దేశ ఆర్థికవ్యవస్థలో నిర్మాణాత్మక, క్రియాత్మక పాత్ర పోషించే రిజర్వ్ బ్యాంకు ఆఫ్ ఇండియా రోజువారీ విధి నిర్వహణలో భాగం కావాలనుకునే వారు, ఆర్‌బిఐ నిర్వహించే గ్రేడ్ బి మరియు అసిస్టెంట్ మేనేజర్ నియామకాల ద్వారా ఆ కలను నెరవేర్చుకోవచ్చు.
ఈ ఉదోగాలకు ఎంపికవ్వడం ద్వారా ఇండియన్ ఎకానమీ నిర్వహణలో కీలక పాత్ర వహించే అవకాశంతో పాటుగా, మీ పరిశోధనాత్మక ఆలోచనల ద్వారా బలమైన ఆర్థిక వ్యవస్థ నిర్మాణంలో మీవంతు బాధ్యత వహించే అవకాశం దొరుకుతుంది. ఆర్‌బిఐ గ్రేడ్ బి అధికారుల ప్రారంభ వేతనం 35150/- నుండి ప్రారంభమోతుంది.
దీనికి ఇతర అలోవెన్సులు అన్నీ కలుపుకుంటే నెలకు గరిష్టంగా 70208/- వరకు అందుతుంది. అసిస్టెంట్ మేనేజర్స్ కు 17000/- ప్రారంభ వేతనం కేటాయించగా, ఇతర అలోవెన్సులు కలుపుకుంటే వీరిక్కూడా నెలకు గరిష్టంగా 43183/- వరకు లభిస్తుంది.
దేశ ఆర్థిక వ్యవస్థకి సంబంధించి సమస్త కార్యకలాపాలు ఒంటిచేతితో నిర్వహించే ఆర్‌బిఐ తెర వెనక నిరంతర సవాళ్ళను స్వీకరిస్తూ, మక్కువతో పనిచేసే సిబ్బంది పాత్ర ఉంటుంది. ద్రవ్యోల్బణం అదుపులో ఉంచడం, ఉత్పాదక రంగానికి ద్రవ్యలోటు లేకుండా చూడటం, వడ్డీ రేట్లు, మారక రేట్లలలో స్థిరత్వాన్ని నిర్దారించుట, కెరెన్సీ ముద్రణ, కెరెన్సీ చలామణి, వాణిజ్య చెల్లింపులు సులభతరం చేయడం, కేంద్ర రాష్ట్ర ప్రభుత్వ ఖాతాలు నిర్వహణ, బ్యాంకులు, ఫైనాన్సియల్ సంస్థల పనితీరు, నిర్వహణ నిబంధనలు రూపొందించడం, నూతన టెక్నాలజీ రూపకల్పన వంటి అనేక విధులలో వీరు నిరంతరం నిమగ్నమై ఉంటారు.
ఆర్‌బిఐ రెండు కేటగిరీలలో తమ సిబ్బందిని నియమించుకుంటుంది. మొదటి కేటగిరిలో క్లాస్ 1 గ్రేడ్ బి అధికారులను, రెండవ కేటగిరిలో వివిధ విధులకు సంబంధించి అసిస్టెంట్ మేనేజర్ స్థాయి పోస్టులను భర్తీచేస్తుంది.
