముఖ్ పేరు నివేదించింది. దేనికి రైల్వే మంత్రిత్వ శాఖ ఆమోదిస్తే త్వరలో చర్చ్‌గేట్ రైల్వే స్టేషన్‌, చింతమన్‌రావ్ దేశ్‌ముఖ్ స్టేషన్‌గా మారనుంది.

సీడీ దేశ్‌ముఖ్ అని పిలుచుకునే మహారాష్ట్రకు చెందిన చింతమన్ ద్వారకానాథ్ దేశ్‌ముఖ్, స్వతంత్ర భారత దేశపు తొలి రిజర్వ్ బాంక్ గవర్నరుగా సేవలు అందించారు. ఆ తర్వాత దేశ్‌మూఖ్ భారత దేశానికి ఆర్థిక మంత్రిగా కూడా సేవలు అందించారు.

రష్యాపై యూఎన్ నాన్‌బైండింగ్ రిజల్యూషన్‌ ఆమోదం

ఉక్రెయిన్‌లో యుద్ధంను విరమించుకోవాలని కోరుతూ రష్యాకు పిలుపునిచ్చే నాన్‌బైండింగ్ తీర్మానానికి యునైటెడ్ నేషన్స్ జనరల్ అసెంబ్లీ ఫిబ్రవరి 23న ఆమోదం తెలిపింది. రష్యా - ఉక్రెయిన్ యుద్ధం ప్రారంభమై ఏడాది పూర్తికావడంతో, రష్యా దండయాత్ర మొదటి వార్షికోత్సవం సందర్భంగా ఐక్యరాజ్యసతి ఈ బలమైన సందేశాన్ని పంపింది. తక్షణమే తమ బలగాలను ఉపసంహరించుకోవాలని డిమాండ్ చేసింది.

ఉక్రెయిన్ తన మిత్రదేశాలతో సంప్రదింపులు జరిపి రూపొందించిన తీర్మానం 141-7 ఓటుతో యూఎన్ జనరల్ అసెంబ్లీలో ఆమోదించబడింది, 32 దేశాలు గైర్హాజరయ్యాయి. ఇందులో భారతదేశం కూడా ఉంది. ఇక ఈ తీర్మానానికి వ్యతిరేకంగా ఓటు వేసిన ఏడు దేశాలలో బెలారస్, నికరాగ్వా, రష్యా, సిరియా, ఉత్తర కొరియా, ఎరిట్రియా మరియు రష్యాతో సన్నిహిత సైనిక సంబంధాలను కలిగి ఉన్న మాలి దేశం ఉన్నాయి.

'బారిసు కన్నడ డిమ్ దిమావా' ఫెస్టివల్‌ ప్రారంభం

ఫిబ్రవరి 25 న ఢిల్లీలోని తల్కటోరా స్టేడియంలో ' బరిసు కన్నడ డిమ్ దిమావా సాంస్కృతిక ఉత్సవాన్ని ప్రధాని నరేంద్ర మోదీ ప్రారంభించారు. ఈ కార్యక్రమాన్ని కర్ణాటక సంస్కృతి, సంప్రదాయాలు, చరిత్రను చాటిచెప్పేందుకు నిర్వహిస్తున్నారు.

ప్రధానమంత్రి 'ఏక్ భారత్ శ్రేష్ఠ భారత్' విజన్‌కు అనుగుణంగా, ఆజాదీ కా అమృత్ మహోత్సవ్ ఆధ్వర్యంలో జరుగుతున్న ఈ ఉత్సవంకు వందలాది మంది కర్ణాటక నృత్య, సంగీతం, నాటక కళాకారులు తమ రాష్ట్ర సాంస్కృతిక వారసత్వాన్ని ప్రదర్శించడానికి హాజరయ్యారు.

ప్రపంచ బ్యాంక్‌కు అధ్యక్షుడిగా అజయ్ బంగా

మాస్టర్ కార్డ్ మాజీ చీఫ్ ఎగ్జిక్యూటివ్ అజయ్ బంగాను ప్రపంచ బ్యాంక్‌కు నాయకత్వం వహించడానికి నామినేట్ చేస్తున్నట్లు అమెరికా అధ్యక్షుడు జో బిడెన్ ఒక ప్రకటనలో తెలిపారు. అజయ్ బంగా ప్రస్తుతం జనరల్ అట్లాంటిక్‌లో వైస్ ఛైర్మన్‌గా ఉన్నారు. అతను గతంలో జూలై 2010 నుండి డిసెంబర్ 31, 2020 వరకు మాస్టర్ కార్డ్ కంపెనీకి ప్రెసిడెంట్ మరియు చీఫ్ ఎగ్జిక్యూటివ్ ఆఫీసరుగా సేవలు అందించారు.

ప్రపంచ బ్యాంకు అనేది ఒక అంతర్జాతీయ ఆర్థిక సంస్థ. ఇది అభివృద్ధి చెందుతున్న దేశాల ఆర్థిక పురోభివృద్ధికై ధన సాయం చేసేందుకు గాను 1945 లో ఏర్పాటు చేయబడింది. దీని ప్రధాన కార్యాలయం వాషింగ్టన్ డీసీలో ఉంది. ప్రస్తుతం ఇది ఇది మూలధన ప్రాజెక్టులను చేపట్టలనే ఉద్దేశంతో పేద దేశాల ప్రభుత్వాలకు రుణాలు మంజూరు చేస్తుంది. ప్రపంచ బ్యాంకులో ప్రస్తుతం 189 సభ్య దేశాలు ఉన్నాయి.

అబుదాబిలో 2023 ఐ2యూ2 బిజినెస్ ఫోరమ్

ఫిబ్రవరి 21-22 తేదీల్లో అబుదాబిలో జరిగే ఐ2యూ2 యొక్క మొదటి వైస్ మినిస్టీరియల్ సమావేశానికి యునైటెడ్ అరబ్ ఎమిరేట్స్ ఆతిథ్యం ఇచ్చింది. ఈ ఏడాది నవంబర్ నెలలో కాప్28కి యూఏఈ ఆతిధ్యం ఇస్తున్నందున, ఈ సమావేశాల్లో భాగస్వామ్య దేశాల మధ్య ప్రాంతీయ సహకారాన్ని మరియు ఇంధన సంక్షోభం, వ్యాపార పెట్టుబడులు మరియు ఆహార అభద్రత నిర్వహణతో సహా, అత్యంత ముఖ్యమైన ఆర్థిక సమస్యలపై చర్చించారు.

ఇదే వేదిక ద్వారా స్మార్ట్ వ్యవసాయానికి పెట్టుబడి మరియు మద్దతును వేగవంతం చేసే లక్ష్యంతో యూఎస్ మరియు యూఏఈ ప్రారంభించిన అగ్రికల్చర్ ఇన్నోవేషన్ మిషన్ ఫర్ క్లైమేట్ (AIM4C) లో ఇండియా చేరుతున్నట్లు ప్రకటించింది. ప్రస్తుతం ఈ జాబితాలో 42 దేశాల ప్రభుత్వాలతో పాటుగా 275 కంటే ఎక్కువ  వ్యవసాయ,క్లైమేట్ సంస్థలు ఉన్నాయి.

ఐ2యూ2 అనేది భారతదేశం, ఇజ్రాయెల్, యునైటెడ్ అరబ్ ఎమిరేట్స్ మరియు యునైటెడ్ స్టేట్స్‌లతో కూడిన అంతర్-ప్రభుత్వ ఆర్థిక సహకార ఫోరమ్. దీనిని అక్టోబర్ 2021లో ప్రారంభించారు. దీనిని సభ్య దేశాల మధ్య నీరు, శక్తి, రవాణా, అంతరిక్షం, ఆరోగ్యం మరియు ఆహార భద్రతలో పాటుగా పరస్పర ఉమ్మడి పెట్టుబడుల ద్వారా పరస్పర సహకారం అందించేందుకు ప్రారంభించారు.

ఫైనాన్షియల్ యాక్షన్ టాస్క్ ఫోర్స్‌లో రష్యా సభ్యత్వం రద్దు

ఉక్రెయిన్ పైన యుద్ధం కారణంగా తమతో ఉన్న రష్యా సభ్యత్వాన్ని రద్దు చేస్తున్నట్లు, గ్లోబల్ యాంటీ మనీ లాండరింగ్ వాచ్‌డాగ్ ఫైనాన్షియల్ యాక్షన్ టాస్క్ ఫోర్స్ (FATF) వెల్లడించింది. ఫైనాన్షియల్ యాక్షన్ టాస్క్ ఫోర్స్ భద్రత మరియు ప్రపంచ ఆర్థిక వ్యవస్థ యొక్క సమగ్రతను ప్రోత్సహించే లక్ష్యంతో తమ ప్రధాన సూత్రాలకు వ్యతిరేకంగా రష్యన్ ఫెడరేషన్ యొక్క చర్యలు ఆమోదయోగ్యం కాదని పేర్కొంది.

ఫైనాన్షియల్ యాక్షన్ టాస్క్ ఫోర్స్ అంతర్జాతీయంగా మనీలాండరింగ్ మరియు టెర్రరిజం ఫైనాన్సింగ్ నివారణకు బాధ్యత వహిస్తుంది. ఇది 200 కంటే ఎక్కువ దేశాలకు మరియు దర్యాప్తు సంస్థలకు భద్రత ప్రమాణాలను నిర్దేశిస్తుంది.

మాదకద్రవ్యాల అక్రమ రవాణా, మానవ అక్రమ రవాణా మరియు తీవ్రవాదంతో సహా తీవ్రమైన నేరాలను పరిష్కరించడానికి అధికారులకు సహాయం చేస్తుంది. దీని ప్రధాన కార్యాలయం పారిస్ నగరంలో ఉంది. దీనిని 1989లో గ్రూప్ ఆఫ్ సెవెన్ దేశాలు ఏర్పాటు చేశాయి. ప్రస్తుతం దీనిని అధ్యక్షుడుగా ఇండియాకు చెందిన టి రాజ కుమార్ ఉన్నారు.

జర్మనీ ఛాన్సలర్ ఓలాఫ్ స్కోల్జ్ భారత పర్యటన

జర్మనీ ఛాన్సలర్, ఓలాఫ్ స్కోల్జ్ ఫిబ్రవరి 25-26 తేదీలలో భారతదేశంలో పర్యటించారు. ఛాన్సలర్‌గా భారతదేశంలో మొదటిసారి పర్యటించిన ఓలాఫ్ స్కోల్జ్, తన పర్యటనలో రాష్ట్రపతి ద్రౌపది ముర్ముతో పాటు ప్రధాన మంత్రి నరేంద్ర మోడీతో ముచ్చటించారు. ప్రధాని మోడీతో ద్వైపాక్షిక, ప్రాంతీయ మరియు ప్రపంచ సమస్యలపై చర్చలు జరిపారు. భారత్, జర్మనీలు జీ4 లో సభ్య దేశాలుగా ఉన్నాయి.

2011లో ద్వైవార్షిక ఇంటర్-గవర్నమెంటల్ కన్సల్టేషన్ (IGC) మెకానిజం ప్రారంభమైన తర్వాత జర్మనీ ఛాన్సలర్ భారత్‌లో పర్యటించడం ఇదే తొలిసారి. ఇరు నాయకుల ద్విపాక్షిక సమావేశం తర్వాత ప్రధాని మోడీ మాట్లాడుతూ ఉగ్రవాదం మరియు వేర్పాటువాదంపై పోరాటంలో భారతదేశం మరియు జర్మనీల మధ్య క్రియాశీల సహకారం ఉందని వెల్లడించారు.

ఇరు దేశాల మధ్య వ్యూహాత్మక సహకారానికి భద్రత మరియు రక్షణ చురుకైన మూలస్తంభమని ప్రధాన మంత్రి అన్నారు. గ్రీన్ అండ్ సస్టైనబుల్ డెవలప్‌మెంట్ పార్టనర్‌షిప్‌ని గత ఏడాది నా జర్మనీ పర్యటన సందర్భంగా ప్రకటించామని మోదీ చెప్పారు. దీని ద్వారా క్లైమేట్ యాక్షన్ మరియు సస్టైనబుల్ డెవలప్‌మెంట్ గోల్స్ రంగాలలో ఇరు దేశాలు సహకారాన్ని విస్తరిస్తున్నాయని ఆయన హైలైట్ చేశారు.